ෂෙරීන්ස්ලේමමන් – රූපලාවණ්‍ය ශිල්පිනී

 

කාන්තාවක ලස්සන වීම යනු නිර්වචනය කරන්නට අසීරු සංකල්පයකි. ලස්සන ගැන එකිනෙකට වෙනස් අදහස් ගණනාවක් තිබිය හැකිය. රූපලාවණ්‍ය කිරීම යනු සුදුවීම, කොණ්ඩය වර්ණ ගැන්වීම, තොල් ආලේප කිරීම පමණක් නොවේ. තවත් කෙනෙකු ලස්සන කිරීමද පහසු කටයුත්තක් නොවේ. මේ සංවාදය කාන්තාවකගේ මුහුණේ සුන්දරත්වය ගැන විවිධ අදහස් හා ප්‍රවණතා පිළිබඳවය.

පෙර කාලයට සාපේක්ෂව තරුණියන් එදිනෙදා ජීවිතයේදී තමන්ගේ කොණ්ඩය වර්ණ ගැන්වීම, මුහුණ වර්ණ ගැන්වීම වගේ කාරණා ගැන සැලකිලිමත් වෙන බව ජනප්‍රිය අදහසක්..

හැම කාලෙකම කාන්තාවන් පෙනුම ගැන සැලකිලිමත් වෙනවා. එහෙත් අවුරුදු ගාණකට කලින් කාන්තාවන්ට කාලයෙන් කාලයට එන රූපලාවණ්‍ය හෝ විලාසිතා රැල්ල පිළිබඳ වන තොරතුරු දැනගෙන හිටියේ නැහැ. රූපලාවණ්‍ය කටයුතුවලට වියදම් වැඩියි. ඒත් වර්තමානයේදී සමාජමාධ්‍ය සහ ඉන්ටර්නෙට් හරහා ගලාගෙන එන තොරතුරු නිසා කාන්තාවන් දන්නවා, තියෙන විලාසිතා රැල්ල මොනවාද, තමන්ට ගැළපෙන විලාසිතාව මොකක්ද කියලා. දැනුම සමාජගත වෙලා. අඩු මිලට පහසුකම් ලබාගන්න පුළුවන්. ඒ නිසා විලාසිතා අත්හදා බැලීම, කොණ්ඩය  වර්ණ ගැන්වීම හෝ විවිධ ආලේපන භාවිත කිරීම අලුත් දෙයක් නෙවෙයි. හැමෝම විලාසිතා කරනවා. කාන්තාවක් ලස්සනට හිටියොත්, ආත්ම විශ්වාසය තිබුණොත් ඇයට කේන්ති යන එක පවා අඩු වෙන බව පිළිගත් අදහසක්.

 

රූපලාවණ්‍ය කියන්නේ කෙනෙක් ලස්සන කිරීමේ කලාවක් කියලා හිතන්න පුළුවන්. එහෙත් ඇත්තටම ලස්සන කියන්නේ මොකක්ද?

රූපලාවණ්‍ය තුළින් අපි කෙනෙක්ව වෙනස් කරන්නේ නැහැ. අපි කරන්නේ කාන්තාවකගේ එදිනෙදා දකින රූපය වෙනුවට ඒ කෙනාගේ රූපය ඔප් නැංවීම. විවාහ වෙන්නට නියමිත මනාලියක් හෝ වෙනත් කෙනෙක් ලස්සන කරන්න නම්, රූපලාවණ්‍ය කරනවා කියන්නේ, ඇගේ ඇහි බැමි පිළිවෙළට හැදීම, ඇඟේ මැරුණු සම ඉවත් කිරීමට අවශ්‍ය ප්‍රතිකාර කිරීම ආදි දේවල්.

 

ලස්සන කියන සංකල්පය නිර්වචනය කරන්න අමාරුයිනේ..

