ජනාධිපති මෛත‍්‍රිපාල සිරිසේන සහ හිටපු ආරක්ෂක ලේකම් ගෝඨාභය රාජපක්ෂ ඝාතනය සඳහා කුමන්ත‍්‍රණයක් කල බවට චෝදනා එල්ල වී ඇති ත‍්‍රස්ත විමර්ශන ඒකකයේ නියෝජ්‍ය පොලිස්පති නාලක සිල්වා මෙම ලිපිය ලියන මොහොත වන විට අනිවාර්ය නිවාඩු යවා ඇත. එම ‍කුමන්ත‍්‍රණය හා සම්බන්ධ තොරතුරු මාධ්‍යට හෙළිකල නාමල් කුමාර පොලීසිය පොරොන්දු වූ ආරක්ෂාව ලබා නොදුනැයි චෝදනා කරමින් වරකාපොල පදිංචි සිය නිවස අතහැර ගොස් ඇත.

ජනාධිපති මෛතී‍්‍රපාල සිරිසේනහා ‍ඝෝඨාභය රාජපක්ෂ ඝාතන කුමන්ත‍්‍රණයක් බවට ඒත්තු ගැන්වෙන තොරතුරු එළියට එන්නේ එකිනෙකා පරයා නැගී සිටීමට වෙර දරන ජතිවාදී කල්ලි කණ්ඩායම් කීහිපයක් හා සමීපව කටයුතු කරමින් ඔවුන්ගේ තොරතුරු පොලිස් ත‍්‍රස්ත විමර්ශන කොට්ඨාශයට ලබා දුන්නේ යැයි පවසන පොලිස් ඔත්තුකරුවෙකු ලෙස පෙනී සිටි නාමල් කුමාර සමග එම ජාතිවාදී කණ්ඩායම් ඇතිකර ගත් ගැටුමකින් පසුවය. ඉන්පසුව මෙම ගැටුම නාමල් කුමාර සහ පොලිසිය අතර විරසකයක් නිර්මාණය වන තැනට එනතෙක් උඩු දුවා ඇත. එහි ප‍්‍රතිඵලයක් ලෙස මේ ඝාතන තැත පිළිබඳව කතාව කරළියට පැමිණෙයි. අනික් පැත්තෙන් ඒකාබද්ධ විපක්ෂයේ දේශපාලන උවමනාවන්ට මෙම ඝාතන කුමන්ත‍්‍රණය යන කඬේ යාම දැන් අපි කතාවට යමු. නාමල් කුමාර යනු කවුරුන්ද?

සිංහල ජාතික සංවිධානයේ ක‍්‍රියාකාරිකයෙකු වන ඩෑන් ප‍්‍රියසාද් සම්බන්දයෙන් ත‍්‍රස්ත විමර්ශන කොට්ඨාශයේ නියෝජ්‍ය පොලිස්පති නාලක සිල්වා කල ප‍්‍රකාශයක හඬපටයක් ඩෑන් ප‍්‍රියසාද්ට ඇසීටම සලස්වා නාමල් කුමාර ඩෑන් ප‍්‍රියසාද්ට ප‍්‍රවෙසම් වන ලෙසත් තමන් සමග හැප්පුනහොත් කරදර වන බවත් පවසමින් තර්ජනය කර ඇත. නාමල් කුමාර මෙම තර්ජනය සිදුකර ඇත්තේ 2018/6/18 දින ඥානසාර හිමියන් සම්බන්ධයෙන් පිටකොටුවේ පැවති සත්‍යග‍්‍රයකදීය. එම තර්ජනය සම්බන්ධයෙන් හා අදාළ හඬපටයේ ප‍්‍රකාශය ගැන ඩෑන් ප‍්‍රියසාද් නාලක සිල්වාගෙන් විමසීමක් කිරීමෙන් පසුව ඔහු විසින් නාමල් කුමාරට දුරකථනයෙන් බැන වැදී ඇත. නියෝජ්‍ය පොලිස්පති නාලක සිල්වා හා ඔහුගේ ඔත්තුකරුවකු ලෙස කටයුතු කල නාමල් කුමාර අතර විරසකය ආරම්භ වන්නේ මෙලෙසය. අනෙක් පැත්තෙන් මේ විරසකය පිටුපස මුදල් ගණුදෙනු ඇති බවද දැනගන්නට ලැබේ. නාලක සිල්වා සිය ඔත්තුකරු නාමල් කුමාර අතහැර දමන්නේ මෙම සිදුමෙන් පසුවය.

