‘කරූ ජයසූරිය කථානායකතුමාට කිව්වා මට රනිල් වික‍්‍රමසිංහගේ ප‍්‍රතිපත්ති ගැළපෙන්නේ නැහැ. මට ඔහු එක්ක වැඩ කරන්න බැහැ. ඒ නිසා කරූ ජයසූරියගෙන් මම ඇවිටිලි කළා අගමැතිධූරය බාරගන්න කියලා. මම වැන්ඳේ නැති ටික විතරයි. කරූ ජයසූරිය කිව්වා අවසානයේදී හෙට හම්බවෙමු කියලා. මාව හම්බවෙන්න තනිවම එනවා කියපු කරූ ජයසූරිය පහුවදා මගේ නිල නිවසට ආවා රනිල් වික‍්‍රමසිංහ එක්ක. ඔහු කිව්වා රනිල් වික‍්‍රමසිංහට විරුද්ධ වෙන්න බැහැ කියලා. මම එතැනින් අත්හැරියේ නැහැ. මාස දෙකකට කලින් එක්සත් ජාතික පක්ෂයේ නියෝජ්‍ය නායක සජිත් පේ‍්‍රමදාසට එන්න කියලා කිව්වා ඔබේ නායකයා මට ගැළපෙන්නේ නැහැ කියලා. මම සජිත්ට කිව්වා රනිල්ව අයින් කරමු. ඔබ බාරගන්න කියලා. කරූ ජයසූරිය මහත්තයා වගේම සජිත් පේ‍්‍රමදාස මහත්තයාත් කිව්වා නායකතුමා එක්ක මට හැප්පෙන්න බැහැ කියලා. ඒ නිසා මම තීන්දු කළා රටට ගැළපෙන නායකයෙක්ව හොයන්න. මේ රටේ දේශීයත්වය අගය කරන, සංස්කෘතිය අගය කරන, රටට ආදරය කරන මට ගැලපෙන මිනිහෙක්ව.’ මේ ජනාධිපති මෛත‍්‍රීපාල සිරිසේන විසින් නොවැම්බර් 06 වැනිදා සිදුකළ ප‍්‍රකාශයකින් කොටසකි. ඒ ප‍්‍රකාශය අනුව රනිල් වික‍්‍රමසිංහව ඉවත් කිරීමේ වුවමනාව මෛත‍්‍රීපාල සිරිසේනට තිබී ඇත්තේ මාස කිහිපයක සිටය.

එහෙත් ආණ්ඩුව අක‍්‍රීය කොට, පාර්ලිමේන්තුවේ සැසිවාරය අවසන් කොට නීතිවිරෝධී ආණ්ඩුවක් පත් කිරීමට උත්සාහ කිරීමේ කුමන්ත‍්‍රණය සාධාරණීකරණය කිරීම සඳහා මෛත‍්‍රීපාල සිරිසේන ජනාධිපතිවරයා ඇතුලූ බොහෝ දෙනෙක් මුලින් කී හේතුව වුණේ ජනාධිපතිවරයාව ඝාතනය කිරීමට සැලැස්මක් තිබුණු නිසා ආණ්ඩුව වෙනස් කිරීමට සිදුවූ බවයි. එහෙත් නාමල් කුමාර නම් පුද්ගලයා විසින් නියෝජ්‍ය පොලිස්පති නාලක සිල්වා සමඟ දුරකථන සංවාද කිහිපයක හඬපට පෙන්වමින් ජනාධිපති මෛත‍්‍රීපාල සිරිසේනව ඝාතනය කිරීමේ සැලැස්මක් ඇතැයි ප‍්‍රකාශ කළේ සැප්තැම්බර් 13 වැනිදාය. එහෙත් ජනාධිපතිවරයාගේ ඉහත කී ප‍්‍රකාශය හා කුමන්ත‍්‍රණ කතාව එකිනෙකට පරස්පර බව පැහැදිළි කාරණයකි. සැප්තැම්බර් 13 වැනිදාට පෙර සිටම ජනාධිපතිවරයාට ආණ්ඩුව වෙනස් කිරීමේ වුවමනාවක් තිබුණු බව පෙනී යයි.

