ශ්‍රී ලංකාවේ කොවිඞ්-19 දෙවැනි රැල්ලක් මතු වී ඇති බව පැහැදිලිවම ප්‍රකාශ කළ හැකි තත්වයක් උදා වී තිබේ. දැනට සෞඛ්‍ය විශේෂඥයන් දෙවැනි රැල්ලක් යන වචනය පාවිච්චි කරමින් සිටී. මීට පෙර නාවික හමුදා පොකුර වර්ධනය වූ සේම මෙවර කොවිඞ්-19 පොකුර හටගෙන ඇත්තේ යුධ හමුදාවේ පාලනය යටතේ තිබුණු කඳවුරු ආශ්‍රිතවය. ආසාදිතයන් අතර හමුදා සෙබළුන්ද සිටී.

මේ වන විට සම්පූර්ණ ගම්මාන පිටින්, පවුල් පිටින් නිරෝධායනයට යොමු කරමින් පවතී. එලෙස නිරෝධායනයට යොමු කළ අය අතරින් හමුවන කොවිඞ්-19 රෝගීන් පාලනය කළ තත්වයක් යටතේ හමුවූ ආසාදිතයන් ලෙස නම් කරයි. එහෙත් සැබෑ තත්වය වන්නේ එම ආසාදිතයන් පාලනය කළ තත්වයන් යටතේ සිටි අය නොවන බවත්, ඔවුන් යම්කිසි කාලසීමාවක් තිස්සේ එම රෝගීන් සමාජයේ නිදහසේ සැරිසරා, පසුගිය සතියක කාලය ඇතුළත නිරෝධායනයට යොමු කල අය බවත්ය.

කෙසේ වෙතත් අප සැහැල්ලු සුසුමක් හෙළිය යුතු තත්වයක් වන්නේ කෙටි කාලසීමාවක් ඇතුළත ආසාදිතයන්ව හා ආශ්‍රිතයන්ව හඳුනාග ැනීමට මහජන සෞඛ්‍ය පරීක්ෂකවරුන් ප්‍රමුඛ නිලධාරීන් කටයුතු කළ නිසාය. ඒ අනුව වෛරසය පැතිරෙන වේගයෙන්ම වෛරසය පසුපස දිව යමින් ආසාදිතයන්ව සොයාගැනීමේ හැකියාව ඇත. සටහන ලියන මොහොත වන තෙක් එලෙස පෙර හඳුනාගත් කණ්ඩායම් වලට පිටින්, බාහිර සමාජයේ රෝගීන් හමු වූ බවට වාර්තා නැත.

ජුලි 15 වන විට ශ්‍රී ලංකාවෙන් කොවිඞ්-19 රෝගීන් 2665ක් හමුවී ඇත. කන්දකාඩු පුනරුත්ථාපන මධ්‍යස්ථානය ආශ්‍රිතව ආසාදනය වී ඇතැයි තහවුරු වූ රෝගීන් සංඛ්‍යාව එදින වන විට 506 කි.

පහත දැක්වෙන්නේ පසුගිය දින කිහිපයේදී හමු වූ ආසාදිතයන් හා නිරෝධායනයට යොමු කළ පුද්ගලයන් පිළිබඳ විස්තරය.

රාජාංගණය

කන්දකාඩු, සේනපුර පුනරුත්ථාපන මධ්‍යස්ථානය ආශ්‍රිතව ඇති වූ කොවිඞ්-19 ආසාදිතයන් පොකුරෙන් මේ වන විට ආසාදිතයින් 533 ක් වාර්තා වි ඇත. ඒ අතරින් කොවිඞ් 19 වෛරසය ආසාදනය වූ 17 දෙනෙකු රාජාංගනය යාය 1, 3 සහ 5 ප්‍රදේශය වලින් හමු විය. පසුව එම කලාපවල ජීවත්වන රාජාංග නයේ පුද්ගලයින් 12,000 ක් මේ වනවිට ස්වයං නිරෝධායනයට ලක්කර ඇතැයි සෞඛ්‍ය සේවා අධ්‍යක්ෂ ජෙනරාල් අනිල් ජාසිංහ කියා ඇත. කොවිඞ්-19 ලංකාවට පැමිණීමෙන් පසුව වැඩිම පිරිසක් එකවර නිරෝධායනයට යොමු කළ අවස්ථාව දැන් උදා වී තිබේ. රාජාංගනය ගොවි ජනපද ව්‍යාපාරය මෙම තත්වයෙහි කේන්ද්‍රයක් බවට පත්ව ඇත.