ඒක තමයි, එකිනෙකාගේ මුහුණු අනෙක් කෙනාට වඩා වෙනස්. ඒ ඒ අයගේ සමේ ස්වභාවයත් වෙනස් වෙනවා. සමහර වෙලාවට තමන්ගේම අවයව අතර වර්ණයේ වෙනසක් තියෙන්න පුළුවන්. සමහර කාන්තාවන්ගේ මුහුණ, අත් සහ බෙල්ල කියන සියල්ලේම පැහැය  එකිනෙකට සමාන නැහැ. අපි කරන්නේ ඒ අයගේ පෙනුමේ විශේෂත්වයන් මතුකරන එක. සමට අවශ්‍ය ප්‍රතිකාර කරනවා. ප්‍රතිකාර කරනවා කියන්නේ අඳුරු පැහැය සුදු කිරීමක්ම නෙවෙයි. මැරුණ සම ඉවත් කරනවා. කුරුලෑ නිසා ලප කැළල් තිබෙනවා නම් අපි ඒ ලප කැළැල් ඉවත් කිරීමට අවශ්‍ය ප්‍රතිකාර කරනවා. හමේ වර්ණය සකසනවා.

කෙනෙක් විවාහ වෙන දවස හරිම විශේෂයිනේ. ඒ නිසා ඕනෑ කෙනෙක් එදාට තමන්ගේ පෙනුම ගැන හිතනවා. ඇය ඒ දවසේ ඉන්න ස්වරූපය පින්තූර හෝ වීඩියෝ විදියට පරම්පරා ගණනාවක් පරෙස්සම් කරගන්න සිදු වෙනවා. ඒ නිසා ඒ දවසේ ලස්සනට ඉන්න කල්පනා කරන එක සාමාන්‍ය දෙයක්. ඒ දවසේ තමන්ගේ සම, කොණ්ඩය, ඇඳුම මේ සියල්ලම නිසා තමයි මනාලියක් ලස්සන වෙන්නේ. 

 

කෘත්‍රිම වර්ණකවලින් සුදු වෙන්න ගොඩක් අය කැමතියි. එහෙම රංගන ශිල්පිනියන් පවා ඉන්නවා. සාමාන්‍ය අඳුරු හමක් තියෙන කෙනෙක් ජනප්‍රිය අදහස් අනුව ‘සුදු’ වෙන්න උත්සාහ කරනවා…

ආසියාවේ කාන්තාවට තියෙන්නේ දුඹුරු පාටට හුරු හමක්. ඒ නිසා බොහෝ කාන්තාවන් තමන්ගේ සම ගැන තියෙන ආත්ම විශ්වාසය නැති කරගෙන ඉන්නවා. ඒ අය ජනප්‍රිය සංස්කෘතියේ ඉන්න නිළියන් විදියට තමන් සිටිය යුතුයි කියන ආකල්පයේ සිටිනවා. ලස්සන ගැන අදහස් හදන්නේ සිනමාවෙන්, ටෙලිනාට්‍යවලින්, නිරූපිකාවන්ගෙන්. ඒත්, ලස්සන වෙන්න හිතාගෙන පාවිච්චි කරන කෘත්‍රිම රසායනික ද්‍රව්‍යවලින් වෙන්නේ සමේ තියෙන මෙලනින් යටපත් වීම. සුදු වෙන්න එහෙම කරන අයත් ඉන්නවා. එහෙත් කෘත්‍රිම ආලේපන වර්ග පාවිච්චි කරනකොට ඒ ප්‍රතිකාරවලට දරන්න වෙන මිල අධිකයි. නොකඩවා ප්‍රතිකාර කරන්නත් වෙනවා. දින කිහිපයක් ප්‍රතිකාර කරලා නතර කළොත් සමේ යටපත් වෙලා තියෙන මෙලනින් යළි මතුවෙලා සම අඳුරු පැහැ වෙනවා.  මම පෞද්ගලිකව ඒ විදියට කෘත්‍රිමව සුදු වෙනවාට කැමති නැහැ.