නාමල් කුමාර
නාමල් කුමාර පොලීසිය වෙත ඔත්තු සැපයූ අයෙකි. ඔහුව ඔත්තු බැලීම සඳහා යොදවා තිබුණේ අමිත් වීරසිංහ, ඩෑන් ප‍්‍රියසාද් ඇතුලූ මුස්ලිම් විරෝධී අන්තවාදී සංවිධාන අතරටය. නාමල් කුමාර එම අන්තවාදීන් සමග සමීපව ගණුදෙනු කර ඇති අතර නාලක සිල්වා නියෝජ්‍ය පොලිස්පතිවරයා සමගද සම්බන්ධතා පවත්වා තිබුණි. නාමල් කුමාර විසින් ජනාධිපති මෛත‍්‍රීපාල සිරිසේන ඝාතන කුමන්ත‍්‍රණයක් පිළිබඳ පෙන්වන්නේ එක් හඬපටයක් පදනම් කරගෙනය.
‘‘දැන් ජනාධිපතිතුමයි අගමැතිතුමයි පැටලිලානේ ඉන්නෙ. අපි අගමැතිතුමාව තමයි පුම්බන්න ඕනෑ. අගමැතිතුමාට ලකුණු ගන්න විදියට කරමුකෝ වැඬේ. ජනාධිපතිතුමාව පුම්බන්න විදියක් නැත්තේ, ජනාධිපතිතුමා ළං කරගෙන ඉන්න එවුන් එකෙක්වත් විශ්වාස නැහැනේ. උන් ඔක්කොම ගෝඨාභයට වැඩ කරන උන් ටිකක් ළං කරගෙන ඉන්නේ. බුද්ධි ලොක්කත් ගේමේ ඉන්නේ. ජනාධිපතිතුමාව අතරමං කරන ගේමක් යන්නේ. එයාට තේරෙන්නේ නැහැ ඒක. බලන්නකෝ 2019 වෙනකොට අතරමං කරන විදිය.’’ නියෝජ්‍ය පොලිස්පති නාලක සිල්වා තමන්ගේ සීමාව ඉක්මවමින් කටයුතු කර ඇති බවට සැකයක් නැත. එහෙත් මේ සංවාදවලින් පෙනෙන අන්දමට එය කිසිසේත්ම ජනාධිපතිවරයාව ඝාතනය කිරීමේ කුමන්ත‍්‍රණයක් පිළිබඳ කතාබහක් නොවේ. කිසිවක් කළ නොහැකි වුණොත් මාකඳුරේ මධුෂ් ලවා ජනාධිපති මෛත‍්‍රීපාල සිරිසේනට සහ ගෝඨාභය රාජපක්ෂට ගේමක් දිය යුතු බව කතාව අවසානයේදී නාලක සිල්වා කියයි. එය ඝාතන සැලැස්මක් ලෙස අර්ථ දැක්වීමේ හැකියාවක් ඕනෑම අයෙකුට ඇති බව සැබෑය. එහෙත් ඒ කතාව එතැනින් එහාට ඔප්පු කිරීමට නම් ඉන් එහා ගිය සාක්ෂි තිබිය යුතුය.

පෞද්ගලික කතාබහක් පටිගත කිරීමේදී වැදගත් කාරණයක් සිහිතබාගත යුතුය. එනම්, පෞද්ගලික කතාබහකදී අපි විවිධාකාර අදහස් දැක්වීමේ ඉඩක් ඇති බවයි. අහවලාව මරන්න වටින බව කියන්නට ඉඩ තිබේ. අහවලාට අප කළ උදව්ව වෙනුවෙන් සල්ලි ඉල්ලාගන්න ඕනෑ බව කියන්නට ඉඩ තිබේ. ඕනෑම දෙයක් පෞද්ගලික සාකච්ඡුාවකදී කළ හැකිය. ඒ නිසා මාකඳුරේ මධුෂ්ට කියා ගෝඨාභය රාජපක්ෂව සහ මෛත‍්‍රීපාල සිරිසේනව අවසන් කළ යුතුයැයි නාලක සිල්වා විසින් කළ ප‍්‍රකාශය සාමාන්‍යයෙන් කතාවක් මැද්දට යෙදූ යෙදුමක් පමණක් විය හැකිය. මොකක්වත් කරගන්නට බැරිවුනොත් මෙහෙම කරමුයැයි සාමාන්‍ය සාකච්ඡාවලදී ඕනෑම අයෙක් එවැනි කතා කීමේ ඉඩක් ඇත. පෞද්ගලික සාකච්ඡුාවලදී පමණක් නොව සරත් වීරසේකර, කමල් ගුණරත්න වැනි කුප‍්‍රකට චරිත විසින් දේශද්‍රෝහීන්ව ඝාතනය කළ යුතු බව ප‍්‍රසිද්ධ රැස්වීම්වලදීද කියා ඇත. අහවලාව මරා දැමිය යුතුයැයි ප‍්‍රසිද්ධියේ පුද්ගලයන් විසින් පැවසූ අවස්ථා බොහෝය. එවැනි ප‍්‍රකාශයකින් ඝාතන කුමන්ත‍්‍රණයක් තහවුරු වෙන්නේ නැත.

