කටුනායක ගුවන්තොටුපළේ ගුවන් යානාවලින් ඉවත් කරන මස් වර්ග, කෙටිකෑම හා අනෙකුත් ආහාර ගුවන්තොටුපළ අවට හෝටල්වලට අලෙවි කිරීමේ ජාවාරමක් ක‍්‍රියාත්මක වන බවට තොරතුරු අනාවරණය වී ඇත.

මෙරට හා විදෙස් ගුවන්යානා නැවතුම් අංගණයේදී එම ගුවන්යානා සුද්ධ පවිත‍‍්‍රකිරීමෙන් පසු ඉවත් කරන කෑම වර්ග හා කසළ සෞඛ්‍ය ආරක්ෂිතව පුළුස්සා විනාශකිරීමේ වැඩපිළිවෙළ උල්ලංඝනය කරමින් නිලධාරීන් කිහිපදෙනෙකු මෙම ජවාරමේ නිරතවෙන බවට හෙළිවී ඇත. ගුවන් යානා අංගණයේදී ලොරිවලට ඉවත් කරගන්නා මෙම ද්‍රව්‍ය ගුවන්තොටුපළේ සුළු සේවකයන් රැඳී සිටින කාමරයක් වෙතට රැගෙනවිත් වෙන්කිරීමෙන් පසු ආහාර ද්‍රව්‍ය කසළ සමගම අලෙවිය සඳහා ගුවන්තොටුපළෙන් ඉවතට ගෙනඒම සිදුකරන බවයි පැවසෙන්නේ. පසුව එම කෑම වර්ග වෙනත් වාහනවලින් වෙළෙඳසැල් වෙත රැුගෙන යන බව හෙළිවී ඇත.

ගුවන්යානාවලින් ඉවත් කරන මස් වර්ග සඳහා කටුනායක අවට මත්පැන්හල්වලින් වැඩි ඉල්ලූ‍මක් පවතින බවට හෙළිවී තිබේ.
මෙලෙස මෙම ජාවාරමේ නිරත පුද්ගලයන් දෙදෙනෙකු මීට පෙර වැඩ තහනමකට ලක්වී ඇත. මේ සම්බන්ධයෙන් විමසීම සඳහා ගුවන්තොටුපළ හා ගුවන් සේවා අධිකාරියේ සභාපතිවරයා සම්බන්ධ කරගැනීමට දැරූ උත්සාහය අසාර්ථක විය.

ධම්මික පි‍‍යදර්ශන