2015 ජනාධිපතිවරණයට පෙර දින ගාමිණි සෙනරත්, කුඩාබාලගේ හා නීල් හපුහින්න කොන්ත්‍රාත් අනුමත කරලා

 

ඉදිකෙරෙමින් පවතින කොළඹ ග්‍රෑන්ඞ් හයට් හෝටලයේ ඕනර්ස් අපාර්ට්මන්ට් කාහටද මැයෙන් පසුගිය සතියේ අපි ලීවෙමු. එම ලිපියේදී පාර්ලිමේන්තුව තුළ ව්‍යවසාය සංවර්ධන අමාත්‍යාංශයට අදාළ වැය ශීර්ෂ විවාදයේදී මහින්දානන්ද අලුත්ගමගේ ඇසූ ප්‍රශ්නයකට එවක අමාත්‍ය කබීර් හෂීම් ලබාදුන් පිළිතුරක්ද ගෙනහැර දැක්වුවෙමු. එදින එනම් 2017 නොවැම්බර් 29 බදාදා එම පිළිතුරු ලබාදීමේදී කබීර් හෂීම් මහතා කියූ දෙයක මෙසේද සටහන් වී තිබුණි.

‘මූලාසනාරූඪ ගරු මන්ත්‍රීතුමනි, මහින්දානන්ද අලුත්ගමගේ හිටපු ඇමතිතුමා හයට් හෝටලයේ නඩුවක් ගැන කිව්වා. අපි ලබාදුන් කොන්ත්‍රාන්තුවක් අවලංගු කළාය, ඒ නිසා දැන් ලොකු දඩයක් අපට ගෙවන්න සිද්ධ වෙනවාය කිව්වා. ඔව්, එවැනි ආකාරයේ කොන්ත්‍රාන්තුවක් අවලංගු කරලා තිබෙනවා. මොකක්ද ඒ කොන්ත්‍රාත්තුව? ඒ පසුබිම් දැනගෙනනේ කථා කරන්න ඕනෑ. සමහර වෙලාවට ළදරුවෙක් ජරාව දමා ගත්තාම ඇඟේ, මුහුණේ හැම තැනම ගා ගන්නවානේ. එවැනි ආකාරයට තමන් දන්නේ නැති දෙයක් ගැන කතා කරනකොට තමන්ගේ ඇඟේ ජරාව ගා ගන්නවා වගේ දෙයක් තමයි මහින්දානන්ද අලුත්ගමගේලා දැන් කළේ. ඒ නිසා මම කියන්නම් මේකේ ඇත්ත කථාව.

