42, 43, 44 මහල් ‘ඕනර්ස්’ලාට

එම මහල්වලට අධිවේගී සෝපානයක්

ක්‍රීඩා පිටියක්, පිහිනුම් තටාකයක්, ජිම් එකක්

 

මෙවර කැබිනට් අමාත්‍යාංශ සඳහා විෂයන් වෙන් කිරීමේදී නාගරික සංවර්ධන හා නිවාස අමාත්‍ය අගමැති මහින්ද රාජපක්ෂට වෙන්කර තිබුණේ රාජ්‍ය ආයතන දෙකක් පමණය. ඉන් එකක් වූයේ හොටෙල් ඩිවලපර්ස් (ලංකා) පෞද්ගලික සමාගමය. මෙම සමාගම මීට පෙර කැබිනට් අමාත්‍යාංශ විෂයන් වෙන් කිරීමේදී තිබුණේ අගමැති මහින්ද රාජපක්ෂගේ මුදල් අමාත්‍යාංශය යටතේය.

රජයේ හෝටල් සමාගමක් මුදල් අමාත්‍යාංශය යටතේ නොතිබී නාගරික සංවර්ධන හා නිවාස අමාත්‍යාංශය යටතට පැමිණීමටත්, එම අමාත්‍යාංශය යටතේ රාජ්‍ය අමාත්‍යවරුන් ලෙස කටයුතු කරන නාලක ගොඩහේවා හෝ ජීවන් තොණ්ඩමාන්ට ලබා නොදී අගමැති මහින්ද රාජපක්ෂ යටතේම එම හෝටල් සමාගම තබා ගැනීමටත් යම් විශේෂත්වයක් තිබිය යුතු කරුණකි. මෙම ලිපියේ අරමුණ එම විශේෂත්වය හෙළිදරව් කිරීමය.

ඉදිකිරීම් සම්පූර්ණ වශයෙන් නිමකර නොමැති ග්‍රෑන්ඞ් හයට් කොළඹ හෝටලයේ ඉතිරි වැඩ නිම කිරීම සඳහා ශ්‍රී ලංකා රක්ෂණ සංස්ථාවෙන් රුපියල් කෝටි 600ක මුදලක් ලබා ගැනීමට යන බවත් ඊට අමතරව ලංකා බැංකුවෙන්ද මුදල් ලබාගැනීමට යන බවත් ‘අලුත් හෝටල් සමාගමට රක්ෂණ සංස්ථාවෙන් කෝටි 600ක්’ යනුවෙන් ජුලි 19 වැනිදා අනිද්දා පුවත්පත හෙළිදරව් කළ වග පාඨකයන්ට මතක ඇතැයි සිතමු.

එහිදී අප කීවේ ග්‍රෑන්ඞ් හයට් කොළඹ හෝටලයේ මව් සමාගම වන කැන්විල් සමූහ ව්‍යාපාරයත්, හිල්ටන් හෝටලය අයත් හොටෙල් ඩිවලපර්ස් සමාගමත් ග්‍රෑන්ඞ් ඔරියන්ටල් හෝටලයත් ඒකාබද්ධ කරමින් තනි සමාගමක් පිහිටුවීමට 2020 පෙබරවාරි මස කැබිනට් මණ්ඩලය අනුමැතිය දී ඇති බවය.

ග්‍රෑන්ඞ් හයට් කොළඹ හෝටලයේ ඉතිරි වැඩකටයුතු කඩිනමින් නිම කිරීමට සැලසුම් කර ඇති අතර ශ්‍රී ලංකා රක්ෂණ සංස්ථාවෙන් රුපියල් කෝටි 600ක මුදලක් මුල් පියවර සඳහා ලබා ගැනීමට තීරණය කර තිබුණේ ඒ අනුවය.

මෙම හෝටල් ව්‍යාපෘතිය කඩිනමින් නිම කිරීම සඳහා එහි ව්‍යාපෘති අධ්‍යක්ෂවරයා ලෙස හොටෙල් ඩිවලපර්ස් සමාගමේ සභාපති සිරිනිමල් පෙරේරා පත් කර තිබුණු අතර ඒ අනුව හොටෙල් ඩිවලපර්ස් සමාගම එහි මූලික කටයුතු සිදුකළ යුතු විය.