අවංකව යමක් කිව යුතුය. ලියුම්කරු මාධ්‍යවේදියෙක් ලෙස ලංකාවේ ප‍්‍රබල ඇමතිවරුන්, මන්ත‍්‍රීවරුන් බොහෝ දෙනෙකු සමග සම්මුඛ සාකච්ඡා පවත්වා ඇත. ඕනෑම සම්මුඛ සාකච්ඡාවක් පවත්වන්නට පෙර එම සාකච්ඡාව පටිගත කරන බව කියා පටිගත කිරීමට අවසර ලබාගැනීමට ජනමාධ්‍ය ආචාරධර්ම අනුව ලියුම්කරු විසින් කටයුතු කළ යුතුය. කෙසේ වුව පූර්වයෙන් දැනුම් දී පටිගත කරන සාකච්ඡුාවලදී පවා ඇතැම්විට ඇමතිවරුන් අහවලාට ගේම දිය යුතු බව කියා ඇත. සමහර ප‍්‍රබල පුද්ගලයන් විසින් සිදුකළ අපරාධ පිළිබඳව, අහවල් ඝාතනයට වගකිව යුත්තේ අහවලාය යන්න ඇමතිවරුන් කී අවස්ථා ඇත. අල්ලස් ගැනීමේ සිදුවීම් ගැන ඇමතිවරුන් කළ ප‍්‍රකශයන් එවැනි සාකච්ඡාවලදී පටිගත වී ඇත. එවැනි නොනිල කතාවක් කී පසුව, ‘ඒ කෑල්ල දාන්න එපා’ යැයි ඉන්පසුව කීම සිරිතය. එවැනි හඬපට කිහිපයක්ම ලියුම්කරු ළඟද ඇතත් ඒවා ප‍්‍රසිද්ධ කිරීමේ හැකියාවක් නැත. අනෙක් අතට එවැනි හඬපටයක් ප‍්‍රසිද්ධ කළ පමණින් ඔවුන්ගේ වචනය මත පදනම්ව කුමන්ත‍්‍රණ සැලසුම්, අපරාධ සැලසුම් හෙළි කිරීමේ හැකියාවක්ද නැත

.
කෙසේ වෙතත් අපරාධ පරීක්ෂණ දෙපාර්තමේන්තුව විසින් නාමල් කුමාර විසින් ලබාදුන් හඬපටි පරීක්ෂා කර තිබුණි. එම හඬපටිවල ඝාතන සැලැස්මක් පිළිබඳව සැලසුම් සහගත සාකච්ඡා තිබී නැත. තිබී ඇත්තේ ඉහතින් හෙළිකළ හඬපටය පමණි. ඊට අමතරව නාලක සිල්වා නියෝජ්‍ය පොලිස්පතිවරයාව අත්අඩංගුවට ගෙන ප‍්‍රශ්න කිරීමෙන්ද ඝාතන සැලැස්මක් පිළිබඳ වැඩි විස්තර හෙළිවී තිබුණේ නැත. රහස් පොලිස් ආරංචි මාර්ග තහවුරු කරන්නේ එයයි. අනෙක් අතට එවැනි වැඩි විස්තරයක් තිබුණේනම් මේ වෙද්දීත් එය මෛත‍්‍රීපාල සිරිසේන පාර්ශ්වය විසින් ප‍්‍රසිද්ධ කොට හමාරය. වැඩි විස්තර ප‍්‍රසිද්ධ නොකරන්නේ කිසිම වැඩි විස්තරයක් නැති නිසාය.

