■ විශේෂඥ වෛද්‍ය නිලුපුල් පෙරේරා
■ විශේෂඥ වෛද්‍ය අජිත් අමරසිංහ
■ විශේෂඥ වෛද්‍ය මහේෂ් හරිස්චන්ද්‍ර

මහාචාර්ය නලින් ද සිල්වා මැතිතුමා පුන පුනා පවසන මතයක් නම් බටහිර විද්‍යාව පට්ටපල් බොරුවක් බවයි. දැනට පවතින බටහිර විද්‍යාව පදනම්ව ඇත්තේ යුදෙව් චින්තනය ඇසුරින් තැනුණු ප්‍රවාද මත බවද ඔහු පවසයි. මෙසේ ප්‍රවාද ඇසුරින් තැනුණු බටහිර විද්‍යාව අධිරාජ්‍යවාදීන් විසින් තම මතවාදී ආධිපත්‍යයය ලොව පුරා පැතිරවීම තුළින්, ලොවෙහි අනෙක් විද්‍යාවන් යටපත් කර ඇති බව එතුමා පවසයි. බටහිර විද්‍යාවන් ප්‍රතික්ෂේප කරන එතුමා ඇතැම් බටහිර විද්‍යාවන්ට පදනම්ව ඇත්තේ පෙරදිග විද්‍යාවන් බවද, ඔහුගේ පොත්වල තැනින් තැන පවසයි.
දැන් අපි පෙරදිග විද්‍යාවන් ගැන කතා කරමු. පෙරදිග විද්‍යාවන්ට ඉතා දීර්ඝ ඉතිහාසයක් ඇත. ආයුර්වේදය වසර පන්දහසක් පැරණි ගැඹුරු විද්‍යාවකි. පෙරදිග කලා ශිල්පද, ගණිත ශාස්ත්‍රයද ඉතා පැරණිය. චීනය තම ඉතිහාසය තුළ කළ නව නිෂ්පාදන අති මහත්ය. කඩදාසි, මුද්‍රණ ශිල්පය, වෙඩිබෙහෙත්, මාලිමා යන්ත්‍රය, රොකට්, පටසළු පමණක් නොව නලින් මැතිතුමාද අපද අඳින කලිසමද ලොවට දායාද කළේ චීනයයි. ජෝශප් නීඩ්හැම් නැමැති බි්‍රතාන්‍ය ජාතිකයා පසුගිය ශත වර්ෂයේදී චීනයට ගොස් විමසා බලා ‘චීනයේ විද්‍යාව හා ශිෂ්ටාචාරය’‍ නමින් විශාල ග්‍රන්ථ හතක් ඉංග්‍රීසි බසින් ලිවීය. ඔක්ස්ෆඩ් විශ්වවිද්‍යාලයේ විද්‍යාර්ථිකයෙකුවූ වූ ඔහුගේ නම නලින් ද සිල්වා මැතිතුමාගේ ලිපිවල තැනින් තැනින් ඇසේ. චීනුන්ගේ නිෂ්පාදන බටහිර ජාතීන් වැළඳගත්තා පමණක් නොව ඔවුන්ගේ නිපැයුම් නවීකරණය කොට, තමන්ගේ ප්‍රයෝජනය සඳහා ගන්නා ලදි. බටහිරයන් හැසිරෙන්නේ එසේය. යමක් සොයාගත්තේ තමන්ද, අන් අයද, යන්න ඔවුන්ට වැදගත් නොවේ. බටහිරට පෙරදිගින් යමක් ගෙන එය තම උන්නතිය හා ලාභය සඳහා යොදාගැනීම බටහිරයන්ට කිසිවිටෙකත් ප්‍රශ්නයක් නොවේ. එහෙත් බටහිරින් යමක් අප ගැනීම නලින් ද සිල්වා මැතිතුමාට හා එතුමාගේ අනුගාමිකයන්ට බලවත් ප්‍රශ්නයකි.
