ජිනීවාහි එක්සත් ජාතීන්ගේ මානව හිමිකම් කවුන්සිලය වෙත අමෙරිකාව ඇතුළු රටවල් කිහිපයක් සමග ශ‍්‍රී ලංකාව ඉදිරිපත් කර ඇති යෝජනාව ප‍්‍රතික්ෂේප කරමින් නව යෝජනාවලියක් ඉදිරිපත් කරන බවට එක්සත් ජාතීන්ගේ සංවිධානයේ මහා මණ්ඩල සැසිවාරයේදී සැප්තැම්බර් 25 වැනිදා ජනාධිපති මෛත‍්‍රීපාල සිරිසේන ඉදිරිපත් කරන්නට සිටි අදහස් දැක්වීම අවසාන මොහොතේ වෙනස් කර ඇතැයි වාර්තා වෙයි.

එම වෙනස්වීම සඳහා ජනාධිපතිවරයා සමග අමෙරිකානු එක්සත් ජනපද තානාපති කාර්යාලය, යුරෝපා කොමිසම, අග‍්‍රාමාත්‍ය රනිල් වික‍්‍රමසිංහ හා තවත් ඇමතිවරුන් කිහිපදෙනෙකු විසින් කරන ලද සාකච්ඡා හේතු වී ඇතැයි වැඩිදුරටත් වාර්තා වෙයි.

ජනාධිපති මෛත‍්‍රීපාල සිරිසේන සැප්තැම්බර් 14 වැනිදා මාධ්‍ය ආයතන ප‍්‍රධානීන් මුණගැසුණු අවස්ථාවේදී ලංකාවට එරෙහිව ඇති මානව හිමිකම් චෝදනා සම්බන්ධයෙන් එක්සත් ජාතීන්ගේ මහා මණ්ඩලයට යෝජනාවලියක් ඉදිරිපත් කරන බව ප‍්‍රකාශ කර තිබුණි. එහිදී ලංකාවට එරෙහිව ජිනීවාහි ජාත්‍යන්තර මානව හිමිකම් කවුන්සිලයේ යෝජනාවලිය ප‍්‍රතික්ෂේප කිරීමට කටයුතු කරන බවටද අදහස් දක්වා තිබුණි.

මාධ්‍ය ඔස්සේ ජනාධිපතිවරයාගේ එම අදහස් වාර්තා වුණු අතර විදේශ තානාපති කාර්යාල ඒ සම්බන්ධයෙන් මැදිහත් වී තිබුණේ ඉන් පසුවය.

අගමැතිවරයා ජනාධිපති මෛත‍්‍රීපාල සිරිසේන මුණගැසී එවැනි ප‍්‍රකාශයක් නොකරන ලෙස ඉල්ලා ඇත. ලංකාව ජාත්‍යන්තර වශයෙන් ලද ජයග‍්‍රහණ එවැනි ප‍්‍රකාශයක් සිදුකළහොත් අහිමි වනු ඇතැයි අගමැතිවරයා පෙන්වාදී තිබේ.

අමෙරිකානු තානාපති කාර්යාලයේ සහ යුරෝපා සංගමයේ නියෝජිතයන් ජනාධිපතිවරයා මුණගැසී එවැනි ප‍්‍රකාශයක් නොකරන ලෙස ඉල්ලා ඇත. එවැනි ප‍්‍රකාශයක් කළහොත් ජී.එස්.පී ප්ලස් සහනය අහිමි වීම, යුරෝපා සංගමයට මත්ස්‍ය සම්පත් අපනයනය කිරීම තහනම් කිරීම ආදි ආර්ථික සම්බාධක යළි පැනවීමට සිදුවනු ඇති බවත් ජාත්‍යන්තර වශයෙන් තවත් බරපතළ ගැටලූ‍වලට මුහුණදීමට ලංකාවට සිදුවනු ඇති බවත් එම නියෝජිතයන් පෙන්වා දී තිබුණි.

ඊට අමතරව ජනාධිපතිවරයා සමඟ එක්සත් ජාතීන්ගේ මහා මණ්ඩල සැසිවාරය සඳහා සහභාගි වීමට අමෙරිකාව වෙත ගමන් කළ අමාත්‍ය මනෝ ගනේෂන්, අමාත්‍ය රාජිත සේනාරත්න ඇතුළු පිරිසක් ද මේ පිළිබඳව පැහැදිලි කර ඇති අතර අමෙරිකාවට ගොඩබසිද්දී ජනාධිපතිවරයා සිය අදහස වෙනස් කරගෙන සිටි බව ජනාධිපතිවරයා සමඟ අමෙරිකාවට ගිය කණ්ඩායමේ සාමාජිකයෙක් අමෙරිකාවේ සිිට අනිද්දා සමඟ අදහස් දක්වමින් කීය.

එම ¥ත කණ්ඩායමේ තවත් සාමාජිකයෙකු වන අමාත්‍ය මනෝ ගනේෂන් තම ෆෙස්බුක් ගිණුමෙහි සටහනක් පළ කරමින් ප‍්‍රකාශ කර තිබුණේ ජනාධිපති මෛත‍්‍රීපාල සිරිසේන තම කතාව අවසන් කළ විගස ශ‍්‍රී ලංකාවේ දූත කණ්ඩායම අසලට පැමිණ තමන්ගේ කර මත අත තබා ‘කතාව කොහොමදැ’යි විමසූ බවය. මනෝ ගනේෂන් මහතා එම සටහනෙහි වැඩිදුරටත් සටහන් කර තිබුණේ ජනාධිපතිවරයා පැවැත්වූ කතාව පිළිබඳව තිරය පසුපස කතා තිබෙන බවයි. ඒවා තිරය පසුපසම පැවතීම යහපත් බව මනෝ ගනේෂන් ඇමතිවරයා එහි වැඩිදුරටත් සටහන් කර තිබුණි.

ජනාධිපතිවරයා මුලින් සැලසුම් කළ ප‍්‍රකාශය කරනු ඇතැයි බලාපොරොත්තුවෙන් සිටි ශ‍්‍රී ලංකාවේ සහ ජාත්‍යන්තර වශයෙන් ක‍්‍රියාත්මක වන දෙමළ ජාතිකවාදී සංවිධාන විසින් එම ප‍්‍රකාශයට එරෙහිව දැවැන්ත විරෝධතා ව්‍යාපාරයක්ද සැලසුම් කර තිබුණු බව වාර්තා වෙයි. ඊට අමතරව දෙමළ ජාතික සන්ධානයද එවැනි ප‍්‍රකාශයක් සිදු කළහොත් ආණ්ඩුවට විරුද්ධව දැඩි ස්ථාවරයක් දක්වා මාරුවීමට සූදානමකින් සිට ඇතැයි ආණ්ඩුවේ ඉහළ ආරංචිමාර්ග පවසයි.

රේඛා නිලූ‍ක්ෂි හේරත් / තරිඳු උඩුවරගෙදර