නාමල් කුමාර විසින් එක් හඬපටයක් පෙන්වීමෙන් පසුව, ඔහු කියන සියලූ‍ දේ සත්‍ය යැයි පිළිගනිමින්, මාධ්‍ය හරහා ඔහුට මහා ඉහළ වටිනාකමක් ලබාදීමට දැන් පටන්ගෙන ඇත. ඒ නාමල් කුමාර යනු රහස් ළඟ තබාගෙන සිටින බුද්ධි ප‍්‍රධානියෙක් නොවේ. ඔහු නිකන්ම පොලිස් ඔත්තුකරුවෙක් පමණි. ස්මාට් ජංගම දුරකථනයකින් පොලිස් නිහෙත් නිලධාරියෙකු සමග සාකච්ඡුා පටිගත කිරීම ඔහු කළ එකම වීර ක‍්‍රියාවයි. මෛත‍්‍රීපාල සිරිසේනව ඝාතනය කරන්නට අගමැති රනිල් වික‍්‍රමසිංහ හා අමාත්‍ය සරත් ෆොන්සේකා සම්බන්ධ බව මාධ්‍ය සාකච්ඡුාවක් පවත්වා නාමල් කුමාර කළ ප‍්‍රකාශය මාධ්‍ය හරහා ප‍්‍රසිද්ධ කර තිබුණි. එහෙත් නාමල් කුමාර විසින් අපරාධ පරීක්ෂණ දෙපාර්තමේන්තුව වෙත අග‍්‍රාමාත්‍ය රනිල් වික‍්‍රමසිංහ හා සරත් ෆොන්සේකා සම්බන්ධයෙන් කිසිදු පිළිගත හැකි සාක්ෂියක් ඉදිරිපත් කර නොතිබුණි. නාලක සිල්වාව ප‍්‍රශ්න කිරීමෙන්ද ඝාතන කුමන්ත‍්‍රණයක් පිළිබඳව වැඩි විස්තර ඉදිරිපත් කර තිබුණේ නැත. රටක අග‍්‍රාමාත්‍යවරයා විසින් ජනාධිපතිවරයාව ඝාතනය කරන්නට සූදානමින් සිටින බව, පොලිස් නිලධාරියෙකුගේ හඬ පටයක් පමණක් ළඟ තබාගෙන සිටින පොලිස් ඔත්තුකරුවෙක් ප‍්‍රකාශ කරන්නේ කුමන පදනමක් මතද යන්න අපට ඇති පැනයයි.

මාකඳුරේ මධුෂ්
මාකඳුරේ මධුෂ් නම් විදේශගතව සිටින පාතාල නායකයා ගෝඨාභය රාජපක්ෂව ඝාතනය කිරීමේ වුවමනාවකින් පසුවෙන බව නාලක සිල්වා නියෝජ්‍ය පොලිස්පතිවරයාගේ හඬපටයෙන් පමණක් නොව තවත් පොලිස් නිලධාරීන්ගේ ප‍්‍රකාශවලින්ද අපට තහවුරු කරගත හැකිවූ කාරණයකි. ඊට අමතරව දේශපාලනඥයන් කිහිපදෙනෙක්ද මාකඳුරේ මධුෂ්ගේ පවුල සමග සම්බන්ධයක් ඇති අයෙක්ද හරහා අපට දැනගන්නට ලැබී ඇති කාරණයක් වන්නේ මාකඳුරේ මධුෂ්ට ගෝඨාභය රාජපක්ෂ සමග දැඩි වෛරයක් ඇති බවය. නාලක සිල්වාගේ හඬපටයෙහි ඇත්තේ කිසිවක් කරගත නොහැකි නම් මධුෂ් ලවා හෝ ගෝඨාභයට හා මෛත‍්‍රීපාලට වැඬේ දිය යුතු බවය. එය සාමාන්‍යයෙන් අප වුව කතාබහකදී සිදුකරන අන්දමේ යෙදුමක් පමණක් විය හැකිය. කෙසේ වෙතත් මධුෂ්ගේ ගෝඨා විරෝධය යනු ඉතිහාසයක් ඇති කාරණයකි.