පාර්ලිමේන්තු මැතිවරණය පැවැත්වීමෙන් පසු පත්කරන ලද නව කැබිනට් මණ්ඩලයට අයත් ලේකම්වරුන් පත් කිරීමේදී හොටෙල් ඩිවලපර්ස් සමාගමේ සභාපති සිරිනිමල් පෙරේරා නාගරික සංවර්ධන හා නිවාස අමාත්‍යාංශයේ ලේකම්වරයා ලෙස පත්කර ඇත. ග්‍රෑන්ඞ් හයට් කොළඹ හෝටලය පිළිබඳ රාජපක්ෂවරුන්ගේ වුවමනාව ඒ අනුවද පැහැදිලිය. (සිරිනිමල් පෙරේරා යනු ගෝඨාභය රාජපක්ෂ නාගරික සංවර්ධන හා ආරක්ෂක අමාත්‍යාංශ ලේකම්වරයා ලෙස කටයුතු කරද්දී නාගරික සංවර්ධන අධිකාරියේ සභාපති ලෙස කටයුතු කළ තැනැත්තාය.)

ග්‍රෑන්ඞ් හයට් හෝටලය යනු සෙලින්කෝ සෙලෙස්ටියල් රෙසිඩන්සීස් සමාගම මගින් ක්‍රියාත්මක කළ ව්‍යාපෘතියක් වන අතර පසුගිය මහින්ද රාජපක්ෂ ආණ්ඩු සමයේදී එනම් 2012 වර්ෂයේදී ඌන වත්කම් පුනරුද පනත යටතේ රජයට හෙවත් නාගරික සංවර්ධන අධිකාරියට පවරාගත් එකකි.

මහල් 47කින් යුත් කාමර 458ක් හා මහල් නිවාස 100කින් සමන්විත තරු පහේ හෝටල් ව්‍යාපෘතියක් වූ මෙහි ඉදිකිරීම් සඳහා එම ආණ්ඩු කාලයේදී රුපියල් කෝටි 1859ක් වූ මුදලක් රාජ්‍ය ආයතන තුනක් මගින් යොදා ගනු ලැබුණි. ඒ ශ්‍රී ලංකා රක්ෂණ සංස්ථාවෙන් රුපියල් කෝටි 850ක්, සේවක අර්ථසාධක අරමුදලෙන් රුපියල් කෝටි 500ක් හා ලිට්රෝ ගෑස් සමාගමෙන් රුපියල් කෝටි 500ක් වශයෙනි.

මෙම හෝටලයේ ඉදිකිරීම් සීයට 50ක ප්‍රමාණයක් අවසන් කර ඇති බවත් ඉතිරි සීයට 50ක ප්‍රමාණය අවසන් කිරීම සඳහා තවත් රුපියල් බිලියන 60ක් හෙවත් රුපියල් කෝටි 6000ක් අවශ්‍ය බවත් මුදල් ඇමතිවරයා ලෙස මහින්ද රාජපක්ෂ 2020 ජුලි 15 දින ඉදිරිපත් කළ කැබිනට් පත්‍රිකාවේ සඳහන් කර ඇත. එම මුදල් ශ්‍රී ලංකා රක්ෂණ සංස්ථාවෙන් හා ලංකා බැංකුවෙන් ලබා ගැනීමට නියමිත අතර එම කැබිනට් පත්‍රිකාවට අනුව හෝටලයේ පළමු අදියර 2021 අගෝස්තු මාසයේදී නිමකර ව්‍යාපාරික කටයුතු ආරම්භ කිරීමටත් 2022 අගෝස්තු මාසයේදී ඉතිරි කොටස සම්පූර්ණ කිරීමටත් බලාපොරොත්තු වේ.

ග්‍රෑන්ඞ් හයට් කොළඹ හෝටලය පිළිබඳ රාජපක්ෂවරුන්ට ඇති කැක්කුම මුල් වරට අනාවරණය වූයේ 2017 නොවැම්බර් 29 බදාදා පැවති 2018 විසර්ජන පනත් කෙටුම්පතට අදාළ ව්‍යවසාය සංවර්ධන අමාත්‍යාංශ වැය ශීර්ෂ විවාදයේදීය. එහිදී මහින්දානන්ද අලුත්ගමගේ ග්‍රෑන්ඞ් හයට් කොළඹ හෝටලය සම්න්ධයෙන් මතු කරනු ලැබූ කරුණුවලට එවක ව්‍යවසාය සංවර්ධන අමාත්‍ය කබීර් හෂීම් පිළිතුරු දුන්නේ මේ ආකාරයටය.