සමස්ථයක් ලෙස රාජාංගනය ගොවි ජනපද ව්‍යාපාරයට අයත් ග්‍රාම සේවා වසම් 21 න් 11 කින් කොරෝනා ආසාදිතයින් මේ වනවිට හඳුනාගෙන තිබේ. කලුන්දෑගම, පන්තියාව, සිරිමාපුර, නව සිරිගම, මහතිබිරිකල්ල, නයිගල, යාය 03, යාය 04 , තිස්සපුර, රන්දෙනිගම, අංගමුව, තුඹුල්ලේගම එම ප්‍රදේශ අතර ඇත.

උතුරු මැද පලාත් සෞඛ්‍ය සේවා අධ්‍යක්ෂ වෛද්‍ය ඩබ්ලිව්.එම්.පාලිත බණ්ඩාර අනිද්දාට අදහස් දක්වමින් පැවසුවේ ග්‍රාම නිලධාරී වසම් 11 කට අයත් පුද්ගලයන් 560 කට ආසන්න සංඛ්‍යාවකගේ පීසීආර් පරීක්ෂණ සිදු කර ඇති බවත් ජුලි 16 වන දින තවත් පීසීආර් පරීක්ෂණ 100 ක් පමණ සිදු කිරීමට බලාපොරොත්තු වන බවත්ය. ඒ අනුව නිරෝධායනයට යොමු කර ඇති අයගෙන් සැලකිය යුතු කොටසක් තවමත් පීසීආර් පරීක්ෂණ වලට ලක් කර නොමැති බවය. ඒ අනුව රෝගය කෙතරම් පැතිර ඇතිදැයි සැබෑ ලෙස හෙළිවන්නේ ඉදිරියේදීය. මෙම පැතිර යෑමේ ප්‍රතිඵලයක් ලෙස රාජාංගනය යාය 5 රෝහලේ ප්‍රධාන වෛද්‍යවරුන් දෙදෙනා මේ වනවිට ස්වයං නිරෝධායනයට ලක්කර ඇත. ඒ රාජාංගනයෙන් වාර්තා වු පළමු කොවිඞ්-19 ආසාදිතයා එම රෝහලෙන් ප්‍රතිකාර ලබා ගැනීමට පැමිධෑම හේතුවෙනි.

හමුදා නිලධාරීන්

මේ වන විට ප්‍රදේශ කිහිපයකටම වසංගතය පැතිර ඇතැයි සැකය මතුව තිබෙන්නේ වසංගතය පැතිරීම වළක්වන්නට සේවයේ යෙදවූ ශ්‍රී ලංකා යුධ හමුදාවේ නිලධාරීන් නිසා බව නිරීක්ෂණය කළ යුතු කාරණයකි. එය සඳහන් කළ යුත්තේ සේවයේ යෙදුණු හමුදාව කෙරෙහි වෛරයෙන් නොවේ. සෞඛ්‍ය නිලධාරීන් සිටියදී හමුදා නිලධාරීන් ඉදිරියේ තබාගෙන වසංගතය මර්දනය කළ නොහැකි බව දැන්වත් තේරුම් ගත යුතු නිසාය.

