පාස්කු ඉරිදා ප‍්‍රහාරයෙන් මාස තුනකට පසු පසුගිය 21 වනදා මීගමුව කටුවාපිටිය දෙව් මැදුර යළි විවෘත කිරීමෙන් පසු පැවැත්වූ දිව්‍ය පූජාවේදි කාදිනල් හිමි නැවතත් තම (අ) කිතුනු චින්තනය ප‍්‍රකාශයට පත් කළේය.
රටේ යථාර්ථය ගැන කතාබහ කරන පූජකයින් හට පූජාසනයේ සිට දේශපාලනය කතා කරනවා යැයි තහංචි පනවමින් ක‍්‍රියා කළ කාදිනල් හිමි දැන් නම් පූජාසනය තම තක්කඩි දේශපාලනයට ලැජ්ජාවකින් තොරව භාවිතා කිරීම උපරිම තැනට පත් වී ඇත.


තමාගේ මතය හැර අන් සියල්ල වැරදි යැයි සිතන චින්තනය හෙවත් පැෂිස්ට් චින්තනය නිසා මුලදි තමාව ඇගයු බොහෝ දෙනා ද ‘කාදිනල් හිමියනි දැන් ඇති’ යි කියන හඬ එතුමාට ඇසෙන බවක් පෙනෙන්නට නැත. එසේම ඒ බව පෙන්වා දිය හැකි පිරිසක් කතෝලික සභාව තුළ ද නැති බව පෙනේ. රදගුරු මඩුල්ල මුනිවතිනි.


මෙම පසුබිම් මත කාදිනල් හිමියන් වහෙන් හොරො භාෂාවෙන් කියන දේවල් වල සත්‍ය දැන ගනු පිණිස එතුමාගේ ප‍්‍රකාශවලට අදාල පහත ප‍්‍රශ්න එතුමාගෙන් විවෘතව විමසනු කැමැත්තෙමි. එතුමා ජනතාවට අවංකව මඟ පෙන්වන නායකයෙකු නම් මෙම ප‍්‍රශ්නවලට පැහැදිලි කිරීමක් කරනු ඇත. එසේ කරන මෙන් ඉල්ලා සිටිමි.


(1* ”මේ සිදුවූණේ නිදහසින් පස්සේ සිදු වූ ලොකුම විනාශයයි”
පාස්කු ඉරිදා ත‍්‍රස්ත ප‍්‍රහාරයෙන් 250 ක් මිය ගොස් 500 ක් තුවාල ලැබීම නිදහසින් පසු මෙරට සිදුවූ ලොකුම විනාශයද ?
1971 තරුණ තරුණියන් අවම වශයෙන් 3000 ක් පමණ ඝාතනය වු කැරැුල්ල මීට වඩා ලොකු විනාශයක් නොවේද ?
1983 අහිංසක දෙමළ ජනයා 2000 ක් පමණ මරා දැමුනු කළු ජූලිය මීට වඩා ලොකු විනාශයක් නොවේ ද ?
1988 /89 තරුණ තරුණයින් 60 000 පමණ මරා දැමු භීෂණ සමය මීට වඩා ලොකු විනාශයක් නොවේ ද ?. ලක්ෂයකට ආසන්න පිරිසකට ජීවිත අහිමි කළ උතුරේ යුද්ධය මීට වඩා විශාල විනාශයක් නොවේද ?


(2* ”එක්සත් ජාතින්ගේ සංවිධානය කියන්නේ ඇත්ත නැත්ත කරන නැත්ත ඇත්ත කරන කට්ටියක්. ඔවුන් විශ්වාස කරන්න බෑ. සිද්ධියෙන් පස්සේ ඒ අය ආවා. ඒ අය ගියේ අල්ලාගෙන ඉන්න වැරදිකරුවන්ට සාධාරණය ඉටුකරන්නයි. ඔවුන්ට විපතට පත්වූවන් ගැන රිදීමක් කැක්කුමක් නෑ. අපේ රටේ නායකයෝ ඒවාට විරුද්ධව ක‍්‍රියා කරන්න බයයි.”


එක්සත් ජාතින් විසින් සාධාරණය ඉටුකරන්න උත්සහ කළ වැරදිකරුවන් කව්ද ?

