ජනවාරි මාසයේදී චීනයේ සිට මෙරටට රැගෙන ආ ලාංකික සිසුන්ගේ ගුවන් ටිකට්පතක් සඳහා රුපියල් 60,000ක මුදලක් අය කරගෙන ඇති බව අනිද්දාට වාර්තා වේ.

ඉන්දීයාවේ සිට මෙරටට අපේ‍්‍රල් 25 වන දින පැමිණීමට නියමිත සිසුන්ගෙන් මුදල් අයකරන බවට පුවත් පළවීමෙන් අනතුරුව ජනවාරි මස 28 හා 29 දිනවල චීනයේ සිට පැමිණි සිසුන් කිහිපදෙනෙකුගේ මාපියෝ අප වෙත අදහස් දක්වමින් මේ බව පැවසූහ.

චීනයේ  සිර වී සිටි තම දරුවන් ගෙන්වා ගැනීමේදී ටිකට්පතක් වෙනුවෙන් රුපියල් 130,000ක් ඉල්ලූ බවත්, එම මුදල් ගෙවීමේ හැකියාව නොමැති බව ප‍්‍රකාශ කිරීමෙන් පසු ටිකට්පතක මිල පහත දමා රුපියල් 60,000ක් ඉල්ලූ බවත් ඔවුහු පැවසූහ.

මෙලෙස රජයේ මැදිහත්වීමෙන් විදේශ රටවල සිට ගෙන්වන සිසුන්ගෙන් ටිකට්පත් සඳහා මුදල් අයකිරීම පිළිබඳව ශ‍්‍රී ලංකන් ගුවන් සමාගමෙන් කළ විමසීමකදී එම සමාගමේ ඉහළ නිලධාරියෙකු ප‍්‍රකාශ කළේ සිසුන් ගෙන්වාගැනීම සඳහා මගීන් රහිතව ගුවන්යානා යැවීමට සිදුවූ බවත් එම ගුවන් ගමන්වල පිරිවැය ආවරණය කරගැනීමට මුදල් අය කිරීමට සිදුවූ බවත්ය. චීනයේ වුහාන් ප‍්‍රාන්තයේ සිටි සිසුන් ගෙන්වාගත් අවස්ථාවේ පමණක් මුදල් අය නොකළ බව එම නිලධාරියා කීය.