* පොදු ජන පෙරමුණ හා ශ‍්‍රීලනිපය අතර පොදු සන්ධානයද නොකෙරෙන තැනට ඇදී යමින් තිබේ.
* ජනාධිපතිවරයා විශ්වාස කළ නොහැකි හැසිරීම් ඇත්තකු බව නැවතත් එමගින් තහවුරු කෙරිණි.
* තමා හෙටානිද්දා කරන්නේ කුමක්දැයි, පෙනෙන විදියට, මේ මොහොතේ ඔහුවත් දන්නේ නැත.

ජනාධිපති සිරිසේනගේ ඉරණම කුමක්ද?

ශ‍්‍රී ලංකා පොදු ජන පෙරමුණ තමන්ගේ ඉදිරි ජනාධිපති අපේක්‍ෂකයා ලෙස ගෝඨාභය රාජපක්‍ෂ නම නියම කරගැනීම දැන් බොහෝ දුරට අවසන්ය. ඔහුට දැන් ඇත්තේ අමෙරිකානු පුරවැසිකමෙන් නිදහස් වීම පමණෙකි. අමෙරිකානු පුරවැසිකමෙන් නිදහස්වීම සඳහා අවශ්‍ය වන ලියුම් කියුම් ඔහු මේ වන විටත්, අදාළ බලධාරීන්ට බාරදී ඇති බව දැනගන්නට තිබේ.
එහෙත්, ඒ ක‍්‍රියාදාමය අවසන් වන්නට ගතවන කාලය කුමක්දැයි නිශ්චිත නැත. සමහර විට එය මාස කිහිපයක සිට අවුරුදු කීපයක් දක්වා විය හැකි බව තතු දන්නෝ කියති.


ගෝඨාභය රාජපක්‍ෂට ඒ කඩුල්ල පැනගත නොහැකි වුවහොත්, ඔහුට ජනාධිපතිවරණ අපේක්‍ෂකත්වය අහිමි වන්නේය. අමෙරිකානු පුරවැසිභාවය අවසන් කරගන්නට ඉල්ලූම්පත් බාරදී ඇතය කියා ජනාධිපති අපේක්‍ෂකකම ලබාගන්නට හෝ ජනාධිපතිවරණයට ඉදිරිපත් වන්නට හෝ ගෝඨාභයට නොහැකිය.


ගීතා කුමාරසිංහගේ ස්විස් පුරවැසිභාවය සම්බන්ධ නඩුවේදී අභියාචනාධිකරණය තීන්දු කළේ, අදාළ මහජන ධුරයට තරග කරන අවස්ථාව වන විට පුරවැසිභාවය පිළිබඳ ප‍්‍රශ්නය නිරාකරණය වී තිබිය යුතුය යන්නයි. පුරවැසිභාවය පිළිබඳ ප‍්‍රශ්නය නිරාකරණය නොකරගෙන ජනාධිපතිවරණ අපේක්‍ෂකකම පොදුජන පෙරමුණෙන් ගෝඨාභයට නොලැබිය හැකිවාක් මෙන්ම, තරග කිරීමෙන් පසු නීතිමය තත්ත්වය මත ගෝඨාභය නුසුදුස්සකු වුවහොත්, පොදුජන පෙරමුණට නොලැබී යන අවස්ථාව ගැනද එම පෙරමුණ දැනුවත් බව පැහැදිලිය.


යම් හෙයකින් ගෝඨාභය රාජපක්‍ෂට අමෙරිකානු පුරවැසිබව ඉවත්කරගන්නට නොහැකි වුවහොත්, රාජපක්‍ෂ පවුලේ ඊළඟ අපේක්‍ෂකයා චමල් රාජපක්‍ෂ විය හැකිය. කෙසේ වෙතත්, චමල් රාජපක්‍ෂ ඉදිරිපත්වීම මහින්ද රාජපක්‍ෂටද මහත් අස්වැසිල්ලක් වනු ඇත. ඔහු ජයග‍්‍රහණය කළහොත්, එක් ධුර කාලයකින් පසු හෝ දෙවැනි ධුර කාලයකින් පසු යළිත් මහින්ද රාජපක්‍ෂ පවුලටම, එනම් නාමල් රාජපක්‍ෂට පක්‍ෂයේ නායකත්වයත්, නැති නම් රටේ නායකත්වයත් ලබාගත හැකිවීම ඒ අස්වැසිල්ලට හේතුවයි. ගෝඨභය රාජපක්‍ෂට ඒ බලය ලැබුණහොත්, නැවත වරක් මහින්ද රාජපක්‍ෂ පවුලට එය නොලැබීමට තිබෙන ඉඩ ඉතා වැඩිය. මේ පසුබිම මත, මහින්ද රාජපක්‍ෂ ගෝඨාභය රාජපක්‍ෂට අපේක්‍ෂකකම දෙන්නට එකඟ වුණේ, අමෙරිකානු පුරවැසිභාවය නියමිත කාලයට පෙර ඉවත් කරගන්නට ගෝඨාභය අසමත්වනු ඇති බව දැන දැනම යයිද සමහර ආරංචි මාර්ග කියයි.