එම විරසකයෙන් මාස 4කට පසු පසුගිය සැප්තැම්බර් 12 දින මහනුවර දී මාධ්‍ය හමුවක් කැදවමින් දුෂණ විරෝධී බලකාය නම් සංවිධානයක් විසින් නියෝජ්‍ය පොලිස්පති නාලක සිල්වාට චෝදනා කරන්නේ ඔහු ඝාතන කුමන්ත‍්‍රණයක් සැලසුම් කරමින් ජනාධිපතිවරයා හ ඝෝඨාබය රාජපක්ෂ ඝාතනයට සූදානම් වූ බවටය. මෙම චෝදනාව එල්ල කරන දුෂණ විරෝධී බලකායේ එහි මෙහෙයුම් අධ්‍යක්ෂවරයා වශයෙන් පෙනී සිටින්නේ ඉහත සදහන් පොලිස් ඔත්තු කරුවන නාමල් කුමාරය. මෙම මාධ්‍ය හමුවේදී ඔහු සදහන් කල දේ මෙන්ම පසුව මාධ්‍යට
පවසන කරුණුත් අතර බරපතල පරස්පර තාවයන් රැුසක් පවතී. ඔහු මාධ්‍යට ඉදිරිපත් කල හඬපටය තුළ කිසිදු පුද්ලගයෙකු ඝාතනය කිරීමක් හා සම්බන්ධ ප‍්‍රකාශයක් නැත. නාමල් කුමාර නුවර පැවති මාධ්‍ය හමුවේදී පවසන්නේ නියෝජ්‍ය පොලිස්පතිවරයා මාස දෙකකට පමණ පෙර මේ කුමන්ත‍්‍රණය සම්බන්ධයෙන් කතාකල බවයි.

එහෙත් අපකල විමසීමට නාමල් කුමාරගේ පිළිතුර වන්නේ මාස 4කට පෙර මෙම කාරණය නාලක සිල්වා තාමාට පැවසූ බවයි. මෙම මාධ්‍ය හමුවේදී නාමල් කුමාර ඉදිරිපත් කරන කරුණු ඔහු ඉදිරිපත් කරන හඬපටවල නැත්තේ ඇයිදැයි යන ප‍්‍රශ්නයට ඔහුගේ පිළිතුර වන්නේ තමා මාධ්‍ය හමුවට ඉදිරිපත්කළේ තමා සතුව පවතින පටිගත කිරීම්වලින් කොටසක් පමණක් බවයි. නාමල් පවසන ආකාරයට ඔහු සමග කතාකරන ඕනෑම අයෙකු කියන කරුණු පටිගත කරීමේ පුරුද්දක් ඔහුට ඇත.

‘‘අපි දුෂණ විරෝධී බලකාය ආරම්භ කලේ 2017 අවුරුද්දේ. මේ සංවිධානය රට පුරා ක‍්‍රියාත්මක වෙනවා අපිට එක් දිස්ත‍්‍රික්කයකට එක් නියෝජතයෙක් වශයෙන් නියෝජිතයන් 25 ඉන්නවා. රටට අහිතකර යම් දුෂණ ක‍්‍රියාවක් වෙනවානම් අපේ නියෝජිතයන් මට දැනුම් දෙනවා. මම දුෂණ විරෝධී බලකායේ මෙහෙයුම් අධ්‍යක්ෂවරයා වශයෙන් එම තොරතරු නීතිය ක‍්‍රියත්මක කරණ ආයතන වලට දැනුම් දෙනවා. අපි හැමොම වැටුප් නැතිව ස්වේච්ඡුාවෙන් වැඩ කරණ අය.”‍ නාමල් තමන්ගේ සංවිධානය ගැන කියන්නේ එවැනි කතාවකි. ඔහුට අනුව එම සංවිධානයේ අරමුණ රට ජාතිය ආරක්ෂා කර ගැනීමය.