මූලාසනාරූඪ ගරු මන්ත්‍රීතුමනි, කොන්ත්‍රාත්තුවක් අත්සන් කරන්න සැලසුම් කළා. හයට් අධ්‍යක්ෂ මණ්ඩලයෙන් 2014 දෙසැම්බර් මාසයේ 16 වැනිදා සාකච්ඡා කරලා ඒක අත්සන් කරන්න තිබුණේ අඩු ධාරිතා විදුලි පද්ධතියට, ඊඑල්වි වයරින්වලට, යාන්ත්‍රික විදුලි සහ නළ ජල අපවහන (එම්.ඊ.පී., මෙකැනිකල් ඉලෙක්ටි්‍රකල් ඇන්ඞ් ප්ලම්බින්) අභ්‍යන්තර අලංකරණ සැලසුම් (ඉන්ටීරියර් ඩිසයින්ස්) කියන කොන්ත්‍රාත් ටික දෙන්න කථා කරලා තිබියදී ඒ වෙලාවේ අධ්‍යක්ෂ මණ්ඩලය කිව්වා. ‘ඒක යම් යම් කොන්දේසි ඇතුළත් කරන්න ඕනෑ. නමුත්, තවත් වැඩ අවසන් වුණාට පසුව තමයි මේ ටික දෙන්න ඕනෑ.’ කියලා. එහෙත්, හදිසියේ 2015 ජනවාරි මාසයේ 8 වැනිදා ජනාධිපතිවරණය පැවැත්වුණු බව ඔබතුමන්ලාට මතක ඇති. 2015 ජනවාරි මාසයේ 7 වැනි දින හයට් එකේ අධ්‍යක්ෂ මණ්ඩලයේ සියලුදෙනා කැඳවන්නේ නැතිව තුන්දෙනෙක් එකතු වෙනවා. කුඩාබාලගේ මහතා, ගාමිණී සෙනරත් මහතා, නීල් හපුහින්න මහතා. මේ තුන්දෙනා එකතුවෙලා 2015 ජනවාරි මාසයේ 7 වැනිදා ඒ කියන්නේ 2015 ජනාධිපතිවරණයට කලින් දවසේ මෙන්න මේ කොන්ත්‍රාත්තුව අනුමත කරනවා. දෙයියනේෟ ජනාධිපතිවරණය තියන්න දවසකට කලින් කොන්ත්‍රාත්තුවක් අනුමත කරන්නේ මොකටද? කොමිස් ගන්න වෙන්න ඕනෑ. වෙන මොනවා හෝ යටි වැඩක් තියෙන්න පුළුවන්. නැත්නම් මෙහෙම හදිසියේ හෙට ජනාධිපතිවරණයක් තියනකොට අද කොන්ත්‍රාත්තුවක් අනුමත කරනවාද? අධ්‍යක්ෂ මණ්ඩලය මේකට කොන්දේසි දමන්න ඕනෑ කියලාත් තිබියදී තමයි අනුමත කරලා තියෙන්නේ. මේ හොර කොන්ත්‍රාත්තුව නිසාම තමයි 2015 මාර්තු මාසයේ එවකට හිටපු අමාත්‍යවරයා මේක දිහා බලලා, වැඩ ආරම්භ කරලා තිබුණේ නැති නිසාත්, කොන්ත්‍රාත්තුව නියම ක්‍රමවේදයට දීලා නැති නිසාත් මේක නැවැත්තුවේ. ඒ වෙනකොට පෆෝමන්ස් බොන්ඞ් එකවත් ගෙවලා තිබුණේ නැහැ. ඒ නිසා සිංගප්පූරුවල ආර්බිටේ්‍රෂන් ගිහිල්ලා, එතැනදී ප්‍රශ්නයක් වුණා. නඩුව උසාවියකට දාලා තාක්ෂණික තොරතුරු දුන්නාම අපි හිතනවා අපට මේක වෙනස් කරන්න පුළුවන් කියලා.’

කබීර් හෂීම් මහතාගේ එම පිළිතුර තුළ පුද්ගලයන් තිදෙනෙකුගේ නම් ඇතුළත්ය. ඒ වත්මන් අග්‍රාමාත්‍ය ලේකම් ගාමිණී සෙනරත්, වත්මන් සමෘද්ධි, ගෘහ ආර්ථික, ක්ෂුද්‍ර මූල්‍ය, ස්වයං රැකියා, ව්‍යාපාර සංවර්ධන හා ඌන උපයෝජිත රාජ්‍ය සම්පත් සංවර්ධන රාජ්‍ය අමාත්‍යාංශ ලේකම් නීල් බණ්ඩාර හපුහින්න හා ලාෆ්ස් සමාගමේ වත්මන් කළමනාකාර අධ්‍යක්ෂ, ප්‍රධාන විධායක නිලධාරී පියදාස කුඩාබාලගේය.

කොළඹ ග්‍රෑන්ඞ් හයට් හෝටල් ව්‍යාපෘතිය සඳහා ලිට්රෝ ගෑස් සමාගම ආයෝජනය කළ මුදලින් හම්බන්තොට හයට් හෝටල් ව්‍යාපෘතියට මුදල් යෙදවීම මගින් රාජ්‍ය මුදල් සාවද්‍ය පරිහරණය යටත් මේ තිදෙනාට එරෙහිව මහාධිකරණයේ නඩු පැවරූ නමුත් ඔවුහු එයින් නිදහස් වූහ. ඒ එම මුදල් වැය කිරීම සාවද්‍ය මුදල් පරිහරණය කිරීමක් නොවන බවට අධිකරණය තීරණය කිරීම හේතුවෙනි. අධිකරණයේ එම තීරණයට එම නඩුවට සාක්ෂි ලබාදුන් ලිට්රෝ ගෑස් සමාගමේ එම කාලයේ සිටි අධ්‍යක්ෂවරයෙකුගේ සාක්ෂි බලපෑ අතර ඔහු කීවේ හම්බන්තොට හයට් හෝටල් ව්‍යාපෘතියට මුදල් යෙදවීම පිළිබඳ දැනුවත්ව ලිට්රෝ අධ්‍යක්ෂ මණ්ඩලය හයට් හෝටල් ව්‍යාපෘති සමාගමට මුදල් ලබාදුන් බවයි.