‘ඒ විතරක් නෙවෙයි, අර ගුවන් යානාවල සුපිරි කාමර හදලා ගියා වාගේම හයට් හෝටලය හදනකොට ඒකේ 42.43,44 වෙනි මහල්වල කරන්නේ මොකක්ද? ඒකේ විශේෂයෙන්ම සුපිරි අපාර්ට්මන්ට් ටිකක් හදනවා. ඒක ඕනර්ස් අපාර්ට්මන්ට් කියලා. ඒක හෝටලටයත් අයිති නැහැ. රජයටත් අයිති නැහැ කියලා හදන්නේ. තමන්ට පාවිච්චි කරන්න කියලා වෙනම අපාර්ට්මන්ට් හදනවා. මේවා කාටද? රජ පවුලට වෙන්න ඕනෑ. මේ අපාර්ට්මන්ට් ගහන්නේ රජයට, ඒ ව්‍යාපෘතියට කිසිම ආදායමක් නැති වෙන ආකාරයට. වෙනම අයිතිකාරයන්ට ගන්න කියලා හදන්නේ. එහි කොටහ ඒගොල්ලන්ට. ඒකෙන් රජයට කෝටි ගණනක් පාඩුයි. රජයට ඒක නැවත වෙනස් කරන්න ඩොලර් මිලියන 3.9ක් ගියා.

අපි බලයට ආපු ගමන් එක එක පුද්ගලයන්ට හයට් හෝටලයේ මහල් තුනක් වෙන්කරලා දෙන්න ඕනෑ නැති නිසා හෝටලයේම සාමාන්‍ය පොදු කොටසක් විදියට අරගෙන රජයට ආදායම එන විදියට ඒක වෙනස් කළා. අපට ඒක නැවත වෙනස් කරන්න විශාල වියදමක් ගිහිල්ලා තිබෙනවා. ඒ වාගේම ඒකට යන්න විදුලි සෝපානය වෙනම හදලා තිබුණා. රජ පවුලට යන්න විතරක් වෙනම හදලා තිබුණා. එහි ඩිසයින් එක වෙනස් කරන්න අපට විශාල මුදලක් ගියා. ඒකත් පොදු පාවිච්චියට ගන්න වෙනස් කරන්න මිලියන 40ක් ගියා. මේක තමයි යථාර්ථය.’

කබීර් හෂීම් මහතා එදා පාර්ලිමේන්තුවේ කියා තිබුණේ බොරුවක් නොවේ. එය ඇත්තකි. ඕනර්ස් අපාර්ට්මන්ට් හෙවත් ග්‍රෑන්ඞ් හයට් කොළඹ හෝටලයේ හිමිකරුවන්ගේ මහල් නිවාසවල විස්තර මෙසේය.

 

42වන මහල

එම හෝටලයේ 42වන මහලේ නිදන කාමර 4කින් යුතු මහල් නිවාසයක්, නිදන කාමර 1කින් යුතු මහල් නිවාසයක් හා පොදු පරිහරණ ප්‍රදේශයක්ද තිබේ.

නිදන කාමර 4කින් යුත් මහල් නිවාසයේ ප්‍රමාණය වර්ග මීටර 479.37 හෙවත් වර්ග අඩි 5160කි. එම මහල් නිවාසය තුළ මාස්ටර් බෙඞ් රූම් එකක් හෙවත් ප්‍රධාන නිදන කාමරයක් හා තවත් නිදන කාමර තුනක් ඇත. එහි ඇති නාන කාමර ගණන 4කි. අධ්‍යයන කාමරයක්, විවෘත මුළුතැන්ගෙයක්, විසිත්ත කාමරයක්, කෑම ගැනීමට ප්‍රදේශයක්, තවත් මුළුතැන්ගෙයක්, ලොන්ඩි්‍රයක් හා ගෘහ සේවිකාවන්ගේ කාමරයක්, අමුත්තන් සඳහා විවෘත ප්‍රදේශයක් හා අමුත්තන්ගේ නාන කාමරයක් ආදියෙන් සමන්විත වෙයි.

එහි ඇති තනි කාමරයක් සහිත මහල් නිවාසයේ ප්‍රමාණය වර්ග මීටර 81.59ක් හෙවත් වර්ග අඩි 878ක් පමණ වේ. නිදන කාමරයට අමතරව එහි නාන කාමරයක්, විසිත්ත කාමරයක්, මුළුතැන්ගෙයක්, අමුත්තන්ගේ නාන කාමරයක් හා කෑම ගැනීමට ප්‍රදේශයක් ඇත.

එම මහලේ ඇති විවෘත ප්‍රදේශයේ ප්‍රමාණය වර්ග මීටර 131.45ක් හෙවත් වර්ග අඩි 1415ක් පමණ වේ. ඒ තුළ පොදු විවේකාගාරයක්, පැන්ටි්‍රයක්, සංගීත කාමරයක් හා අමුත්තන්ගේ නාන කාමරයක් ඇත.

 

43වන මහළ

43වන මහලේ ඇත්තේ වර්ග මීටර 544.41ක් හෙවත් වර්ග අඩි 5860ක් වන නිදන කාමර තුනකින් සමන්විත මහල් නිවාසයක් හා වර්ග මීටර 89.14කින් හෙවත් වර්ග අඩි 960කින් යුත් එක් නිදන කාමරයක් සහිත මහල් නිවාසයකි.

