අරුණ ජයවර්ධන

තමන් කැමති දෙයකට වියදම් කරගන්නටයැ’යි කියා යුවාන් බිලියන 2ක දීමනාවක් චීන ජනාධිපති ක්‍ෂි ජින්පිං තමාට දුන්නේයැයි ජනාධිපති මෛත‍්‍රීපාල සිරිසේන කියයි. ඔහු මේ බව කීවේ, පොළොන්නරුවේ චීන ආධාර ඇතිව ඉදිකෙරෙන ජාතික වෘක්කවේද විශේෂිත රෝහලට මුල්ගල් තැබීමේ අවස්ථාව සඳහා පසුගිය ජූලි 21වැනිදා සහභාගි වෙමිනි.

මෙම මුල්ගල තැබීමේ උත්සවය සඳහා දිනයක් වෙන්කර ගැනීම සඳහා තමා හමුවීමට නිවෙසට පැමිණි ලංකාවේ චීන තානාපතිවරයා, ජනාධිපති ක්‍ෂි ජින්පිං තවත් තෑග්ගක් තමාට ලබාදෙන බව දැන්වූ බව ජනාධිපති සිරිසේන ඒ අවස්ථාවේදී කීවේය.

‘මගේ කැමැත්ත අනුව යොදාගන්න යුවාන් බිලියන 2ක මුදලක් චීන ජනාධිපතිවරයා මට දුන්නා. ඒ මුදල් උපයෝගි කරගෙන සෑම මැතිවරණ කොට්ඨාසයකම නිවාස හැදීමේ වැඩපිළිවෙළක් ගැන යෝජනාවක් මම චීන තානාපතිට දෙනවායැ’යිද මෛත‍්‍රීපාල සිරිසේන මහතා එහිදී කියා තිබේ.

චීන යුවාන් බිලියන දෙකක් යනු ආසන්න වශයෙන් ඩොලර් මිලියන 295කි.

පොළොන්නරුවේදී ජනාධිපතිවරයා චීනයෙන් ලැබුණු මේ තෑග්ග ගැන හෙළිදරව් කළේ, පසුගිය මාසයේදී චයිනා හාබර් ඉංජිනියරින් සමාගම මහින්ද රාජපක්‍ෂ මහතාගේ මැතිවරණ ප‍්‍රචාරණ කටයුතු සඳහා ඩොලර් මිලියන 7.6ක මුදලක් ලබාදී ඇති බව නිව්යෝර්ක් ටයිම්ස් පුවත්පත වාර්තා කිරීමත් සමග රට පුරා විශාල ආන්දෝලනයක් පැතිර ගොස් තිබියදීය.