එක්සත් ජාතික පක්ෂය විසින් පාර්ලිමේන්තුවට ඉදිරිපත් කර තිබෙන ජාතික ආණ්ඩු යෝජනාව සම්මත කරගැනීම සඳහා සහයෝගය ලබාදීම හෝ නොදීම පිළිබඳව තවමත් නිශ්චිත ස්ථාවරයක් ප‍්‍රකාශ නොකළ බව ශ‍්‍රීලනිප මන්ත‍්‍රීවරයෙකු අනිද්දා සමඟ කීය.

ආණ්ඩුවට එක්වීමේ බලාපොරොත්තුවෙන් සිටින්නේයැයි වාර්තාවන ශ‍්‍රීලනිප මන්ත‍්‍රීවරුන් කණ්ඩායමේ සාමාජිකයෙකු වන අදාළ මන්ත‍්‍රීවරයා වැඩිදුරටත් පැවසුවේ ශ‍්‍රීලනිපය පොදුජන පෙරමුණ සමග එක්වන බවට තවමත් නිශ්චිතව තීන්දු වී නැති නිසා, ආණ්ඩුවට සහාය දීම ගැන අවසන් තීන්දුවක් ගත නොහැකි බවයි.

එක්සත් ජාතික පක්ෂයේ ප‍්‍රබලයෙකු මේ පිළිබඳව අදහස් දක්වමින් පැවසුවේ ශ‍්‍රීලනිප මන්ත‍්‍රිවරුන් කිහිපදෙනෙකු ජාතික ආණ්ඩු යෝජනාවට පක්ෂව ඡුන්දය ලබාදීමට හෝ එදින ඡුන්දය ලබා නොදී සිටීමට එකඟ කරගැනීමට නොහැකි වුවහොත් ජාතික ආණ්ඩු යෝජනාව විවාදයට ගැනීමට නොහැකි වනු ඇති බවයි. දෙමළ ජාතික සන්ධානයද ජාතික ආණ්ඩු යෝජනාව සම්බන්ධයෙන් ඡුන්දය ප‍්‍රකාශ නොකර සිටින තැනට එකඟ කරවාගැනීමට උත්සාහ කළත් එයද තවම සාර්ථක වී නැති බව එජාප ප‍්‍රබලයා කීය.

එක්සත් ජාතික පක්ෂයෙන් පාර්ලිමේන්තුවට තේරී පත්වූ මන්ත‍්‍රීවරුන් 106 දෙනා අතරින් මන්ත‍්‍රීවරුන් 101 දෙනෙකු වත්මන් ආණ්ඩුවට සහාය දක්වයි. මීට අමතරව ශ‍්‍රී ලංකා මුස්ලිම් කොංග‍්‍රසයෙන් පාර්ලිමේන්තුවට තේරී පත්වූ මන්ත‍්‍රීවරයාද, එජනිසයෙන් පාර්ලිමේන්තුවට තේරී පත්වූ මන්ත‍්‍රීවරුන් 4 දෙනෙක්ද ආණ්ඩුවට සහාය දක්වන බව ප‍්‍රකාශ කර ඇත. ඒ අනුව ජාතික ආණ්ඩුවට සහාය දක්වන බව ප‍්‍රකාශ කර ඇත්තේ පාර්ලිමේන්තු මන්ත‍්‍රීවරුන් අතරින් 106 දෙනෙකු පමණකි. පාර්ලිමේන්තුවේ සමස්ථ මන්ත‍්‍රීවරුන් අතරින් සරල බහුතරයක් සඳහා අවශ්‍ය වෙන්නේ තවත් මන්ත‍්‍රීධූර 7කි. කෙසේ වෙතත් මුළු මන්ත‍්‍රීවරුන් සංඛ්‍යාවම පාර්ලිමේන්තුවට නොපැමිණියහොත් පැමිණ සිටින මන්ත‍්‍රීවරුන් අතරින් සරල බහුතරය සලකා බලනු ලබයි.