මියගියේ කොවිඞ් නිසාද? වකුගඩු රෝගය නිසාද? සොයාගෙන නෑ: කාර්ය සාධක බලකායේ මාධ්‍ය ප‍්‍රකාශක



කොවිඞ් 19 ආසාදනය වී සිටි නාවික හමුදා සෙබළෙකුගේ නැන්දනියක මැයි 04 වන දින මිය ගොස් ඇති බව වාර්තා වේ.


ඇය පොල්පිතිගම, ප‍්‍රදේශයේ ජීවත් වූ 72 කාන්තාවකි. අපේ‍්‍රල් 27 වන දින හටගත් දැඩි අසනීප තත්වයක් නිසා පොල්පිතිගම මූලික රෝහලට ඇතුළත් කර ඇත. ඉන් අනතුරුව අනුරාධපුර රෝහලට මාරු කර යවා ඇති අතර අපේ‍්‍රල් 28 දින කළ පීසීආර් පරීක්ෂණවලදී ඇයට කොවිඞ් 19 ආසාදනය වී ඇති බව තහවුරු වී ඇත.


ඒ කාන්තාවට දියවැඩියාව සහ වකුගඩු රෝගය ඇති බැවින් අපේ‍්‍රල් 29 වන දින ගම්පහ රෝහලට මාරු කර යවා ඇති අතර ඉන්පසුව අංගොඩ ජාතික වසංගත රෝග විද්‍යායතනයට මාරු කර යවා තිබේ. එහිදී ඇය මිය ගොස් ඇත.


මියගිය කාන්තාව ජීවත් වූ පොල්පිතිගම ප‍්‍රදේශයේ ප‍්‍රදේශවාසීන්ගෙන් සහ සෞඛ්‍ය නිලධාරීන්ගෙන් විමසීමක් කළ විට ඔවුන් තහවුරු කළේ කාන්තාව මියගොස් ඇති බව මැයි 03 වන දින රාත‍්‍රියේ ඇගේ නිවැසියන්ට දැනුම් දී ඇති බවත් ඔවුන් ඇගේ අවසන් කටයුතු කිරීම සඳහා කොළඹට පැමිණ ඇති බත්ය.


කොරෝනා මර්දන කාර්යසාධක බලකායේ මාධ්‍ය ප‍්‍රකාශක ලූතිනන් කර්නල් හෙට්ටිආරච්චිගෙන් එම කාන්තාව මියගොස් ඇති දැයි කළ විමසීමකදී ඔහු පැවසූවේ තමන්ට එම කාන්තාව මිය ගොස් ඇති බව දැනුම් දී නැති බවත් කොවිඞ් සම්බන්ධ වාර්තා තමා වෙත ඇත්තේ මැයි 04 වන දින දහවල් 12.30 තෙක් පමණක් බවත්ය. තොරතුරු පිළිබඳව සොයා දැනුම් දිය හැකි බවත් ඔහු පැවසීය.


පසුව අප කළ විමසීමේදී ලූතිනන් කර්නල් හෙට්ටිආරච්චි, කොවිඞ් 19 ආසාදනය වී අයිඞීඑච් රෝහලේ ප‍්‍රතිකාර ලබමින් සිටි එම කාන්තාව මියගිය බව තහවුරු කළ අතර, ඔහු පැවසුවේ එම කාන්තාවට වකුගඩු රෝගය තිබුණු බැවින් මියගියේ කොවිඞ් නිසාද, වකුගඩු රෝගය නිසාදැයි තවමත් සොයාගෙන නැති බවය.