වෛද්‍ය ප‍්‍රතිකාර ලබාගැනීමට විදෙස්ගත වීම සඳහා අධිකරණය ලබාදුන් දින වකවානු තුළ ගෝඨාභය රාජපක්ෂ මහතාට නැවත ශ‍්‍රී ලංකාවට පැමිණීමට නොහැකි බව ජනාධිපති නීතිඥ අලි සබ්රි විශේෂ ත‍්‍රිපුද්ගල මහාධිකරණයට දැනුම් දී ඇත.

මැදමුලන ඞී.ඒ. රාජපක්ෂ කෞතුකාගාරය හා ස්මාරකය ඉදිකිරීම සඳහා රුපියල් මිලියන 33.9ක රාජ්‍ය මුදල් අවභාවිත කිරීම සම්බන්ධයෙන් පවතින නඩුවට මෝසමක් ඉදිරිපත් කරමින් ජුනි 03 වැනිදා ජනාධිපති නීතිඥවරයා ඒ බව දැනුම් දී ඇත.

පසුගිය මැයි මස 24 සිට ජුනි 02 දින දක්වා සිංගප්පූරුවට ගොස් වෛද්‍ය ප‍්‍රතිකාර ලබාගැනීම ගැනීම සඳහා ගෝඨාභය රාජපක්ෂට ත‍්‍රිපුද්ගල මහාධිකරණයෙන් අවසර ලැබී තිබුණි.

එම මෝසම අනුව කරුණු දක්වමින් ජනාධිපති නීතිඥ අලි සබ්රි අධිකරණයට දන්වා තිබුණේ ගෝඨාභය රාජපක්ෂගේ සෞඛ්‍ය තත්වය අයහපත් බැවින් ඔහුට තවදුරටත් පරීක්ෂණ සිදුකිරීමට ඇති බැවින් විදෙස්ගතවීම සඳහා අධිකරණය ලබාදුන් දින දික්කරන ලෙසය.

ඒ අනුව ජුනි 19 දක්වා විදෙස්ගත වීමේ කාලය අධිකරණය දික්කර ඇත. මේ ජුනි 19 වැනිදා යනු ගෝඨාභය රාජපක්ෂට එරෙහි මූල්‍ය වංචා නඩුව විභාග කිරීම සඳහා අධිකරණය මීට පෙර ලබාදුන් දිනයය.

මෝසම කැඳවු අවස්ථාවේදී කරුණු දක්වමින් රජයේ අධිනීතිඥ වසන්ත පෙරේරා කියා ඇත්තේ ගෝඨාභය රාජපක්ෂ නොමැතිව නඩුව පවත්වාගෙන යෑමට බාධාවක් නොමැති බවයි. එහෙත් ජනාධිපති නීතිඥ අලි සබ්රි කියා ඇත්තේ නඩුව විභාග වන අවස්ථාවේ අධිකරණය හමුවේ ගෝඨාභය රාජපක්ෂ සිටිය යුතු බවයි. ඔහුට උපදෙස් ලබා ගැනීමට ගෝඨාභය රාජපක්ෂ සිටීම වැදගත් බවයි.

කෙසේ වෙතත් නඩුව කල්දැමීම ගැන තීරණයකට සම්පත් විජේරත්න, සම්පත් අබේකෝන් හා චම්පා ජානකී රාජරත්න යන ත‍්‍රිපුද්ගල මහාධිකරණ විනිසුරන් පැමිණ නැති අතර මුලින් තීරණය කර තිබූ පරිදිම ජුනි 19 දින එම නඩුව විභාගයට ගැනීමට නියමිතය.

තමා ඉදිරි ජනාධිපතිවරණයට තරඟ කරනවායැයි කියන මේ සුවිශේෂ පුද්ගලයා සම්බන්ධයෙන් වූ එම නඩුවේ විස්තර සිය මුල් පිටුවල පොල්ගෙඩි අකුරින් පළකරන්නට  ප‍්‍රධාන ප‍්‍රවාහයේ ජනමාධ්‍ය උත්සාහ කර තිබුණේ නැත. ඊට පසුවදා දිනමිණ පුවත්පතේ හා අයිලන්ඞ් පුවත්පතේ ඇතුළු පිටුවක වැඩි අවධානයකින් තොරව එය පළවී තිබුණි. එමෙන්ම ජුනි 03 වැනිදා රාත‍්‍රියේදී රූපවාහිනී නාලිකාවලටද මෙය ප‍්‍රධාන ප‍්‍රවෘත්තියක් වී නොතිබුණි.

