පාස්කු ඉරිදා ඉස්ලාම් අන්තවාදී ප්‍රහාරයට ලක්වූ කොළඹ කොච්චිකඬේ ශාන්ත අන්තෝනි දේවස්ථානය බැතිමතුන් සඳහා මැයි හත් වැනි අඟහරුවාදා විවෘත විය. එම සිද්ධස්ථානයේ පියනම පණිවිඩයක් තබමින් නිවේදනය කර තිබුණේ බැතිමතුන් බෑග් රහිතව පැමිණිය යුතු බවත්, නාවික හමුදාව හා පොලීසිය බැතිමතුන් පරීක්ෂාවට ලක් කිරීමෙන් පසුව සිද්ධස්ථානයට ඇතුල් කරගන්නා බවත්ය. එය එසේ වෙද්දී පාස්කු ඉරිදා ප්‍රහාරයෙන් පසු මැයි 6 වැනිදා ආරම්භ වූ රජයේ පාසල්වල (6 ශ්‍රේණියෙන් ඉහළ සිසුන්ගේ) පැමිණීම එතරම් සාර්ථකත්වයක් ගෙන තිබුණේ නැත. එදින රාත්‍රි ඒ පිළිබඳව වාර්තා කළ පෞද්ගලික රූපවාහිනී නාලිකා සියල්ලම වාර්තා කර තිබුණේ එදින ළමුන්ගේ පැමිණීම අඩුවීම තවදුරටත් දිරිගන්වන ස්වරූපයෙන්ය. මැයි 7 වැනිදා පටන් පාස්කු ඉරිදා ප්‍රහාරය සම්බන්ධයෙන් වූ පාර්ලිමේන්තුව කල් තැබීමේ විවාදයේදී ද එම පෞද්ගලික රූපවාහිනී නාලිකා අනුව යමින් සමහර විපක්ෂයේ මන්ත්‍රීවරුන් අධ්‍යාපන අමාත්‍යවරයාගෙන් විමසා සිටියේ ඔබගේ දරුවන් පාසැල් ගියාද යන්නය. ඊට අපූරු පිළිතුරක් ලබා දෙමින් අමාත්‍යවරයා කියාසිටියේ පාර්ලිමේන්තුවට පැමිණීමට පෙර පාසල් නොගිය අය පාසල් වසා තැබීමට කැමති බවය. සතියක් පාසල් වසා තැබුවහොත් එයින් ළමයින්ට වන හානිය ඉතා ප්‍රබල එකක් බවය. කෙසේවෙතත් දෙවන දින වූ මැයි හත්වැනිදා ළමයින් පාසල්වලට පැමිණීම පළමු දිනට වඩා සාර්ථක වී තිබුණි. විශේෂයෙන් නගරයෙන් බැහැර පාසල්වල ළමුන්ගේ පැමිණීම සාර්ථක වී තිබුණි. බිල්ලකු නොවේ නම් දින ගණනාවක් යන විට පාසල්වල තත්ත්වය සාමාන්‍ය අතට හැරෙනු නොඅනුමානය.


පාස්කු ඉරිදා ප්‍රහාරයට පෙර සියලුම රජයේ පාසල්වල, රජයේ ආධාර ලබන සහ රජයේ අනුමත පෞද්ගලික පාසල්වල දෙවන පාසල් වාරය ආරම්භ වීමට නියමිතව තිබුණේ අප්‍රේල් 22වැනිදාය. එහෙත් පාස්කු ඉරිදා ප්‍රහාරයත් සමග කතෝලික පෞද්ගලික පාසල් පිළිබඳ සාමාන්‍ය අධිකාරි අයිවන් පෙරේරා පියනමගේ නිවේදනයක් අනුව කියවුණේ එම කතෝලික පෞද්ගලික පාසල් අප්‍රේල් 29 වැනිදා සිට විවෘත වන බවයි. ඊට පසුව ඒ අනුව අධ්‍යාපන අමාත්‍ය අකිල විරාජ් කාරියවසම් නිවේදනය කළේ දෙවන පාසල් වාරය සඳහා පාසල් අප්‍රේල් 29 වැනිදා විවෘත වන බවයි.