එනමුත්, අදවන විට බටහිර සමග කරට කර තරග කරන චීනය, ජපානය හා ඉන්දියාව හැසිරෙන්නේ නලින්වාදී, ළිංමැඩි ආකල්පය තුලද? අප පහසුව සඳහා එක් උදාහරණයක් පමණක් ගනිමු. තුවක්කුව මුල් වරට නිෂ්පාදනය කළේ චීනයේය. ඒ 12 වන ශතවර්ෂයේදීය. ඒ වන විට චීනය වෙඩි බෙහෙත්ද සොයාගෙන තිබුණි. එම චීන තුවක්කුව ඉතා සරල වර්ගයේ බෙහෙත් කොටන තුවක්කුවකි. මෙම තුවක්කුව බටහිර ජාතීන් අතට පත්විය. ඔවුහු එය වැඩිදියුණු කොට, නිර්දය ලෙස පාවිච්චි කොට, මුළු ලොවම යටත්කර ගත්තෝය. මැෂින් තුවක්කු, අත්තුවක්කු, කාලතුවක්කු හා රයිෆල් වැනි විවිධ ගණයේ ගිනි අවි බටහිරයන් විසින් නිෂ්පාදනය කරන ලදි. ඔවුන් තුවක්කුව වැඩිදියුණු කළේ නලින් ද සිල්වා මහතාගේ වචනවලින් පවසන අන්දමට ‘‍නිව්ටන්ගේ ප්‍රවාද’යේ සංසිද්ධින් භාවිත කරමින්ය. චීන්නු නිවුටන්ගේ ප්‍රවාද දැන නොසිටියෝය.
මෙම තුවක්කුව අලු‍ත් ආකාරයකට, අතට හුරුබුහුටි ස්වයංක්‍රීය අවියක් ලෙස රුසියාව නිෂ්පාදනය කළේය. එම ස්වයංක්‍රීය ගිනි අවිය ඒකේ47 නම්ය. මෙම ඒකේ47 ගිනි අවිය දුටු චීනුන් කළේ කුමක්ද? තමන්ගේ මුතුන් මිත්තන් තුවක්කුවේ මුල් නිර්මාපකයන් ලෙස පාරම්බබා සිටීමද? ඒකේ47 ගිනි අවිය දියුණු කර ඇත්තේ නිවුටන්ගේ ප්‍රවාදය මත නිසා එය ප්‍රතික්ෂේප කිරීමද? 12 වන ශතවර්ෂයේ තමන් අත්තුවක්කු නිපදවූ තාක්ෂණය සොයා නැවත සොයා ගැනීමට උත්සාහ කිරීමද? නැත. අතිශයින්ම බුද්ධිමත් හා ප්‍රායෝගික චීන්නු ඒකේ47 ගිනි අවිය අනුකරණය කොට ටී56 නම් ගිනි අවියක් නිෂ්පාදනය කළෝය. මිලෙන් අඩු මෙම ගිනි අවිය ඒකේ47 ගිනි අවියට වඩා වැඩියෙන් ලොවෙහි අලෙවි විය.
නලින්වාදීන් චීනයේ සිටියේ නම් ටී56 ගිනි අවිය සෑදු අය අනුකාරක උගතුන් යැයි කියනු නියතය. ඒ ඔවුන් බටහිර නිපදවූ ඒකේ47 ගිනි අවියේ අනුකරණයක් චීනයේ නිපදවීම නිසාය. චීනයේ වාසනාවට මෙන් නලින් ද සිල්වා මැතිතුමා චීනයේ නොඉපදිණි. චීනයේ ඉපැරණි නිපැයුම් ගැන චීනුන්ට නැති කැක්කුමක් නලින් ද සිල්වා මැතිතුමන්ට හා එතුමාගේ ළිංමැඩියන් වැනි අනුගාමිකයන්ට ඇත. එසේ එතුමා චීනයේ ඉපදුණා නම් එතුමා හා එතුමාගේ අනුගාමිකයන්ගේ බක බකය චීනය පුරා පැතිරෙනු ඇත. එහෙත් චීනයේ එම කරච්චලය වැඩි දිනක් නොපැවතෙනු ඇත. ඒ අතින් නලින් ද සිල්වා මැතිතුමා චීනයේ නොඉපදුණේ එතුමාගේද වාසනාවකටය.
බෞද්ධයන් ගිනි අවි නිෂ්පාදනය නොකළ යුත්තේ, බුදුරජාණන්වහන්සේ අවි වෙළඳාම ගිහියන් විසින් නොකළ යුතු වෙළඳාම් පහෙන් එකක් ලෙස හැඳින්වීම නිසා යයි යමෙකු පැවසුවහොත්, අපි එම මතය හා එකඟ වෙමු. එහෙත් ඔවුන් ගිනඅවි නිෂ්පාදනය නොකළ යුත්තේ ඒවා බටහිර තාක්ෂණය තුළින් නිපදවන නිසායැයි කිවහොත්, අපි එම මතය එකහෙළා ප්‍රතික්ෂේප කරන්නෙමු. තමන් එසේ නොකියන්නේ යැයි නලින්වාදීන් දැන් පවසනු ඇත. යම් කරුණක් නොකියා කියා, තර්කය වැරදුණු පසු ආඳන් මෙන් ලිස්සා යාම, නලින්වාදයේ මූලික ලක්ෂණයෙකි. මෙවර මේ ආඳන් මඩ වලෙහි එරී ඇත.