කන්දකාඩු පුනරුත්ථාපන කඳවුරේ සේවයේ නියුතුව සිටි හමුදා නිලධාරියෙකු කොවිඞ්-19 ආසාදනය වී ඇති බවට තහවුරු වු පසුව ඔහු සමග සබඳතා පැවැත්වූ නිවාස 7 ක පුද්ගලයින් කැකිරාව කිතුල්හිටියාව ප්‍රදේශයේදී ජුලි 14 දින ස්වයං නිරෝධායනයට ලක්කර ඇති බව ප්‍රදේශයේ සෞඛ්‍ය නිලධාරියෙකු පැවසීය. එම නිලධාරියාගේ පවුලේ සාමාජිකයන් පස්දෙනෙකු දියතලාව නිරෝධායන කඳවුර වෙත රැගෙන ගොස් ඇත.

ජුලි 15 වන දින කන්දකාඩු පුනරුත්ථාපන මධ්‍යස්ථානයේ සේවය කළ කොවිඞ්-19 ආසාදිත යුධ හමුදා නිලධාරියෙකු ඇසුරු කිරීම හේතුවෙන් සීගිරිය පොලීසියේ පොලිස් පරික්ෂකවරයෙකු හා ඔහුගේ පවුලේ පිරිස් නිරෝධායනයට යොමු කර ඇත. සීගිරිය පොලීසියේ දෛනික වැඩ කටයුතුවලදී එම පොලිස් ස්ථානයේ නිලධාරීන් යොදා ගැනිමේ අවදානමක් මතුව ඇති නිසා ඒ සඳහා දඹුල්ල පොලිසියේ විශේෂ කණ්ඩායමක සීගිරිය පොලීසියට අනුයුක්ත කර ඇත.

කන්දකාඩු පුනරුත්ථාපන මධ්‍යස්ථානයේ සේවය කළ මධ්‍යම පළාතේ පදිංචි හමුදා නිලධාරීන් කිහිපදෙනෙකුට වෛසරය ආසාදනය වී ඇතැයි පළාත් සෞඛ්‍ය අධ්‍යක්ෂ වෛද්‍ය අර්ජුන තිලකරත්න ජූලි 14 දින මාධ්‍ය හමුවක් කැඳවමින් පැවසීය.

පොතුහැර, තෝරවතුර ප්‍රදේශයේ පදිංචි යුධ හමුදා නිලධාරියෙකුට ද කොරෝනා ආසාදනය වී ඇති බව තහවුරු වී තිබුණි. එම නිලධාරියා ජූලි 6 වැනිදා සේවය නිමකර නිවසට පැමිණ ඇති අතර ජුලි 8 වෙනි දින නඩු කටයුත්තක් සඳහා පොල්ගහවෙල මහේස්ත්‍රාත් අධිකරණයට ද ගොස් ඇති බැවින් පොල්ගහවෙල මහේස්ත්‍රාත් අධිකරණය විෂබීජහරණයට ලක්කර තිබුණි.

සීදූව කොටුගොඩ, කයිතානුව දේවාස්ථානයේ දේවමෙහෙයකට සහභාගී වු හමුදා නිළධාරියෙකුට කොවිඞ්-19 අසාදනය වී ඇති බවට තහවුරු වීමත් සමඟ එම දේව මෙහෙයට සහභාගී වු පුද්ගලයන් 44 ක් සහ ඔහුගේ අසල්වැසියන් 36 ක් ස්වයං නිරෝධායනයට යොමු කර ඇත.

අම්බලන්ගොඩ, ගොනාපීනුවල ආසාධිත හමුදා නිලධාරියෙකුගේ බිරිඳ වන ගුරුවරියකගේ ආශ්‍රිතයන් වන පාසල් ළමුන් 70 ක් පමණ හඳනා ගෙන ඇත. එයින් සිසුන් 11 ක් ගුරුවරුන් 7 ක් ඇතුළු පුද්ගලයන් 51 ක පීසීආර් පරීක්ෂණ සිදුකර ඇත.