කෙසේ වෙතත් සැප්තැම්බර් 12 දා පැවති මාධ්‍ය හමුවේදී දුෂණ විරෝධී බලකාය මාධ්‍ය හමුවට මාධ්‍යවේදීන් කැඳවන්නේ මහසොහෙන් බලකායේ අමිත් වීරසිංහ අත්ඩංගුවට ගැනීම හා සම්බන්ධ තොරතුරු කිහිපයක් හෙළි දරවුකිරීමට බව පවසමිනි. එහිදී ඔහු පවසන කාරණයක් වන්නේ නාලක සිල්වා විසින් අමිත් වීරසිංහ අත්අඩංගුවට ගන්නේ අසත්‍ය තොරතුරු මත පදනම් වෙමින් බවයි. ඒ ප‍්‍රකාශය ඔහු කරන්නේ අපි මුලින් කි නාලක සිල්වාගේ හඬ පටය මාධ්‍යට ඉදිරිපත් කිරීමෙන් අනතුරුවය.

එහෙත් නාමල් එම මාධ්‍ය හමුවෙන් දින 5කට පසු ‍අප සමග පවසන්නේ මෙවන් කතාවකි. ”‍අමිත් වීරසිංහව අත්ඩංගුවට ගන්න තොරතුරු දුන්නේ මමයි. නාලක සිල්වා කිවුවා තෙල්දෙනියේ සිද්ධියට කොහම හරි අමිත්ව අල්ල ගන්න ඕන කියලා. මම ඒ වලාවේ ඇහුවා පොලිස්පතිතුමා එහෙම කිවුවද කියලා. ඔහු කිවුවා ඔව් කියලා. 2018 මාර්තු 17 ඒ සදහා කොලඹ ඉදලා නාලක සිල්වාත් සමග නුවර ගියා. ගිහිල්ලා අමිත්ලා ළඟට කිට්ටුවෙන ක‍්‍රමයක් හදාගත්තා. පස්සේ එතැනට මම ගිහිල්ලා අමිත්ලා එක්ක ?වෙනකම් හිටියා. නාලක සිල්වා මගෙන් තොරතුරක් එන තුරු මග හිටියා. පස්සේ මම පාන්දර 2.00 අපි ඉන්න තැන ගැන නාලක සිල්වාට තොරතුරු දුන්නා. නාලක සිල්වා ආවා එතන හිටපු අයව වාහන දෙකක දා ගත්තා. පස්සේ මම මගින් බැහැලා ගියා. ‘‘‍ ඔහු ගේ ප‍්‍රකාශවල තියෙන පරස්පරතාවයන් සහ ඔහු කියන ලෙසම ඔහු සහ පොලිසිය අතර තිබුණු සම්බන්ධයේ දිග පළල දැන් අපිට සිතාගන්නට පුළුවන් විය යුතුය.

පොලිසිය සහ මේ නාමල් කුමාර අතර සම්බන්ධය තවත් විශාලය. ඒ සඳහා තිබෙන තොරතුරුද අපමණය. සිංහලේ ජාතික සංවිධානයේ ඩෑන් ප‍්‍රියසාද් ඇතුළ පිරිස සැඟවීමට තැනක් ලබාදීමට යැයි පවසමින් ‍වේවැල්දෙනියට ගෙන්වා උපක‍්‍රමශීලිව ත‍්‍රස්ත විමර්ශන ඒකකයට 2016 නෙවැම්බර් 15 කොටුකර දෙන්නේද නාමල් කුමාර විසිනි. මේ සම්බන්ධයෙන් ඩෑන් ප‍්‍රියසාද් පවසන්නේ මෙවැනි කතාවකි.
‘‘‍නාමල් කුමාර කියන්නේ මුදලට පාවාදෙන්නෙක්. අපිට විශ්වාසවන්ත විදිහට කටයුතු කරලා අන්තිමට අපිව පාවලා දුන්නා. නාලක සිල්වාට කලෙත් ඒකමයි. මෙයා නිකම් කෙනෙක් නෙවෙයි ගුවන් හමුදාවේ සේවය කරමින් ඉදලා 2009 අවුරුද්දේදි පැනලා ගිය කෙනෙක්. 2018/6/18 දවසේ කොටුව බෝගහ ළඟ තිබුණු උපවාසයට නාමල් කුමාර ආවා. ඒවෙලාවේ කට්ටිය නාමල් කුමාරට දොස් කිවුවා. ඒ වෙලාවේ නාමල් මට කතා කරලා කිව්වා කටිටියට වැඩිය දඟලන්න එපා කියපං කියලා. මට නාලක සිල්වා බැනවදින හඬපටියක් දාලා අහන්න දුන්නා. පස්සේ කිව්වා වැඩිය නැටුවොත් වැඩ වරදිනවා කියලා. මම ඒක නාලක සිල්වාට කිව්වා. එකෙන් පස්සේ නාලක සිල්වා නාමල් එක්ක තරහා වුණා. නාලක සිල්වා දෙන්න තියන සල්ලි වගයක් දුන්නේ නෑ. ඒ තරහට තමයි ඔය නාලක සිල්වා කියපු කතා එලි කරන්නේ. නැත්නම් ‍දෙන්නම එකතුවෙලා තමයි ඔය කුමන්ත‍්‍රණය කරන්නේ.”‍

