තමා අත්අඩංගුවට ගැනීමට නියමිත ව ඇති බැවින්, ඉන් වළක්වා ලන ලෙස ඉල්ලා ආරක‍ෂක අමාත්‍යාංශයේ හිටපු ලේකම් ගෝඨාභය රාජපක‍ෂ, ශ්‍රේෂ්ඨාධිකරණය ඉදිරියේ ගොනු කළ මූලික අයිතිවාසිකම් පෙත්සම විභාගයෙන් තමා ඉවත් වන බව විනිසුරු මුර්දු ප්‍රනාන්දු මහත්මිය ප්‍රකාශ කළා ය. ඒ, මේ ජුනි මාසයේ මුල ය. ඒ හේතුවෙන් පෙත්සම් විභාගය කල් තබන ලදි. ඊළඟ දිනය මේ අවුරුද්දේ නොවැම්බර් 27 වැනි දා ය. ඒ කියන්නේ තවත් මාස හයකට පසු දිනයකිෟ නොවැම්බර් 27න් පසු තවත් සති දෙක තුනකින් මේ අවුරුද්දේ වසර අවසාන අධිකරණ නිවාඩුව ද එළැඹෙනවා ඇත. නොවැම්බර් 27 වැනි දා ද පෙත්සම් විභාගය කල් යෑමට තවත් හේතුවක් යෙදුණොත් ඊළඟ දින ලැඛෙනු ඇත්තේ ලබන අවුරුද්දේ මැදට ය.

ගෝඨාභය රාජපක‍ෂ මහතා මේ මූලික අයිතිවාසිකම් පෙත්සම ගොනු කළේ, මිග් යානා ගනුදෙනුව සම්බන්ධයෙන්, ලංකා හොස්පිට්ල්ස්හි මුදල් ආයෝජනය කිරීම සම්බන්ධයෙන් සහ ඇවොන් ගාඩ් අවි ගබඩාව සම්බන්ධයෙන් ප්‍රකාශයක් ලබා ගැනීම සඳහා පොලිස් මූල්‍ය අපරාධ කොට්ඨාසය තමා කැඳවා ඇති බවත්, එහි ගියහොත් තමා අත්අඩංගුවට ගැනීමට සැලසුමක් ඇති බවත් කියමිනි. රාජපක‍ෂ මහතාට එරෙහිව එල්ල වී ඇති මේ චෝදනා ගමේ ගොඩේ හරක් හොරකමක්, ගස්ගෙඩි කැඩීමක් ගැන නොවේ. මිලියන ගණනින්, සමහර විට බිලියන ගණනින් මහජන මුදල් අවභාවිතය සම්බන්ධයෙනි.

එක් උදාහරණයක් කිවහොත්, 2006දී ව්‍යාජ සමාගමක් හරහා මිග් යානා හතරක් ශ්‍රී ලංකා ගුවන් හමුදාවට රුසියාවෙන් මිලදී ගැනීමේ මුවාවෙන් අමෙරිකානු ඩොලර් මිලියන 6ක් වංචා කිරීම සම්බන්ධයෙන් වන චෝදනාවක් ගෝඨාභය රාජපක‍ෂ මහතා වෙත එල්ල වී තිබේ. (සමහරුන් කියන විදියට, මේ ගනුදෙනුව ගැන 2007 ජූලි 29 වැනි දා සිය පුවත්පතේ දීර්ඝ ව ලියමින්, ගනුදෙනුවට අදාළ සමාගම හා පුද්ගලයන් ව්‍යාජ බව, සන්ඩේ ලීඩර් කර්තෘ ලසන්ත වික්‍රමතුංග හෙළි කිරීම, ඔහුගේ ජීවිතය අහිමි වීමට ද හේතු විය.)

මේ සම්බන්ධයෙන් විමර්ශන පවත්වන මූල්‍ය අපරාධ පොලිස් කොට්ඨාසය, ඒ පිළිබඳ ප්‍රකාශයක් ලබා දෙන්නට එහි එන ලෙස දැනුම් දුන් විට රාජපක‍ෂ මහතා කළේ කුමක් ද? ශ්‍රේෂ්ඨාධිකරණය ඉදිරියට ගොස්, මූලික අයිතිවාසිකම් පෙත්සමක් ඉදිරිපත් කිරීමයි. ඒ 2015 දී ය. ඒ පෙත්සම මුලින් විභාගයට ගත් ඊවා වනසුන්දර හා සරත් ආබෘෘ යන විනිසුරුවරු, පෙත්සම විභාගය අවසන් වන තුරු ගෝඨාභය රාජපක‍ෂ අත්අඩංගුවට ගැනීමෙන් වළක්වන නියෝගයක් නිකුත් කළෝ ය. ඒ නියෝගය දුන් විනිසුරු ඊවා වනසුන්දර, 2014 ජූලි 6 වැනි ඉරිදා, සති අන්ත zදේශයZ පුවත්පතට කියා තිබුණේ, තමා ශ්‍රේෂ්ඨාධිකරණ විනිසුරුවරියක හැටියට පත් කළ ජනාධිපති මහින්ද රාජපක‍ෂ නීති විද්‍යාලයේ සිටියදී තමාගේ හොඳ මිතුරකු බවයි. ඒ මිතුරුකම ගැන ඒ පුවත්පත් ලිපියේ දී ඈ මහත් ආහ්ලාදයෙන් දීර්ඝ වශයෙන් විස්තර කොට තිබේ. ඒ සා මිතුරු ජනාධිපතිවරයාගේ සහෝදරයා, මහජන මුදල් වංචාවක් සම්බන්ධයෙන් අත්අඩංගුවට ගැනීමෙන් වළක්වා දෙන්නැයි, තමා ඉදිරියට මූලික අයිතිවාසිකම් පෙත්සමක් ගෙන ආ විට, ඇය ඒ සහෝදරයාට අවශ්‍ය නියෝගය ලබා දුන්නා ය.

දැන් 2015න් වසර තුනක් ඉක්මී ගොසිනි. අද වන විට, ඊවා වනසුන්දර මහත්මිය ද ඇතුළු ව විනිසුරුවරුන් හතර දෙනකු එම පෙත්සම විභාගයෙන් ඉවත් වී තිබේ. එහෙත්, පෙත්සම තවමත් විභාගයට ගෙන නැත. මහජන මුදල් වංචාවක් සම්බන්ධයෙන් චෝදනා ලබා සිටින ගෝඨාභය රාජපක‍ෂ අත්අඩංගුවට ගැනීමට එරෙහි නියෝගය තවමත් ක්‍රියාත්මක වෙයි.

මේ ක්‍රියාවලිය දෙස බලා සිටින සාමාන්‍ය යුක්ති ගරුක අප වැනි මිනිසකුගේ සිතට එන්නේ කුමක් ද?

අපේ අධිකරණය ගන්නා තීන්දු තීරණවලින්, මහා පරිමාණයෙන්, ඩොලර් මිලියන ගණනින් මහජන මුදල් වංචා කළ දේශපාලන කැරැට්ටුවක් ඇතිවුන්ට, රටේ වෙනත් සාමාන්‍ය මිනිසුන්ට නොමැති අසාධාරණ රැකවරණයක් සැපයෙනවා ය කියා නොවේ ද?•