කොහොම වුණත්, එයින් පෙනෙන්නේ පොහොට්ටුවේ ජනාධිපතිවරණ අපේක්‍ෂකකම මෛත‍්‍රීපාල සිරිසේන මහතාගෙන් බොහෝ ඈතට ගසාගෙන ගොස්් තිබෙන බවයි.
ඔක්තෝබර් 26 වැනිදා ආණ්ඩුක‍්‍රම ව්‍යවස්ථා කුමන්ත‍්‍රණයේදී මෛත‍්‍රීපාල සිරිසේන ජනාධිපතිවරයාගේ අරමුණ වී තිබුණේ මහින්ද අගමැති කොට, ඉන් ලැබෙන ප‍්‍රසාදය හරහා, පොදුජන පෙරමුණ හා ශ‍්‍රී ලංකා නිදහස් පක්‍ෂය අතර සන්ධානයක් ඇතිකර ගනිමින් ඊළඟ ජනාධිපතිවරණයේ පාර්ශ්ව දෙකේම පොදු අපේක්‍ෂකයා තමා වීමයි. එහෙත්, දැන් ඒ සිහිනයෙන් මෛත‍්‍රීපාල සිරිසේන මහතා කනගාටුදායක ලෙසින් අවදිවී තිබේ. නැතහොත් අවදි වන්නට බල කෙරී තිබේ.


ඒ අතර, පොදු ජන පෙරමුණ හා ශ‍්‍රීලනිපය අතර පොදු සන්ධානයද නොකෙරෙන තැනට ඇදී යමින් තිබේ. මේ වන තුරුත් කිසිම වැදගත් එකඟතාවක් ඇතිකර ගැනීමට දෙපාර්ශ්වයට හැකිවී නැත. ඕනෑවට එපාවට අවසන් වරට පැවැති සාකච්ඡුාවේදී පවා කළ හැකිවුණේ දෙපාර්ශ්වයට එකඟ විය හැකි ප‍්‍රතිපත්තිමය කාරණා 20ක් ගැන එකඟ වීමයි. මේ වනාහි නොකෙරෙන වෙදකමට කෝඳුරු තෙල් සෙවීමක් වැනිය. ඉතා පුළුල් ප‍්‍රතිපත්ති 20ක් යනු කිසිවකුට විරුද්ධ වන්නට බැරි, එකඟ වුණත් කිසිම වැදගත් දෙයක් සිදුනොවන අන්දමේ කාරණා සමූහයකි. එහෙත් තීරණාත්මක කාරණා ඒවා නොවේ. තීරණාත්මක වන්නේ, සන්ධානයේ නායකත්වය දරන්නේ කවුද, නිලතල බෙදෙන්නේ කුමන ආකාරයටද, ඒවායේ අනුපාතයන් මොනවාද සහ විශේෂයෙන්ම පොදු සන්ධානයේ ඊළඟ ජනාධිපති අපේක්‍ෂකයා කවුද යන්නයි. මේ ගැන කිසිම එකඟතාවක් නැති තත්ත්වයක් යටතේ, පොදු ජන පෙරමුණෙන් ගෝඨාභය රාජපක්‍ෂට අවසරය ලැබීම වනාහි මෛත‍්‍රීපාල සිරිසේන මහතා, එම පෙරමුණ විසින් නොසලකා හරිනු ලැබීමකි.
දැන් ජනාධිපති සිරිසේන ඉන්නේ යන්නට තැනක් නැති කෙනෙකුගේ මට්ටමේය.
පසුගිය 12වැනිදා ඔහු හිටපු ජනාධිපතිනි චන්ද්‍රිකා කුමාරතුංග හමුවීම, ඒ අවුල් සහගත පසුබිමේ තවත් අවුල් සහගත වෑයමකි. පසුගිය කාලය පුරාම ජනාධිපති සිරිසේන හිටපු ජනාධිපතිනියට දැක්වූයේ අවමන්සහගත සැලකිල්ලකි.


