ශ‍්‍රීනාත් බොහෝ අය කලෙක පටන් හඳුනන්නේ කලාව සහ දර්ශනය පිළිබඳ උනන්දුවකින් සංවිධාන කටයුතුවල යෙදුණු පුද්ගලයෙකු ලෙසය. අලූ‍ත් පරපුර ප‍්‍රධාන ධාරාවේ දේශපාලනයට බලපෑම් කරද්දී ඔහු එහි ප‍්‍රමුඛ සංවිධායකයෙක් විය. නූතන නිදහස්කාමී තරුණ කලාකරුවන් අතර ඔහු ප‍්‍රියමනාප මිත‍්‍රයෙක් විය. ‘කවුන්ටර් පන්ච්’ නම් යූටියුබ් වීඩියෝ මාලාව හරහාද ඔහු අවධානය දිනාගත්තේය. පසුගිය සති දෙක තුළ ඔහු සාකච්ඡුා මාතෘකාවක් බවට පත්වුණේ ‘බුදුන්ගේ රස්තියාදුව’ නම් කෘතිය
රචනා කිරීම නිසාය.

 

ශ‍්‍රීනාත් සාමාන්‍ය සමාජයෙන් පිටමං වුණේ ඇයි?
මම පාසල් අධ්‍යාපනයේ ඉන්නකොටම කළකිරීමක් තිබුණා. මම පාසලේ විශිෂ්ටතම ශිෂ්‍යයා වුණ කාලයක් තිබුණා. ඒ වෙද්දී විශාල දේශපාලන ඥානයක් තිබුණේ නැහැ. එකොළහ වසර විතර වෙද්දී එක්ස් කණ්ඩායමේ ක‍්‍රියාකාරීව ඉන්නවා. මම එයාලාගේ දේවල් කියෙව්වා. අපේ අධ්‍යාපන ක‍්‍රමයෙ අවුල තේරුම්ගත්තා. යා යුතු ගමනක් තියෙනවා, ඒ ගමන යා යුත්තේ සම්මත ඇකඩමි හරහා නෙවෙයි. ඒ නිසා තමයි විකල්ප කවවලට ගිහින් දැනුම හොයාගෙන රස්තියාදු ගහන්නෙ. දැනුම හොයද්දී කලින් පරම්පරාවෙ හිටපු අය මට ගුරුවරු වෙනවා. නිර්මාල් රංජිත් දේවසිරි, වංගීස සුමනසේකර වගේ අය මුණගැහෙනවා. මම රොහාන් පෙරේරා ගුරුවරයෙක් විදියට හඳුනගන්නවා.

එහෙම නිර්මාණයවූ ශ‍්‍රීනාත්ගේ ජීවිතයම පර්ෆෝමින් ආට් එකක් කියලා වංගීස සුමනසේකර ලියලා තිබුණා..
මාව පර්ෆෝමින්ග් ආටිස්ට් කෙනෙක් විදියට හඳුන්වන්න ගත්තේ ඉසුරු කුමාරසිංහ සහ ධනුෂ්ක මාරසිංහ. ඔවුන් මාව පර්ෆෝමින් ආට් වර්ක්ෂොප් එකකට එකතු කරනවා. ඒ වර්ක්ෂොප් එකේදී මම කවියක් පර්ෆෝම් කළා. ඒකට ආපු ප‍්‍රතිචාර ඉතා ඉහළයි. ‘බුදුන්ගේ රස්තියාදුව’ පොතට වුණත් ඒ පර්ෆෝමින්ග් ආට්වල බලපෑම තියෙනවා.