තංගල්ල, පට්ටියපොළ ප්‍රදේශයේ පදිංචි හමුදා නිලධාරියෙකු ආසාදිතයෙකු ලෙස හඳුනාගැනීමෙන් පසු ඔහු තංගල්ල නගරයේ සංචාරය කළ සුපිරි වෙළඳසලක්, රාජ්‍ය ඔසුසල, රෙදිපිළි අලෙවිසල් කිහිපයක් හා කොණ්ඩා කපන ස්ථානයක් හදුනාගෙන ඇත. බව තංගල්ල නගරයේ මහජන සෞඛ්‍ය පරීක්ෂවරයෙක් අනිද්දාට අදහස් දක්වමින් පැවසීය. රෙදිපිළි වෙළඳසල්වල 17 දෙනෙකු සහ කොණ්ඩා කපන ස්ථානයේ සිව්දෙනෙකු ස්වයං නිරෝධායනයට යොමු කර ඇති බවත් එම ආසාදිතයාගේ ආශ්‍රිතයන් ලෙස හඳුනාගත් තවත් පවුල් 8 ක පුද්ගලයින් 15 දෙනෙකුද ස්වයං නිරෝධායනයට යොමු කළ බවත් ඔහු පැවසීය. අසාදිත හමුදා නිලධාරියා පැමිණ තිබුණු වෙළෙඳසැල් 03 ක් නිරෝධායන නීතී උල්ලංඝණය කිරීම හේතුවෙන් වසා දැමු බව ඔහු පැවසීය.

දෙහිඅත්තකණ්ඩිය ප්‍රදේශයේ පදිංචි හමුදා සෙබළුන් දෙදෙනෙකු කොවිඩි ආසාදිත බවට තහවුරු විය. දෙහිඅත්තකණ්ඩියේ සේරුපිටිය සහ දියවිද්දාගම ප්‍රදේශවල පදිංචි ඔවුන් ආසන්නයෙන් ඇසුරු කළ පුද්ගලයන් 52 දෙනෙකු නිරෝධායනයට ලක්කිරීමට දෙහිඅත්තකණ්ඩිය සෞඛ්‍ය වෛද්‍ය නිලධාරී කාර්යාලයේ නිලධාරීන් කටයුතු කළ බව එම ප්‍රදේශයේ වෛද්‍ය නිලධාරියෙකු අනිද්දාට පැවසීය. ආසාදිතයන්ගේ පවුල් වල සාමාජිකයන් නිරෝධායන මධ්‍යස්ථාන වලට හමුදාවෙන් රැගෙන ගිය බවත් ගෙන යන්නේ කුමන ප්‍රදේශයටදැයි තමන්ට නොදැන්වූ බවත් ඔහු පැවසීය.

පැල්මඩුල්ල ප්‍රදේශයේ පදිංචි හමුදා සෙබළෙකුට කොව්ඞ්-19 ආසාදිනය වී ඇති බවට තහවුරු වීමත් සමඟ කහවත්ත ඇන්දාන, වත්තකන්ද ප්‍රදේශයේ පිහිටි පවුල් 6 ක පුද්ගලයින් 22 දෙනෙක් ස්වයං නිරෝධායනය සඳහා යොමු කර තිබේ.

හෝමාගම ගොඩගම හා කැන්දලන්ද පදිංචි හමුදා නිලධාරීන් දෙදෙනෙකුටද කොවිඞ්-19 වෛරසය ආසාදනය වී ඇතැයි ජූලි 14 දින තහවුරු විය. ඔවුන්ගේ පවුල්වල සාමාජිකයින් නිරෝධායන මධ්‍යස්ථාන වෙත යොමු කර ඇති අතර එම පවුල් සමග සබඳතා පැවැත්වූ ඥාතීන් හා අසල්වැසියන්ගේ පවුල් 8 කට අයත් 35 දෙනෙකු දින 14ක ස්වයං නිරෝධායනයට යොමු කර තිබුණි. ආසාදිත හමුදා නිලධාරීන් පනාගෙ ාඩ යුද හමුදා රෝහලට හා පොළොන්නරුව රෝහලට යොමු කර තිබේ.

