No menu items!
19.6 C
Sri Lanka
29 March,2024

ජුවොන් හැරිසන් – ටෝකියෝ ඔලිම්පික් උස හා දුර පැනීම් සමායෝජනය

Must read

පාසල් නිවාසාන්තර ක්‍රීඩා තරගයේදී කිනම් හෝ මළල ක්‍රීඩා ඉසව්වකට සහභාගි නොවූ අයකු ඇත්නම් ඒ කිහිප දෙනෙකි. එහිදී මළල ක්‍රීඩාව ක්‍රීඩාවක් වශයෙන් තෝරාගෙන එහි යෙදෙන්නන් ඉසව් කිහිපයකට සහභාගි වීමේදී එම තෝරා ගැනීම් සිදුකරන්නේ ගැළපෙන ආකාරයකටය. වේගයෙන් දිවිය හැකි අය මීටර් 100, 200, 400 වැනි ඉසව් තෝරා ගනිති. මැදි දුර දුවන්නන් මීටර් 800, 1500 වැනි ඉසව් තෝරා ගනිති. දිගු දුර දුවන්නන් මීටර් 5000, 10,000 වැනි ඉසව් තෝරා ගනිති. වීසි කිරීම් සඳහා දක්ෂතා ඇති අය යගුලිය, කවපෙත්ත, හෙල්ල වීසි කිරීම වැනි ඉසව් තෝරා ගනිති. එසේ වුවද පැනීම් සඳහා දක්ෂතා ඇති අයද දුර පැනීම, උස පැනීම තුන් පිම්ම වැනි ඉසව් තෝරා ගත්තද දුර පැනීමත් උස පැනීමත් යන දෙකම එක් අයකු තෝරා ගන්නේ නැත. ඊට හේතුව දුර පැනීම යනු තිරස් පැනීමක් වීමත්, උස පැනීම යනු සිරස් පැනීමක් වීමත්ය. ඊටත් අමතරව දුර පැනීම සඳහා යම්කිසි වේගවත් ධාවනයක් වුවමනා වීමත්, උස පැනීම සඳහා වේගවත් ධාවනයක් අවශ්‍ය නොවීමත්, එහෙත් තිරස්ව ඉපිලීමේ හැකියාව හා වත්මන් ෆොස්බරි ප්ලොෆ් පැනීම සඳහා නම්‍යතාව අවශ්‍ය වීමත්ය. මේ නිසා පාසල් මට්ටමේ ක්‍රීඩකයකු පවා මෙම ඉසව් දෙක එකවිට තෝරා ගන්නේ නැත. තෝරා ගන්නවා නම් තෝරා ගනු ඇත්තේ දුර පැනීම හා තුන් පිම්ම යන තිරස් පැනීම් ඉසව් දෙකය. 80 දශකයේ ලංකාවේ ජාතික මට්ටම නියෝජනය කළ අතුල කුමාර එවැන්නෙකි.

මීටර් 100, 200 කෙටි දුර ධාවකයෝ එම ඉසව්වලට අමතරව දුර පැනීමද සිය සිය අනෙක් ඉසව්ව වශයෙන් තෝරා ගනිති. එයට හේතුව පෙර සඳහන් කළ ආකාරයට මෙම තිරස් පැනීම සඳහා ඉපිලීමට යම් වේගවත් ධාවනයක් අවශ්‍ය වීමය. ලෝකය ගත් විට 80 දශකයේ ඒ සඳහා අපට හමුවූ උදාහරණය වූයේ ඇමරිකාවේ කාල් ලුවිස්ය. ඔහු මීටර 100, 200 හා දුර පැනීම යන ඉසව් ත්‍රිත්වයෙන්ම ඔලිමිපික් රන් පදක්කම් ලැබූවෙකි. ඊට පෙර 30 දශකයේදී එම දස්කම කරනු ලැබුවකු ලෙස අපට හමුවන්නේ ඇමරිකාවේම ජෙසී ඕවන්ස්ය. 90 දශකයේදී ලංකාවේ ජාතික මට්ටමේදී අපට හමුවූයේ බෙනිල්ඩස් ප්‍රනාන්දුය.

මේ ආකාරයෙන් පැහැදිලි කරන්නට සිදුවූයේ මළල ක්‍රීඩා තරඟ ඉසව්වල මීට හාත්පසින් වෙනස් තෝරා ගැනීමකින් තේරී පත්වීමක් ගැන කියන්නටය. එම තේරී පත්වීම සිදුවී ඇත්තේ නිකම්ම නිකම් තරගාවලියකට නොව එළැඹෙන ජපානයේ ටෝකියෝ ඔලිම්පික් උළෙලටය. එම ඔලිම්පික් උළෙල සඳහා ඇමරිකානු තේරීම් තරගාවලියේදී උස පැනීම හා දුර පැනීම යන ඉසව් දෙකකටම එක් ක්‍රීඩකයකු සුදුසුකම් ලබා තිබේ. ඔහු ජුවොන් හැරිසන්ය. මෙහි විශේෂත්වය ගැළපීමක් නැති මෙම ඉසව් දෙකෙන් ඇමරිකානු ක්‍රීඩකයකු ඔලිම්පික් වරම් ලබන්නේ අවුරුදු 109කට පසුව වීමය. අවසන් වරට එම ඉසව් දෙකටම ඇමරිකානු ක්‍රීඩකයකු සුදුසුකම් ලබා තිබෙන්නේ 1912 වසරේ ස්වීඩනයේ ස්ටොක්හෝම්ස්හි පැවති ඔලිම්පික් උළෙලටය. ඒ ජිම් ත්‍රෝප්ය. ඔහුට අමතරව ලෝකයේ වෙනත් රටක ක්‍රීඩකයකු එම ඉසව් දෙක සඳහා ඔලිම්පික් ක්‍රීඩා උළෙලක් නියෝජනය කර ඇති බව සඳහන් වන්නේද නැත.