එහෙත් එම දිනයද නැවත කල් ගියේ කොළඹ අගරදගුරු මැල්කම් කාදිනල් රංජිත් හිමියන් පෞද්ගලික කතෝලික පාසල් මැයි 6 වැනිදා විවෘත කරන බව දැනුම් දීමත් සමඟය. ඊට සමගාමීව ආරක්ෂක මණ්ඩලය ගත් තීන්දුවක් අනුව යැයි කියමින් සියලුම පාසල්ද, විශ්වවිද්‍යාලද මැයි 6 වැනිදා විවෘත කරන බව රජය විසින් නිවේදනය කරනු ලැබීය. එහෙත් කාදිනල් හිමියන් මැයි දෙවෙනිදා නැවත දැනුම් දෙන තුරු පෞද්ගලික කතෝලික පාසල් විවෘත නොකරන ලෙස පැවසීය.


ඒ සඳහා හා ඒ හිමියන් නිකුත් කළ නිවේදනයේ එම කරුණ සඳහන් වූයේ මේ ආකාරයටය.
‘අතිවිශ්වසනීයව ලැබුණු විදේශීය ආරංචි මාර්ගයකට අනුව අප සතු සුප්‍රසිද්ධ දෙව්මැදුරකට සහ අපෝස්තලික සේවා ආයතනයකට පහර දීමට මේ සති අග මාන බලන බවට අපට තොරතුරු ලැබී ඇත. එම නිසා ඔබගේ යහපත වෙනුවෙන් මෙම ස්ථාන දැනට වසාදැමීමට තීරණය කළෙමු. කෙසේ වෙතත් සියලුම දෙව්මැදුරුවල ලබන ඉරිදා පවත්වන්නට සැලසුම් කළ දේව මෙහෙයන් හා අනෙකුත් දිව්‍ය පූජා යාගයන් නැවත දැනුම් දෙන තුරු නවත්වා දැමීමට තිරණය කළෙමු. මෙම තොරතුරු මත පදනම්ව ලබන සතියේ දී සියලුම කතෝලික පෞද්ගලික පාසල් නැවත දැනුම් දෙන තුරු වසා තබන ලෙස ඉල්ලා සිටිමු’.