 

අඳුරු හම ලස්සනයි කියලා කෙනෙක් යෝජනා කළාට, සුදු හමකට කැමති කෙනෙක්ට විරුද්ධ වෙන්නත් බැහැ නේද?

කෙනෙක්ට පැහැපත් වෙන්න වුවමනා නම් අපිට ස්වාභාවික ප්‍රතිකාර ලබා ගන්නත් පුළුවන්. කෘත්‍රිම ප්‍රතිකාරවලට වඩා ස්වාභාවික ප්‍රතිකාරවලින් සමේ පැහැය දීර්ඝ කාලයක් පවතිනවා. සම පැහැපත් කරන්න විවිධ ස්වාභාවික ප්‍රතිකාර තියෙනවානේ. සමහර ප්‍රතිකාර වර්ග සති කිහිපයකින් වැඩ කරනවා.

 

පාට කරන්න ගිහින්, හම තවත් විකෘති වෙන අවස්ථාත් තියෙනවා නේද?

ලංකාවේ කාන්තාවන් කරන්නේ සමේ ලප කැළැල්, කුරුලෑ, කළු ලප තියෙද්දී පැහැපත් වීමට අවශ්‍ය කෘත්‍රිම ආලේපන පාවිච්චි කිරීම. එම ක්‍රියාවලිය සම්පූර්ණයෙන් වැරදියි. කාන්තාවකට වැදගත් වෙන්නේ සමේ පාට නෙවෙයි, සමේ නිරෝගී බව. නිරෝගී හමක් තියෙනකොට ප්‍රියමනාප පෙනුමක් ලැබෙනවා. පාට මොකක් වුණත් එවැනි කෙනෙක් ආකර්ෂණීයයි.

 

එහෙත්, සමහර අය ලස්සන යැයි හිතන්නේ තවත් කෙනෙකුගේ පෙනුමට. තමන් ඒ වගේ හැඩගන්වන්න යැයි ඉල්ලන අයත් ඇති..

ඔය වගේ ඉල්ලීම් නිසා අපි මුලින්ම  කරන්නේ තමන්ට ගැළපෙන්නේ මොනවාද කියලා මනාලියට තෝරා දීම. ඉන්පස්සේ ඇයගේ මේකප් ඒක තීරණ කිරීම. කාන්තාවන් 10 දෙනෙකුගේ ඇස්වල හැඩය එකිනෙකට වෙනස්. ඒ නිසා ඒ හැමෝටම එකම විදියට ඇස්වලට මේකප් එක දාන්න බැහැ. ආසන්න වශයෙන් සමාන පෙනුමක් තියෙන දෙන්නෙකුගේ මුහුණුවලට වුණත්, එකම මේකප් එක ගැළපෙන්නේ නැහැ. ඒ විදියට මේකප් එක ගැන තීන්දු කළාම තමයි ඇඳුම් පවා තීරණය කරන්නේ. ඔය වැඩකටයුතුවලට මාස හයක් විතර ගතවෙනවා.

 

තමන් ‘ලස්සන’ බවට ඇති හැඟීම ආත්ම විශ්වාසය ඇති කරනවා නේද?

ඔව්, පුංචි දෙයක නොගැළපීමකින් වුණත් එය වෙනස් වෙන්න පුළුවන්.  උදාහරණයක් විදියට අපි ආභරණ තෝරා ගනිද්දී බොහෝ සැලකිලිමත් වෙනවා.

 

මුහුණේ වළවල්, ලප කැළැල් තියෙන අය විවාහ දිනය වගේ දවසක් ගැන පුදුමාකාර බියක් ඇති කරගන්නවා. එහෙත් සමහර වෙලාවට ලපකැළැල් සහ කුරුලෑ කියන්නේත් යම් කෙනෙකුගේ ලස්සන මතු කරන ලක්ෂණයක් වෙන්න පුළුවන් බව ඉන්දියාවේ මෑත කාලයේ ජනප්‍රිය වුණ ඇතැම් රංගන ශිල්පිනියන් නිසා හැඟෙනවා..

