කොවිඩ්-19 රෝගීන්ට ප්‍රතිකාර කිරීම වෙනුවෙන් ජාතික රෝහල, ශික්ෂණ රෝහල්, මහ රෝහල් සහ පළාත් මහ රෝහල් ලබාදීමෙන් එම රෝහල්වල ප්‍රතිකාර ලබන බරපතළ රෝගීන්ට, ශල්‍යකර්මවලට භාජනය වන සහ සායන සඳහා සහභාගි වන රෝගීන්ට කොවිඩ්-19 අවදානමක් ඇතිව තිබෙන බව අප කළ විමසීම්වලදී වෛද්‍යවරු, සෞඛ්‍ය පරිපාලන ක්ෂේත්‍රයේ නිලධාරීහු සහ සෞඛ්‍ය නිලධාරීහු පිරිසක් පැවසූහ.
මේ සම්බන්ධයෙන් කළ විමසීමකදී හිටපු සෞඛ්‍ය අමාත්‍ය වෛද්‍ය රාජිත සේනාරත්න ප්‍රකාශ කළේ වසංගත මර්දනය කරන අවස්ථාවකදී ප්‍රධාන රෝහල් පාවිච්චි නොකරන බවය. ඒවා තෘතීයික සේවා සපයන රෝහල් ලෙස හඳුන්වන බවත්, වසංගත පැතිරීමේ අවදානම නිසා ඒවා අත්හැර දිස්ත්‍රික් මට්ටමෙන් ද්විතීයික සේවා සපයන රෝහල් වසංගත මර්දනයට යොදා ගත යුතු බවත් ඔහු කීය. කොවිඩ්-19 මුල් කාලසීමාවේ ඒ ආකාරයට කටයුතු කළත්, කොවිඩ්-19 රෝගීන් වැඩි වශයෙන් රෝහල්ගත වන විට නිසි සැලසුමක් නැතිකමින් තෘතීයික මට්ටමේ රෝහල් වසංගත මර්දනයට යොදා ගන්නා බව ඔහු වැඩිදුරටත් කීය.
මේ පිළිබඳ අදහස් දක්වමින් රජයේ හෙද නිලධාරීන්ගේ සංගමයේ සභාපති සමන් රත්නප්‍රිය ප්‍රකාශ කළේ බරපතළ රෝගවලට ප්‍රතිකාර ලබන නේවාසික රෝගීන් සහ සායන සඳහා පැමිණෙන රෝගීන් එම රෝහල්වලට පැමිණෙන නිසා අවදානම වැඩි බවය.
කොළඹ ජාතික රෝහලේ වාට්ටු 4ක්, කළුබෝවිල රෝහලේ වාට්ටු 4ක රෝගීන් 112ක්, අනුරාධපුර රෝහලේ රෝගීන් 89ක්, රාගම රෝහලේ රෝගීන් 80ක්, පේරාදෙණිය රෝහලේ රෝගීන් 70ක්, කරාපිටිය රෝහලේ රෝගීන් 50ක්, මහනුවර රෝහලේ රෝගීන් 40ක්, බදුල්ල රෝහලේ රෝගීන් 30ක්, කළුතර නාගොඩ රෝහලේ රෝගීන් 30ක් රැඳී සිටින බව මැයි 05 වැනිදා පැවති සාකච්ඡාවකදී වාර්තා වූ බව රත්නප්‍රිය මහතා කීය.
රත්නප්‍රිය මහතා වැඩිදුරටත් කීවේ මීට පෙර කොවිඩ්-19 සැකසහිත රෝගීන් සඳහා පමණක් ප්‍රධාන රෝහල්වල වාට්ටු වෙන් කර තිබුණු බවය. මීට පෙර පීසීආර් පරීක්ෂණවලින් කොවිඩ්-19 ආසාදිත බව තහවුරු වූ පුද්ගලයන් කොවිඩ්-19 ප්‍රතිකාර මධ්‍යස්ථාන වෙත යැවූ බවද ඔහු කීය. කෙසේ වෙතත් මේ වන විට කොවිඩ්-19 ප්‍රතිකාර මධ්‍යස්ථාන පිරී ඇති නිසා එය සිදු නොකරන බව ඔහු පැවසීය.
අප සමඟ අදහස් දැක් වූ කළුබෝවිල ශික්ෂණ රෝහලේ වෛද්‍යවරයෙකු පැවසුවේ මේ වන විට රෝගීන් කොරිඩෝවල පවා සිටින බවය.
රජයේ වෛද්‍ය නිලධාරීන්ගේ සංසදයේ සභාපති වෛද්‍ය රුක්ෂාන් බෙල්ලන ප්‍රකාශ කළේ රෝහලේ සිටින රෝගීන්ට ප්‍රතිකාර දිය යුතුද, නිරෝධායනයට යොදනවාද යන්න පැහැදිලි නැති බවත් දැන් එම රෝහල් කොවිඩ්-19 ප්‍රතිකාර මධ්‍යස්ථානවලට හරවා ඇති බවත්ය. ශික්ෂණ රෝහල් ආදිය අනෙකුත් ප්‍රධාන රෝගීන්ට වෙන් කොට, හදිසි ප්‍රතිකාර සඳහා පහසුකම් සහිතව කොවිඩ්-19 ප්‍රතිකාර මධ්‍යස්ථාන සකස් කළ යුතු බවත් ඔහු පැවසීය.
ප්‍රජා විශේෂඥ වෛද්‍ය නිහාල් අබේසිංහ ප්‍රකාශ කළේ සෞඛ්‍ය කාර්ය මණ්ඩලවලට සහ විශේෂඥයන්ට මෙවැනි මාතෘකා පිළිබඳ සාකච්ඡා කිරීම සඳහා කිසිදු විධිමත් ක්‍රමවේදයක් නොමැති බවය. කොවිඩ්-19 සඳහා පහසුකම් සැපයීමේදී සෞඛ්‍ය පරිපාලකයන් කිසිදු සැලසුමකින් තොරව කටයුතු කරන බව ඔහු කීය.■