ලංකා ඉතිහාසය ගැන අල්ප දැනුමක් ඇතිව ඒ පිළිබඳ විශාරදයෙකු ලෙස හැසිරෙන නලින් ද සිල්වා මැතිතුමාගේ දැනගැනීම පිණිස තවත් කරුණක් මෙහි සඳහන් කරමු. එනම් බටහිරයන් ලංකාවට පැමිණීමට පළමුව ලාංකිකයන් වෙඩි බෙහෙත් ගැන දැනසිටි බවයි. ක්‍රිස්තු වර්ෂ 13 වැනි සියවසේ ලියැවුණු ‘‍දඹදෙණි අස්න’‍ නම් කුඩා ග්‍රන්ථයෙහි දඹදෙණියේ රජකම් කළ ‘පණ්ඩිත පරාක්‍රමබාහු’ රජුගේ යුද අවි අතර ‘දුම් වෙඩි, සැර වෙඩි, මුන වෙඩි, යතුරු වෙඩි, ගල් වෙඩි, ගිනි වෙඩි, ශබ්ද වෙඩි, වාල වෙඩි, මහ වෙඩි’‍ තිබුණු බව සඳහන්වේ. මෙම කරුණ නලින් ද සිල්වා මැතිතුමා දැන සිටියේ නම් ‘‍බටහිරයන්ට පෙර අප වෙඩි බෙහෙත් සොයගතිමු’ යැයි දාර්ශනික මතයක් පළකරනු ඇත. යම් යම් මතවාදී ගැටුම් ඇතත්, නලින්වාදයෙන්ම නිෂ්පන්නවූ ප්‍රභේදයක් වන රාවණාවාදීන්, වෙඩි බෙහෙත් ලොවට සොයාදුන්නේ සක්විති රාවණ බැව් ඉපැරණි පුස්කොල පොතක ඇති රහස් වට්ටෝරුවක සඳහන්වෙතැයි පවසනු ඇත. ඒ පුස්කොළ පොත එච්.සී.පී. බෙල් මහතා එංගලන්තයට සොරා ගෙන ගොස්, ඒ ඇසුරෙන් වෙඩි බෙහෙත් තැනුවේ යැයි පවසනු ඇත. සැබවින්ම, මෙම වෙඩි වර්ග ලංකාවට ලැබෙන්නට ඇත්තේ ලංකාව හා චීනය අතර තිබූ ඉපැරණි නාවුක සම්බන්ධතාවන් මගිනි.
ඒකේ47 හා ටී56 ගිනි අවි ගැන කතාව අප මෙහිදී පැවසුවේ කරුණු අවබෝධය කරගැනීමේ පහසුව සඳහාය. අප කළ යුත්තේ බටහිර දෙය ප්‍රතික්ෂේප කිරීම නොවේ. අපගේ අතීතය ගැන කට මැත දොඩවමින් සිටීමද නොවේ. අපගේ අතීතය ගැන ආඩම්බර වන අතරම, නවීකරණය ඇතිවී ඇති ලොවෙහි සොයාගැනීම් බටහිරද, පෙරදිගද යැයි සොයා නොබලා අපගේ උන්නතිය සඳහා යොදා ගැනීමයි. බටහිර හා පෙරදිග උන්නතිකාමී ජාතීන් හැසිරෙන්නේ එලෙසයි. මෙහිදී අවශ්‍ය වන්නේ තම රටට ආදරය කිරීම පමණි. චීනුන් චීනුන් ලෙසම සිටියදී, නූඩ්ල්ස් කමින් ඒකේ 47 ගිනි අවිය අනුකරණය කොට ටී56 ගිනි අවිය නිපදවීය. ඉන්දියාවද, චීනයද, ජපානයද අද දියුණු වන්නේ ඔවුන්ගේ පැරණි තාක්ෂණය නැවත සොයායාම නිසා හෝ පැරණි තාක්ෂණය ගැන නන්දොඩවා සිටීම නිසා නොව නවීන තාක්ෂණය රටේ ප්‍රයෝජනයට ගෙන තම රටවල් දියුණු කර ගැනීමෙනි. එහිදී බටහිර සමාගම් හා එක්ව ඔවුන්ගේ රටවල කර්මාන්ත ශාලා පිහිටුවීම, චීනුන්ට හෝ ඉන්දියානුවන්ට හෝ ජපනුන්ට හෝ ප්‍රශ්නයක් නොවේ. එය දේශද්‍රෝහී ක්‍රියාවක් ලෙස ඔවුන් සලකන්නේ නැත. එය බටහිර මතවාදී ආධිපත්‍යයකට තමන් යටවීමක් ලෙසද ඔවුන් සලකන්නේ නැත. එමනිසා ඔවුහු ඉදිරියට යති. අපි හිටි තැනමය.