එහෙත් තවමත් ලපකැළැල් කියන්නේ ආත්ම විශ්වාසය දුර්වල කරන දෙයක්. කෙනෙක්ගේ මුහුණේ ලේසියෙන් කැළැල් මතුවෙන්නේ නැහැ. සමහරවිට ඔවුන් එදිනෙදා ජීවිතයේදී එතරම් ගණන් ගන්නේ නැතිව කුරුලෑ අතින් කඩමින්, සාමාන්‍ය විදියට ජීවත්වෙනවා. එහෙත් විවාහ දවස වගේ විශේෂ වෙලාවක තමන්ගේ මුහුණේ වළවල් තියෙනවාට කැමති නැහැ. ඒත් මුහුණක වළක් ෆවුන්ඬේෂන් ක්‍රීම්වලින් වහලා ගොඩක් වෙලා තියන්න අමාරුයි. පැය කිහිපයක් ඇතුළත වළවල් පෙනෙන්න ගන්නවා. විවාහ උත්සවයක් තියෙන දවසක මනාලියක් ගෙදරින් පිටත්වෙන්න කලින් හැඩ ගන්වනවානේ. උදේ පැය දෙකක් විතර ඡායාරූපවලට පෙනී ඉන්නවා. ඊට පස්සේ දවසේම ඉඳලා, අන්තිමේ පිටත්වෙන වෙලාව වෙනකොට මේකප් තට්ටු කඩාවැටිලා. මුහුණේ කැළැල් තියෙනවා නම් ඒවා කඩාවැටෙනවා. මේවා කාන්තාවන්ගේ ආත්ම විශ්වාසය දුර්වල කරන්න හේතු වෙනවා.

 

සමහරු විහිළුවට කියන්නේ විවාහ දිනයේ ඉන්න මනමාලිය, මේකප් හේදුවාම අඳුනගන්නත් අමාරුයි කියලා…

විවාහ දිනයේදී මනාලියගේ මුහුණ කෘත්‍රිම ආකාරයෙන් පෙනෙන විදියට හැඩ ගැන්විය යුතු නැහැ. එහෙත් ලංකාවේ මනාලියන් හා රූපලාවණ්‍ය ශිල්පීන් ඒක කරනවා. සමහර ශිල්පීන් මනාලියගේ බෙල්ලෙන් එහාට ආලේපන දාන්නේ නැහැ. එතකොට මනාලියගේ අත් දෙක එක පාටක් වෙලා මුහුණ එක පාටක් වෙනවා. කාන්තාවන් අපෙන් ඉල්ලා සිටිනවා මංගල දිනයේදී ඇයට සුදු වෙන්න වුවමනා බව. එහෙම ඉල්ලීමක් කළොත් ඇගේ සමේ පැහැයට ගැළපෙන ආකාරයෙන් පැහැපත් කිරීමට අවශ්‍ය ෆවුන්ඬේෂන් වර්ග භාවිත කරලා ඇයව හැඩ ගන්වනවා. කිසිම මොහොතක මනාලියව හඳුනාගැනීමට නොහැකි අයුරින් වර්ණ ආලේපන භාවිත කර ඇගේ පෞරුෂයට හානි නොකළ යුතුයි. ඉල්ලුමට සැපයුම දෙනවා කියලා සමහරු හිතනවා. ඒත් අපට වගකීමක් තියෙනවානේ. අපට පුළුවන් එයාලා එක්ක කතාබහ කරලා, ඒ අයගේත් වුවමනාව ඉටුවෙන, වඩා සුදුසු හැඩගැන්වීමකට කැමති කරගන්න.■