මරණ දඬුවම ක‍්‍රියාත්මක කිරීම සඳහා ජනාධිපතිවරයා ගන්නා උත්සාහය අත් හැර නොමැති බව පෙනේ. දැන් ඔහු සිටින්නේ, තමාගේ අත්තනෝමතික තීරණයට එරෙහි වන්නන් සැම දෙනාට ම හැකි වැර යොදා පහර දීමේ ක‍්‍රියාන්විතයක ය.

මුලින් ම ජනාධිපති මෛත‍්‍රීපාල සිරිසේනගේ ද්වේෂයට බඳුන් වුණේ රාජ්‍ය නොවන සංවිධාන හෙවත් එන්ජී ඕ ය. මේ එන්ජී ඕ විරෝධය පසුගිය අවුරුදු හතරහමාරක කාලයෙන් වැඩි කොටසක් තුළ ජනාධිපතිවරයා විසින් අඛණ්ඩ ව පවත්වා ගන්නා ලද්දකි. එහෙත්, ඔහුට දැන් අමතක ව ඇත්තේ, 2015 ජනවාරියේ දී, අද ඔහුගේ ද්වේෂයට බඳුන් වී තිබෙන එන්ජී ඕ සහ එන්ජී ඕකාරයන් සියල්ලන්ම කැප වී වැඩ කළේ ඔහුගේ ජයග‍්‍රහණය සඳහා බව ය. ඒ මෛත‍්‍රීපාල සිරිසේනගේ කිසියම් මායාමය බලයක් ගැන සිතා නොවේ. මහින්ද රාජපක්‍ෂ ගෙන ගිය ජන විරෝධී පාලනයෙන් රට මුදා ගැනීම සඳහා ය. ඒ කාලයේ එන්ජී ඕ සහ එන්ජී ඕකාරයන් සමග එක පතේ කමින්, එක මේසයේ වාඩිවෙමින් ජනාධිපතිවරයා වැඩ කෙළේ ය. අද මේ කියන කිසිම විරෝධයක් ජයග‍්‍රහණය කරන තුරු ජනාධිපතිවරයාගේ තිබුණේ නැත.

ජනාධිපතිවරයාට එන්ජී ඕ විරෝධයක් එන්නේ, ඇතැම් භික්‍ෂූන් හා හමුදා සාමාජිකයන් කළ අපරාධ සම්බන්ධයෙන් මේ රාජ්‍ය නොවන සංවිධාන එරෙහි වන්නට පටන්ගත්තාට පසු ව ය. ජනාධිපතිවරයා සිටියේ කවර අපරාධයක් කළ ද, භික්‍ෂූන් හා හමුදා සාමාජිකයන්ට එරෙහිව නීතිය ක‍්‍රියාත්මක නොකළ යුතු යැයි කියන ස්ථාවරයේ ය. ඉතින්, එවැනි ප‍්‍රතිගාමී ස්ථාවරයක සිටින විට, නීතියේ පාලනය වෙනුවෙන්, මිනිස් අයිතිවාසිකම් වෙනුවෙන් කටයුතු කරන එන්ජී ඕ හා එන්ජී ඕකාරයන් ජනාධිපතිට අරහං ය.

මරණ දඬුවමට ජනාධිපතිවරයා පෙළඹෙන්නේ ද ඔහුගේ ඉතා සරල සිතීම් පරාසය නිසා ය. මිනිසුන් මැරීමෙන් ප‍්‍රශ්න විසඳිය හැකි බව ඔහුගේ කුඩා මනස දෙන සංඥාවයි. එහෙත්, මරණ දඬුවම නැවත ක‍්‍රියාත්මක කිරීම වනාහි, රටක් හැටියට, සමාජයක් හැටියට මෙන් ම ලෝකයක් හැටියට ද අප කර ගන්නා බලවත් වරදක් බවත්, එය නොකළ යුත්තක් බවත්, ඉතා ප‍්‍රබල කාරණා හරහා පෙන්වා දෙන විට, ඒ සියල්ලෝ ජනාධිපතිවරයාට එන්ජී ඕකාරයෝය. ඉතින්, එන්ජී ඕකාරයන් සමග ඇති තරහට ඔහු මරණ දඬුවම කොහොම හරි ක‍්‍රියාත්මක කරන්නට වෑයම් කරයි.

මරණ දඬුවම පිළිබඳ තීරණයට යුරෝපා සංගමය ඇතුළු ජාත්‍යන්තර සංවිධාන හා විවිධ රටවල් දැන් සිය විරෝධය ජනාධිපතිවරයාට ම දන්වා තිබේ. විශේෂයෙන් යුරෝපා සංගමය කියා ඇත්තේ, මරණ දඬුවම යළි ක‍්‍රියාත්මක වේ නම්, ලංකාවට දෙන ජීඑස්පී ප්ලස් සහනය සම්බන්ධයෙන් යළි සලකා බැලීමට සිදු වන බවය. මේ දැනුම් දීම ජනාධිපතිවරයා පිළි ගන්නේ ‘තර්ජනයක්’ ලෙස ය. ලංකාවේ ස්වාධීනත්වයට, ඊනියා ස්වෛරීභාවයට කරන තර්ජනයක් ලෙස ය.