මේ ආකාරයට සාක්ෂිකරුවන් විත්තිකරුවන්ට පක්ෂව සාක්ෂි ලබාදීම, මුලින් දුන් සාක්ෂි වෙනස් කිරිම ආදිය නිසා පසුගිය යහපාලන ආණ්ඩු සමයේදී ඊට පෙර මහින්ද රාජපක්ෂ පාලන කාලයේදී සිදුවූ වංචා දූෂණ සම්බන්ධයෙන් පැවරූ නඩු කිහිපයකම අරමුණු ඉටු වූයේ නැත. එම නිසා එම නඩුවල විත්තිකරුවන් නිදහස් වීම හෝ සාක්ෂිකරුවන් අවිශ්වාස වීම මත නඩු ඉල්ලා අස් කරගන්නට නීතිපති දෙපාර්තමේන්තුවට සිදුවිය.

ස්ථාවරයන් වෙනස් කළ සාක්ෂිකරුවන්ට එරෙහිව නීතිපති දෙපාර්තමේන්තුව නඩු පැවරීම් සිදුකරන බව එවැනි අවස්ථාවලදී නීතිපති දෙපාර්තමේන්තුව ප්‍රකාශ කර ඇතත් තවමත් එවැනි පුද්ගලයෙකුට එරෙහිව නඩු පැවරීමක් සිදුවී නැත.

ග්‍රෑන්ඞ් හයට් කොළඹ ව්‍යාපෘතිය සඳහා ශ්‍රී ලංකා රක්ෂණ සංස්ථාව ලිට්රෝ ගෑස් සමාගම හා සේවක අර්ථසාධක අරමුදල යෙදවූ මුදලින් පියදාස කුඩාබාලගේ නුවරඑළියේ ලිට්ල් ඉංන්ග්ලන්ඞ් කොටේජ් ව්‍යාපෘතියේ ගෙයක් ගැනීම ගැන අප මීට පෙර අනිද්දා පුවත්පත මගින් හෙළිදරව් කර ඇත.

මේ ආකාරයේ පසුගිය මහින්ද රාජපක්ෂ පාලන කාලයේදී මේ රටේ සිදු වූ කළු සුදු සාවද්‍ය අරමුදල් පරිහරණයන් මෙන්ම හොරකම්ද ඕනෑ තරම් තිබුණි. එහෙත් නඩු පැවරීම්වලදී බොහෝවිට අවශ්‍ය කාරණය වෙනුවට අනවශ්‍ය කාරණයට නඩු පැවරීම්ද දක්නට ලැබුණි. ඒ මගින් සිදුවුණේ හොරු නිදොස් වීමය. හොරකම් සිදු නොවූ බවට සමාජ මතයක් ඇතිවීමය.

මේ ග්‍රෑන්ඞ් හයට් කොළඹ ව්‍යාපෘතියේ මුදල් හම්බන්තොට හයට් ව්‍යාපෘතියට යෙදවීම සම්බන්ධ නඩුවේදී එහි එක් විත්තිකරුවෙකු වූ පියදාස කුඩාබාලගේට අතිවිශාල මුදලක් නීතිඥ ගාස්තු හා සේවා වෙනුවෙන් ගෙවන්නට සිදුවී ඇති බවට අපට තොරතුරු ලැබී තිබේ. ඒ පියදාස කුඩාබාලගේ එම නඩුව අවසන් වීමට පෙර ශ්‍රී ලංකා රක්ෂණ සංස්ථාවට යොමු කළ ඉල්ලීමක ඇති තොරතුරු අනුවය.

පියදාස කුඩාබාලගේ ශ්‍රී ලංකා රක්ෂණ සංස්ථාවෙන් ඉල්ලා ඇත්තේ ඒ වනවිට එම නඩුව සම්බන්ධයෙන් ඔහුට වැය වී ඇති නඩු ගාස්තු ගෙවන ලෙසය. ශ්‍රී ලංකා රක්ෂණ සංස්ථාවට හා එහි අනුබද්ධ සමාගම්වල අධ්‍යක්ෂවරුන්ට හා නිලධාරීන්ට වගකීම් පිළිබඳ කාරණාවලදී ප්‍රතිපූරණය කර ගැනීමට රක්ෂණයක් තිබී ඇති අතර එය හඳුන්වා ඇත්තේ ඩී ඇන්ඞ් ඕ ලයබිලිටි පොලිසි යනුවෙන්ය.

