‘කරුණාකරලා මාව මේ පක්‍ෂයට හෝ ඒ පක්‍ෂයට එකතු කරන්න උත්සාහ කරන්න එපා. මට පක්‍ෂයක් නෑ. මට තිබෙන්නේ මගේ ජනතාවගේ පක්‍ෂය.’ බදාදා මාධ්‍ය හමුවක දී මේ වචන කීවේ මැල්කම් රංජිත් කාදිනල්වරයා ය.

තමා දේශපාලනය කරන්නේ නැතැ’යි පුන පුනා කියන්නට සිදුවීමේ තත්ත්වයට මැල්කම් රංජිත් කාදිනල්වරයා කනගාටුදායක ලෙස පත්වීමෙන් ම පෙනෙන්නේ, ඔහු දේශපාලනය කරන බවයි. බදාදා මාධ්‍ය හමුවේදීත් ඔහු කීවේ දේශපාලන වශයෙන් පක්‍ෂපාතීත්වයක් හඟවන බොරු සහ සම්ඵප‍්‍රලාප ය.

කාදිනල් පදවියට පත් වූ අවස්ථාවේ සිට ම ඔහු පක්‍ෂ දේශපාලනය කළේ ය. ඒ සඳහා උදාහරණ ඕනෑ තරම් ඔහුගේ ඉතිහාසයෙන් පෙන්වා දිය හැකි ය. දැන් වෙනසකට ඇත්තේ, අපේ‍්‍රල් 21 වැනිදා පල්ලිවලදී ඝාතනයට ලක්වූ කිතුනු බැතිමතුන්ගේ මෘතශරීර ද ඔහු තම දේශපාලනය සඳහා ක‍්‍රෑර ලෙස පාවිච්චි කිරීමට පටන් ගෙන තිබීම ය. ඒ මිනිසුන්ගේ මෘත ශරීර, ශාරීරික තුවාල, අසරණකම, මානසික පීඩනය හා භක්තිය මේ කාදිනල්වරයා සිය දේශපාලන වුවමනා එපාකම් සඳහා, එනම් රාජපක්‍ෂ කඳවුරේ දේශපාලනය සඳහා සිත් සේ අපයෝජනය කරමින් සිටියි.

අලූත් ම මාධ්‍ය හමුවේ දී ඔහු මෙසේ කීවේ ය.
‘කුරිරු ත‍්‍රස්ත ප‍්‍රහාර සිදුවි දැන් මාස තුනකටත් වැඩියි. ඔවුන් බොහෝ දෙනා කඳුළු සලමින් මට කියා සිටියේ, ‘අනේ අපට වන්දි එපා. අපට යුක්තිය ඉෂ්ට කරන්න. මේ සිදුවෙච්ච දේ ගැන සම්පූර්ණ සත්‍යය අපට හෙළිකරන්න’ කියායි. මේ කුරිරු ත‍්‍රස්ත ප‍්‍රහාරය පිටිපස සිටින අය, එයට කුමන්ත‍්‍රණ කළ අය, සංවිධානය කළ අය, ඊට අනුග‍්‍රහය දැක්වූ අය, කල් තියා ලැබුණු බුද්ධි තොරතුරු හිතාමතා නොසලකා හැරි අය, සැකකරුවන් ලෙස අත්අඩංගුවට ගෙන පුළුල් විභාගයකින් තොරව නිදහස් කළ අය, කිසිදු දඬුවමක් නොලබා තවම නිදැල්ලේ සැරිසරන බව පැහැදිලියි.’

කාදිනල්වරයා මෙහි දී එක් ඇත්තක් නම් කියා තිබේ. එනම්, වන්දිවලට වඩා මිනිසුන්ට අවශ්‍ය වන්නේ ‘යුක්තිය ඉටු කර ගැනීම’ බවයි. තමන්ට අසාධාරණයක් සිදු වූ විට එය කළේ කවුද, කොහොමද යන ප‍්‍රශ්නයට මිනිසුන්ට පිළිතුරු අවශ්‍ය බවයි. එහෙත් තිස් වසරක අමානුෂික යුද්ධයක් නිසා අතුරුදහන් කිරීම්වලට, ඝාතනයන්වලට, පැහැර ගැනීම්වලට, ¥ෂණයන්ට ලක්වුණු උතුරු නැගෙනහිර දෙමළ මිනිසුන් මේ ආකාරයෙන් ම ‘අපට යුක්තිය ඉෂ්ට කරන්නයැ’යි කියන විට, ඔවුන් වෙනුවෙන් කාදිනල්ගේ මුවෙන් මේ යුක්තිය ඉල්ලීම පිළිබඳ තර්කය යෙදෙනවා නම් අප දැක නැත. පක්‍ෂපාතීත්වය නම් එයයි.