එම නිවේදනය අනුව යමින් එම නිවේදනයට අදාළ මැයි 05 වැනි දා ද, ඊට පෙර ඉරිදා වූ අප්‍රේල් 28වැනිදා ද, කතෝලික දේවස්ථානවල ඉරිදා දේවමෙහෙයන් පැවැත්වූයේ නැත. කොළඹ අගරදගුරු මැදුර දේවස්ථානයේ සිට කාදිනල් හිමියන් විසින් පැවැත්වූ දේව මෙහෙය රූපවාහිනි නාළිකා මඟින් සජීවීව විකාශනය කරනු ලැබීය. එසේ වුවද සමහර කතෝලික දේවස්ථානවල ඉරිදා දේව මෙහෙයන් පැවැත්වූ බවද විවාහ උත්සවවලට අදාල දිව්‍ය පූජා පැවැත්වූ බව ද වාර්තා විය.
තහනම් කිරීම් සහ තහනම නොතකා සිදුකරන පාසල් යෑම සහ දිව්‍ය පූජා පැවැත්වීම ආදියෙනුත් පෙනී යන්නේ ආරක්ෂාව පිළිබඳ නිසි සුපරික්ෂාකාරීත්වයක් යටතේ එම කටයුතු සාමාන්‍ය පරිදි පවත්වාගෙන යා හැකි බවයි. පාස්කු ඉරිදා ප්‍රහාරයෙන් පසු රාජ්‍ය සහ පෞද්ගලික අංශයේ කාර්යාල හා වෙළඳ කටයුතු නිසි සුපරික්ෂාකාරීත්වයක් යටතේ සාමාන්‍ය පරිදි පවත්වාගෙන යන්නාක් මෙන්ය.
ඒ සඳහා ද බිල්ලෙකු මැව්වේ නම් පාස්කු ඉරිදා ප්‍රහාරයේ සිට මේ දක්වා රාජ්‍ය හා පෞද්ගලික අංශයේ කිසිදු කටයුත්තක් සිදු වන්නට ඉඩ තිබුණේ නැත. පොලීසිය හා ත්‍රිවිධ හමුදාපතිවරුන් කිහිප විටක් ප්‍රකාශ කර ඇති පරිදි සුපරික්ෂාකාරී වීම හැර ආරක්ෂක තත්ත්වය පිළිබඳ මහා බියක් ඇතිකර ගැනීමට හේතුවක් නැත. ඉස්ලාම් අන්තවාදී ත්‍රස්තවාදී කල්ලියේ නායකයන් සියල්ලම වාගේ මියගොස් හෝ අත්අඩංගුවට ගෙන ඇත. ඔවුන් සතු පුපුරන ද්‍රව්‍ය ඇතුළු අනෙකුත් දෑ අත්අඩංගුවට ගෙන ඇත. ඇත්තේ ජනතාව බියට පත් කරන ආකාරයේ වැටලීම්වලට අදාළ මාධ්‍ය වාර්තාකරණයන්ය. ඒ ආශ්‍රිතව බිල්ලකු මැවීම සිදු කරන විපක්ෂයේ දේශපාලන සංදර්ශනයත් පමණය. පාස්කු ඉරිදා ප්‍රහාරයෙන් පසු දිනවල ආරක්ෂක අංශ ප්‍රකාශයට පත් කළ සැක සහිත වාහන පිළිබඳ තොරතුරු, අලුත් තොරතුරු ලෙස නැවත ප්‍රකාශයට පත් කරමින් වගකීම් විරහිතව කටයුතු කරන මාධ්‍ය වාර්තාකරණයන් පමණය. එසේ නොමැති නම් පාස්කු ඉරිදා ප්‍රහාරයෙන් පසු මේ දක්වා රාජ්‍ය සහ පෞද්ගලික අංශයේ සියලු වැඩකටයුතු ඇනහිටින තත්ත්වයක් තිබිය යුතුය. කාදිනල් හිමියන්ගේ තහනම පවතිද්දීත් දිව්‍ය පූජා පවත්වන්නට හැකිකමක් තිබිය නොහැකිය. රජයේ පාසල්වල හෝ 6 ශ්‍රේණියෙන් ඉහළට පාසල් පවත්වන්නට හැකියාවක් තිබිය නොහැකිය. විශේෂයෙන්ම කොළඹ කොච්චිකඬේ ශාන්ත අන්තෝනි වැනි සිද්ධස්ථානයක් බැතිමතුන්ට විවෘත වන්නට නොහැකිව තිබුණි.


මෙහිදී අප මතක තබා ගත යුතු කරුණ වන්නේ ගමක හෙවත් කතෝලික සභාවේ බෙදීම් අනුව කියනා ලෙස මීසම මත ඇති දේවස්ථානයකට වඩා කොච්චිකඬේ ශාන්ත අන්තෝනි වැනි සිද්ධස්ථානයක තත්ත්වය වෙනස් බවය. ගමක හෙවත් මීසමක ඇති දේවස්ථානයක දිව්‍ය පූජාවට සහභාගිවන්නෝ, දේවස්ථානයට පැමිණෙන ගම්වැසියෝය. ඔවුන් බොහෝ විට මුළු ගමම දනිති. පිටස්තරයෙකු ලේසියෙන්ම හඳුනාගත හැකිය. ඒත් සිද්ධස්ථානයක් යනු එය පිහිටි ගමේ කතෝලිකයන් පමණක් වන්දනාමාන කරන තැනක් නොවේ. රට පුරාම වෙසෙන කතෝලික බැතිමතුන්ගේ වන්දනාවට ලක්වන ස්ථානයකි. එපමණක් නොව කතෝලික නොවන වෙනත් ආගමිකයන්ගේ ද වන්දනාවට හා ගෞරවයට ලක් වන ස්ථානයකි.


