ඒකාබද්ධ විපක්ෂයේ මීළඟ ජනාධිපතිවරණ අපේක්ෂකත්වය ලබාගැනීමේ තරඟයට බැසිල් රාජපක්ෂ අවතීර්ණ වී ඇති බවත්, ඒ සඳහා ඔහු විසින් ගෝඨාභය රාජපක්ෂ මොඩලයේ විද්වතුන් එක්රැස් කර සම්මන්ත්‍රණ පැවැත්වීමේ වැඩපිළිවෙලක් ආරම්භ කර ඇති බවත් වාර්තා වෙයි.

ඒ අනුව ශ්‍රී ලංකා පොදුජන ඉංජිනේරු පෙරමුණ නමින් ශ්‍රී ලංකා පොදුජන පෙරමුණට සම්බන්ධ විද්වත් සංවිධානයක් ආරම්භ කර එහි ආරම්භක සම්මන්ත්‍රණය ඔක්තෝම්බර් 17 වැනිදා තාජ් සමුද්‍රා හෝටලයේදි පවත්වා ඇත. ගෝඨාභය රාජපක්ෂගේ එළිය සහ වියත්මඟ සම්මන්ත්‍රණ මෙන් පොදුජන ඉංජිනේරු පෙරමුණේ සම්මන්ත්‍රණ මාලාවක් ඉදිරියේදී බැසිල් රාජපක්ෂගේ ප්‍රධානත්වයෙන් රටේ විවිධ ප්‍රදේශවල පැවැත්වීමට තීරණය කර ඇත.

එම රැස්වීමට සහභාගී වූ කථිකයන් විසින් යුද්ධය අවසාන කිරීම සම්බන්ධයෙන් හමුදා සාමාජිකයන්ට ස්තූතිය පළ කරමින් අදහස් පළ කර ඇතත් ගෝඨාභය රාජපක්ෂ පිළිබඳව කිසිඳු සඳහනක් කර නැත. බැසිල් රාජපක්ෂ විසින් රටේ විශාල සංවර්ධනයක් සිදුකළ බවත්, රටේ අනාගත සංවර්ධනයට නායකත්වය දීම බැසිල් රාජපක්ෂ විසින් සිදුකළ යුතු බවත් එහිදී කියා තිබුණි.

මේ සම්බන්ධයෙන් කළ විමසීමකදී ඒකාබද්ධ විපක්ෂයේ පක්ෂ නායකයෙකු පැවසුවේ මහින්ද රාජපක්ෂ විසින් බැසිල් රාජපක්ෂව ජනාධිපති අපේක්ෂකයා ලෙස තෝරාගැනීමේ වැඩි අවස්ථාවක් ඇති බවයි. එමෙන්ම ඔහු තවදුරටත් ප්‍රකාශ කළේ මේ වනවිට බැසිල් රාජපක්ෂගේ ඇමෙරිකානු පුරවැසිභාවය ඉවත් කරගැනිමට අවශ්‍ය වැඩකටයුතු ආරම්භ කර ඇති බවයි.