බුලත්විට කන, කොට කලිසම් ඇඳගත්, වල්මත් පෙනුමක් තියෙන කොල්ලෝ දෙන්නෙක්, එදිනෙදා භාෂාවෙන් දාර්ශනික සංවාද කරනවා. ඔබත් කසුන් චන්ද්‍රනාත් පතිරණත් කළ කවුන්ටර් පන්ච් කියන යූටියුබ් වැඩසටහනේදී වුණේ ඒක. හොඳ කෝට් එකක් ඇඳගෙන දේශනාවක් විදියට නොවී, ඒ විදියට දර්ශනය කතාකළේ ඇයි?
යම් ශාස්තෲවරයෙක් ආගමක් දේශනා කරද්දී සමාජය වෙතින් ඒකට ප‍්‍රතිරෝධතාවක් හැදෙනවා. අලූ‍ත් අදහසක් කියද්දී විරෝධයක් හැදෙනවා. අලූ‍ත් අදහස් සම්පේ‍්‍රෂණය කරන්නට අලූ‍ත් මාධ්‍යයන් සොයායෑම අවශ්‍ය වෙනවා. ඒ ගැන හොයද්දී මුණගැහුණා ෆෙඞ්රික් නිට්ෂේ. ඔහු ලිවීම් ක‍්‍රම දහයක් කියනවා. එකක් තමයි සාමාන්‍ය ජනයාගේ විශ්වාසයන් තුළ ඉඳිමින් මේ වැඬේ කරන හැටි. අදහස සමාජගත කරද්දී මටත් කසුන්ටත් සිද්ධවෙනවා කෝට් එකක් පළඳින්නෙ නැතිව බුලත්විට කමින්, සාමාන්‍ය කුණුහරුප කියමින් දාර්ශනික සංකල්ප පුරුද්දන්න. හැම මනුස්සයෙක්ටම දාර්ශනිකයෙක් විය හැකියි. හැම කෙනෙක්ම බුදුකෙනෙක් වගේ.
‘බුදුන්ගේ රස්තියාදුව’ කියන නම යෙදීමේදී වුණත් බුදුන් කියලා තත්වයක් තියෙනවා. බුද්ධ, බෞද්ධ කියලාත් තියෙනවා. ඒවායේ සංස්කෘත මුසුවක් තියෙනවා. බුදුන් කිව්වාම සිංහල. ඒක ගොඬේ. මම ගොඬේ කියලා කිව්වෙ වෛරයකින් නෙවෙයි. මේ අවිහිංසාවාදී දහම හැම කෙනෙක්ටම බුදුකෙනෙක් වීම සඳහා නිදහස නිර්මාණය කරලා තියෙනවා. කසුනුත් මාත් උත්සාහ කරන්නෙ මේ ගොඬේ භාෂාවෙන් සන්නිවේදනය කරන්නෙ.

බුදුන්ගේ රස්තියාදුව ලීවෙ බුදුදහම ගැන වෛරයෙන්ද? ඔබ බුදුදහම අවිශ්වාස කරනවාද?
ආගමකට ලේසියෙන් අත ගහන්න බැහැ. ඉතා ආචාරධාර්මික තත්වයන් යටතේ විකසනය වුණ විද්‍යාවක් තියෙනවා. සංසන්දනාත්මක ආගමික විද්‍යාව කියලා. මට පොඩිකාලෙ බුදුදහම ගැන අදහස තිබුණෙ දාර්ශනික එළඹුමකින් නෙවෙයි. මම වැඩිහිටි වෙද්දී දාර්ශනික එළඹුමකින් බුද්ධාගම විශ්වාස කරනවා. මට බුද්ධාගම විශ්වාස නොකර ඉන්න තරම් තත්වයක් හැදිලා නැහැ. එහෙත් නිවන ගැන කතාකරද්දී නිරාගමික ලෙස තමන්ව හඳුන්වාගන්නා කෙනෙක්ට ඔහොම එකක් නෑ කියලා විතණ්ඩවාදයකට යන්න පුළුවන්. හැබැයි නිවන ගැන සංකල්පය අවුරුදු 2500ක් තිස්සේ විකාශනය වෙලා තියෙනවා. ඒ නිසා බුදුදහම කියන්නෙ නිරාගමිකයෙක් කියලා හිතන කෙනෙක්ට පහසුවෙන් විවේචනය කළ හැකි එකක් නෙවෙයි. මට බුදුදහම එක්ක වෛරයක් හෝ තරහක් නෑ. මගේ දැක්ම සමාජගත කරද්දී මම පටන්ගන්නෙ බුදුදහමින්. මම ක‍්‍රිස්තියානි කෙනෙක් එක්ක කතාකරද්දී මම කතාකරන්නෙ ඒ දහමින්.