එවන් තැනක ගම් වැසියන් හා එසේ නොවන්නන් කියා පුද්ගලයන් හඳුනාගැනීම අසීරුය. ශ්‍රී පාදය, කතරගම, අනුරාධපුරය වැනි පොදු වන්දනාව ගෞරවයට ලක් වන ආගමික ස්ථාන මීට සමාන ලෙස දැක්විය හැකිය. ඉස්ලාම් අන්තවාදී ත්‍රස්තවාදීන්ගේ මරාගෙන මැරෙන ප්‍රහාරයට ලක් වූ ජීවිත ගණනාවකින් වන්දි ගෙවා දැඩි අලාභ හානියකට ලක්වූ ප්‍රධාන පාරක් අයිනේ ඇති කොච්චිකඬේ ශාන්ත අන්තෝනි සිද්ධස්ථානයට හැකි දේ වෙන ස්ථාන සම්බන්ධයෙන් නොහැකි වන්නට බැරිකමක් නැත.


කොළඹ අගරදගුරු මැල්කම් කාදිනල් රංජිත් හිමියන්ගේ ඉහත සඳහන් කළ නිවේදනය අනුව නම් කොච්චිකඬේ ශාන්ත අන්තෝනි සිද්ධස්ථානය මැයි 7 වැනිදා අඟහරුවාදා බැතිමතුන් සඳහා විවෘත කිරීමට හේතුවක් නැත. ඉරිදා ප්‍රහාර පිළිබඳ කල් තියා ලැබුණු බුද්ධි අංශ තොරතුරු සම්බන්ධයෙන් තමා දැනුවත් කළේ නම් සිදුවූ ජීවිත හානි වළක්වා ගන්නට හැකියාව තිබූ බව හා කාදිනල් හිමි ප්‍රකාශ කළේය. එය ඇත්තකි. ආරක්ෂාව භාරව කටයුතු කළ දේශපාලන බලධාරීන් හා රාජ්‍ය නිලධාරි වගකිවයුත්තන් ඔවුන්ගේ වගකීම ඉටු කරමින් එවැනි දැනුම් දීමක් කළේ නම් ඒ මහා විනාශය වළක්වා ගන්නට හෝ අවම කරගන්නට ඉඩ තිබුණි.


එහෙත් දැන් කාදිනල් හිමියන්ට සෘජුවම බුද්ධි තොරතුරු ලැබෙන බව ඔහුගේ නිවේදනය අනුව පෙනී යයි. නිවේදනය දැක්වෙන ආකාරයට ඒවා විදේශීය බුද්ධි තොරතුරුය. එම තොරතුරු විශ්ලේෂණය කිරීමටත්, අවදානම තක්සේරු කිරීමටත්, එම අවදානම මගහැරීම සඳහා ගත යුතු ක්‍රියාමාර්ග තීරණය කිරීමටත් කාදිනල් හිමියන් සතු ආරක්ෂක දැනුම් හැකියාවක් නැති බව අපට සිතන්නට පුළුවන. මේ විදේශීය බුද්ධි තොරතුරු ගැන කාදිනල් හිමියන් ආරක්ෂක අංශ දැනුවත් කළාද යන්න අපි නොදනිමු. එවැනි දැනුවත්වීමක් කළා හෝ නොකළා වුවත් එවැනි අනතුරක් ගැන ආරක්ෂක අංශ අනතුරු අඟවා නැත.


මෙහිදී විපිළිසර වන්නේ රටේ පොදු මහජනතාව ය. ඔවුන් පිළිගන්නේ ආරක්ෂක අංශ කියන කතාව ද? නැතහොත් කාදිනල් හිමියන් කියන කතාව ද? ඊට අඩු වැඩිය සපයන්නේ බෞද්ධ නායක හිමිවරුන්ය. අස්ගිරි පාර්ශ්වයේ මහනායක වරකාගොඩ ඥානරතන නා හිමියන් ප්‍රකාශ කර ඇත්තේ සියලුම පාසල් තවත් සති දෙකක කාලයක් වසා තැබිය යුතු බවයි. උන්වහන්සේලා ආරක්ෂාව සඳහා පන්සල් වසා තබනැයි තවම නිවේදනය කර නැත.