එහෙත්, මහින්ද රාජපක්‍ෂ පාලන කාලයේ මානව අයිතිවාසිකම් පිළිබඳ ව පැවැති අපකීර්තිමත් තත්ත්වය මත ජීඑස්පී ප්ලස් ලංකාවට අහිමි වීම ගැන මැතිවරණ වේදිකාවල දී චෝදනා කෙළේ ද ජනාධිපති මෛත‍්‍රීපාල සිරිසේන ම ය. එය නැවතත් ලබා ගැනීම සඳහා ඔහු වැදගත් දායකත්වයක් දුන් බව ද, නැවතත් ලැබුණු පසු, තමාගේ දායකත්වය ගැන ඔහු උදම් ඇනූ බව ද අපට මතක ය.

අද ලෝකයේ වෙළෙඳාම, ණය හා ප‍්‍රදාන සැපයීම, වෙළෙඳ සහන ලබාදීම ආදි හැම කාරණයක් සමග ම මානව අයිතිවාසිකම් ගැට ගැසී තිබේ. එය මිනිස් වර්ගයාගේ පැත්තෙන් ඉතා හොඳ ය. මිනිස් අයිතිවාසිකම් උල්ලංඝනය කරමින් කරන වෙළෙඳාම්වලට හෝ නිෂ්පාදනය කෙරෙන භාණ්ඩවලට හෝ එරෙහි ව ලෝකයේ නැගෙන විරෝධතා අප සැලකිය යුතු වන්නේ ධනාත්මක ලෙසිනි. ඒ ආධාර, ප‍්‍රදාන හෝ වෙළෙඳ සහන ලබා ගැනීමට අපට අවශ්‍ය නම්, ඒ මානව අයිතිවාසිකම් අවශ්‍යතා පිළි ගැනීමට අපට සිදු වෙයි. එය යහපත් කාරණයකි. එහි තේරුම, අප මානව අයිතිවාසිකම් රකින අතරේ ඒ ආර්ථික ප‍්‍රතිලාභ ද ලබා ගන්නා බව ය. එක පැත්තකින් ආර්ථික සහන ලැබෙන අතරේ, රටේ මිනිසුන්ගේ මානව අයිතිවාසිකම් තත්ත්වය දියුණු වීම වරදක් ද?

එහෙත්, අවාසනාවකට ජනාධිපති සිරිසේන දකින්නේ මරණ දණ්ඩනයට එරෙහිව යුරෝපා සංගමයේ අවධාරණය ‘තර්ජනයක්’ ලෙස ය. යුරෝපා සංගමයත් එපා. ජීඑස්පී ප්ලසුත් උඹලා ම තියා ගනිල්ලා යැයි සිරිසේන මහතා හෙටානිද්දා කිවහොත් අප පුදුම නොවිය යුත්තේ ජනාධිපතිවරයා සාමාන්‍යයෙන් එවැනි පටු ආකාරයෙන් සිතන මතන බව පැහැදිලි ව පෙනෙන නිසා ය.

එහෙත් ප‍්‍රශ්නය එය නොවේ. මේ එක පුද්ගලයකුගේ සිතීමේ දුප්පත්කමත්, ලෝකය ගැන දැනුම් තේරුම් නැතිවීමේ අභාග්‍යයත් නිසා රටක් සමාජයක් හැටියට ම අපට මුහුණ දෙන්නට සිදු වන අවදානම හා අලාභය යි. තව මාස කිහිපයකින් ජනාධිපති ධුරය අත් හරින්නට සිදු වන සිරිසේන ජනාධිපතිවරයා ඊට පසු මහජන අවකාශයෙන් ගිලිහී යෑම ස්ථිර ය. එහෙත්, ලංකාවේ මිනිසුන්ට ගෞරවනීය රටක් තවදුරටත් අවශ්‍ය ය. ඒ රට මානව අයිතිවාසිකම් ද රකින අතරේ, ආර්ථික ප‍්‍රතිලාභ ද ලබන අතරේ, සාපේක්‍ෂ ස්වෛරීභාවයක් ද භුක්ති විඳිනු දකින්නට අපි කැමැත්තෙමු.

එක් පුද්ගලයකුට කෙටි කලක් තුළ මුළු රටක් විනාශ කරන්නට ඉඩ නොතැබිය යුත්තේ එහෙයිනි.x