කාදිනල් හිමි කීප වතාවක්ම කියා ඇති ”අපිට සිදුවුණු අසාධාරණයට” බලාපොරොත්තු වන සාධාරණය කුමක් ද ?

දඩුවම් නොකරනවා යැයි කියන වැරදි කරුවන් කව්ද ? ඔවුන් වැරදිකරුවන් බව කාදිනල් හිමි දැන ගත්තේ කවර යුක්තිය පසිඳලීමේ නෛතික ක‍්‍රියාමාර්ගයක් මතද ?

ඔවුන්ට දඬුවම් නොකර සිටින්නේ කව්ද ?

මීට පෙර සිටි ආණ්ඩු වැරදි කරුවන්ට දඩුවම් දුන්නාද ?

නිර්භය නායකයෙන් ලෙස එක්සත් ජාතින්ගේ සංවිධානයට විරුද්ධව කාදිනල් හිමි කර ඇති දේ මොනවාද ?

කාදිනල් හිමිගේ සභාවේ නායකත්වය එක්සත් ජාතින් සමඟ සහයෝගයෙන් ක‍්‍රියා කරන්නේ නැද්ද ? පාප් තුමන්ලා එක්සත් ජාතින් අමතන්නේ නැද්ද ?


ත‍්‍රස්තවාදය වැලැක්වීමට එක්සත් ජාතින් ඉටු කරන භූමිකාව අගය කරමින් පාප් තුමන් 2015 සැප්තැම්බර් කළ ප‍්‍රකාශය මේ වැරදි සංවිධානය ගැන නොදැනුවත් කමින් නොමඟ යමින් කළ එකක් ද ? පාප් තුමන්ට වඩා කාදිනල් හිමිට කිතුනු දැක්මක් තිබෙනවාද ? 2015 ඔක්තෝම්බර් 14 එක්සත් ජාතින් අමතා එක්සත් ජාතින්ගේ වතිකාන නිත්‍ය නියෝජිත හිමිපාණන් කරන ලද පහත ප‍්‍රකාශය රැුවටිලිකාර ප‍්‍රකාශයක්ද ? පාප් තුමන්ට හා වතිකාන නියෝජිත බිය ගුල්ලන් ද?


”ජාත්‍යන්තර සහ සියලූ ආකාර ත‍්‍රස්තවාදයට එරෙහි සටන හුදෙක් නවීන ආයුධ භාවිතයෙන් පමණක් ජය ගත නොහැකිය යන්න ශුද්ධාසනය අවබෝධ කරගෙන තිබේ. රාජ්‍යතාන්ති‍්‍රකභාවය, සාම සාධනය, නීතියේ ආධිපත්‍ය, එක්සත් ජාතින්ගේ ප‍්‍රඥාප්ති හා ජාත්‍යන්තර නීති පිළිපැදීම, මූලික මානව අයිතින්ට ගරු කිරීම වැනි ක‍්‍රියාමාර්ග දැඩි ලෙස අනුගමනය කිරිම ද ඒ සඳහා අවශ්‍යය.”


මානව හිමිකම් විරෝධි හඬක් නඟන කාදිනල් හිමි ඉහත ශුද්ධාසන ස්ථාවරය වරදක් ලෙස සලකනවාද ?

එක්සත් ජාතින්ගේ දුබලකම් පක්ෂපාතිකම් ඇති බව සත්‍යයක් වූවද එවැනි සංවිධානයක්වත් නැති ලෝකයක තත්වය මීට ඩා යහපත් වේ යැයි කාදිනල් හිමි සිතනවාද ?


(3* ”මුස්ලිම් ජනතාවට මම කියන්නේ පාස්කු ඉරිදා සිද්ධිය ඔබේ වැඩක් නොවෙයි. ජාත්‍යන්තර කුමන්ත‍්‍රණකරුවන් නොමඟ ගිය තරුණ පිරිසක් අල්ලාගෙන කළ ප‍්‍රහාරයක් කියලයි මේකට මුස්ලිම් අය වගකියන්න ඕන නෑ.”
මෙය කාදිනල් හිමිගේ ප‍්‍රකාශය තුළ ඇති සාධනීය අදහස් දැක්වීමකි. එහෙත් මුස්ලිම් කඩ ව්‍යාපාර වර්ජනය කරන්න. මුස්ලිම් අයට කිතුනු ගම්මාන වල ඉඩ නොදෙන්න. කිතුනුවන්ගේ වෙළඳ ආයතනවලින්, කුලී ගෙවල් වලින් මුස්ලිම් අය පළවා හරින්න ක‍්‍රියා කරන කිතුනුවන් හා ඊට උඩගෙඩි දෙක කිතුනු පූජකයින්ට එසේ නොකරන්නැයි කාදිනල් හිමි ප‍්‍රසිද්ධියේ නොකියන්නේ ඇයි ?