තමන්ගේ ආගම, විශ්වාසයන් හා සංස්කෘතිය ආරක්ෂා කරගන්නා අතරම බටහිර දේ විචාර බුද්ධියෙන් ගැනීමට තරම් මුහුකුරා ගිය නුවණක් ඔවුන්ට තිබේ. නලින් ද සිල්වා මැතිතුමන් හා ඔහුගේ අනුගාමිකයන් ලාංකිකයන්ගේ මෙම විචාර බුද්ධිය මොට කොට ඇත. බටහිර විද්‍යාව ප්‍රතික්ෂේප කරන එතුමා හා ඔහුගේ අනුගාමිකයෝ ඒ ප්‍රතික්ෂේප කරන බටහිර විද්‍යාව වෙනුවට හඳුන්වාදෙන පෙරදිග විද්‍යාව කුමක්දැයි සඳහන් නොකරති. මෙය අටුව කඩා පුටුවක්ද නොසෑදීමකට සමානය. දැන් කොස් ඇටයක් වේලීමටවත් අටුවක් නැත. වාඩි වන්නට පුටුවක්ද නැත.

අපගේ මුතුන්මිත්තන් විශාල වැව් දහස් ගණනක් තැනූ බව ඇත්තය. ක්‍රිස්තු වර්ෂයෙන් පළමුවැනි සහශ්‍රය තුළ ලෝකයේ විශාලතම වාරිමාර්ග තැනුණේ ලංකාවේය. එහෙත් එම වාරි තාක්ෂණයේ නිර්මාපක විද්‍යාවන් අද ඉතුරුවී ඇත්ද? එම නිර්මාපක විද්‍යාවන් සොයාගැනීමට පසුගිය දශක තුන තුළ නලින්වාදීන් ගත් පියවර මොනවාද? අවම වශයෙන් නාථ දෙවිඳුගෙන් ඒ ගැන ඇසීද? ඔහුගේ එක් පොතක ‘‍නාථ සහ විපස්සක දෙවියන්ගේ දැනුම අතිවිශිෂ්ට බවට මට කිසිදු සැකයක් නැත’‍යැයි සඳහන් කරයි. පෙරදිග විද්‍යාවන් ගැන සැඟවී ඇති දැනුම ඔවුන්ගෙන් නොඇසුවේ නම්, එසේ අසා දැන ගන්නේ කවදාද? නලින් ද සිල්වා සහ ඔහුගේ නාථ දේව බැතිමතුන්ට කළ හැකි එක් දෙයක් ඇත. එනම් නාථ සහ විපස්සක දෙවියන්ගෙන් අසා ‘ශ්‍රී ලංකාවේ ඉපැරණි විද්‍යාව’‍ නමින් පොත් මාලාවක් පළකිරීමයි. එවැන්නක් සිදුකළහොත් නලින් ද සිල්වා මැතිතුමාගේ නම ජෝශප් නීඩ්හැම් මෙන්ම අමරණීය වනු ඇත. අපට ඒ විද්‍යාව අනුව ස්වාධීන නිපැයුම් කළහැකි වනු ඇත.
නලින් ද සිල්වා මැතිතුමා හා නාථ දේව බැතිමතුන් කල්ලිය අපට ඒ සැඟවුණු දැනුම සොයාදෙන තෙක්, වැව් තැනවීමට නවීන උපකරණද, නවීන ගණනය කිරීම් ද, භෞතික විද්‍යාවද යොදා ගත යුතුවේ. දන්නා දැනුමට දෙස් දෙවොල් තැබීමද, නොදන්නා දැනුමෙහි අගය කීමද එක හා සමාන නිෂ්ඵල ක්‍රියාවන් වේ.
මෙහිදී වැදගත් වන්නේ අපගේ මුතුන්මිත්තන් කළ දේ ගැන ආඩම්බර වීමෙන් නොනැවතී, දැනට ලොවේ දැනට පවතින පෙරදිග හෝ අපරදිග විද්‍යාවන් පාවිච්චි කරමින් රට ප්‍රවර්ධනය කිරීමට සහාය දීමයි. නලින් ද සිල්වා මැතිතුමා හා එතුමාගේ අනුගාමිකයන් නොකරන්නේද එයයි. ඔහුගේ මතවාදය ශ්‍රී ලාංකිකයන්ගේ මනස අවුල් කොට ඇත.■