පුවත් විමසුම

මත්ද්‍රව්‍ය ජාවාරමට එරෙහිව ගෙනයන වැඩපිළිවෙළ හා ඊට ලබාදෙන නායකත්වය හේතුවෙන් එය අඩාල කිරීම සඳහා තමා විනාශ කිරීමට විශාල කුමන්ත‍්‍රණයක් ඇති බවත්, තමාට ජීවිත තර්ජන එල්ලවී ඇති බවත් ජනාධිපති මෛත‍්‍රීපාල සිරිසේන ජුලි 2වැනිදා පොළොන්නරුවේදී ප‍්‍රකාශ කර ඇත.

ඒ පිටුපස සිටින්නේ හා ඊට වියදම් කරන්නේ කුඩු ජාවාරම්කාරයන් බවද ජනාධිපතිවරයා ප‍්‍රකාශ කර ඇත.

මත්ද්‍රව්‍යයට එරෙහි සටන අඩපණ කරන්නට විශාල පිරිසක් උසාවි යන බවත්, මානව හිමිකම් බාස්ලා සිරගෙදර සිටින මත්ද්‍රව්‍ය ජාවාරම්කරුවන් වෙනුවෙන් පෙනී සිටින්නට පටන්ගෙන ඇති බවත් ජනාධිපතිවරයා ප‍්‍රකාශ කර ඇත.

එමෙන්ම මත්ද්‍රව්‍ය ජාවාරම්කාරයන් වෙනුවෙන් සමාජ මාධ්‍ය විශාල වශයෙන් පෙනී සිටින්නට පටන්ගෙන ඇති බවත්, ආණ්ඩුව, විපක්ෂය, එන්ජී ඕ ඇතුළු බොහෝ අය විශාල වශයෙන් තමාට පහර දෙන්නට පටන්ගෙන ඇති බවත් ඔහු වැඩිදුරටත් එහිදී ප‍්‍රකාශ කර ඇත.

තවද ඊට පෙරදා කොළඹදී පැවති මත්ද්‍රව්‍ය විරෝධී උත්සවයකදී ජනාධිපතිවරයා ප‍්‍රශ්න කර තිබුණේ ඔහුගේ මරණ දඬුවම් තීන්දුවට ආණ්ඩුව විපක්ෂය හා එන්ජී ඕ විරෝධය පළකළත් මත්ද්‍රව්‍ය මර්දනයට එම පිරිස් ලබාදුන් සහාය කුමක්ද යන්නයි.

එකකට එකක් සම්බන්ධ ජනාධිපතිවරයාගේ මේ කථාවලින් අපට භයානක හැඟවුම් කිහිපයක් ලබාදේ. එකක් යළි ජනාධිපති ඝාතන කුමන්ත‍්‍රණ කතාවක් කරළියට ඒදෝ යන කරුණය. නාමල් කුමාර වෙනුවට සමහරවිට එය පාතාලයට සම්බන්ධ සාමාජිකයෙකුගේ විය හැකිය. එහෙත් එහිදී විමර්ශන කටයුතු තමන්ට වුවමනා ආකාරයට සිදුකරන්නට පොලීසිය අයත් අමාත්‍යාංශය පවරාගන්නට ඔහුට සිදුවන්නේ නැත. දැන් එය ඇත්තේ ඔහු භාරයේය. ජනාධිපති ඝාතන කුමන්ත‍්‍රණ පරීක්ෂණ නිසියාකාර සිදුනොවෙතැයි කියමින් මාස තුනක කාලයකට පවරාගත් එම අමාත්‍යාංශය මාස ගණනාවක් ගතවීත් තවමත් ඔහු පාලක පක්ෂයට ලබාදී නැත.

මේ ජනාධිපති ඝාතන තර්ජනය නිසාම ඔහු යළිත් පසුගිය ඔක්තෝබරයේ මෙන් ව්‍යවස්ථා විරෝධී වැඩක්ද කළ හැකිය. දැනට ප‍්‍රශ්නය ඇත්තේ ඔහු කරන්නේ මොනවාද යන්න ගැන නොව ඔහු නොකරන්නේ මොනවාද යන්න ගැනය.

අලූත් ජනාධිපති ඝාතන කුමන්ත‍්‍රණයට අදාල තොරතුරු තිබේ නම් පොලීසියත් ඔහු යටතේ නම් තවත් මොන කථාද? කුමන්ත‍්‍රණකරුවන් ඇල්ලිය යුතුය. රටටම ප‍්‍රදර්ශනය කළ යුතුය. ඔහු සේනාධිනායකය. ආරක්ෂක ඇමතිය. කොමාන්ඩෝ බලකාය, විශේෂ බලකාය ආදි  ඕනෑම සන්නද්ධ පිරිසකගෙන් ආරක්ෂාව සපයාගත හැකිය.

වෙඩි නොවදින ඇඳුම් ඇඟලා, වීදුරු ආවරණවල සිට ඔහුට ඉදිරි ජනරැුලි පැවැත්විය හැකිය. මිනිසුන් කිහිපදෙනෙකු එල්ලා මරා, මත්ද්‍රව්‍ය විරෝධයේ ලාභ සිල්ලර ධජය ඔහුට අතට ගත හැකිය. ඒ සිල්ලර ඡුන්දදායකයාගේ ඡුන්ද ටික ලබාගැනීම සඳහාය. ඊට තව වැඩි කාලයක් නැත. ඇත්තේ මාස කිහිපයකි. ජනාධිපතිවරයාගේ හොඳ හොඳ රැුඟුම් එහිදී බලාගැනීමට හැකිවනවාට සැක නැත.

එම වේදිකාවලදී මත්ද්‍රව්‍ය විරෝධයට ආණ්ඩුව, විපක්ෂය හෝ එන්ජී ඕ නොව ඔහුගේ පවුලේ සාමාජිකයන් ලබාදුන් සහයෝගය කුමක්දැයි ඔහු රටටම ඇසෙන්නට ඇසිය යුතුය. ඔහුගේ මත්ද්‍රව්‍ය විරෝධයේ පොළොන්නරු නායිකාව වූ දියණි චතුරිකා සිරිසේන යහපාලන ආණ්ඩුව බලයට පත්වීමෙන් පසු ඇගේ හෝටලයට මත්පැන් බලපත් ලබාගත්තේ කෙසේදැයි ඇසිය යුතුය.

මත්පැන් සංග‍්‍රහ කරනවා නම් විවාහ මංගල උත්සවවල සාක්ෂියට අත්සන් කිරීමටවත් නොයන තමාගේ ප‍්‍රතිපත්තිය කඩා පුත් දහම් සිරිසේනගේ විවාහ මංගල උත්සවයේදී විදේශ මත්පැන් සංග‍්‍රහ කළේ ඇයිදැයි ඔහු ඇසිය යුතුය.