එසේ වන්නේ පැහැදිලිවම මේ බොහෝ මාධ්‍ය රාජපක්ෂ මතවාදය වෙනුවෙන් පෙනී සිටීමත් ගෝඨාභය රාජපක්ෂව අනාගත ශ‍්‍රී ලංකාවේ ජනාධිපතිවරයා කිරීමේ සිහිනයක හෙවත් ව්‍යාපෘතියක මේ මාධ්‍ය නියැලී සිටින නිසාත්ය.

ගෝඨාභය රාජපක්ෂට එරෙහි මෙම නඩුව සුළු චෝදනාවක් සම්බන්ධයෙන් නොවේ. අපරාධ ගණයට වැටෙන චෝදනාවකි. මේ නඩුවෙන් බේරීම සඳහා ගෝඨාභය නොකළ දෙයක් නැත. මේ නඩුව සම්බන්ධයෙන් ඔහුව අත්අඩංගුවට ගැනීම වළක්වා ගැනීම සඳහා මුලින්ම ශ්‍රේෂ්ඨාධිකරණ නියෝගයක් ලබා ගත්තේය. ඒ නිසා ඔහු අත්අඩංගුවට ගැනීම වැළකුණි. රිමාන්ඞ් බන්ධනාගාර ගතවීම වැළකුණි. මේවා සිදුවූයේ රාජ්‍ය මුදල් සාවද්‍ය පරිහරණය සම්බන්ධයෙන් වෙනත් දේශපාලනඥයන්ද රාජ්‍ය නිලධාරීන්ද අත්අඩංගුවට පත්වී රිමාන්ඞ් බන්ධනාගාරගතවූ පසුබිමකය.

ඉන්පසු ගෝඨාභය රාජපක්ෂ උත්සාහ කරනු ලැබූයේ විශේෂ ත‍්‍රිපුද්ගල මහාධිකරණයේ මෙම නඩුව විභාගවීම වැළැක්වීමටය. ඒ සඳහා ඔහු අභියාචනාධිකරණයේ පිහිට පැතීය. එහෙත් ත‍්‍රිපුද්ගල මහාධිකරණය එම නඩුව ජුනි 19 සිට විභාගයට ගන්නා බවට තීරණය කළේය. අභියාචනාධිකරණයට යොමුකළ ඔහුගේ ඉල්ලීම තවම පවතී. මේ අසනීපය එම තීන්දුව එනතෙක්දැයි නොදනිමු.

එහෙත් ගෝඨාභය රාජපක්ෂට අසනීප උත්සන්න වූයේ ඉන් පසුවය. වෛද්‍ය ප‍්‍රතිකාර සඳහා විදේශගත වීමට ඔහු අවසර ලබාගත්තේ ඒ අනුවය. දැන් නියමිත දිනට රටට පැමිණීමට නොහැකි ලෙස ඔහුගේ රෝගී තත්වය අසාධ්‍ය තත්වයට පත්වී ඇත.

ඒ අනුව ඉදිරි ජනාධිපතිවරණයේ ඉදිරියෙන්ම සිටිනවායැයි කියන අපේක්ෂකයා බරපතළ රෝගාබාධවලට බරපතළ පරීක්ෂණ සිදු කරමින් සිටින බරපතළරෝගියෙකි. ජුනි 19 වැනිදාත් ඔහු ලංකාවට නොපැමිණියහොත් එහි තේරුම වන්නේ ඔහුගේ රෝගී තත්වය තව තවත් උත්සන්න වී බරපතළ වී ඇති බවය.

ඒ ගැන හරියටම කියන්නට අපට එම දින තෙක් බලා සිටින්නට සිදුවනු ඇත. එහෙත් මෙම නඩුවේ චෝදනා අනුව ඔහු කිසිදු බයක් සැකයක් නොමැතිව සියලූ නීතිරීති කඩකරමින් රාජ්‍ය මුදල් අවභාවිත කර ඇති බවට කරුණු තිබේ. ඔහුගේ ඒ හැසිරීම අයියාගේ රාජ්‍ය බලය යටතේය. ඔහුට රාජ්‍ය බලය ලැබුණහොත් කොහොම වේද? එය ප‍්‍රජාතන්ත‍්‍රවාදී භාවිතාවක් විය නොහැකි බව නම් දැන්ම කිව හැකිය.