නාමල් කුමාර ත‍්‍රස්ත විමර්ශන එකකයේ ඔත්තුකරුවෙකු වශයෙන් කටයුතු කරන අතරතුර තවත් කණ්ඩායම් සමග ගනුදෙනු කරමින් ඔවුන්ගෙන්ද මුදල් ලබාගන තිබේ. නාමල් කුමාරම අප සමග කළ මෙම ප‍්‍රකාශයෙන් එය තහවුරුවෙයි.
‘‘මට ප‍්‍රංශයේ ඉන්න තුෂාර පීරිස් කතා කරලා කිවුවා අද්මිරාල් සරත් වීරසේකරව සම්බන්ද කරලා දෙන්න කියලා. මම ඒ වැඬේ කලා. මට තුෂාර මාසකට රුපියල් විසිතිස් දාහක් වරිවර දුන්නා. එයා හිතුවා මම එයාලට වැඩ කරන කෙනෙක් කියලා”‍

මෙම ප‍්‍රකාශයෙන් පැහැදිලි වන්නේ නාමල් කුමාර විවිධ කණ්ඩාම් සමග ගනුදෙනු කරමින් ඔවුන්ට එකිනෙකා හා සම්බන්ධ තොරතුරු සපයමින් මුදල් ලබාගත් බවයි.

අපගේ එක් තොරතුරු මූලාශ‍්‍රයක් වාර්තා කරන පරිදි නාමල් කුමාර හමුදා බුද්ධි අංශය සමගද සමීපව කටයුතු කර ඇත. ඒ අනුව ඔහු කුමන හෝ ආරක්ෂක අංශයකට සම්බන්ධව සිට ඇත. එහෙත් තමා හමුදාවේ හෝ වෙනත් අංශයක සේවය කල බව නාමල් ප‍්‍රතික්‍ෂේප කරන අතර කිසිදු අයුරක බුද්ධි තොරතුරු එකතු කිරීමක් හෝ අවි පුහුණුවක් ලබා නැති බව පවසයි. එහෙත් ඔහු ත‍්‍රස්ත විමර්ශණ කොට්ඨාශයට සැලකියුතු වැදගත් තොරතුරු ප‍්‍රමාණයක් ලබාදී ඇති බවට ඔහුම අප සමග වරිවර කළ ප‍්‍රකාශවලින් තහවුරු වෙයි.