ලංකාවෙ බෞද්ධයන් මේ පොතෙන් හිත් රිදවාගැනීම ගැන ඔබේ අදහස මොකක්ද?
බුදුන්ගෙ කාලයේදී බුදුන්ට මුහුණදෙන්න වුණ අත්දැකීම් මොනවාද. තමන්ගේ අය ගහගැනීම නිසා කළකිරීමෙන් පාරිලෙය්‍ය වනයට යන්න සිද්ධවුණා. තමන් විශ්වාස කරන දැනුම් පද්ධතියට අභියෝගයක් ආවාම මුලින්ම හිත රිදෙනවා. අදහස් දෙකක් එකතුවුණාම අලූ‍ත් එකක් හැදෙනවා කියලා එයාලාට හිතන්න බැහැ. එහෙත් මම කිසිසේත්ම හිත් රිදවීමක් අපේක්ෂා නොකර මේක ලියන්නෙ. එහෙම අපේක්ෂාවක් තිබුණා නම් ඒක පොතේ තියෙනවා. බුදුන්ගේ අවිහිංසාවාදී දහම පතුරවද්දීත් හිත් රිදුණු අය බොහොමයක් හිටියා.

අලූ‍ත් පරපුරට නිතර එන විවේචනයක් තමයි මත්ද්‍රව්‍ය පාවිච්චි කිරීම. අලූ‍ත් පරපුර කියන්නේ කුඞ්ඩෝ පිරිසක් කියලා සමහරු කිව්වා. ඔය ගැන අදහස?
ඇතැම් මත්ද්‍රව්‍ය පැරණි සිංහල ආයුර්වේද බෙහෙත්. ඒවා ලංකාව යටත්විජිතයක් වෙන්න කලින් රජවරු පවා පාවිච්චි කළා. එදිනෙදා සමාජයේදී හමුවුණා. ඒවාට නිදහසක් තිබුණා. යුරෝපීය ජාතිකයන් මෙහේට ආවාම වික්ටෝරියානු සදාචාරය ඇතුළේ මේවා තහනම් කරන නීති දැම්මා. ගංජා භාවිතය තහනම් කරලා සුද්දා අරක්කු රේන්ද දුන්නා. අපි ඔය ඉතිහාසය දැනගෙන සාමාන්‍ය කෙනෙක් වගේ මත්ද්‍රව්‍යවලට එරෙහිවෙන්න බැහැ. උදාහරණයක් විදියට ෆ්‍රොයිඞ් පවා කොකේන් පාවිච්චි කළා. ඇතැම් මත්ද්‍රව්‍ය යම්කිසි විදියක මානසික නිදහසක් ඇති කරන වැඩක්. ඒ ගැන ලොකු සමාජ සංවාදයක් ඇතිවෙන්න ඕනෑ. අපි තනියෙන්ම කෑගහලා වැඩක් නැහැ. ඇතැම් හාමුදුරුවරුන්ද ඇතුළු විශාල පිරිසක් ඒ ගැන කතාකරන්න සූදානමින් ඉන්න බව මම දන්නවා. එහෙත් විචිකිච්ඡුාවක් තියෙනවා.
ඒ එක්කම තියෙන එකක් තමයි ලිංගික නිදහස ගැන ප‍්‍රශ්නය. තරුණයන් සහ තරුණියන් සම සමව අත්වැල් පටලාගෙන හිටියාම ජාතිකවාදී තරුණයන්ගෙන් ලොකු විරෝධයක් එනවා..

අලූ‍ත් පරපුර නම් මත්ද්‍රව්‍ය තමයි කියන විරෝධ පාඨය හැදෙන තැන තමයි මේ ලිංගික සමානත්මතාව. ලෝක ඉතිහාසය පුරාවට මත්ද්‍රව්‍ය විරෝධය ඇතුළෙ ලිංගිකත්වයක් තියෙනවා.
අලූ‍ත් පරපුර සංවිධානයේ ඉන්න අය සහ අපි එක්ක සමීප කණ්ඩායමේ තියෙනවා ගැහැනු පිරිමි එකට ඉන්න පුළුවන් ශික්ෂණයක්. ගැහැනු පිරිමි එකතුවෙලා කරන්න පුළුවන් වැඩක් හරි ලස්සනයි. ඒක කරන්න බැරිවීම පිළිබඳ ප‍්‍රශ්නයක්, එහෙම එකතුවෙන්නට පුහුණුවක් නැති අවුලක් තියෙන පිරිසක් ඉන්නවා. අපි එකතුවෙද්දී මෙයාලාගේ ඇතුළෙ මොකක්හරි ලිංගික සම්බන්ධයක් තියෙනවා කියලා එහෙම අය අනුමාන කරනවා. එහෙත් මගේ මිතුරියකට හොඳම ආරක්ෂාව සපයන්න මට පුළුවන්. මට හොඳම ආරක්ෂාව සැපයීමත් මිතුරියක කරන්න පුළුවන්.