දේශපාලන පළිගැනීම් හේතුවෙන් අසාධාරණයන්වලට ලක්වූ රාජ්‍ය නිලධාරීන්ට සාධාරණය ඉටුකිරීම සදහා ආණ්ඩුව ගෙන ඇති කැබිනට් තීරණය මත පොලිස් කොමිසම ලබා දී ඇති නව පොලිස් පත්වීම් සහ උසස් කිරීම් නිසා පොලිසියේ ඉහළ නිලධාරීන් අතර නොසන්සුන්කාරී තත්ත්වයක් උදාවී ඇතැයි අනිද්දා වෙත වාර්තා වෙයි.

මේ පිළිබදව අදහස් දැක්වූ ඉහළ පොලිස් නිලධාරියෙකු ප්‍රකාශ කළේ අදාළ පත්කිරීම් සහ උසස් කිරීම් සඳහා 124 දෙනෙකුගේ නාම ලේඛනයක් පොලිස් කොමිසම හරහා පොලිස්පති වෙත පැමිණ ඇති බවය.එහි නම තිඛෙන කිරුළපන පොලිසියේ හිටපු ස්ථානාධිපතිවරයෙකු වන වර්ණසූරිය යන අය පොලිස් අධිකාරී නිලයට උසස්කර ඇති බව මෙම ලේඛනයෙහි අඩුපාඩු පෙන්වාදෙමින් ඉහළ පොලිස් නිලධාරියෙක් පැවසීය. මෙම පුද්ගලයා පසුගිය කාලයේ ඇමෙරිකාවට ගොස් එහි රැකියාවක් කරමින් සිටි අයෙකු බවද ඔහු එලෙස විදේශගත වනවිට ප්‍රධාන පොලිස් පරීක්ෂක නිලයට හෝ නිර්දේශ වී නොසිටි පුද්ගලයෙකු බවද එම උසස් පොලිස් නිලධාරියා පැවසීය. මේ අතර අධ්‍යාපනය සදහා ස්විට්සර්ලන්තයට ගොස් සිට පැමිණ ඇති හපුවින්න නැමති නිලධාරියෙකුටද ඔහු පොලිසිය හැරදා යනවිට සිටි නිලය වන පොලිස් පරීක්ෂක නිලයේ සිට සහකාර පොලිස් අධිකාරී නිලයට උසස්වීමක් ලබාදීමද පොලිසිය තුළ දැඩි කතාබහට ලක්වී තිබේ.

මෙම ලේඛනය සකස් කිරීමට පත්කරනු ලැබූ කමිටුවේ රාජකාරි කළ සහකාර ලේකම්වරයා මෙම උසස්වීම ලද පුද්ගලයාගේ සහෝදරයෙකු බවද වාර්තා වෙයි. මේ වනවිට මෙම උසස්වීම් සඳහා පත්වීම් ලිපිද නිකුත් කර ඇත. එහෙත් මේ තීරණය ක්‍රියාත්මක කිරීම පොලිස්පති පූජිත් ජයසුන්දර ප්‍රතික්ෂේප කිරීම නිසා මෙම තීරණය ක්‍රියාත්මක වීම තාවකාලිකව යටපත්වී ඇතැයි පොලිස් ආරංචිමාර්ග වැඩිදුරටත් පවසයි.