පසුගිය දා ලන්ඩන් නුවර පැවති පොදු රාජ්‍ය මණ්ඩලීය රාජ්‍ය නායක (චෝගම්) සමුළුවට සහභාගිවීම සදහා ජනපති මෛත‍්‍රිපාල සිරිසේන මහතා සමග කණ්ඩායම් තුනකින් පුද්ගලයන් 120කට ආසන්න ප‍්‍රමාණයක් ලන්ඩන් නුවරට ගොස් ඇතැයි ගුවන්තොටුපල ආරංචි මාර්ගවලින් වාර්තාවෙයි.

මේ අනුව මුලින්ම පසුගිය අපේ‍්‍රල් 15 වැනි දින ජනපතිවරයා සමග ශ‍්‍රී ලන්කන් ගුවන් යානයකින් කණ්ඩායමක් ගොස් ඇති අතර, එම පිරිස 32ක් බවද, එයින් 12 දෙනෙකු ජනපති ආරක්ෂක අංශයේ බවද දැනගන්නට ලැබේ. මීට අමතරව ජනාධිපති දියණිය චතුරිකා සිරිසේන මහත්මිය සමග තවත් කණ්ඩායමක් කටාර් එයාර්වේස් යානයකින් අපේ‍්‍රල් 15 වැනි දින උදේ 10ට කටුනායකින් පිටත් වී ඇති බව දැනගන්නට ලැබෙන අතර, එදිනම උදේ 11.25ට කටාර් එයාර්වේස් කිව්ආර්665 දරන යානයෙන් තවත් කණ්ඩායමක් ලන්ඩන් නුවර බලා කටුනායකින් පිටත්වී ඇත.

මේ සියලූම පිරිස සඳහා විශාල වැයක් දරා ඇති අතර එම මුදල් ජනපති ලේකම් කාර්යාලයෙන් සහ තවත් ආයතනවලින් ගෙවා ඇත. මෙසේ ගිය පිරිස අතර ජනාධිපතිවරයාගේ නිවසේ ගෘහ සේවා කටයුතු කරන පිරිසක්ද සිට ඇති වාර්තා වෙයි.

මේ පිළිබඳව කරුණු විමසීම සදහා අනිද්දා පුවත්පත විදේශ කටයුතු අමාත්‍යාංශයේ මාධ්‍ය ප‍්‍රකාශිකා මහේෂි කොලොන්නේ මහත්මියගෙන් කරුණු විමසීමට ඇය ඇමතුවත් සම්බන්ධ කරගැනීමට නොහැකි විය.