පාස්කු ඉරිදා ත‍්‍රස්ත ප‍්‍රහාරය හා මුස්ලිම්වරුන්ට ප‍්‍රහාර එල්ලකිරීමේ සිදුවීම් හේතුවක් කරගනිමින් හදිසි නීතිය පාවිච්චි කොට ජනාධිපතිවරණය හා පාර්ලිමේන්තු මැතිවරණය නියමිත දිනවල නොපවත්වා කල් දැමීමට හැකිදැයි ජනාධිපති මෛත‍්‍රීපාල සිරිසේන ඇතුළු ආණ්ඩුවේ ප‍්‍රබලයන් පිරිසක් සලකා බලා ඇතැයි වාර්තා වෙයි.

හදිසි නීතිය යටතේ යැයි කියමින්, භාරකාර රජයක් ලෙස නව ආණ්ඩුවක් පත්කොට 2019 නොවැම්බර් මාසයේදී කැඳවිය යුතුව තිබෙන ජනාධිපතිවරණය මාස කිහිපයකට හෝ කල් දැමීමට හැකිදැයි ජනාධිපතිවරයා සහ ඔහුගේ සමීප හිතවතුන් පිරිසක් සොයාබලා තිබෙන බව එම ආරංචි මාර්ග වාර්තා කරයි. වාර්තාවන ආකාරයට ශ‍්‍රීලනිප ප‍්‍රබලයන් පිරිසක්ද මැතිවරණ කල් දමා භාරකාර රජයක් පිහිටුවීම පිළිබඳව ජනාධිපතිවරයාට යෝජනා කර තිබේ.

පවතින තත්වය යටතේ ජනාධිපති මෛත‍්‍රීපාල සිරිසේන ජනාධිපතිවරණයෙන් පරාජය වීමේ අවදානමක් තිබෙන නිසාත්, ශ‍්‍රීලනිපයට මීළඟ පාර්ලිමේන්තු මැතිවරණයකදී අඩු ආසන සංඛ්‍යාවක් ලැබීමේ අවදානමක් තිබෙන නිසාත් මෙසේ යෝජනා කිරීමට හේතු වී ඇත. කෙසේ වෙතත් මෙය යෝජනා මට්ටමේ පවතින්නක් පමණක් බවත්, තවම ඒ පිළිබඳව විධිමත් සාකච්ඡුා කිසිවක් සිදුව නැති බවත් එම ආරංචි මාර්ග පවසයි.

හදිසි නීතිය යටතේ මැතිවරණ කල්දැමීමේ හැකියාවක් තිබේදැයි කළ විමසීමකදී මැතිවරණ කොමිෂන් සභාවේ සභාපති මහින්ද දේශප‍්‍රිය ප‍්‍රකාශ කළේ, හදිසි නීතිය යටතේ මැතිවරණ කල් දැමිය නොහැකි බව පැහැදිලිවම ශ්‍රේෂ්ඨාධිකරණ තීන්දුවකින් ප‍්‍රකාශ කර තිබෙන බවයි.  එෆ්.ආර්. 512/1998 අංකය දරන ශ්‍රේෂ්ඨාධිකරණ නඩු තීන්දුවෙන් ඒ බව පැහැදිලිව ප‍්‍රකාශ කර තිබෙන බව ඔහු ප‍්‍රකාශ කළේය. එම මැතිවරණ දෙකෙන් එකක් හෝ කල් දැමීමට නම් පාර්ලිමේන්තුවේ තුනෙන් දෙකක අනුමැතියකින් ආණ්ඩුක‍්‍රම ව්‍යවස්ථාව සංශෝධනය කළ යුතු බවද ඔහු පැවසීය. ඔහු වැඩිදුරටත් ප‍්‍රකාශ කළේ ත‍්‍රස්තවාදය හේතුවක් කරගනිමින් මැතිවරණ කල් දැමීමට උත්සාහ කරනවා නම්, ත‍්‍රස්තවාදීන් හා එසේ උත්සාහ කරන අය අතර වෙනසක් නැති බවය. කෙසේ වෙතත් ජනාධිපතිවරණය හෝ පාර්ලිමේන්තු මැතිවරණය කල් දැමීම පිළිබඳව මැතිවරණ කොමිෂන් සභාව සමඟ කිසිවෙකු සාකච්ඡුා කර නැතැයි ඔහු කීය. x