ගම්බිම් බලා යෑමට නොහැකිව රැඳී සිටින කටුනායක නිදහස් වෙළඳ කලාපයේ 500කට අධික සේවක පිරිසකට රජයෙන් ලබා දෙන රුපියල් 5000 ගෙවීම බලධාරීන් විසින් ප්‍රතික්ෂේප කරනු ලැබ ඇත. සෙසු සේවක පිරිස් රජයේ මැදිහත්වීම මත පිටත්කර හැර තිබියදී,  විවිධ හේතුමත නිවෙස් වෙත යා නොහැකිව ඇවරියවත්ත ජේ.ආර් ජයවර්ධනපුර ප්‍රදේශයේ නේවාසිකාගාරවල රැඳී සිටින පිරිසකට මෙලෙස සහනාධාර දීමනාව අහිමි වී තිබේ.

සීදුව අමන්දොළුව නිදහස් කාන්තා සංවිධානය පවසන්නේ, මෙම සේවක පිරිසට රුපියල් 5000 ලබාදීම සිදුකරන බව පොරොන්දු වී ඔවුන්ගේ අභියාචනා සහ සම්පූර්ණ කරන ලද අයදුම්පත් වසමේ ග්‍රාම නිලධාරීවරයා විසින් ලබාගෙන ඇතත්, අභියාචනා සළකා බැලීමේ කමිටුවේ සාමාජික පොදුජන පෙරමුණ නාගරික මන්ත්‍රී මනෝෂණ කාරියවසම්ගේ මැදිහත්වීම නිසා මුදල් ගෙවීම ප්‍රතික්ෂේප වී ඇති බවයි. දීමනාව ලබාදෙන මෙන් ඉල්ලීමට නාගරික මන්ත්‍රීවරයා හමු වූ අවස්ථාවේ සිය කොට්ඨාශයේ ස්ථීර පදිංචිකරුවන්ට දී ඉතිරියක් ඇතොත් ලබාදිය හැකිබව ඔහු පැවසී යැයි සේවක පිරිස පවසති.  එසේම වසමේ ඡන්දදායකයන් ලෙස ලියාපදිංචි වී තමන්ට ඡන්දය දෙන්නේ නම් බඩු මල්ලක් ලබාදීමට හැකි බවද ඔහු පවසා ඇත. එසේම දැනට තමන් සතුව කිසියම් කණකර ආභරණයක් ඇත්නම් උකස් කොට ජීවත්වන මෙන් නාගරික මන්ත්‍රීවරයා කළ ප්‍රකාශය ඒ අවස්ථාවේ එහි සිටි ග්‍රාම නිලධාරිවරයාද අනුමත කළ බව සේවකයෝ සඳහන් කරති. මෙම ග්‍රාම නිලධාරිවරයා කුලී ශ්‍රමික සේවා සැපයුම් හෙවත් මෑන් පවර් ආයතනයක් පවත්වා ගෙන යන්නෙකි.

රුපියල් 5000 දීමනාවට අදාල අභියාචනා කමිටුවෙහි මෙම වසමේ සමෘද්ධි නිලධාරියා හා සංවර්ධන නිලධාරිණියද සාමාජිකයන් වන අතර පසුගිය අප්‍රෙල් 29 වැනිදා මුදල් ලබාදෙන බව පැවසීම නිසා ගැබිණි කාන්තාවන් සහ කිරි දෙන මව්වරුන් ඇතුළු නේවාසික සේවක පිරිස නියමිත ස්ථානයට පැමිණ පැය කිහිපයක් රැඳී සිටි නමුත් ගම්වැසියන්ට මුදල් ගෙවා ඔවුන්ට මතු දිනෙක ලබාදෙන බඩුමල්ලක් සඳහා ටෝකන් පතක් පමණක් ලබා දී ඇත.

සිදුවූ අසාධාරණය පිළිබඳව කම්කරුවන් ජනාධිපති කාර්ය සාධක බලකාය හා කටාන ප්‍රාදේශීය ලේකම් වරයා දැනුවත් කිරීමේදී එම සියලු නිලධාරීන් පවසා ඇත්තේ ඔවුන්ට අදාල මුදල හිමිවිය යුතු බවයි. එහෙත් නාගරික මන්ත්‍රීවරයාගේ බලපෑම මත අභියාචනා කමිටුව ඉහළ නිලධාරීන්ගේ නියෝග හා මඟපෙන්වීම නොසළකා හැර තිබේ. ආසන්න සෙසු වසම්වල ග්‍රාම නිලධාරීන් වෙත ලබාදෙන අභියාචනා ලිපි මගින් මෙලෙස නේවාසිකව රැඳී සිටින පිරිස් වෙත මුදල් ලබා දී තිබියදී, මෙම සේවක පිරිසට පමණක්  බලවත් අසාධාරණයක් සිදු කර ඇති බව සීදුව අමන්දොළුව නිදහස් කාන්තා සංවිධානයද බලධාරීන් වෙත පෙන්වා දී තිබේ. කාන්තා සංවිධානයේ මාධ්‍ය ප්‍රකාශකවරයා පවසන්නේ, තමන්ට නිරීක්ෂණය කරන්නට ලැබුණු අන්දමට මැයි 01 ජාත්‍යන්තර කම්කරු දිනයේ ඔවුන් වෙත බෙදා දී ඇති වියළි ආහාර මල්ලේ තිබූ සහල් ඇතුළු ද්‍රව්‍ය සමහරක් පරිභෝජනයට නුසුදුසු බවයි. රටේ ආර්ථිකය වෙනුවෙන් ශ්‍රමය කැපකරන අසරණව සිටින මෙම සේවක පිරිස පිළිබඳ මානව හිමිකම් කොමිසම දැනුවත් කිරීමෙන් පසු පැමිණිළි 60ක් ගොනු කිරීමට තමන් ක්‍රියා කළ බවද අවශ්‍ය වුවහොත් අධිකරණ ක්‍රියාමාර්ග ගන්නා බවද සීදුව අමන්දොළුව නිදහස් කාන්තා සංවිධානය පවසයි. 

නයන ආලෝකබණ්ඩාර