හේතුවක්
ජනාධිපති මෛත‍්‍රීපාල සිරිසේන විසින් මේ ඝාතන කුමන්ත‍්‍රණය මුලින් ඉදිරිපත් කළේ ආණ්ඩුව වෙනස් කිරීමේ කුමන්ත‍්‍රණය සාධාරණීකරණය කරගැනීමටය. එහෙත් ජනාධිපතිවරයාගේ කටෙන්ම හෙළිවී තිබෙන්නේ ජනාධිපතිවරයා කුමන්ත‍්‍රණ කතාව ප‍්‍රසිද්ධ වෙන්නට පෙර සිටම රනිල් වික‍්‍රමසිංහව ඉවත් කිරීමේ වුවමනාවකින් සිටි බවයි.
ඕනෑම ක‍්‍රියාවක් සමාජය ඉදිරියේ සාධාරණීකරණය කරගැනීමට නම් හොඳ හේතුවක් අවශ්‍ය වෙයි. සිදුකරන ක‍්‍රියාව තීරණාත්මක වන තරමට තීරණය සඳහා හේතුවන ක‍්‍රියාවත් තීරණාත්මක විය යුතුය. ඇතැම්විට යම් ක‍්‍රියාවක් සඳහා හේතුවූ සැබෑ හේතුව ප‍්‍රසිද්ධියේ කිව නොහැකිය. ඒ නිසා වෙනත් ව්‍යාජ හේතුවක් නිර්මාණය කිරීමට හේතුවෙයි. ඇතැම්විට එලෙස නිර්මාණය වෙන ව්‍යාජ හේතුව පදනම් සහගත එකක් විය යුතු නැත. එය සත්‍යය නොවේ. සත්‍යය නොවන බව ක‍්‍රියාව කරන්නා මෙන්ම ක‍්‍රියාව දෙස බලා සිටින්නෝද හොඳින් දනිත්.

ඔක්තෝම්බර් 26 වැනිදා ලංකාවේ සිදුවූ දේශපාලන කුමන්ත‍්‍රණයටද පසුබිම් වූ සැබෑ හේතුව එකකි. සමාජයට පෙන්වූ හේතුව අනෙකකි. ජනාධිපතිවරයාව ඝාතනය කිරීමට කුමන්ත‍්‍රණයක් ඇති නිසා හදිසියේ ආණ්ඩු වෙනසක් අවශ්‍ය වූ නැගෙන තර්කය මෛත‍්‍රීපාල සිරිසේන හා මහින්ද රාජපක්ෂගේ බල අවශ්‍යතාවය වෙනුවෙන් සිදුකළ කුමන්ත‍්‍රණයක් සාධාරණීකරණය සඳහා යොදාගත් බව පැහැදිළි කාරණයකි.

සත්‍යය සහ ව්‍යාජය
සිදුවීම පැහැදිළි කරන්නට ඇමෙරිකන් මල්ලවපොර ඇසුරෙන් ඇමෙරිකානු දේශපාලන විචාරකයන් පෙන්වාදුන් කාරණයක් ගත හැකිය. මොහොතකට ලංකාවේ සිදුවූ කුමන්ත‍්‍රණය පසෙකින් තබා මල්ලවපොර වෙත යා යුතුය.
ඇමරිකන් මල්ලවපොර හෙවත් රෙස්ලින් යනු තිර පිටපතකට අනුව සිදුකෙරෙන රංගනයකි. එහි සටන්වල අවසාන ප‍්‍රතිඵලය ලැබෙන්නේ පූර්වයෙන් සැලසුම් කළ ආකාරයටය. එය මේ වෙද්දී දැවැන්ත ප‍්‍රසංගයක් බවට පත්ව ඇත. රූපවාහිනී වැඩසටහනක් බවට පත්ව ඇත. මේ වැඩසටහනේ අඛණ්ඩභාවය පවත්වාගෙන යෑමට කතාවක් අවශ්‍ය වෙයි. අප දන්නා යථාර්තය වෙනුවට කෘත‍්‍රිමව නිර්මාණය කළ යථාර්ථයක් අවශ්‍ය වෙයි. රෙස්ලින් සඳහා කෘත‍්‍රිමව නිර්මාණය කළ යථාර්ථය කේෆෙබ් ලෙස හඳුන්වයි. මෙය සැබෑව නොව, කෘත‍්‍රිම යථාර්ථයක් බව පේ‍්‍රක්ෂකයා හොඳින් දන්නේය.
චිත‍්‍රපටියක, වේදිකා නාට්‍යයක හෝ වෙනත් ප‍්‍රසාංගි ක නිර්මාණයකදී, නිර්මාණය කළ යථාර්ථය සහ රෙස්ලින් කේෆෙබ් එක වෙනස් වෙන්නේ සරල හේතුවක් නිසාය. චිත‍්‍රපටියකදී නිර්මාණය කළ යථාර්ථය චිත‍්‍රපටියට සීමා වෙයි. එය චරිතයක් බව පිළිගනු ලබයි. එහෙත් රෙස්ලින්වලදී කෘත‍්‍රිම යථාර්ථය සැබෑ ලෝකයේදීත් සැබෑවක් වෙයි.