මෙහිදී අප තේරුම් ගත යුතු සත්‍යය වන්නේ එල්ටීටීඊ සංවිධානය සක්‍රියව පැවති කාලයේ එම සංවිධානය පරාජය කරන තුරු රටේ සියලුම කටයුතු නවත්වා මිනිසුන් ගෙවල්වලට ගාල් කර නොසිටි බවයි. ඒ නිසාම මේ අවස්ථාවේදී අවශ්‍ය වන්නේ ආරක්ෂක අංශ උපදේශ පරිදි රට සාමාන්‍ය පරිදි ඉදිරියට ගෙන යාමය. එහිදී අන්ත දෙකක් තිබිය නොහැකිය.


කතෝලික පෞද්ගලික පාසල් යන නාමයෙන් හඳුන්වන පාසල් ද ක්‍රියාත්මක වන්නේ අධ්‍යාපන අමාත්‍යාංශයේ අනුමැතිය අධීක්ෂණය හා මෙහෙයවීම යටතේය. අධ්‍යාපන අමාත්‍යාංශයේ චක්‍රලේඛවලට අනුකූලවය. මේ පාසල්වල විභාග යනු අධ්‍යාපන අමාත්‍යාංශය පවත්වන විභාගය. එම විභාග සඳහා ප්‍රශ්න පත්‍ර සැකසීමේදී සලකා බලන්නේ පාසල් පැවැත්වූ කාලසීමාවත්, එම කාලසීමාවේදී ආවරණය කරනු ලැබූ විෂය නිර්දේශයත් පමණක්ය. පෞද්ගලික පාසල් ඊට වඩා අඩු දින ගණනක් පවත්වා අඩු විෂය නිර්දේශ ප්‍රමාණයක් ආවරණය කළා යැයි එහිදී බොහෝ විට සලකා බලන්නේ නැත. අධ්‍යාපන අමාත්‍ය අකිල විරාජ් කාරියවසම් පාර්ලිමේන්තුවේදී කී පරිදිම සතියක කාලයක් පවා ළමයෙකුට විශාල කාලයකි. එමෙන්ම අධ්‍යාපන අමාත්‍යාංශයේ අනුමත පෞද්ගලික පාසල් යන්න කතෝලික සභාවට පමණක් අදාළ වූවක් නොවේ. මේ ගණයට වැටෙන කතෝලික නොවන වෙනත් ක්‍රිස්තියානි ඒවාත් ඇංග්ලිකානු හා මෙතෝදිස්ත පාසල්ද, මුස්ලිම් පාසල් ද තිබේ. ඇංග්ලිකානු පෞද්ගලික පාසලක් වන කොල්ලුපිටියේ සාන්ත තෝමස් ප්‍රාථමික විදුහල දැනගන්නට ඇති පරිදි මැයි 6 වැනිදා සිට පාසල් කටයුතු ආරම්භ කර තිබේ.


අනෙක් කරුණ වන්නේ කතෝලික පෞද්ගලික පාසල් යනුවෙන් හැඳින්වුවද ඒවා අතරින් බහුතරය රජයේ ආධාර ලබන පාසල් හෙවත් අර්ධ රාජ්‍ය පාසල් වශයෙන් කටයුතු කරන බවය. ඒවායේ අනුමත ගුරු මණ්ඩලයට හිමි වැටුප්ද පෙළපොත් ද ළමයින්ට ලබාදෙන නිල ඇඳුම් ආධාරය ද රජයෙන් සපයනු ලැබේ. උදාහරණයකට කොළඹ නගරය ගතහොත් පූර්ණ පෞද්ගලික කතෝලික පාසලකට ඇත්තේ ශාන්ත බි්‍රජට් කන්‍යාරාමය පමණි. ශාන්ත පීතර විදුහල, ශුද්ධවූ පවුලේ කන්‍යාරාමය, ශාන්ත ජෝසප් විදුහල, සාන්ත බෙනඩික් විදුහල හා යහපත් එඬේරාගේ කන්‍යාරාමය යන කතෝලික පාසල් අර්ධ රාජ්‍ය පාසල්ය.


