ඉන්ටනැෂනල් ඇම්ෆිකාර් ඕනර්ස් ක්ලබ්! ඒක හරියට ගංවතුරගම එක්සත් කෙහෙල්කොට පාරු පදින්නන්ගේ සංගමය කිව්වා වගේ එකක්. ඇම්ෆිකාර්වලට ආසා කරන එක වෙනම දෙයක්. හැබැයි එයින් එකක් අරගෙන, ක්ලබ් එකකුත් හදාගෙන ඒකටත් බැඳිලා, කාර් එක වතුරටත් දානවා කියන එක ටිකක් විශේෂයි. විශ්වාස කරන්න, එහෙම කාර් එකකුත් තියනවා. එහෙම ක්ලබ් එකකුත් තියනවා!


පාරේ යන අතරෙම හිතුණු ගමන් අහසින් යන්න පුළුවන් පියාඹන කාර් වගේම අවශ්‍ය වෙලාවට වතුරේ යන්න පුළුවන් උභයජීවී වර්ගයේ කාර් හදන්න මිනිස්සුන්ට ඉස්සර ඉඳන්ම ආසාවල් තිබුණා. දෙවෙනි ලෝක යුද්ධ කාලේ ජර්මනියේ කේඞීඑෆ් වාගන් (පසුකාලීනව ෆෝක්ස්වාගන්* එකේ නිර්මාතෘ වුණු ෆර්ඩිනන්ඞ් පෝෂ, ඒ කාර් එකම බේස් කරගෙන ජර්මානු හමුදාව වෙනුවෙන් හදාපු ෂ්විම්වාගන් (Schwimmwagen) * එක සාර්ථක දිය-ගොඩ වාහනයක්. හැබැයි ඒක සාමාන්‍ය ජනතාව වෙනුවෙන් නිෂ්පාදනය වුණේ නැහැ. මිලිටරි අරමුණු වෙනුවෙන් ඔහොම වාහන ලෝකයේ තවත් රටවල හදලා තියනවා.
හැටේ දශකයට කිට්ටු වෙද්දී ජර්මනියේ හිටපු හාන්ස් ටි‍්‍රපෙල් කියන ඉංජිනේරු මහත්මයාට හිතුණා සාමාන්‍ය මිනිස්සු වෙනුවෙන්, කිඹුලා වගේ දිය ගොඩ දෙකේම යන කාර් එකක් හදන්න ඕනෑ කියලා. එතුමාගේ කිඹුල් චින්තනයේ ප‍්‍රතිඵලය තමයි ඇම්ෆිකාර් කියන්නේ.


ඇම්ෆිකාර් එක ඉස්සරලාම නිෂ්පාදනය වුණේ 1961 අවුරුද්දේ. මුලින්ම ආපු එන්ජිම, ඊට කලින් එංගලන්තයේ ට‍්‍රයම්ෆ් කාර්වලට පාවිච්චි වුණු, 1147ජජ එන්ජිමක්. ඇම්ෆිකාර් එකේ ගොඩබිමදී උපරිම වේගය පැයට කිලෝමීටර් 110කට ආසන්න වුණා. වාහනේ බඳ ආවේ දොර 2 ක්‍්ඉරසදකැඑ එකක් විදිහට. ඇම්ෆිකාර් එක පාරේ එළවගෙන යනකොට රෝද හතරෙන් දුවනවා.

වතුරට දැම්මාම, අවරපෙති දෙකකින් වාහනේ ඉස්සරහට යනවා. දිශාව වෙනස් කරන්නේ සුක්කානමෙන් ඉස්සරහ රෝද හැරවීමෙන්ම තමයි. 1965 අවුරුද්ද වෙනකල් ඇම්ෆිකාර් නිෂ්පාදන වුණා කිව්වත්, නිෂ්පාදන හා එකලස් කිරීම සම්බන්ධ ඉතිහාසය සංකීර්ණයි. ඒ කොහොම වුණත් මේ කාලය ඇතුළත කාර් 3878ක් නිෂ්පාදන වෙලා තියනවා. ප‍්‍රධාන වශයෙන් ඇමරිකාවෙත්, එංගලන්තය ඇතුළු යුරෝපා රටවලත් මේවා අලෙවි වුණා. වෙන වෙන රටවලටත් යන්න ඇති. උදාහරණයක් හැටියට තායිලන්තයේත් අඩුම වශයෙන් ඇම්ෆිකාර් දෙකක් තියනවා.


