තරිඳු උඩුවරගෙදර

හිටපු ආරක්ෂක ලේකම් ගෝඨාභය රාජපක්ෂට ජනාධිපති මෛත‍්‍රීපාල සිරිසේනගේ විශේෂ අනුමැතියක් මත කමාන්ඩෝ සෙබලූ‍න් කණ්ඩායම් දෙකක විශේෂ ආරක්ෂාවක් ලබාදී ඇතැයි වාර්තා වෙයි.
ඒකාබද්ධ විපක්ෂ කණ්ඩායමේ මීළඟ ජනාධිපති අපේක්ෂකයා වීමේ අපේක්ෂාවෙන් මේ වනවිට ප‍්‍රචාරක ව්‍යාපෘති සඳහා දිවයිනේ විවිධ ප‍්‍රදේශවලට ගමන් ගන්නා ගෝඨාභය රාජපක්ෂ මහතා මෙම විශේෂ ආරක්ෂක කණ්ඩායම් දෙක සමඟ එම ගමන්වල යෙදෙන බව වාර්තා වෙයි.
වාර්තාවන ආකාරයට ජනාධිපති මෛත‍්‍රීපාලට සහ අග‍්‍රාමාත්‍ය වික‍්‍රමසිංහටද ලබා දී ඇත්තේ විශේෂ ආරක්ෂක බලකායේ ආරක්ෂාවක් පමණකි. යුද්ධය අවසන් කිරීම සඳහා නායකත්වය දුන් ජනාධිපතිවරයා වූ මහින්ද රාජපක්ෂ මහතාට සහ එවකට හමුදාපතිවරයා වූ ෆීල්ඞ් මාෂල් සරත් ෆොන්සේකා ඇතුළු නායකයන් කිහිපදෙනෙකුටම කමාන්ඩෝ සෙබලූ‍න්ගේ ආරක්ෂාව ලැබී නොමැත. ඔවුන්ටද පොලිස් විශේෂ කාර්ය බලකායේ ආරක්ෂාව පමණක් හිමිවී ඇත.
මේ පිළිබඳව හමුදා මාධ්‍ය ප‍්‍රකාශක ජයනාත් ජයවීරගෙන් කළ විමසීමකදී ඔහු පැවසුවේ විශේෂ ආරක්ෂක අවශ්‍යතා ඇති එවැනි නායකයන්ට කමාන්ඩෝ ආරක්ෂාව ලබාදීම සාමාන්‍ය තත්වයක් බවයි. හිටපු හමුදාපති සරත් ෆොන්සේකා මහතාට එම විශේෂ ආරක්ෂාව ලබා නොදෙන්නේ මන්දැයි කළ විමසීමේදී හමුදා මාධ්‍ය ප‍්‍රකාශකවරයා පැවසුවේ විශේෂ අවස්ථාවල ඔහුට එම ආරක්ෂාව ලබාදෙන බවයි. මෙසේ විශේෂ ආරක්ෂාව ලබාදෙන පුද්ගලයන් තෝරාගන්නේ කෙසේදැයි විමසූ විට හමුදා මාධ්‍ය ප‍්‍රකාශකවරයා පැවසුවේ ජනාධිපතිවරයාගේ අනුමැතිය මත එම ආරක්ෂාව ලබාදෙන බවයි. යුද හමුදාව පිළිබඳ ප‍්‍රවීණයෙකු අදහස් දක්වමින් අප සමඟ කීවේ සාමාන්‍යයෙන් විශේෂ පුහුණුවක් ලත් කොමාන්ඩෝ සෙබලූ‍න්ගේ ආරක්ෂාව ප‍්‍රභූන්ට ලබාදෙන්නේ යුද සමයකදී බවයි.