පිළියන්දල දැල්තර ප්‍රදේශයේ යුද හමුදා නිලධාරියෙකුටද කොවිඞ්-19 වෛරසය ආසාදනය වී ඇත. පිළියන්දළ සෞඛ්‍ය වෛද්‍ය නිලධාරී වෛද්‍ය ඉන්දික එල්ලාවල පවසා සිටියේ ආසාදිතයා සංචාරය කළ පිළියන්දල නගරයේ කඩ සාප්පු කිහිපයක් වසා දමා එම ආසාදිතයා ගොස් ඇති නිවාස කිහිපයක පුද්ගලයන් කිහිපදනෙක් ස්වයං නිරෝධායනයට යොමු කර ඇත. ඔහු පාවිච්චි කළ රාජ්‍ය බැංකුවක මුදල් ලබා ගැනීමේ ඒටීඑම් යන්ත්‍රයක් තාවකාලිකව වසා දමා ඇත. ඔහුගෙන් පසුව එම ඒටීඑම් යන්ත්‍රය පරිහරණය කළ පුද්ගලයන් පිලිබඳව තොරතුරු හඳුනාගෙන ඇත.

තවත් ප්‍රදේශ

රාගම පෞද්ගලික රෝහලක් ජුලි 14 වන දින වසා දැමීමට පියවර ගෙන තිබුණේ එම රෝහලේ උසස් නිලධාරියෙකුට කොවිඞ්-19 ආසාදනය වී ඇති බව තහවුරු වීම නිසාය. ගම්පහ යක්කල වැරැල්ලවත්ත ප්‍රදේශයේ කන්දකාඩු පුනරුත්ථාපන මධ්‍යස්ථානයේ උපදේශකවරයෙකුගේ නිවසක සාමාජිකයින් ස්වයං නිරෝධායනයට ලක්කර තිබේ.

ගම්පහ, වැරැල්ලවත්ත සහ බණ්ඩාරවත්ත යන ප්‍රදේශවලින් කොවිඞ්-19 අසාදිතයින් දෙදෙනෙකු වාර්තා වූ අතර ඔවුන් කන්දකාඩු පුනුරුත්ථාපන මධ්‍යස්ථානයේ සේවය කළ උපදේශකවරයෙකු සහ ඔහුගේ රියදුරුය. එම රියදුරා ගම්පහ දිසා අධිකරණයට ගොස් ඇත. ඒ අනුව ඔවුන් සමග සම්බන්ධතා පැවැත්වූ සහ එම ප්‍රදේශයේ ජීවත් වූ පුද්ගලයින් 70 කගේ පමණ පී.සී.ආර් පරීක්ෂා සිදු කර ඇති බව ගම්පහ ප්‍රදේශයේ සෞඛ්‍ය නිලධාරියෙකු අනිද්දාට අදහස් දක්වමින් පැවසීය.

මහනුවර කුණ්ඩසාලේ කොව්ඞ්-19 ආසාදිතයන් 3ක් වාර්තා වී ඇති අතර ඔවුන් සමඟ සමීප සබඳතා පැවැත්වු 150 ක් පමණ ප්‍රමාණයක් නිරෝධායනයට ලක් කර ඇත. එම ආසාධිතයන්ගෙන් එක් අයෙකු සමඟ සම්බන්ධ පවුල් කිහිපයක් කෑගල්ල ප්‍රදේශයේ ජීවත් වෙයි. ඔවුන්ව නිරෝධායනයට ලක් කර ඇත. ඊට අමතරව මාතර අපරැක්ක ප්‍රදේශයේ 100 ක පමණ සංඛ්‍යාවක් නිරෝධායනයට ලක් කර ඇත.