නිදන කාමර තුනකින් යුත් මහල් නිවාසයේ ප්‍රධාන නිදන කාමරයක් ඇති අතර නාන කාමර සංඛ්‍යාව 5කි. අධ්‍යයන කාමරයක්, ටීවී නැරඹුම් කාමරයක්, විසිත්ත කාමරයක්, කෑම ගැනීමේ ප්‍රදේශයක්, මුළුතැන්ගෙයක්, ලොන්ඩි්‍රයක්, සේවිකාවන්ගේ කාමරයක් හා අමුත්තන් සඳහා විවෘත ප්‍රදේශයක් ඇත.

 

44වන මහල

එහි මුළු ප්‍රමාණය වර්ග මීටර 1109.02ක් හෙවත් වර්ග අඩි 11,937කි. ඒ මහලේ ජිම් එකක්, විවේකීව මත්පැන් ගැනීමට හැකි ප්‍රදේශයක්, පිහිනුම් තටාක මත්පැන් කුටියක්, පැන්ටි්‍රයක්, ජල සම්බාහනය සඳහා තටාකයක්, එළිමහන් විවේකාගාරයක්, එළිමහන් භෝජනාගාරයක්, තණපිඩැලි සහිත ප්‍රදේශයක්, කාන්තා පිරිමි ඇඳුම් මාරුකරන ස්ථාන, කාන්තා පිරිමි සේදුම් කාමර, ක්‍රීඩා පිටියක් හා ගබඩා කාමරයක් ඇත.

මේ මහල් තුන සඳහා පමණක් යෑමට ග්‍රෑන්ඞ් හයට් කොළඹ හෝටලයේ අධිවේගී විදුලි සෝපානයක්ද ඇත. එම මහල් තුනේ ඇති මහල් නිවාස හා අනෙකුත් පහසුකම් ඉදිකරන්නේ අධි සුඛෝපභෝගී ලෙසය. ඒ සඳහා අතිවිශාල වියදමක් දරන්නට වන බව නිසැකය. එහි ඇති ක්‍රීඩාපිටිය පවුලේ සාමාජිකයන්ට රගර් ක්‍රීඩාවේ යෙදීමට ප්‍රමාණවත් බවට සැක නැත. මන්ද 44 වන මහලේ මුළු ප්‍රමාණය වර්ග අඩි 12,000කට ආසන්න වන නිසාය.

අගමැති මහින්ද මහතාගේ පවුලේ සාමාජිකයන්ට 42වන මහලේ ඇති නිදන කාමර 4කින් යුත් විශාල මහල් නිවාසය සරිලන බව අනුමාන කළ හැකිය. මන්ද ප්‍රධාන නිදන කාමරය රාජපක්ෂ යුවළටත්, ඉතිරි නිදන කාමර තුන පුතුන් තිදෙනාටත් සරිලන නිසාය. සැලකිය යුත්තේ එම මහලේම ඇති නිදන කාමර එකකින් යුත් මහල් නිවාසය හා 43වන මහලේ ඇති නිදන කාමර තුනකින් යුත් මහල් නිවාසයත්, නිදන කාමර 1කින් යුත් මහල් නිවාසය යන ඒවා අනුමාන කළ හැක්කේ ගෝඨාභය, චමල් හා බැසිල් යන රාජපක්ෂවරුන්ගෙන් කාහටද යන්නය. නැතහොත් වෙනත් කවරකුටද යන්නය.

ග්‍රෑන්ඞ් හයට් කොළඹ හෝටලයේ ඉදිකිරීම් මෙම ආණ්ඩුව යටතේ අවසන් වූ පසු 42,43,44 යන මහල්වල ඕනර්ස් අපාර්ට්මන්ට් මුල් සැලසුමේ පරිදි තිබෙනවාදැයි අපට දැක බලාගත හැකිවනු ඇත. එමෙන්ම එම ඕනර්ස් අපාර්ට්මන්ට්වල ඕනර්ස්ලා හෙවත් හිමිකරුවන් කවුදැයි අපට දැක බලාගත හැකිවනු ඇත. ඒවායේ සිටින්නේ අනුමාන කළ ලෙසම රාජපක්ෂ පවුලේ සාමාජිකයන් නම් ඒ ගැන අප පුදුම විය යුතු නැත. මන්ද මේ රටේ ජනතාව මේ රට අතිවිශාල ජනවරමකින් ඕනෑ දෙයක් කරගන්නා ලෙස රාජපක්ෂ රජ පවුලට ලබා දී ඇති නිසාය.■