නින්දිත පාස්කු ඉරිදා ප්‍රහාරය එල්ල වීමෙන් පසු කොළඹ අගරදගුරු මැල්කම් කාදිනල් රංජිත් හිමි දැක්වූ නායකත්වය ප්‍රශංසනීය ය. එහි විවාදයක් නැත. නීතිය අතට නොගන්නා ලෙසත් නීතිය පසිඳලන ආයතනවලට එම කටයුතු සිදු කිරීමට ඉඩ ලබා දෙන ලෙසත් එහිමියන් කතෝලික ප්‍රජාව හා අනෙකුත් ජන කොටස්වලින් කරන ලද ආයාචනය හා ඉල්ලීම ඉන්පසුව ඇතිවීමට හැකි මහා විනාශයක් වළක්වා ගනු ලැබීය. එමෙන්ම මීට දින කිහිපයකට පෙර මීගමුව පෝරුතොට දී දෙපිරිසක් අතර ඇතිවූ ගැටුම තව දුර නොයා සමනය කිරීම සඳහා මුස්ලිම් ආගමික ප්‍රජාව හමුවී උන්වහන්සේ දැක්වූ කැපවීම අගය කළ යුතුය.


එහෙත් ආරක්ෂාව පිළිබඳ කාරණයේදී තවම රටට තොරතුරු සහිතව ප්‍රසිද්ධියේ කියා නැති හා හා ආරක්ෂක අංශවලට කීවාදැයි අප නොදන්නා කාරණයකින් හිමියන් පෙළෙන බව පෙනේ. ඒ පාස්කු ඉරිදා ප්‍රහාරයෙන් දින කිහිපයකට පසු එහිමියන් දේශීය හා විදේශීය මාධ්‍යයට කරන ලද ප්‍රකාශයක් හේතුවෙන්ය. එහි දී හිමියන් කීවේ මෙවැන්නකි. ‘ආරක්ෂක කටයුතු සිදුවන ආකාරය ගැන අපට සෑහීමකට පත්වෙන්න බැහැ, මේක පිටිපස්සේ කවුද ඉන්නේ කියලා හොයන්න ඕනෑ. ප්‍රශ්න කිරීමක් කරලා සමහර අය රට අතහැරලා යන්න පුළුවන්. අපට සැකයක් තියෙනවා. මේ පිටිපස්සේ ඉන්න උදවිය මේ වනවිටත් රටින් පිටවෙලා ගිහින් කියලා. බඩුබාහිරාදිය කොහෙන්ද ගෙනාවේ? කවුද කියලා හොයන්න අවශ්‍ය වෙනවා.


ජනාධිපතිතුමා කොමිසමක් පත්කළා කිව්වා. මේවාට අදාළ අයගේ සාක්ෂි ලබා ගත්තාද මම දන්නේ නෑ. මට සැකයක් තියෙනවා මේවා අර ඉස්සර කරපු කොමිෂන් සභා වගේ වේවිද කියලා. මේවාට සම්බන්ධ යම් යම් උසස් උදවිය රටින් පැන යනවා කියලා ආරංචියකුත් අපට ලැබෙනවා. මේක කළේ නැත්නම් අපිට පාරට බහින්න වෙනවා. අපිත් ඉස්සරහින් යනවා. අපට නීතිය අතට ගන්න නොදී ඔබ නීතිය ක්‍රියාත්මක කරන්න සෑම අංශයකම.’


මේ නිසාම නීතිය අතට නොගන්නැයි දේශනා කළ කාදිනල් හිමියන්ම පසුව කී ලෙසම පෙළපාලිවල පෙරමුණේ නොගොස් නීතිය අතට ගෙන දැයි අපට සිතෙන්නේ පාසල් සම්බන්ධයෙන් කටයුතු කරන ආකාරයෙන්ය. ඒ විශේෂයෙන් ම කතෝලික පුද්ගලික පාසල් යන නාමයෙන් හඳුන්වනු ලබන පාසල්වලින් අතිබහුතරයක් රජයේ ආධාර ලබන අර්ධ රාජ්‍ය පාසල් වශයෙන් කටයුතු කරන බැවින්ය.


විශේෂයෙන්ම ප්‍රහාරයට ලක්වූ කොච්චිකඬේ ශාන්ත අන්තෝනි සිද්ධස්ථානය බැතිමතුන්ට විවෘත කළ හැකි නම් පාසල් විවෘත කිරීමට ඇති බාධාව කුමක්ද යන සාධාරණ පැනය අප තුළ මෙහිදී පැන නගින බව කිවයුතුය. ■