ශ‍්‍රී ලන්කන් ගුවන් සමාගමේ ධාවන අවශ්‍යතා සඳහා ගුවන් යානා අවශ්‍යතාවන් නොතිබියදී නව පාලනාධිකාරිය විසින් දිර්ඝකාලීන කුලී පදනම මත ඔක්තෝබර් 05 දින ගුවන් යානාවක් ලබාගෙන ඇති අතර ගමන් වාර නොමැති වීම නිසා එම ගුවන් යානය කටුනායක ජාත්‍යන්තර ගුවන් තොටුපොළ තුළ නවතා තැබීමේ ගාස්තු ගෙවමින් නිකරුණේ තිබෙන බව වාර්තා වෙයි.

මේ ආකාරයට ලබාගෙන ඇත්තේ ඒ 330 වර්ගයේ විශාල ගුවන් යානාවක් වන අතර එය ශ‍්‍රී ලංකාවට පැමිණ ඇත්තේ බෙල්ජියමේ සිටය. එය යුරෝපය තුළ වසර 10ක පමණ කාලයක් ධාවනයේ යෙදුණු ගුවන් යානයක් බවද වාර්තා වෙයි.

ශී‍‍්‍රලන්කන් ගුවන් සමාගමේ ඉංජිනේරුවරුන් විසින් ලබාගෙන ඇති මෙම ගුවන් යානය ධාවනයට නුසුදුසු බවට මීට පෙර නිර්දේශ කර ඇති බවත්, එසේ තිබියදී මෙය ලබාගෙන ඇති බවත් මෙම වර්ගයේම තවත් ගුවන් යානා දෙකක් ලබාගැනීමේ සැලසුමක් පවතින බවත් අපගේ ශ‍්‍රී ලංකන් ගුවන් සමාගම් ආරංචි මාර්ග පැවසීය.

පසුගිය රජය සමයේ ශ්‍රීලන්කන් ගුවන් සමාගම ප‍‍්‍රංශයෙන් විශාල ප‍්‍රමාණයේ ගුවන් යානා 4ක් මිලදී ගැනීමට ඇණවුම් කර තිබූ අතර මෙම රජය බලයට පත්වීමෙන් පසු එම ඇණවුම් අත්හිටුවීමට කටයුතු කළේය.

එසේ එම ගනුදෙනුව අත්හිටුවනු ලැබුවේ ඒ තුළ දූෂණ රැසක් සිදුව ඇති බව පවසමිනි. ගුවන් සමාගමේ ප‍්‍රතිව්‍යුහගතකරණය යටතේ එය විසින් මෙතෙක් ක‍්‍රියාත්මක කරන ලද ගමනාන්ත කිහිපයක්ම අවලංගු කර ඇති අතර ඒ අනුව ශ‍්‍රීලංකන් ගුවන් සමාගමට නව ගුවන් යානාවල අවශ්‍යතාවක් නොමැති බව එහි සේවකයෝ අවධාරණය කරති.

මේ සම්බන්ධයෙන් කළ විමසීමකදී ශී‍්‍රලන්කන් ගුවන් සමාගමේ මාධ්‍ය ප‍්‍රකාශක දීපාල් පෙරේරා පැවසුවේ බෙල්ජියම වෙත කුලී පදනම මත ලබාදුන් ශී‍්‍රලන්කන් ගුවන් යානයක් නැවත පැමිණ ඇති බවය.

ධම්මික ප්‍රියදර්ශන