(4* ”විදේශීය බලවේගවලට අතපොවන්න ඉඩ නොදෙන්න අපේ නායකයන්ගේ කොන්ද පණ මදි. අහිංසක ජීවිත විනාශ වුණේ හිතුවක්කාර දඩබ්බර ප‍්‍රතිපත්තියක් නැති නායකයෝ නිසයි මේ සියලූ දෙනාට ගෙදර යන්න කියලා කරන්න පුළුවන් කෙනෙකුට භාර දෙන්න ඕනි”

කව්ද කොන්ද පණ නැති නායකයෝ. ජේසු තුමන් ”හෙරොද්ට” නම් කරමින් කිව්වා සේ කාදිනල් හිමි ඒ කවුරුන්දැයි නොකියන්නේ ඇයි ?
සසග කරන්න පුළුවන් කොන්ද පණ ඇතියි කියලා කාදිනල් හිමි හිතන නායකයින් කව්ද ?


දඩබ්බර නැති, හිතවත්කාර නැති ප‍්‍රතිපත්තියක් තිබෙන, අපි රට භාරදිය යුතු කරන්න පුළුවන් නායකයෝ කව්ද ? හොරකම්, වංචා මිනිමැරුම්, ඒකාධිපති ක‍්‍රියාමාර්ග ගත් කාදිනල් හිමිගේ හිතවතුන් වන මහින්ද රාජපක්ෂද ? ගෝඨාභය රාජපක්ෂද ? වෙනත් පිරිසක්ද ?


රාජපක්ෂලා හලාවත ධීවරයින් මරණ විට, කටුනායක කම්කරුවන් මරණ විට, රතු පස් වල ශිෂ්‍යයින් මරණ විට, වැලිකඩ සිරකරුවන් මරණ විට, අගවිනිරුවරිය ගෙදර යවන විට, උතුරේ ඊනියා අවසන් යුද්ධයේදි දහස් ගණන් මැරෙන විට, ආණ්ඩුව ගෙදර යනුයි කාදිනල් හිම අද මෙන් මොරදුන්නේ නැත්තේ ඇයි ? ඒවා කළවුන්ට පක්ෂපාති මතයක් දැරුවේ ඇයි ?.


(5* ”ශක්තිමත්ව තිබු බුද්ධි අංශය විනාශ කළා. ජාත්‍යන්තර ඕන එපාකම් ඉටුකිරීම සඳහා එක්සත් ජාතින්ගේ සංවිධානය මානව හිමිකම් සංවිධාන සතුටු කරන්න බුද්ධි අංශ අඩපණ කර විනාශ කර දැම්මා”

බුද්ධි අංශ විනාශකර දැම්මා යන මේ චෝදනාව ඔප්පු කිරිමට කාදිනල් හිමි ඉදිරිපත් කරන සාක්ෂි මොනවාද ? මානව හිමිකම් සංවිධාන සතුටු කිරිමට එසේ කළ බවට සාක්ෂි මොනවා ද ?

”බුද්ධි අංශවලින් භාගයක් හිරේ” යැයි මහින්ද රාජපක්ෂ කියන බොරුවම රාව නැංවීමක් මිස අන් දෙයක් ඇති බව කාදිනල් හිමිට ඔප්පු කර පෙන්විය හැකි ද ?

