තුර්කියේ ඉන්තාන්බුල් නුවර සෞදි කොන්සල් කාර්යාලයේදී මාධ්‍යවේදී ජමාල් කෂොගී ඝාතනය කිරීම පිළිකුලෙන් යුතුව හෙළා දකින බව ශ්‍රී ලංකාවේ ප‍‍්‍රධාන මාධ්‍ය සංවිධාන ඒකාබද්ධව මාධ්‍ය නිවේදනයක් නිකුත් කරමින් සඳහන් කරයි.

ශ‍්‍රී ලංකා වෘත්තිය ජනමාධ්‍යවේදීන්ගේ සංගමය, නිදහස් මාධ්‍ය ව්‍යාපාරය, මුස්ලිම් මාධ්‍ය සංසදය, මාධ්‍ය සේවක වෘත්තිය සමිති සම්මේලනය, ප‍්‍රජාතන්ත‍්‍රවාදය සඳහා මාධ්‍යවේදියෝ සහ අන්තර්ජාල මාධ්‍ය ක‍්‍රියාකාරීත්වය ඒකාබද්ධව එම නිවේදනය නිකුත් කර ඇත.

ලොව සෑම රටකට ජනමාධ්‍ය සමාජ මෙවැනි කුරිරු ඝාතනයන්ට එරෙහිව දැඩි හඬක් නැඟිය යුතු බවත්, ලෝක ප‍‍්‍රජාතන්ත‍‍්‍රවාදයට මෙවැනි සිදුවීම් හරහා එල්ලවන්නේ දරුණු අභියෝගයක් බවත්, විවේචන ඉවසිය නොහැකි පාලකයන් හමුවේ ජනමාධ්‍ය සමාජය අනතුරුදායක බවට අප රටේ ඉතිහාසයද සාක්ෂි සපයා ඇති බවත් එහි දැක්වේ.
ශ‍්‍රී ලංකාවේ ඝාතනය වූ, අතුරුදන් කළ හා පහරකෑම්වලට ලක්වූ ජනමාධ්‍යවේදීන්ට තවමත් සාධාරණය ඉටු වී නොමැති පරිසරයක මාධ්‍යවේදී කෂොගීගේ සිදුවීම අප රටේ ජනමාධ්‍ය සමාජය සසල කරන්නන් බවත් මෙම ක‍්‍රෑර ඝාතනය සම්බන්ධයෙන් අන්තර්ජාතික විශේෂඥයන්ගෙන් සැදුම්ලත් ස්වාධීන මණ්ඩලයක් මඟින් විමර්ශනයක් සිදුකර ඝාතකයන් හා ඊට අනුබල දුන් පිරිස් නීතිය ඉදිරියට පමුණුවා ඝාතනයට ලක්වූ මාධ්‍යවේදියාට යුක්තිය ඉටුකරන ලෙසත් එමඟින් ඉල්ලා ඇත.