ගෝඨාභය රාජපක්ෂගේ පුරවැසිභාවය අත්හිටුවීමේ නියෝගයක් නිකුත් කරන ලෙස ඉල්ලා ඉදිරිපත් කර ඇති අභියාචනාධිකරණ පෙත්සමේ පැමිණිලිකරුවන් ඇතුළු එහි නීතිඥයන්ට ඉල්ලීමක් කළහොත් උපරිම ආරක්ෂාව සපයන ලෙස වැඩබලන පොලිස්පති සී.ඞී. වික‍්‍රමරත්න දැනුම් දී ඇත.

වැඩබලන පොලිසපතිවරයා කොළඹ දිසාව භාර නියෝජ්‍ය පොලිස්පති චම්පික සිරිවර්ධනට එම දැනුම්දීම කර ඇත.

මෙම රිට් පෙත්සමේ පැමිණිලිකරුවන් වන්නේ මහාචාර්ය චන්ද්‍රගුප්ත තේනුවර හා සාහිත්‍යවේදී ගාමිණී වියන්ගොඩය. පැමිණිලිකරුවන් වෙනුවෙන් පෙත්සම සඳහා කරුණු දක්වන්නේ නීතිඥ සුරේන් ප‍්‍රනාන්දුය.

ගෝඨාභය රාජපක්ෂගේ පුරවැසිභාවය, විදේශ ගමන් බලපත‍්‍රය, ජාතික හැඳුනුම්පත ආදිය අභියෝගයට ලක් කරමින් එම පෙත්සම ඉදිරිපත් කර ඇති අතර එය ඔක්තෝබර් 2 හා 3 දිනවල විභාගයට ගනිමින් තිබුණි. බොහෝවිට එම පෙත්සමේ තීන්දුව ඔක්තෝබර් 3 හෝ 4 ලබාදීමට නියමිතව තිබුණි.