එජාපයේ නායකත්වය හා ජනාධිපතිවරණ අපේක්ෂකත්වය බලාපොරොත්තු වන අය අතරින් මේ වෙද්දී ඉදිරියෙන්ම ඉන්නේ එජාප නියෝජ්‍ය නායක සජිත් පේ‍්‍රමදාස. එජාප පාක්ෂිකයන් හා පාර්ලිමේන්තු මන්ත‍්‍රීවරුන් සැලකිය යුතු පිරිසක් මේ වෙද්දීත් සජිත් පේ‍්‍රමදාස පසුපස ගමන් කරමින් සිටිනවා. මේ වෙද්දී සජිත් පේ‍්‍රමදාසගේ බිරින්දෑව මීළඟ ජනාධිපති ආර්යාව ලෙස මාධ්‍ය ඉදිරියේ පෙනී සිටින්නටත් පටන් අරගෙන.


එජාපයේ වත්මන් නායක රනිල් වික‍්‍රමසිංහ දේශපාලනයෙන් සමුගත යුතු බව මේ වෙද්දීත් ඉතා පැහැදිළියි. එහෙත් රනිල් වික‍්‍රමසිංහ මහතාට විකල්පයක් ලෙස සජිත් පේ‍්‍රමදාස ගැලපෙනවාද යන්න ප‍්‍රශ්නයක්. සජිත් පේ‍්‍රමදාසගේ ප‍්‍රතිපත්ති මොනවාද යන්න ප‍්‍රශ්නයක්. සජිත් පේ‍්‍රමදාස මහතා මවා පෙන්වන තරම් විශිෂ්ඨ නායකයෙක්ද යන්න ප‍්‍රශ්නයක්.


සාමාන්‍ය මිනිසුන්ගේ අවබෝධයේ හැටියට ඇමති සජිත් පේ‍්‍රමදාස මේ වෙද්දී රටපුරා උදා ගම්මාන දස දහස් ගණනක් නිර්මාණය කරමින්, මිනිසුන්ට බෙදා දෙමින් ඉන්නවා. එය මහා සේවාවක් ලෙස සලකන්නෝ ඉන්නවා. එහෙත් බොහෝ අය නොදන්නා කාරණයක් වන්නේ සජිත් පේ‍්‍රමදාස ඇමතිවරයා ඒ නිවාස සියල්ලම පාහේ ණය යෝජනා ක‍්‍රම හැටියට මිස, නොමිලයේ ලබා නොදෙන බව. ඇත්තටම ණය යෝජනා ක‍්‍රම ලෙස හෝ නිවාස තනාදීම යහපත් කාරණයක්. එහෙත් ප‍්‍රශ්නය වන්නේ විශාල වියදමක් දරමින් ඔවුන් කරන ප‍්‍රචාරක කටයුතුවලදී නිවාස නොමිලයේ ලබාදෙන බව මවා පෙන්වමින් ප‍්‍රචාරක කටයුතු සිදු කිරීමයි. අනෙක් කාරණය වන්නේ එකදිගට සිදුකරන නිවාස තැනීමේ ව්‍යාපෘතිවලදී බොහෝ තැන්වල වැඩකටයුතු බාගෙට නිම කිරීමයි.


ඔව්, අමාත්‍ය සජිත් පේ‍්‍රමදාසගේ නිවාස ව්‍යාපෘතිවලදී නිවාස සම්පූර්ණ නොකර, අඩ වශයෙන් නිමකොට පුද්ගලයන්ට බෙදාදුන් අවස්ථා ගැන අප මීට පෙර අසා තිබුණා. එහෙත් ඒ තොරතුරු තහවුරු කරගැනීමේ හැකියාවක් අපට තිබුණේ නැහැ. එහෙත් 2017 වර්ෂයට අදාල නිවාස හා ඉදිකිරීම් අමාත්‍යාංශය පිළිබඳ විගණකාධිපති වාර්තාවෙහි ඇති කරුණු සලකා බලද්දී සජිත් පේ‍්‍රමදාස අමාත්‍යවරයා වැඩ අවසන් නොකළ ගම්මාන බෙදා දුන් බවට තොරතුරු තහවුරු වෙනවා.