කොළඹ ග්‍රෑන්ඞ් හයට් හෝටල් ව්‍යාපෘතියේ මව් සමාගම වන කැන්විල් හෝල්ඩින්ස් සමාගමේ කළමනාකාර අධ්‍යක්ෂ හා ප්‍රධාන විධායක නිලධාරී ලෙස පියදාස කුඩාබාලගේ කටයුතු කළ අතර ඊට අමතරව එම සමයේම ශ්‍රී ලංකා රක්ෂණ සංස්ථාවේ හා ලිට්රෝ ගෑස් සමාගමේ කළමනාකාර අධ්‍යක්ෂ හා ප්‍රධාන විධායක නිලධාරී ලෙසද කටයුතු කළේය.

ඔහු ශ්‍රී ලංකා රක්ෂණ සංස්ථාවෙන් ඉහත නඩුවට වැය වූ නීතිඥ හා සේවා ගාස්තු ඉල්ලන්නේ කැන්විල් හෝල්ඩින්ස් සමාගම ශ්‍රී ලංකා රක්ෂණ සංස්ථාවේ අනුබද්ධ සමාගමක් ලෙස පෙන්වාදෙමින්ය. ඒ අනුව එම සමාගමේ අධ්‍යක්ෂවරුන්ට හා නිලධාරීන්ට ඉහත කී ඩී ඇන්ඞ් ඕ ලයබිලිටි පොලිසිය ප්‍රකාරව ප්‍රතිරක්ෂණ සමාගම්වලින් රක්ෂණ වන්දි ලබාගත හැකි බව දක්වමින්ය.

මෙහිදී පියදාස කුඩාබාලගේ නඩු වාර 30ක් සඳහා එක් ලියවිල්ලක ශ්‍රී ලංකා රක්ෂණ සංස්ථාවෙන් ඉල්ලා ඇති මුදල රුපියල් පන්කෝටි තිස්පන්ලක්ෂයකි. ඒ ජනාධිපති නීතිඥයන් දෙදෙනෙකු, නීතිඥයෙකු හා අනෙකුත් කනිෂ්ඨ නීතිඥයන්ගේ ගාස්තු ගෙවීම සඳහාය. නඩු වාර තිහෙන් බෙදූ විට එක් නඩු වාරයක ගාස්තුව රුපියල් දාහත් ලක්ෂ අසූ තුන්දහසකි.

පියදාස කුඩාබාලගේ වෙනුවෙන් පෙනී සිටි ජනාධිපති නීතිඥයන් දෙදෙනා වන්නේ ගාමිණී එස්. මාරපන හා අලි සබ්රිය. අනෙක් ප්‍රධාන නීතිඥයා ගාමිණී මාරපනගේ පුත් නවීන් මාරපනය. පියදාස කුඩාබාලගේ එවා ඇති ඉල්ලීමේ හා ඉන්වොයිස්වල ඒ අයගේ හැර අනෙක් කනිෂ්ඨ නීතිඥයන්ගේ නම් සඳහන්ව නැත.

මෙහිදී අපගේ අවධානය යොමු වන්නේ ජනාධිපති නීතිඥ අලි සබ්රි වෙතය. ඉල්ලීමේ හා ඉන්වොයිස් විස්තර අනුව නීතිඥ ගාස්තු ඉල්ලුම් කරන ලද නඩු දින 30ටම ජනාධිපති නීතිඥ අලි සබ්රි සහභාගි වී නැත. ඔහුගේ නම සඳහන් වන්නේ ඉන්වොයිස් හතරෙන් තුනක පමණය. එම ඉන්වොයිස් තුන මගින් ජනාධිපති නීතිඥ අලි සබ්රිගේ නීතිඥ ගාස්තු ලෙස රුපියල් එක්කෝටි පනස් ලක්ෂයක මුදලක් දක්වා ඇත. මෙම නඩුව වෙනුවෙන් නිදිවරාගෙන වැඩ කටයුතු කළ ඔහුගේ කනිෂ්ඨ නීතිඥයන් සඳහා ජනාධිපති නීතිඥ අලි සබ්රිගේ ඉල්ලීම මත ඉන්වොයිස් කර ඇති ලක්ෂ 15ක මුදල ඊට අමතරවය.