ඝාතන සංඛ්‍යා ලේඛනවලින් කිසිවක් ලොකු පොඩි නොවන නමුත්, ඒ යුද්ධයේ දී විනාශ වූ ලක්‍ෂ ගණනක් ජීවිත, ප‍්‍රකෝටි ගණනක දේපළ සලකන කල, එය පාස්කු ඉරිදා ප‍්‍රහාරයේ විනාශයට වඩා සිය දහස් ගුණයකින් ඉහළ බව අලූතෙන් කිව යුතු නැත. අදත් ඒ මිනිසුන්ට යුක්තිය ඉටු වී තිබේ ද? ඒ විනාශයේ තරම ගැනත්, ඔවුන්ට යුක්තිය ඉටු නොවී ගත ව ඇති කාලය ගැනත් සලකන විට, තමා අපක්‍ෂපාතී නම්, දිනපතා මාධ්‍ය හමු පවත්වා යුක්තිය ඉල්ලන්නට කාදිනල්වරයාට සිදු වන්නේ ය. එහෙත්, වචනයකින් වත්, ඔහු ඒ අඳුරු කාලය ගැන කතා කරනවා හෝ යුක්තිය ඉටු කරන්නට අඩුපාඩු මධ්‍යයේ වුවත් ගොඩනගා ඇති අතුරුදන්වූවන් පිළිබඳ කාර්යාලය, හානි පූර්ණ කාර්යාලය වැනි ආයතන ගැන අදහසක් පළ කරනවා හෝ, මේ කාදිනල් දිවිය පුරා ම අප දැක නැත. ඔහුගේ දේශපාලන නිරුවත හෙළිවන්නේ ඒ භාවිතය තුළිනි.

වරින් වර පත්කරන ජනාධිපති කොමිෂන්වල වාර්තා කාපට් යට දැමීමක් ගැන ඔහු කියයි. එය අලූත් ඇත්තක් නොවේ. එහෙත්, ඒ තරම් අනුහස් ඇති නායකයකු නම්, ඒ වාර්තා තමාගේ දෝතට පිළිගන්වන තුරු බලා නොසිට, ඒ වාර්තා බලධාරීන්ගෙන් ඉල්ලා සිටින්නට ඔහු කර ඇත්තේ කුමන දායකත්වයක් ද? ඊළඟ ජනාධිපතිවරණ අපේක්‍ෂකයන් තමා හමුවීමට නොපැමිණිය යුතු යැයි කියන කාදිනල්වරයා, තමා හමුවීමට මේ දක්වා පැමිණි නායකයන්ගෙන් වත් පසු ගිය කාලයේ රොෂේන් චානක ඝාතනය ගැන වාර්තාව ඉල්ලා සිටියේ ද? හලාවත ඇන්ටනි ප‍්‍රනාන්දු ගැන වාර්තාව ඉල්ලා සිටියේ ද? රොෂේන් චානක ඝාතන වාර්තාව, තොරතුරු දැනගැනීමේ පනත යටතේ සමාජ ක‍්‍රියාකාරීන් විසින් ලබාගැනුණු බව වත් කාදිනල්වරයා දන්නවා ද?

කතෝලිකයකු වූ රොෂේන් චානකගේ මළගෙදර නිසි ගරුසරු ඇතිව, නිසි ආගමික වත් පිළිවෙත් ඇතිව වත් පවත්වන්නට ඉඩ නොදුන් රාජපක්‍ෂ ආණ්ඩුව තිබුණු කාලයේ කාදිනල්වරයා වතිකානයේ සිට ලංකාවට ගොඩ බැස නොසිටියේ ද? ඔහුගේ අපක්‍ෂපාතී කටහඬ එදා කුමන වළාකුළක පාවී ගොස් තිබුණේ ද?

තමා අපක්‍ෂපාතීයැයි කියන විට, පක්‍ෂපාතීත්වයේ සෙළුව අතින් වසාගන්නට කාදිනල්වරයාට අමතක වෙයි. දැන් ඉන්නා පාලකයන් ගෙදර ගොස් කරන්නට පුළුවන් අයට රට භාර දෙන්නට යැයි කියන විට. කාදිනල්වරයාගේ වචනවලින් හැඟවෙන්නේ පක්‍ෂ දේශපාලනය මිස අන් කුමක් ද?

අනෙක් අතට මැලිකම් රංජිත් කාදිනල්වරයා බලාපොරොත්තු වන අමුතු සත්‍යය කුමක්ද? අපේ‍්‍රල් 21 වැනිදා ප‍්‍රහාර ගැන විමර්හන පවත්වා, පුද්ගලයන් අත්අඩංගුවට ගෙන, වග කිව යුත්තන්ට අපරාධ චෝදනාත් ඉදිරිපත් කර, පාර්ලිමේන්තු කමිටුවකින් සොයා බැලීමකුත් කර ඇති තත්ත්වයක් යටතේ ඊටත් එහා සත්‍යයක් කාදිනල්වරයාට පෙනෙන්නේ නම්, එය ඔහු ම පෙන්වා නොදෙන්නේ ඇයි?x