නිරෝධායනයට බාධා

සේනපුර හා කන්දකාඩු පුනුරුත්තාපන මධ්‍යස්ථාන වල පුනුරුත්තාපනය වු රැඳවියන් බැලීමට ගිය පවුල්වල සාමාජිකයන් 116 කගේ දත්ත ඇතුලත් වාර්තාවක් මහජන සෞඛ්‍ය පරීක්ෂකවරුන්ට ලබා තිබුණි. එහෙත් එම පවුල් අතරින් ඇතැම් පවුල් වල සාමාජිකයන් හමුවීමට ගිය අවස්ථාවේදී ඔවුන් කන්දකාඩු හා සේනපුර පුනරුත්තාපන කඳවුරුවලට ගිය බව ප්‍රතික්ෂේප කර තිබුණි. නිවෙස්වල නිරෝධායනය වන ලෙස ඉල්ලීමක් කළ නමුත් ඔවුන් එම ඉල්ලීමත් ප්‍රතික්ෂේප කළ බව කොළඔ, මෝදර, ගම්පහ, කුරුණෑගල සහ මීගමුව ආශ්‍රිත මහජන සෞඛ්‍ය පරීක්ෂකවරුන් කිහිපදෙනෙකු අනිද්දාට පැවසීය.

නිරෝධායන කඳවුරු තුළදී කොවිඞ්-19 පැතිරෙන බවට එලෙස ප්‍රතික්ෂේප කළ අය අතර අදහසක් ඇත. මීට පෙර නාවික හමුදාව කඳවුරුවල සීමා කර සිටියදී මාසයකටත් වැඩි කාලයක් තිස්සේ රෝගීන්ව හමු වූ නිසා කඳවුරු තුළ රෝගය පැතිරෙන බව කල්පනා කිරීමට හේතු වී තිබේ.

ලෝකයේම වැඩි වෙලා

ජුලි 16 වන විට ලෝකයේ කොවිඞ්-19 ආසාදිතයන් සංඛ්‍යාව මිලියන 13 ඉක්මවා තිබුණි. තවම සුව නොවූ මිලියන 5කට වැඩි පිරිසක් සිටී. මරණ සංඛ්‍යාව ලක්ෂ 5 ඉක්මවා ඇත. ජුලි 15 වැනිදා රෝගීන් 234,245 ඉක්මවූ සංඛ්‍යාවක් ලෝක මට්ටමෙන් හඳුනාගත්තේය. එය මෙතෙක් දෙවැනියට වැඩිම රෝගීන් සංඛ්‍යාවක් හඳුනාගත් දිනයයි. මීට පෙර හඳුනාගත් 237,237 සංඛ්‍යාව ආසන්නයටම පැමිණීමකි.

ජුනි 15 වැනිදා ඉන්දියාවේ වැඩිම රෝගීන් සංඛ්‍යාවක් හමුවූ දිනයද වේ. ඉන්දියාවේ රෝගීන් 32,682ක් හමුවී ඇත. එදින මරණ සංඛ්‍යාව 614කි. මේ වන විට ඉන්දියාවේ සමස්ත රෝගීන් සංඛ්‍යාව ලක්ෂ 9 ඉක්මවා ඇත. ලොව තෙවැනියට වැඩිම රෝගීන් සංඛ්‍යාවක් හමුවූ රට ඉන්දියාවය.

මේ වන විට ලෝකයේ රටවල් සහ ප්‍රාන්ත ගණනාවක් නැවත ලොක්ඩවුන් කිරීමට කටයුතු කර ඇති අතර, නැවත විවෘත කිරීමේ බලාපොරොත්තුවෙන් සිටි ඇතැම් රටවල් එම අදහස් අත්හැර දමා ඇත. ඒ අනුව ඇමෙරිකා එක්සත් ජනපදයේ ප්‍රාන්ත කිහිපයක්ම නැවත විවෘත කිරීමේ සැලසුම් අත්හැර ඇත. ඇමෙරිකාවේ නිව්යෝර්ක් නගරයේ තත්වය යහපත් වුණත්, ෆ්ලොරීඩා ඇතුළු තවත් ප්‍රාන්ත ගණනාවක් මේ දක්වා මුහුණදුන් බරපතලම තත්වයට මුහුණදී ඇත. ඉන්දියාවේ ප්‍රාන්ත කිහිපයක් නැවත ලොක්ඩවුන් කර ඇත. ස්පාඤ්ඤයේ කැටලෝනියා ප්‍රාන්තය ලොක්ඩවුන් කර ඇත.■