බුද්ධි අංශවල සිටින 12000 ක් පමණ පිරිසෙන් සැක පිට අත්අඩංගුවට ගැන සිටින්නේ 7 දෙනෙක් පමණ සුළු පිරිසක් බව කාදිනල් හිමි දන්නවා ද ? ඔවුන්ව ද අත්අඩංගුවට ගෙන තිබෙන්නේ ඉහළ බලවතුන්ගේ අනකිරිම් මත කරන ලද අපරාධ සම්බන්ධයෙන් සැක පිට බව කාදිනල් හිමි දන්නවාද ? දැන දැන එවැනි ඉහළ බලවතුන් වෙනුවෙන් මෙම බොරුව සමාජගත කරනවාද ?


බුද්ධි අංශ මේ ප‍්‍රහාරය ගැන දැන සිටියේ නැතැයි සාක්ෂි තිබෙනවාද ?

බුද්ධි අංශ ශක්තිමත්ව තිබු කාල වල ත‍්‍රස්ත ප‍්‍රහාර සිදුවූයේ නැද්ද ?


මේ ත‍්‍රස්ත පිරිස් වලට රාජපක්ෂ පාලන සමයේ සිට බුද්ධි අංශ සමඟ සබඳතා තිබු බවත් ඔවුන්ට රාජපක්ෂ සමයේ ඔත්තු ලබා ගැනීම සඳහා වැටුප් ගෙවා ඇති බවත් හෙළිදරව් වී ඇති අතර ඒවා ගැන කාදිනල් හිමි කියන්නේ කුමක් ද ?


(6* ”කාදිනල් හිමි ප‍්‍රතිපත්තිගරුක කොන්ද පණ ඇති නායකයෙක් බව ඔහුගේ අනෙකා විවේචනය තුළත් ගම්‍ය වේ. අපගේ දැන ගැනීම පිණිස කාදිනල් හිමිගේ ප‍්‍රතිපත්ති ගැන දැනට අප අසන මේ කරුණු වලට අදාල ප‍්‍රතිපත්ති සඳහන් කළ හැකි ද ?”


ලිංගික අපචාර වලට සම්බන්ධ පූජකයින් ගැන කාදිනල් හිමිගේ ප‍්‍රතිපත්තිය කුමක් ද ? එවැනි පූජකයින් කී දෙනෙකුව මෙරට නීතියට ඉදිරිපත් කිරිමෙන් වැළකීමට කාදිනල් හිමි විදෙස් ගත කර තිබේද ?

මත්ද්‍රව්‍ය විරෝධි කාදිනල් හිමිගේ රදගුරු නිවසේ මත්පැන් ප‍්‍රතිපත්තිය කුමක් ද ? පූජක තුමන්ලා සම්බන්ධ මත්පැන් ප‍්‍රතිපත්තිය කුමක්ද ?
සසසග අනිද්දා පුවත්පත හෙළිදරව් කළ බොරු කියා පඩි ලබාගත් කතෝලික පාසල් වලට අදාල මුදල් ප‍්‍රතිපත්තිය කුමක් ද ? ”ගාස්තු අය නොකරන පාසල්” ලෙස නාමකරණය වී රජයේ වරප‍්‍රසාද ලබන කිතුනු පාසල්වල අය කරන මාසික ගාස්තු හා ඇතුලත් කිරීමේ ආධාර වාර්ෂික ගිණුම් වාර්තා ඉදිරිපත් කළ හැකි ද ?


කොන්ද පණ නැති ගෙදර යැවිය යුතු නායකයින් සිටින ආණ්ඩුවේ ප‍්‍රධානියෙකු වන සජිත් ඇමතිතුමාට ”ස්තූතියි” කියන ප‍්‍රතිපත්තිය කුමක් ද ? ආණ්ඩුවේ මුදල් ලබා ගැනීමට හිරි කිතයක් නැති ආණ්ඩුවේ වැඩ ගැන පමණක් හිරිකියක් ඇති ප‍්‍රතිපත්තිය කුමන ක‍්‍රිස්තු ප‍්‍රතිපත්තියක්ද ?


මේ නැවත නැවත කාදිනල් හිමි කියමින් සිටින දේ ගැන ප‍්‍රශ්න කීපයක් පමණි. එතුමාගේ (හා. ලේකම් ගේ* පිළිතුරු වලින් පසු තවත් කරුණු ඇත්නම් පැහැදිලි කර ගැනීමට මේ සංවාදයට එක් වීමට බලාපොරොත්තු වෙමි ?


මධුර කුසුම් කුමාර