සරල උදාහරණයක් ගමු. අන්ඩර්ටේකර් යන රෙස්ලින් තරුව බිහිවෙන්නේ ඒ නිර්මාණය කළ යථාර්ථය තුළය. මාක් කැලවේ නම් පුද්ගලයා විසින් අන්ඩර්ටේකර් චරිතය නිරූපණය කරයි. ත‍්‍රිපල් එච් නම් චරිතය නිරූපණය කරන්නේ පෝල් ලෙවෙන්ස්කි විසිනි. කිසි දිනෙක ජනප‍්‍රිය රූපවාහිනී වැඩසටහනකදී, සම්මුඛ සාකච්ඡුාවකදී මාක් කැලවේ, පෝල් ලෙවෙන්ස්කි හමු වෙන්නේ නැත. රෙස්ලින් පිටියෙන් පිටතදී පවා හමුවෙන්නේ අන්ඩර්ටේකර් සහ ත‍්‍රිපල් එච්වය. එහෙත් චිත‍්‍රපටියක චරිතයක් රඟපාන නළුවෙක් සැබෑ ජීවිතයේදී ඒ චරිතය ලෙසම ජීවත්වෙන්නේ නැත. කේෆෙබ් සහ සිනමාවක මැවෙන යථාර්තය දෙකක් වෙන්නේ එලෙසය.

කේෆෙබ් එකක වැදගත්ම කොටස වන්නේ පේ‍්‍රක්ෂකයා සහ මේ කෘත‍්‍රිම යථාර්ථය නිර්මාණය කරන රෙස්ලින් සමාගම යන දෙපාර්ශ්වයම මේ සිදුවන්නේ සැබෑ සිදුවීමක් නොවන බව දැන සිටීමය. සැබෑව අනෙකක් බව දැන දැනම රෙස්ලින් සමාගම විසින් නිර්මාණය කර දෙන කෘත‍්‍රිම යථාර්ථය රෙස්ලින් රසිකයන් අන්ධ භක්තියෙන් විශ්වාස කරයි. ඒ අන්ධ භක්තිකයන් කිසිවෙක් මෙය සැබෑවක් නොවද බවද හොඳින් දැන සිටියි.

ඇමෙරිකානු දේශපාලන විද්‍යාඥයන් මෑත කාලයේ පෙන්වාදුන්නේ ඩොනල්ඞ් ට‍්‍රම්ප් වැනි දේශපාලනඥයන් ඇමෙරිකාවේ ක‍්‍රියාත්මක වෙද්දී ඇමෙරිකානු දේශපාලනයද සම්පූර්ණයෙන්ම කේෆෙබ් එකක් බවට පත්ව ඇති බවයි. ට‍්‍රම්ප් විසින් අලූ‍ත් යථාර්තයන් නිර්මාණය කරයි. එය සැබෑවක් නොවන බව දැන දැනම ට‍්‍රම්ප්වාදීන් ඒවා විශ්වාස කරයි.
ජනාධිපති මෛත‍්‍රීපාල සිරිසේන මහතාව ඝාතනය කිරීමට දැවැන්ත කුමන්ත‍්‍රණයක් සිදුවෙන බවට නැෙඟන තර්කයද එවැනි දැවැන්ත කේෆෙබ් එකක් පමණි. එය මහා බොරුවක් බව අපි හොඳින් දන්නෙමු. ජනාධිපතිවරයාද හොඳින් දන්නේය. ජනාධිපතිවරයාට සහාය දක්වන අයත් හොඳන් දන්නේය. මාධ්‍යයද දන්නේය. නාමල් කුමාරද දන්නේය. අනෙක් හැම පාර්ශ්වයක්ම මෙය බොරුවක් බව හොඳින් දන්නා බවත් සියලූ‍දෙනා දන්නේය. එහෙත් එය සැබෑවක් ලෙස පිළිගනිමින් සියල්ලන්ම රංගනයක යෙදෙමින් සිටින්නේය. ඒ පසුපස ඇත්තේ එපමණකි. තව වසරක් දෙකක් යද්දී ඝාතන කුමන්ත‍්‍රණ කතාව පට්ටපල් බොරුවක් බව හොඳින්ම තහවුරු වනු ඇත්තේ මේ පරීක්ෂණවලට මෙතැනින් එහා අඩියක්වත් යෑමේ ඉඩක් නැති නිසාය.