2015 ජනාධිපතිවරණයට පොදු අපේක්‍ෂකයා ලෙස සිරිසේන මහතා ඉදිරියට ගෙනඒමට වැදගත්ම කාර්යභාරය කළේ හිටපු ජනාධිපතිනියයි. සිරිසේන මහතා විශ්වාසය තබාගත හැකි කෙනකුදැ’යි එජාපය ඇතුළු දේශපාලන සන්ධානයේ නායකයන් ඇසූ විට, සිය පපුවට අත තබා, ඔහු ඉතාම විශ්වාසයැයි කුමාරතුංග මහත්මිය කීවේය යන්න ප‍්‍රසිද්ධ කතාවකි. එහෙත්, ජනාධිපති වී ටික දිනකින්ම සිරිසේන මහතාට කුමාරතුංග මහත්මිය අරහං තත්ත්වයකට පත්විය. යම් වැදගත් කාරණයක් ගැන සාකච්ඡුා කරන්නට හමුවීමට වේලාවක් ලබාදෙන ලෙස ඇය කළ ඉල්ලීම් සිරිසේන මහතා විසින් නිර්දය ලෙස නොසකලකා හරින ලදි. ක‍්‍රමක‍්‍රමයෙන් මෝරා වැඩුණු මේ විරසකය ඉහළටම ගියේ, චන්ද්‍රිකා මහත්මිය සංවිධානය කරමින් තිබුණු අත්තනගල්ල ආසනයට, ලසන්ත අලගියවන්න පසුගිය මාසයේදී පත්කිරීමත් සමගය. මේ ආකාරයෙන් ඉතා අවමන් සහගත ලෙස ඇයට සැලකූ ජනාධිපති සිරිසේන මෑත කාලය වන විට ප‍්‍රසිද්ධ වේදිකාවලදී ඇගේ නම නොකියා විවිධ අවඥාවන්ට භාජනය කරන තරමට කළගුණ නොදත් තත්වයට පත්විය.
එහෙත් පසුගියදා ඔහු ඇය හමුවන්නට කාලවේලාවක් ඉල්ලා සිටියේය. දිගු ඇවිටිල්ලකින් පසු 12වැනිදා ඒ අවස්ථාව ඇගෙන් ලැබිණ. එහිදී සාකච්ඡුා කරන ලද්දේ කුමක්දැයි කිසිවකු නොදන්නා නමුත්, එයින් පෙනෙන්නේ ජනාධිපතිවරයා ඉතාම අවුල් සහගත තත්ත්වයකට පත්වී සිටින බවයි. එසේම, තමා කළ කී වැරදි දේවල් ක්‍ෂණයකින් අමතක කෙරෙන, අතීතය අමතක වීමේ රෝගයකින් ඔහු දේශපාලනිකව පෙළෙන බවයි.


අනෙක් අතට, රාජපක්‍ෂ පාර්ශ්වය තමාට නොසලකා හැරීමෙන් කෝපයට පත්වී සිටින ජනාධිපතිවරයා, දැන් යළිත් එක්සත් ජාතික පක්‍ෂය හා සන්ධානයක් කෙරෙහි නැඹුරුවක් දක්වන බව පෙනෙන්නට තිබේ. එහි ප‍්‍රතිඵලයක් හැටියට මෙතෙක් ඔහු විරෝධය දක්වමින් සිටි, ශ‍්‍රීලනිප මන්ත‍්‍රීවරුන්ට ඇමති ධුර පිරිනැමීම කෙරෙහි සිය විරෝධය ඉවත්කරගෙන ඇති බවද දැනගන්නට තිබේ. එහි ප‍්‍රතිඵලය නැවතත් ජාතික ආණ්ඩුවක් ඇතිකරගන්නට උත්සාහයක් පැනනැගීමයි.
ඒ අලූත් තත්ත්වය, ඊළඟ අවස්ථාවේ අයවැය 3වැනි වර කියවීමේ ඡුන්දය අවස්ථාවේදී අයවැයට පක්‍ෂව ඡුන්දය පාවිච්චි කරන්නට ශ‍්‍රීලනිපයේ මන්ත‍්‍රීවරුන්ට අනුමැතිය ලැබීමක් වනු ඇත. අයවැය දෙවැනිවර කියවීමේදී ඊට විරුද්ධව ඡුන්දය පාවිච්චි කරන්නට ශ‍්‍රීලනිපය මුලින් එකඟ වී තිබුණත්, අවසාන මොහොතේදී ජනාධිපතිවරයාගෙන් ලැබුණු පණිවුඩයක් නිසා, විරුද්ධව ඡුන්දය දීම නොකෙරිණ. මේ සිදුවීම රාජපක්‍ෂවරුන් දැඩි ලෙස කෝප ගැන්වූ අතර, සිරිසේන ජනාධිපතිවරයා කිසිසේත් විශ්වාස කළ නොහැකි හැසිරීම් ඇත්තකු බව නැවතත් එමගින් තහවුරු කෙරිණි.
එහෙත්, ජනාධිපතිවරණය ගැන ඔහුගේ බලාපොරොත්තු අවසන් කරගෙන නැති බව දැනගන්නට තිබේ. ඒ අරමුණෙන් තමා හෙටානිද්දා කරන්නේ කුමක්දැයි, පෙනෙන විදියට, මේ මොහොතේ ඔහුවත් දන්නේ නැත.x