එම වාර්තාවෙහි විගණන නිරීක්ෂණ අතරේ සඳහන් වෙන එක් කරුණක් මෙසේ දැක්විය හැකියි. 2017 වර්ෂයේදී විවිධ ව්‍යාපෘති 08ක් යටතේ ඇස්තමේන්තුගත පිරිවැය රුපියල් මිලියන 3,234ක් වූ නිවාස ඒකක 15,836ක් ඉදිකිරීමට සැලසුම් කරලා තිබුණා. එහෙත් ඇත්තටම ඉදිකර තිබුණේ නිවාස 8,233ක් පමණයි. ඒ ව්‍යාපාති 08 යටතේ 2017 අවුරුද්දේ උපයෝජනය කරලා තිබුණු ප‍්‍රතිපාදනය රුපියල් මිලියන 2,727ක්. ඒත් සමහර ව්‍යාපෘතිවල නිවාසවල වැඩ අවසන් කරලා තිබුණේ අවුරුද්දේදී අපේක්ෂිත ඉලක්කයෙන් සීයට 8ක් විතරයි.


සජිත් පේ‍්‍රමදාස මහත්තයාට පොරොන්දු වූ දවසට ව්‍යෘපෘති අවසාන කරගන්න බැරිවීම ගැන කුමන හෝ උත්තරයක් දිය හැකියි. එහෙත් ඇතැම් ව්‍යාපෘති සම්පූර්ණයෙන්ම වැඩ ඉවර කරන්නත් කලින්, ව්‍යාපෘතිය අත්හැරදාලා තියෙනවා. උදාහරණ විදියට 2016 දී පටන්ගෙන 2017 මාර්තු මාසයේදී ඉවර කරන්න නියමිත වෙලා තිබුණු ආදර්ශ ගම්මාන වැඩසටහනට රුපියල් මිලියන 1,388ක් වැය කරලා තියෙනවා. හදන්නට හිටපු නිවාස ප‍්‍රමාණය නිවාස 4,382ක්. ඒත් වැඩ අවසන් කර තිබුණේ ඒවායින් නිවාස 2,054ක පමණයි. අනෙක් නිවාස අතරින් වහල සම්පූර්ණ කරලා, ඒත් වැඩ අවසන් නොවු නිවාස 2,207ක් තිබුණා. වහල දක්වා ඉදිකරපු, වහලයක් නැති නිවාස 114ක් තිබුණා. එහෙම වුණත් ඒ නිවාසවල ජලය, මාර්ග වගේ මූලිකම අවශ්‍යතා ඒ නිවාසවල සම්පූර්ණ කරලා තිබුණේ නැහැ. ඒ ව්‍යාපෘති ගැන විගණකාධිපති දෙපාර්තමේන්තුව නිල වශයෙන් මෙසේ කියනවා. ‘නිවාසවල වැඩ අවසන් කරගැනීමට උනන්දුවක් නොමැති නිවාස සඳහා ලබාදෙන ණය මුදල් සීමා කර ව්‍යාපෘතිය අවසන් කර ඇති බව නිරීක්ෂණය විය.‘


සජිත් පේ‍්‍රමදාස මහතාගේ තවත් ව්‍යාෘතියක් තමයි විසිරි නිවාස වැඩසටහන නමින් 2016 ජනවාරි මාසයේදී පටන්ගත්ත ව්‍යාපෘතිය. මේක 2017 මාර්තු මාසයේදී ඉවර කරන්න නියමිතව තිබුණා. රටේ නායකත්වය පතන සජිත් පේ‍්‍රමදාස මහත්තයාට ඒ ව්‍යාපෘතියේදීත් නියමිත කාලය වෙද්දී ගෙවල් හදලා අවසන් කරන්න බැරිවුණා. රුපියල් මිලියන 4,302ක් වැයකරලයි මේ ව්‍යාපෘතිය කරලා තිබුණේ. නිවාස 16,950ක් හදන්න ව්‍යාපෘතියෙදී බලාපොරොත්තු වෙලා තිබුණා. නියමිත කාලය අවසන්ව මාස ගණනක් ගෙවුණු පසුව, 2017 වර්ෂාවසානය වෙද්දීත් වැඩ අවසන් කරලා තිබුණේ නිවාස 15,032ක පමණයි.