මේ දේවල් කියවනකොට හිතෙයි මේක කාර් ලෝකේ විප්ලවයක් කරන්න ඇති කියලා. නැහැ. හේතුව මේකයි. මේක ඇත්තටම කාර් එකක් හැටියට හොඳත් නැති, බෝට්ටුවක් හැටියට හොඳත් නැති වාහනයක්. වතුරේ යන්න පුළුවන් වෙන විදිහට උස් කරලා හදලා තිබුණු නිසා කාර් එක පාරේදී හැසිරවීම දුෂ්කර වුණා. අනික් අතට මේක වතුරෙදි කාර් එන්ජිමකින් දුවන බෝට්ටුවක් නිසා එන්ජිමේ බලය ප‍්‍රමාණවත් නොවුණා වගේම, සමහර වෙලාවට වතුර ඇතුළු වීම නිසා එන්ජිම ‘කහින්න’ පටන් ගන්න අවස්ථා තිබුණා. ඒ වගේම කල් යද්දී වතුර ඇතුළට එන්න පවා පටන් ගත්තාලූ.


ඒ වුණාට ඇමරිකාවේ හිටපු ජනාධිපතිවරයෙක් වුණු ලින්ඩන් බී. ජොන්සන් බොහොම ආසාවෙන් ඇම්ෆිකාර් එකක් පාවිච්චි කළා. ඇම්ෆිකාර් එක ඉංග‍්‍රීසි ඕඩය ඇතුළු විවිධ සාගර, ගංගා, ඇළදොළ තරණය කරලා තියනවා. ‘වීලර් ඞීලර්ස්’ වගේ ජනප‍්‍රිය වැඩසටහන්වලට ඇම්ෆිකාර් පාවිච්චි වෙලා තියනවා. ලෝකයේ වාහන කෞතුකාගාර සහ වාහන එකතු කරන අය කැමතියි ඇම්ෆිකාර් එකක් තමන්ගේ එකතුවේ තියාගන්න. ඒ විතරක් නෙමෙයි, මේ ලිපියේ මුලින්ම කිව්වා වගේ, කට්ටියක් ඇම්ෆිකාර් ක්ලබ් එකකුත් හදාගෙන, ස්වේච්ඡුාවෙන් ඇම්ෆිකාර්ලෝලීත්වය ප‍්‍රචලිත කරන්න කටයුතු කරගෙන යනවා.


ඇම්ෆිකාර් එක ලෝක කාර් සාහිත්‍යයට ඇතුළු වෙලා තියෙන්නේ ‘ෆේල් වෙච්චි කාර් එකක්’ විදිහට. මොකද විශේෂ දෙයක් අත්හදා බලන්න කැමති අය මිසක් වෙන කවුරුවත් දිය ගොඩ සැම තැන කොට කොට යන වාහනයක් ගන්න කැමති වුණේ නැති නිසා. හැබැයි බර්ලින්වල පොලීසිය නම් කාලයක් තමන්ගේ මෙහෙයුම්වලට ඇම්ෆිකාර් පාවිච්චි කළා කියනවා.


ඒ මොනවා වුණත් ඇම්ෆිකාර් එක තමයි ලෝකයේ දිය ගොඩ දෙකේම යන්න පුළුවන් වාහන අතරින් සාමාන්‍ය මිනිස්සුන්ගේ ප‍්‍රයෝජනය වෙනුවෙන් මහා පරිමාණයෙන් නිෂ්පාදනය වුණු එකම කාර් එක.


වැඩි විස්තර දැනගන්න ආසා අයට පුළුවන් ඉන්ටනැෂනල් ඇම්ෆිකාර් ඕනර්ස් ක්ලබ් එකේ නිල වෙබ් අඩවිය වෙන www.amphicar.com වෙබ් අඩවියට ගොඩවෙලා බලන්න. හැබැයි අර කෙහෙල් කොට පාරු කතාව එයාලට කියන්න එපා! x

x තරිඳු ශ‍්‍රී ලොකුගමගේ