දැන් අපි නාලක සිල්වා දෙසට හැරෙමු. ඔහුද පොලිසිය තුළ එතරම් හොඳනමක් පවත්වා ගත් අයෙකු නොවන බව පොලිසියේ බොහෝ දෙනෙකුගේ අදහසයි. නියෝජ්‍ය පොලිස්පති නාලක සිල්වා ගේ යැයි කියමින් නාමල් කුමාර ඉදිරිපත් කරන හඬ පටයේ තමාගේ කටහඬ නොවන බවත් ඉන් කියවෙන අදහස තමන් ප‍්‍රතික්ෂේප කරන බවත් පවසමින් නාලක සිල්වා ප‍්‍රකාශයක් ලබා දී ඇති බව සඳහන්ය. එමෙන්ම ත‍්‍රස්ථ විමර්ශන කටයුතු සම්බන්ධ අත්දැකීම් සහිත නිලධාරියෙකු පුද්ගලික ඔත්තුකරුවෙකු සමග මෙතරම් බැරෑරුම් ජාතික ආරක්ෂාව හා සම්බන්ධ කරුණක් සාකච්ඡා කිරීමට තරම් තත්ත්වයකට පත්වූයේ කෙසේද යන්න ගැටළු සහිතය. අනික් පැත්තෙන් මුදලට තොරතුරු සපයන්න් සම්බන්ධයෙන් බුද්ධි නිලධාරීන් අනුගමනය කරන පිළිවෙතින් බැහැරව නාලක සිල්වා කටයුතු කළේ කෙසේද යන්න ද අපහැදිලිය. කෙස් හෝ දැන් රහස් පොලිසිය මේ පිළිබඳව පරීක්ෂණ සිදුකර මූලික වාර්තාවක් අදාළ ඇමතිවරයාට යවා ඇත. ඒ අනුව මෙම පොලිස් නිලධාරියා අනිවාර්ය නිවාඩු යැවීමට අමාත්‍යවරයා පොලිස් කොමිසමට සිය නිර්දේශ යවා ඇත. ඒ අනුව නාලක සිල්වා නිවාඩු යනවා ඇත. රහස් පොලිස් පරීක්ෂණ මෙහි ඇත්ත නැත්ත සොයාගන්නවා ඇත.

මෙහිදී නාමල් කුමාර සහ පොලිස්පති පූජිත් ජයසුන්දර අතර තිබෙනවා හෝ තිබුණා කියන අති සමීප සම්බන්ධය ගැන මෙන්ම පූජිත් විසින් නාමල්හට නාලක සිල්වා හඳුන්වා දුන්නා කියන කතාව පිළිබඳවද සොයා බලනු ඇත. නැතිනම් බැලිය යුතුය. අනෙක් පැත්තෙන් නුවර ජාතිවාදී ගිනි ඇවිලීමට නාලක සිල්වා මේකියන නාමල් හරහා ක‍්‍රියා කරා යන බරපතළ චෝදනාව පිළිබඳවද රහස් පොලිසිය පරීක්ෂණ කළ යුතුය. දැනට එළියට පැමිණ තිබෙන තොරතුරු අනුව පොලිස්පති පූජිත් ජයසුන්දරද තමන්ගේ විකට පොලිස් කෝලමෙන් මිදී රහස් පොලිසියට ප‍්‍රකාශයක් ලබා දීම හොඳය. නැතිනම් තමන්ගේ සමීපතයින් දෙදෙනෙක් පිළිබඳව කෙරෙන මේ පරීක්ෂණය ඉවරවෙන තුරු පොලිස්පති තනතුරෙන් ඉවත්වීම හොඳය. එහෙත් මේ ලිපිය ලියන මොහොත වන විට ආරංචි වන්නේ පොලිස්පතිවරයාට සිය ධුරයෙන් ඉල්ලා අස්වන්න යැයි ජනපති සහ අගමැති දැන්වූ බවය. කෙසේ හෝ දැන් මේ කුමන්ත‍්‍රණ කතාවෙන් ගෝටභය රාජපක්ෂ මහතා හට පසුගිය කාලයේදී නැතිවී ගිය ජනප‍්‍රියත්වය සාදාගන්නට පුළුවන් ය. අනෙක් පැත්තෙන් එජාපය සමග සහ යහපාලන මුලදර්ම සමග ගැටුමක සිටින ජනපතිවරයාට මේ සැකයේ වාසිය ලබාගනිමින් ඔළුගෙඩි වෙනස් කර ශ‍්‍රී ලංකා නිදහස් පක්ෂයට අගමැති තනතුර ලබාගන්නට පොඩි උත්සාහයක් දමන්නට පුළුවන් ය. එසේත් නැතිනම් සිය ජනපති ධූරයේ අවසාන කාලය කුමන්ත‍්‍රණ බිල්ලෙක් මවාගෙන විනා වයන්නට කජු ගැන කතාකරන්නට ඕසෝන් වියන ගැන කතාකරන්නට පුළුවන් ය.

ධම්මික ප‍්‍රියදර්ශන