ඒ ව්‍යාපෘතියේත් ගෙවල් 614ක් වහල මට්ටමට විතරක් අවසන් කරලා තිබුණා. වහලක් නැති නිවාස 15ක් තිබුණා. බාගෙට හදපු නිවාස බාරගත්තු අයට ණය අඩුවෙන් ලබාදීලා තිබුණු බව විගණකාධිපති වාර්තාවේ සඳහන් වෙනවා.
වැලිඔය නිවාස ව්‍යාපෘතියත් 2016 ජනවාරි මාසයේදී පටන් අරගත් එකක්. එයත් 2017 මාර්තු මාසයේදී අවසාන කරන්න බලාපොරොත්තු වෙලා තිබුණා. රුපියල් මිලියන 368ක් ඒ වෙනුවෙන් වැය කරලා තිබුණා. ඉලක්කගත නිවාස සංඛ්‍යාව 1,042 න් ගෙවල් 995ක් පමණක් අවසන් කරලා තිබුණා. වහලයට වෙනතුරු පමණක් ඉදිකරපු නිවාස 47ක් තිබුණු බව කියනවා. ඒ වගේම ව්‍යාපෘති ක‍්‍රියාත්මක කරද්දී ජලය වැනි ස්වාභාවික සාධක ගැන නිසි අධ්‍යනයක් කරන්නේ නැතිව ව්‍යාපෘති කරලා තියෙන බවත් කියනවා. වැලිඔය නිවාස ව්‍යපෘතියේ නිවාස ගත්ත බොහෝ අය ජල හිඟය නිසා නිවාසවල පදිංචිය අත්හැරලා ගිහින් තියෙනවා.


මේ දත්ත සුළුකොට තැකිය යුතු නැහැ. විගණකාධිපති දෙපාර්තමේන්තුවේ මේ නිල දත්තවල තියෙන්නේ රටේ අනාගත නායකත්වය පතන ඇමතිවරයෙකුගේ ව්‍යාපෘතිවල තරමයි. ඒ ඇමතිවරයා සංදර්ශන පවත්වමින්, රඟපා පෙන්වන තරම් ඒ ව්‍යාපෘතිවල සැබෑ ප‍්‍රමිතියක් නැති බවයි.
කයිවාරු පමණක් ඉතිරි වී, වැඩ අඩ වශයෙන් නිමකරන මේ ඇමතිවරයාට සම්පූර්ණ රට බාරදුන්නොත් මොනවා නොවේවිද. හම්බන්තොට හිස් වරායවල්, ගුවන්තොටුපොලවල්, මහරෝහල්, ක‍්‍රීඩාංගණ ඉදිකරමින් මහින්ද රාජපක්ෂලා තැනූ හම්බන්තොට හොල්මන් නගරයටත් එහා ගිය නාස්තිකාර ව්‍යාපෘති මිස, රටට සෙතක් වේවිද. සජිත් පේ‍්‍රමදාස ඇමතිවරයා ජනාධිපති පදවියට පත්වුණොත්, ඔහුට රට ගෙනයන්නට තරම් පුළුල් හා දියුණු ප‍්‍රතිපත්තියක් නැති බව තහවුරු වී හමාරයි.


විපක්ෂනායක මහින්ද රාජපක්ෂ පවා ක‍්‍රියාත්මක නොකළ යුතු බව කියන මරණ දඬුවමට පක්ෂව කතාකරමින් සජිත් පේ‍්‍රමදාස ඇමතිවරයා පෙන්වන්නේ තමන් කෙතරම් ගෝත‍්‍රික නායකයෙක්ද යන වග. ඔහු මුව විවර කොට සිදුකරන හැම කතාවකින්ම තහවුරු වෙන්නේ ඔහුගේ ගෝත‍්‍රික ප‍්‍රතිපත්තිවල රඟ. එවැනි නායකයෙක්ව ඉදිරියට දමාගෙන එජාපයේ ලිබරල් ප‍්‍රතිපත්ති වෙනුවෙන් නිර්භයව පෙනී සිටි මංගල සමරවීර, හර්ෂ ද සිල්වා වැනි නායකයන්ද දැන් ඔහුට හුරේ දමමින් ඉන්නවා. ඔවුන් සජිත් පේ‍්‍රමදාසව දිනවා, හිතුමතේ ඔහුව පාලනය කරන්නට ඒ ලිබරල් නායකයන් දැන් හිතනවා ඇති. කරුණු කාරණා සජිත් පේ‍්‍රමදාස ඇමතිවරයාට ගැලපෙන ලෙස නිමවුණොත්, ඔහු ජනාධිපතිධූරයට පත්වීවුණොත් ඉන්පසුව ඒ නායකයන්ට සැබෑ සජිත් පේ‍්‍රමදාසව නිරුවත්ව පෙනේවි. මහින්ද රාජපක්ෂ කෙනෙකු, මෛත‍්‍රීපාල සිරිසේන කෙනෙකුගෙන් පසුව සජිත් පේ‍්‍රමදාස කෙනෙකුගේ අතට රට ගියහොත්, කයිවාරු හා සංදර්ශනවලින් පිරි තවත් හිස් වසර ගණනක් ගත කරන්නට ශ‍්‍රී ලංකාවට සිදුවේවි.x

x අනුරංග ජයසිංහ