මේ නඩු වාර 30 සඳහා ජනාධිපති නීතිඥ අලි සබ්රි පෙනී සිටියේයැයි සිතුවහොත් එක් නඩු දිනයක් සඳහා ඔහුගේ ගාස්තුව රුපියල් ලක්ෂ 5කි. නඩු දින 30ටම ඔහු සහභාගි නොවූවා නම් ඔහුගේ ගාස්තුව ඊට වඩා වැඩි වේ.

පියදාස කුඩාබාලගේ සම්බන්ධ නඩුවක මිල එසේ නම් ජනාධිපති ගෝඨාභය රාජපක්ෂ වෙනුවෙන් ජනාධිපති නීතිඥ අලි සබ්රිගේ ගාස්තුව ඊට වඩා බොහෝ වැඩි විය  යුතුය. එය ගණනය කිරීම වෙනුවට සිතාගත යුත්තකි. එසේම ජනාධිපති ගෝඨාභය රාජපක්ෂට විරුද්ධව තිබුණේ එක් නඩුවක් පමණක් නොවන නිසා එම නඩු සියල්ලෙහිම නඩු ගාස්තු මිල ගණනය අතිවිශාල එකක් විය යුතුය.

එසේ කියන්නට සිදුවන්නේ පියදාස කුඩාබාලගේ සිය ඉල්ලීමේ හා ඉන්වොයිස්වල දක්වා ඇති කරුණු අනුවය. ඔහු කියන්නේ රටේ ප්‍රමුඛ ජනාධිපති නීතිඥයන් ඉතා සහනදායී මුදලක් ඔහුගෙන් අය කළ බය. එමෙන්ම ඉන්වොයිස්වලද සඳහන් වන්නේ සමහර නඩු දිනවලට අයකිරීම් නොකළ බව හා ලබාදෙනු ලැබූ උපදේශනවලට අය කිරීමක් නැති බවය.

ජනාධිපති නීතිඥ අලි සබ්රිගේ මෙන්ම ජනාධිපති ගෝඨාභය රාජපක්ෂගේ මිතුරෙකු යැයි කියන දෙරණ හිමිකරු දිලිත් ජයවීර කියා ඇති පරිදි ජනාධිපති ගෝඨාභය රාජපක්ෂගේ නඩු සඳහා ජනාධිපති නීතිඥ අලි සබ්රි සහභාගි වී ඇත්තේ නොමිලයේය. ඊටත් අමතරව මුදලින්ද ජනාධිපති ගෝඨාභය රාජපක්ෂට ජනාධිපති නීතිඥ අලි සබ්රි උදව් කර තිබේ.

එම නොමිලයේ පෙනීසිටීම්වල හා මුදලින් උදව් කිරීම්වල මූල්‍යමය වටිනාකම ගණනය කර පෙන්විය නොහැකි වූවත් ඊට ප්‍රතිඋපකාර ජනාධිපති ගෝඨාභය රාජපක්ෂ ජනාධිපති නීතිඥ අලි සබ්රිට දක්වා තිබේ. ඒ ජාතික ලැයිස්තුවෙන් පළමු වරට පාර්ලිමේන්තුවට පත් කර එම පළමු වාරයේම අධිකරණ කැබිනට් අමාත්‍යධුරයද පිරිනැමීම මගින්ය.

මෙම ලිපියට පදනම් කරගත් පියදාස කුඩාබාලගේගේ ඉල්ලීම ශ්‍රී ලංකා රක්ෂණ සංස්ථාව යහපාලන ආණ්ඩු සමයේදී ඉටු කර තිබුණේ නැත. එම ඉල්ලීමේ අගය ඉන්පසු වැඩි වී තිබුණාද විය හැක. දැන් ඇත්තේ නැවතත් පියදාස කුඩාබාලගේ සේවය කළ රාජපක්ෂ ආණ්ඩුවකි. එම නඩුවට අදාළ අයගෙන් තවම රජයේ තනතුරක් නැත්තේ ඔහුට පමණි.

මෙම ආණ්ඩුව යටතේ ශ්‍රී ලංකා රක්ෂණ සංස්ථාව එම ඉල්ලීමේ සඳහන් මුදල ගෙවයිද යන්න අපගේ විමසිල්ලට ලක්වන කරුණකි. එමෙන්ම පියදාස කුඩාබාලගේ එම මුදල සිය නීතිඥයන්ට ගෙවා තිබිය හැකිය. ඒ සා විශාල මුදලක් ඔහුට කොහින්ද? ඊළඟට විමසිල්ලට ලක් විය යුතු කරුණ එයය.■