තමන් දැන් ඇමෙරිකන් පුරවැසියෙක් නොවේයැයි ආරක්ෂක අමාත්‍යාංශයේ හිටපු ලේකම් ගෝඨාභය රාජපක්ෂ ප්‍රකාශ කළත්, ඔහුගේ ඇමෙරිකානු පුරවැසිභාවය තවමත් ඉවත් කර නැති නිසා ඔහු තවමත් ඇමෙරිකානු පුරවැසියෙකු බව වාර්තා වෙයි.

ගෝඨාභය රාජපක්ෂ ඇමෙරිකානු පුරවැසිභාවය ඉවත් කරගැනීමට අදාළ ලියකියවිලි බාරදී ඇතත් ඇමෙරිකානු රජය පාර්ශ්වයෙන් කරුණු පරීක්ෂා කොට පිළිතුරු ලබාදීමට මාස කිහිපයක් ගතවෙනු ඇතැයි වාර්තා වෙයි.

යම් ඇමෙරිකානු පුරවැසියෙකු පුරවැසිභාවය ඉවත් කරගැනීමට අයදුම් කළ පසුව එම පුරවැසියාට ඇමෙරිකානු ආදායම් බදු දෙපාර්තමේන්තුවේ බදු හිඟ තිබේද යන්න, අධිකරණයේ නඩු පවරා තිබේද යන්න, ඇමෙරිකානු බුද්ධි අංශවල ඔහු පිළිබඳව සැක කටයුතු තොරතුරු තිබේද යන්න ඇතුළු කරුණු රැසක් පරීක්ෂා කිරීමෙන් පසුව ඇමෙරිකානු රජය විසින් පිළිතුරු ලබාදීම සාමාන්‍ය ක්‍රමවේදය වෙයි. මේ සඳහා මාස කිහිපයක් ගතවෙන බවත්,  2018 දෙසැම්බරයේ ඇමෙරිකානු රජය අක්‍රියව පැවති නිසා ඇමෙරිකානු ආදායම් බදු දෙපාර්තමේන්තුවේ ලිපිගොනු පිළිබඳ කටයුතු අඩපණවීමෙන් සාමාන්‍ය කාලයට වඩා වැඩි කාලයක් ගතවීමේ ඉඩක්ද තිබෙන බවත් වාර්තා වෙයි. මේ අතර ගෝඨාභය රාජපක්ෂට එරෙහිව අධිකරණයේ නඩු දෙකක්ද පවරා තිබෙන නිසා එම කටයුතු තවත් ප්‍රමාද වීමේ ඉඩක් ඇත.

ගෝඨාභය රාජපක්ෂගේ සමීප හිතවතෙකු වන දිලිත් ජයවීර මහතා හිමිකාරිත්වය දරන දෙරණ රූපවාහිනී නාලිකාව, අද දෙරණ පුවත් වෙබ් අඩවිය හා ඉරිදා අරුණ පුවත්පත යන මාධ්‍ය ආයතනවලින් ගෝඨාභය රාජපක්ෂගේ ඇමෙරිකානු පුරවැසිභාවය ඉවත් කරගෙන ඇතැයි ප්‍රවෘත්ති වාර්තා කර තිබුණි. තමන්ගේ ඇමෙරිකානු පුරවැසිභාවය ඉවත් කරගැනීමේ කටයුතුවලින් 99%ක් අවසාන බවත් තවත් එක ලියැවිල්ලක් පමණක් ඇමෙරිකානු රජය පාර්ශ්වයෙන් ලැබිය යුතු බවත් හිටපු ලේකම්වරයා කළ ප්‍රකාශයක් මත පදනම් වෙමින් එම වාර්තා පළ කර තිබුණි. එම වාර්තා පදනම් කරගනිමින් තවත් මාධ්‍ය ආයතන කිහිපයක් ප්‍රවෘත්තියක් ලෙස එම ප්‍රකාශය පළ කර තිබේ. කෙසේ වෙතත් අනිද්දා සමඟ අදහස් දැක්වූ ඒකාබද්ධ විපක්ෂයේ ප්‍රබල මන්ත්‍රීවරයෙකු ප්‍රකාශ කළේ 99%ක් අවසන් බව පැවසුවද තවම සිදුවී ඇත්තේ ඇමෙරිකානු පුරවැසිභාවය ඉවත්කරගැනීමට අදාල පළමු පියවර වන ලියකියවිලි බාරදීම පමණක් බවය. ■