දුර පැනීම, උස පැනීම, ඉසව් පහකින් සමන්විත පෙන්තැත්ලන් හා ඩෙකැත්ලන් හෙවත් දශප්‍රයාම ඉසව් සඳහා මළල ක්‍රීඩාවෙන් ත්‍රෝප් එම ඔලිම්පික් උළෙලට සහභාගි වී ඇති අතර එහිදී දුර පැනීමේදී 7වන ස්ථානයද, උස පැනීමේදී 4වන ස්ථානයද හිමිකර ගෙන ඇත. එමෙන්ම පෙන්තැත්ලන් ඉසව්වේදී හා දශප්‍රයාම ඉසව්වේදී රන් පදක්කම් දිනාගෙන ඇත. දශප්‍රයාම ඉසව්ව එදා සිට අද දක්වාම මීටර් 100, 400, 1500, මීටර් 110 කඩුලු පැනීම, දුර පැනීම, උස පැනීම, රිටි පැනීම, යගුලිය, කවපෙත්ත හා හෙල්ල වීසි කිරීම යන ඉසව් දහයෙන් සමන්විතය. ජිම් ත්‍රෝප් සහභාගි වූ 1912 ස්ටොක්හෝම්ස් ඔලිම්පික් උළෙලේ පෙන්තැප්ලන් ඉසව්වට තිබී ඇත්තේ දුර පැනීම, හෙල්ල වීසි කිරීම, කවපෙත්ත වීසි කිරීම, මීටර් 200 හා 1500 ඉසව්ය.

ජිම් ත්‍රෝප් දශප්‍රයාම ශූරයකු නිසා ඔහුට එදා දුර පැනීම හා උස පැනීම යන තනි ඉසව්වලට ඔලිම්පික් නියෝජනය කිරීම දක්වා දක්ෂතාවක් තිබී ඇති බව පැහැදිලිය. ඔලිම්පික් ක්‍රීඩා උළෙලවලදී පිරිමි දශප්‍රයාම ඉසව්ව්ව හා කාන්තා සත් ප්‍රයාම ඉසව්ව (මීටර් 200,800, මීටර්100 කඩුලු පැනීම, දුර පැනීම, උස පැනීම, යගුලිය දැමීම හා හෙල්ල වීසි කිරීම) නියෝජනය කරන ක්‍රීඩක ක්‍රීඩිකාවන් ඊට අමතරව තනි මළල ක්‍රීඩා ඉසව්වක් නියෝජනය කිරීම සඳහා වරම් ලැබීම කලාතුරකින් දක්නට ලැබෙන්නකි. පසුගිය කාලයේ ඒ සඳහා උදාහරණයද අපට හමුවන්නේ ඇමරිකාවෙනි. ඇය ජැකී ජොයිනර් කර්සිය. 1988 සියොල් ඔලිම්පික් උළෙලේ ඇය සත් ප්‍රයාම හා දුර පැනීම යන ඉසව් දෙකෙන්ම රන් පදක්කම් දිනා ගත්තාය.

එහෙත් මේ කතාවේ අපේ කතානායක ජුවොන් හැරිසන් ඊට වඩා වෙනස්ය. ඔහු දස ප්‍රයාම ඉසව්ව සඳහා තරඟ කරන හා ඊට අමතරව ඒ අතරින් වඩාත් දක්ෂතා ඇති තනි මළල ක්‍රීඩා ඉසව් නියෝජනය කරන්නෙක් නොවේ. ඒ නිසා දුර පැනීම හා උස පැනීම යන එකිනෙකට වෙනස් යෝග්‍යතාවන් අවශ්‍ය ඉසව් දෙක සඳහා ඔලිම්පික් තේරී පත්වීමේ මට්ටම දක්වා පැමිණීමම වත්මන් තරගකාරි මළල ක්‍රීඩා පිටිය තුළ ලෙහෙසි පහසු දෙයක් නොවේ. ඇමරිකානු තේරීම් තරගවලින් ටෝකියෝ ඔලිම්පික් සඳහා ඔහු සුදුසුකම් ලබන්නේ ඉසව් දෙකෙන්ම පළමුවැනියා වෙමින් වීමද එම තේරී පත්වීමට අමතරව තවත් විශේෂත්වයකි. එම ඉසව් දෙක සඳහා මේ වනවිට ඇති ලෝක ශ්‍රේණිගතකිරීම්වල ජුවොන් හැරිසන් ඉන්නේ එම ඉසව් දෙකේම දෙවෙනි ස්ථානයේය. එම ඉසව් දෙකේ රන් පදක්කම් කෙසේ වෙතත් කිනම් හෝ පදක්කමක් ටෝකියෝ ඔලිම්පික් උළෙලේදී ජුවොන් හැරිසන් ලබා ගන්නේ නම්, එම ඉසව් දෙකෙන් ඔලිම්පික් තරගාවලියකට සහභාගිවීම අබිබවා ගිය තවත් සුවිශේෂ වාර්තාවකටද ඔහු හිමිකම් කියනු ඇත.■

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි