පෑන් ඒෂියා ලොක්කෙක් සහ අර්ජුන් ඇලෝෂියස්

ඉදිරි ගනුදෙනු ගැන කතාබහ කළා

කබ්රාල් බලපෑම් කරලා පර්පෙචුවෙල් ඇතුළට ගත්තා

ඊට මාසෙකට පස්සේ කබ්රාල්ගේ මැදිහත්වීමෙන් ඊපීඑෆ්

ද්විතීයික වෙළඳපළේ ආයෝජනයට තීන්දු කළා

ද්විතීයික වෙළඳපළේ පර්පෙචුවල් සමාගමත්, පෑන් ඒෂියා සමාගමත්

එක්ක ඊපීඑෆ් ගනුදෙනු කළා

පර්පෙචුවල්, පෑන් ඒෂියා ලාභ ලබද්දී, ඊපීඑෆ් ආයතනයට පාඩු සිද්ධවුණා

 

 

මුදල් හා ප්‍රාග්ධන වෙළඳපළ සහ රාජ්‍ය ව්‍යවසාය ප්‍රතිසංස්කරණ රාජ්‍ය අමාත්‍යවරයා ලෙස අජිත් නිවාඞ් කබ්රාල් දිවුරුම් දී ඇත. මෙම අමාත්‍යධුරය නරියාට කුකුළන් බාරදීම ගැන අපූරු උදාහරණයකි.

එම රාජ්‍ය අමාත්‍යාංශයේ කාර්යභාරය ලෙස මෙසේ සඳහන්ය. ‘මුදල් අමාත්‍යවරයාගේ උපදෙස් හා මගපෙන්වීම මත ‘ජනතා කේන්ද්‍රීය ආර්ථිකයක්’ ඇතිකිරීම සඳහා අදාළ නීති සහ අණපනත්වලට අනුකූලව මුදල් හා ප්‍රාග්ධන වෙළඳපළ සහ රාජ්‍ය ව්‍යාපාර ප්‍රතිසංස්කරණ විෂයට අදාළ ප්‍රතිපත්ති සම්පාදනයට සහාය වීම හා ජාතික අයවැය, රාජ්‍ය ආයෝජන හා ජාතික සංවර්ධන වැඩපිළිවෙළ යටතේ ඇති වැඩසටහන් ක්‍රියාත්මක කිරීම සහ පහත දැක්වෙන දෙපාර්තමේන්තු, රාජ්‍ය සංස්ථා හා ව්‍යවස්ථාපිත ආයතනයන්හි විෂයන් හා කාර්යයන් හා වැඩසටහන් ක්‍රියාත්මක කිරීම, පසු විපරම් කිරීම හා ඇගයීම.’

මෙම අමාත්‍යාංශය යටතේ සුවිශේෂ ප්‍රමුඛතාද සඳහන් කර ඇත. ‘ඉතුරුම් හා ආයෝජන දිරිගැන්වෙන පරිදි බැංකු, මූල්‍ය ආයතන ශක්තිමත් කිරීමේ ප්‍රතිසංස්කරණ ක්‍රියාත්මක කිරීම, බිඳවැටී ඇති මූල්‍ය ආයතන ව්‍යාපාර නැවත නගා සිටුවීම සඳහා අවශ්‍ය ආයතන ප්‍රතිසංස්කරණ ක්‍රියාත්මක කිරීම’ ආදි ලෙස ප්‍රමුඛතා 10ක් සඳහන්ය.

ඒ අතරින් මේ සටහනේදී අවධානය යොමුකළ හැකි වැදගත් කාරණා කිහිපයක් මෙලෙසය. ‘බැඳුම්කර හා කොටස් වෙළඳපළ ආකර්ෂණීය කරවීම, භාණ්ඩාගාර හා බිල්පත් සහ බැඳුම්කර ප්‍රාථමික වෙළඳපළ ප්‍රතිසංස්කරණ හා නියාමන කටයුතු ශක්තිමත් කිරීම’ එවැනි කාරණා දෙකකි.

ඔහුගේ රාජ්‍ය අමාත්‍යාංශයට ඇති ආයතන වන්නේ රාජ්‍ය ව්‍යාපාර දෙපාර්තමේන්තුව, ව්‍යාපෘති කළමනාකරණ හා අධීක්ෂණ දෙපාර්තමේන්තුව, ජාතික මෙහෙයුම් මැදිරිය, නිවාස සංවර්ධන මූල්‍ය සංස්ථාව, රාජ්‍ය උකස් හා අයෝජන බැංකුව, ඌන ක්‍රියාකාරී ව්‍යවසායන් හෝ ඌන උපයෝජිත වත්කම් පුනරුදය කිරීම (ඉවත් කිරීම) පනත යටතේ මහා භාණ්ඩාගාරයේ ලේකම්වරයා සතු කර ඇති ආයතන යන ඒවාය.

මීට පෙර බැංකු හා මූල්‍ය ආයතන භාරව සිටි කාලයේත්, බැඳුම්කර හා භාණ්ඩාගාර බිල්පත් භාරව සිටි කාලයේත් අජිත් නිවාඞ් කබ්රාල් කටයුතු කර ඇති ආකාරය සලකන විට ඔහු මේ රාජ්‍ය අමාත්‍යධුරයට හැකි තරම් ඈතින් තැබිය යුතු කෙනෙකි. මහින්ද රාජපක්ෂ මහතා ජනාධිපතිව සිටියදී පාඩු ලැබූ නාස්තිකාර හා දූෂිත ආයතන ගණනාවකට මුදල් පොම්ප කිරීමේ කටයුත්ත කළ පුද්ගලයා අජිත් නිවාඞ් කබ්රාල්ය. ලංකාවේ විගණකාධිපති දෙපාර්තමේන්තුවේ වාර්තා සහ වෝහාරික විගණන ඇසුරෙන් අප මීට පෙරද පෙන්වා ඇති පරිදි රටේ සේවකයන් උපයාගත් මුදල් ඇති ඊපීඑෆ් අරමුදලේ මුදල් එවැනි පාඩු ලබන රාජ්‍ය ආයතනවලට කොටස් වෙළඳපළේ ආයෝජනය කළේ කබ්රාල් පාලන සමයේදීය. එක් උදාහරණයක් කීවොත්, ශ්‍රී ලංකන් සමාගමට ඊපීඑෆ් මුදල් ආයෝජනය කරමින්, එයාබස් ගනුදෙනුව වැනි දේ කරමින් කළ දූෂිත ගනුදෙනුවලට මූල්‍යමය අනුබලය සැපයීමේ චෝදනා එල්ලවුණේ ඒ කාලයේය.

 

වෝහාරික වාර්තා

කබ්රාල් ගැන තේරුම් ගන්නට නම් වෝහාරික වාර්තා කියවා බැලිය යුතුය. එම දීර්ඝ වාර්තා කියවන තරමට අලුතින් කරුණු හෙළිවෙයි. බැඳුම්කර ගනුදෙනු පිළිබඳත්, මහ බැංකුව සිදුකළ ආයෝජන පිළිබඳත් එම වෝහාරික විගණන වාර්තා සකස් කර තිබුණි. එහි 2002 ජනවාරි 01 සිට 2016 දක්වා බැඳුම්කර ගනුදෙනු පිළිබඳ කරුණු සොයා තිබුණි. 2019 නොවැම්බර් මාසයේදී වාර්තාව එළිදක්වා තිබුණු අතර 2020 ජනවාරි 21 වැනිදා එය සභාගත කර තිබුණි. වාර්ත සකස් කර තිබුණේ බීඩීඕ සහ කේඑම්පීජී නම් ලෝකයේ ගෞරවනීයම මූල්‍ය සමාගම් දෙකකි.

එහෙත්, එම වාර්තා සභාගත කිරීමට පෙරත්, සභාගත කළ පසුත් එම වාර්තා වංචා සහගත ඒවා බව කියන්න සහ ඒවායේ බර හෑල්ලු කරන්නට අජිත් නිවාඞ් කබ්රාල් හැකි උපරිම උත්සාහය ගත්තේය.

 

හඳුනාගත් නිලධාරියෙක්

බීඩීඕ ඉන්දියා සමාගම වෝහාරික විගණන වාර්තා සකස් කිරීමේදී බැඳුම්කර ගනුදෙනු සඳහා මූලික වූ නිලධාරීන් වෙනම හඳුනාගෙන තිබුණි. ‘හඳුනාගත් නිලධාරීන්’ ලෙස ඔවුන් නම් කර තිබුණි. හිටපු මහබැංකු අධිපතිවරුන් වන අර්ජුන් මහේන්ද්‍රන් හා අජිත් නිවාඞ් කබ්රාල් එවැනි හඳුනාගත් නිලධාරීන්ය. එවැනි නිලධාරීන්ගේ සම්බන්ධතා ගැන, ඔවුන් වෙනත් ආයතන හා ගනුදෙනු කළ ආකාරය ගැන සොයා බලා ඇත.

ප්‍රාථමික ගැනුම්කරුවන් හා හඳුනාගත් නිලධාරීන් අතර බැඳියාවන් අතර ගැටුමක් තිබුණාදැයි එහිදී සොයාබලා ඇත. අප හොඳන්ම දන්නා පර්පෙචුවෙල් ටේ‍රෂරීස් සමාගමේ අර්ජුන් ඇලෝෂියස් සහ අර්ජුන් මහේන්ද්‍රන් අතර බැඳියාවන්ගේ ගැටුම පිළිබඳත් සොයාබලා තිබුණු අතර ඒ ගැන කරුණු හෙළිදරව් කර තිබුණි.

කබ්රාල් පවුල් ගස

මෙම වෝහාරික වාර්තාවලදී කබ්රාල් පවුලේ 10 දෙනෙකුගේ සම්බන්ධතා ගැන කරුණු සඳහන් කර තිබුණි. මහ බැංකුව යටතේ නියාමනය වූ පෞද්ගලික අංශයේ මූල්‍ය ආයතනවල සහ රජයේ මූල්‍ය ආයතනවල ඉහළම පුටුවලට එම පවුලේ සාමාජිකයන් පත් කර තිබුණි.

කබ්රාල්ගේ සමීපම ඥාති සහෝදරයෙකු වන අමල් කබ්රාල් 2013 සිට මහ බැංකුවේ මූල්‍ය ප්‍රතිපත්ති උපදේශන කමිටවේ සාමාජිකයෙකු ලෙස සිට ඇත. 2014 සිට හැටන් නැෂනල් බැංකුවේ අධ්‍යක්ෂවරයෙකු වී ඇත. එම බැංකුව යටතේ තිබුණු ඇක්විටි සෙකියුරිටීස් ආයතනය (එකල කසුන් පළිසේන එම ආයතනයේ සේවය කළේය.) 2014ට පෙර පාඩු ලැබූ බැඳුම්කර ගනුදෙනුවලට සම්බන්ධ වූ ආයතනයකි.

අනෙක් සමීප ඥාති සහෝදරයා වන නිහාල් ෆොන්සේකා අජිත් නිවාඞ් කබ්රාල් මහබැංකු අධිපතිවරයාව සිටියදී කොමර්ෂල් බැංකුවේ අධ්‍යක්ෂවරයෙක්ව සිටියේය. ඊට අමතරව ඩීඑෆ්සීසී බැංකුවේ හා ඩීඑෆ්සීසී වර්ධන බැංකුවේ කොටස් හිමියෙක් විය.

අජිත් නිවාඞ් කබ්රාල්ගේ සහකාරිය වන රෝෂිනී කබ්රාල් 2010 සිට 2015 දක්වා ලංකා හොස්පිට්ල්ස් සමාගමේ අධ්‍යක්ෂවරියකව සිටියාය. ලංකා හොස්පිට්ල්ස්හි කොටස් අයිතියෙන් සීයට 55ක් ශ්‍රී ලංකා ඉන්ෂුවරන්ස් සතුව තිබුණි.

කබ්රාල් මහතාගේ පුත් චතුර විශ්වජිත් කබ්රාල් වැලිබල් පවර් එරත්න පීඑල්සී සහ ෆෝටස් රිසෝට්ස් පීඑල්සී සමාගම්වල අධ්‍යක්ෂවරයෙකුව සිටියේය. ඒවා පෞද්ගලික සමාගම් වන නිසා බැලූ බැල්මට අවුලක් නැත. එහෙත් එම සමාගම්වල සභාපති ව්‍යාපාරික ධම්මික පෙරේරාය. ධම්මික පෙරේරා සතුව මහබැංකුවේ නියාමනය වූ වැලිබල් යන නමින්ම යුත් මූල්‍ය ආයතනයක් තිබුණි. ඊට අමතරව බැඳුම්කර ගනුදෙනුවලට සම්බන්ධ පෑන් ඒෂියා බැංකුවේ කොටස්වලින් සීයට 30ක් ධම්මික පෙරේරා සතු විය.

කබ්රාල් මහතාගේ සහෝදරිය ශිරෝමි නොඑල් වික්‍රමසිංහය. 2013 දෙසැම්බර් 23 වැනිදා සිට 2015 මාර්තු 09 වැනිදා දක්වා ශිරෝමි නොඑල් වික්‍රමසිංහ මහත්මිය පර්පෙචුවෙල් සමාගමේ අධ්‍යක්ෂවරියක ලෙස සේවය කර ඇත. ඊට අමතරව 2013 සිට 2017 දක්වා ඇය එච්එන්බී ඇෂුවරන්ස්හි අධ්‍යක්ෂවරියක ලෙස සේවය කර ඇති අතර, ඊටත් පෙර 2009 පෙබරවාරි 1 වැනිදා සිට 2010 මැයි 26 වැනිදා දක්වා කොමර්ෂල් බැංකුවේ අධ්‍යක්ෂවරියක් ලෙස සේවය කර ඇත.  ඇය නිවාස බැංකුව හෙවත් එච්.ඩී.එෆ්.සී. බැංකුවේ සභාපතිනිය ලෙස 2010 මැයි මාසයේ සිට 2015 ජනවාරි මාසය දක්වා කටයුතු කර ඇත. එය රජය සතු බැංකුවකි. වික්‍රමසිංහ මහත්මිය එම බැංකුවේ සභාපතිනිය ලෙස සිටියදී, 2011 වර්ෂයේ සිට අර්ජුන් ඇලෝෂියස් එච්.ඩී.එෆ්.සී. බැංකුවේ අධ්‍යක්ෂවරයෙකු පත් කර තිබේ. ඇය, අර්ජුන් ඇලෝෂියස්ගේ පර්පෙචුවෙල් හෝලිඩින්ස් සමාගමේ අධ්‍යක්ෂවරියක වී ඇත්තේ ඉන් පසුය.

අජිත් නිවාඞ් කබ්රාල්ගේ නෑනා වන ධාරා විජේතිලක සම්පත් බැංකුවේ අධ්‍යක්ෂවරියක විය. ධම්මික පෙරේරාද සම්පත් බැංකුවේ අධ්‍යක්ෂවරයෙකු වූ අතර, සම්පත් බැංකුව ප්‍රාථමික ගැනුම්කරුවෙක් විය. එම බැංකුවද මහ බැංකුව යටතේ නියාමනය වූ ආයතනයකි.

අජිත් නිවාඞ් කබ්රාල්ට සමීප ඥාතීත්වයක් ඇති ශිබානි රේණුකා තම්බයියා ඩීඑෆ්සීසී බැංකුවේ අධ්‍යක්ෂවරියක් විය. මස්සිනා රවීන්ද්‍ර බාලකන්ත තම්බයියා ඩීඑෆ්සීසී බැංකුවේ අධ්‍යක්ෂවරයෙක් විය. තවත් මස්සිනා කෙනෙකු වන සුනිල් විජේසිංහ ජාතික සංවර්ධන බැංකුවේ සභාපති විය. රනෙල් ටී විජේසිංහ ලංකා බැංකුවේ අධ්‍යක්ෂවරයෙක් විය.

 

පෑන් ඒෂියා සහ පර්පෙචුවෙල්

පෑන් ඒෂියා බැංකුවේ නියෝජ්‍ය ප්‍රධාන කළමනාකරු ලෙස සේවය කළ රිචී ජයස් බැඳුම්කර ගනුදෙනු පිළිබඳ ජනාධිපති කොමිෂන් සභාවේදී කර තිබුණු ප්‍රකාශයක් වෝහාරික වාර්තාවක සඳහන් කර තිබුණි.

‘නිමල් පෙරේරා මහතා සතුව එන්.පී. කැපිටල් නම් සමාගමක් තිබුණා. එම සමාගම ද්විතීයික වෙළඳපොළේ බැඳුම්කර ගනුදෙනු කළා. ඊට අමතරව ඊපීඑෆ් ආයතනය හරහා බැඳුම්කර මිල ඉහළ පහළ හෙළීමේ ක්‍රියාවලියකට නිමල් පෙරේරා සිය පෞද්ගලික ගිණුමෙන් හා එන්.පී. කැපිටල් ආයතනයේ ගිණුමෙන් මැදිහත් වී තිබුණා.’

රිචී ඩයස් මහතා එහිදී ප්‍රකාශ කර තිබුණේ තමන්ට අර්ජුන් ඇලෝෂියස් මුණගස්වා තිබුණේ නිමල් පෙරේරා බවය. නිමල් පෙරේරා මේ වනවිට ආණ්ඩුවට හිතවත් තනතුරුලාභියෙකි. ඇලෝෂියස්ගේ කාර්යාලයට ගොස් ඔහු මුණගැසී කතාකරන ලෙසත්, වැඩකටයුතු සිදුකරන ආකාරය පිළිබඳ කතාබහ කරන ලෙසත් උපදෙස් ලැබුණු බව ඩයස් මහතා කියා ඇත.

ඩයස් මහතා අර්ජුන් ඇලෝෂියස් හමුවීමට

ගොස් ඇති අතර, කසුන් පළිසේන මුණගැසී ඔහු සමගත් සාකච්ඡා කර තිබේ. පර්පෙචුවෙල් ටේ‍රෂරීස් සහ ඊපීඑෆ් අතර අතරමැදි භූමිකාවක් පෑන් ඒෂියා බැංකුව නිරූපණය කළ යුතු බව එහිදී ප්‍රකාශ කළ    බව රිචී ඩයස් මහතා කියා තිබේ.

 

පර්පෙචුවෙල් ගන්න කෝල් දීම

මෙය වෝහාරික විගණන වාර්තා ඇසුරෙන් අප මීට පෙර හෙළිකර ඇති කරුණකි.

මහ බැංකු බැඳුම්කර වංචාව පිළිබඳ චෝදනා ලබා ඇති පර්පෙචුවෙල් ටේ‍රෂරීස් ආයතනයට බැඳුම්කර ගනුදෙනුකරුවෙකු වීමට සුදුසුකම් තිබී නැත. එහෙත් රාජ්‍ය ණය දෙපාර්තමේන්තුවේ නිලධාරීන්ගේ නිර්දේශවලට පිටින් ගොස් පර්පෙචුවෙල් ටේ‍රෂරීස් ආයතනය ප්‍රාථමික ගැනුම්කරුවෙකු ලෙස තෝරාගැනීමට බලපෑම් කළේ අජිත් නිවාඞ් කබ්රාල්ය. 2015 වික්‍රමසිංහ-සිරිසේන ආණ්ඩුව සමයේ සිදුවූ බැඳුම්කර වංචාවට මුල් වුණේ පර්පෙචුවෙල් ටේ‍රෂරීස් ආයතනයය. එහෙත්, ඒ වංචාවට පසුබිම හැදුණේ අර්ජුන් ඇලෝෂියස්ගේ සමාගම ප්‍රාථමික ගැනුම්කරුවෙකු ලෙස තෝරාගෙන තිබීම නිසාය.

පර්පෙචුවෙල් ටේ‍රෂරීස් ආයතනය ප්‍රාථමික ගැනුම්කරුවෙකු ලෙස තෝරාගැනීමට අදාළ එම සමාගමේ අයදුම්පත්‍රය 2012 වර්ෂයේදී ලැබී තිබේ. එම වසරේ නොවැම්බර් 06 වැනිදා එම අයදුම්පත්‍රයට අදාළ දැන්වීම රාජ්‍ය ණය දෙපාර්තමේන්තුවේ අධිකාරී වෙත පර්පෙචුවෙල් ටේ‍රෂරීස් ආයතනයේ අයදුම්පත පිළිබඳ දැනුම්දී ඇති අතර කෙටි කාලයක් ඇතුළත 2013 මැයි 09 වැනිදා මුදල් මණ්ඩලය පර්පෙචුල් ටේ‍රෂරීස් ආයතනයට ප්‍රාථමික ගනුදෙනුකරුවෙකු ලෙස කටයුතු කිරීම සඳහා අනුමැතිය ලබාදීමට එකඟ වී ඇත.

කෙසේ වෙතත් පර්පෙචුවෙල් ටේ‍රෂරීස් සමාගම ඉදිරිපත් කළ අයදුම්පතෙහි අඩුපාඩු රැසක් තිබී ඇතැයි වෝහාරික විගණනයෙන් පෙන්වාදෙයි. එම සමාගමට ප්‍රමාණවත් ප්‍රාග්ධනයක් නොතිබුණු බවද එමගින් පෙන්වාදෙයි. ඊට අමතරව මූල්‍ය සේවා ක්ෂේත්‍රයෙහි පෙර අත්දැකීම් නොතිබීම ඇතුළු අඩුපාඩු රැසක් එම අයදුම්පතට අදාළව තිබී ඇතැයි පෙන්වාදෙයි.

රාජ්‍ය ණය දෙපාර්තමේන්තුවේ අධිකාරී එන්.ඩබ්ලිව්.ජී.ආර්.ඩී. නානායක්කාර සමග විගණනයේදී කර ඇති සම්මුඛ සාකච්ඡාවේදී ඔහු කියා ඇත්තේ තමන්ගේ උපදෙස්වලට පිටින් පර්පෙචුවල් ටේ‍රෂරීස් ආයතනය ප්‍රාථමික ගැනුම්කරුවෙකු ලෙස තෝරාගෙන ඇති බවය. මහ බැංකුවේ සහකාර අධිපති බී.ඩී.ඩබ්ලිව්.ඒ. සිල්වා වෙත තම නිර්දේශය දැනුම්දී ඇති බවය.

කෙසේ වෙතත් මහ බැංකුවේ සහකාර අධිපති  බී.ඩී.ඩබ්ලිව්.ඒ. සිල්වා පර්පෙචුවෙල් ටේ‍රෂරීස් ආයතනය ප්‍රාථමික ගැනුම්කරුවෙකු ලෙස තෝරාගැනීමට අදාළ මුදල් මණ්ඩල පත්‍රිකාව ඉදිරිපත් කිරීමේදී නානායක්කාර මහතාගේ නිර්දේශය ඇතුළත් කර නොමැත. එයට හේතු කිහිපයක් බලපා ඇති බවත්, මහබැංකු අධිපති අජිත් නිවාඞ් කබ්රාල් එම ආයතනයට අදාළ මුදල් මණ්ඩල පත්‍රිකාව ඉදිරිපත් නොවී ප්‍රමාද වෙන්නේ ඇයිදැයි දූරකථනයෙන් අමතා විමසා ඇති බවත්  එම වාර්තාවෙහි සදහන්ව ඇත.

 

ඊපීඑෆ් ආයෝජන කිරීම

2013 ජුනි 05 වැනිදා ඊපීඑෆ් ආයතනයේ ආයෝජන කමිටුවේදී හිටපු මහබැංකු අධිපති අජිත් නිවාඞ් කබ්රාල්ගේ බලපෑම මත ද්විතීයික බැඳුම්කර වෙළඳපොළේ ආයෝජනය කිරීමට තීන්දු කර තිබුණි. එහෙත් එලෙස ද්විතීයික වෙළඳපොලේ ආයෝජනය කිරීම පිළිබඳ විධිමත් සමීක්ෂණයක් සිදුකොට, එය සුදුසු තීන්දුවක්දැයි සොයා බැලීමක් නොමැතිව කටයුතු කර ඇතැයි වාර්තාවෙහි සඳහන්ය. ශ්‍රී ලංකා මහ බැංකුවේ ජ්‍යෙෂ්ඨ සහකාර අධ්‍යක්ෂවරයෙකු වූ ඩබ්ලිව්.ජී.ආර්. හරිස්චන්ද්‍ර 2019 සැප්තැම්බර් 16 වැනිදා ලබාදුන් සම්මුඛ සාකච්ඡාවකදී ඒ බව පැහැදිලි කර තිබුණි.

‘මගේ දැනුමේ හැටියට හිටපු අධිපතිවරයා, ද්විතීයික වෙළඳපොළේ බැඳුම්කර ගනුදෙනු සඳහා ඊපීඑෆ් ආයතනය මැදිහත් කරගන්නා ලෙස දැනුම්දෙන විට, ඒ ගැන විධිමත් අධ්‍යනයක් කර තිබුණේ නැහැ.’

එම තීන්දුවෙන් පසු, 2014 දී ගනුදෙනු සිදුකළ බැඳුම්කරවලදී පෑන් ඒෂියා බැංකුවේ සහ පර්පෙචුවෙල් ටේ‍රෂරීස් සමාගමේ හුවමාරු අසාමාන්‍ය ලෙස ඉහළ ගොස් ඇති බවද වාර්තාවේ සඳහන් කර ඇත. 2014දී පර්පෙචුවෙල් ටේ‍රෂරීස් සමාගම හා ඊපීඑෆ් ආයතනය අතර ද්විතීයික වෙළඳපළේ සිදුව ඇති ගනුදෙනුවල වටිනාකම රුපියල් මිලියන 34,203කි. පෑන් ඒෂියා බැංකුව හා ඊපීඑෆ් අතර රුපියල් මිලියන 18,950කි.

අමතක කළ යුතු නැත. මේ ගනුදෙනු නිසා ඊපීඑෆ් ආයතනයට කිසිම ලාභයක් සිදුවී නැත. ඒවා ඊපීඑෆ් ආයතනයට පාඩු ලැබුණු, කලින් කී පෞද්ගලික සමාගම්වලට අතිශය ලාභ ලැබුණු ගනුදෙනුය. ඒ පිළිබඳ වාර්තාවෙහි විස්තර සහිතව සඳහන් කර ඇත.

පුදුම හිතෙන අහම්බය එය නොවේ. අජිත් නිවාඞ් කබ්රාල් දූරකථන ඇමතුම් දී බලපෑම් කොට, තමාගේ සහෝදරියගේ සම්බන්ධයකුත් ඇති පර්පෙචුවෙල් ටේ‍රෂරීස් ප්‍රාථමික ගැනුම්කරුවෙකු බවට පත්කළේ ඉහත කී ආයෝජන කමිටු තීන්දුව ගන්නට හරියට මාසයට පෙර බවය. 2013 මැයි 09 වැනිදා පර්පෙචුවෙල් ටේ‍රෂරීස් ප්‍රාථමික ගැනුම්කරුවෙකු බවට පත් කර කර තිබුණි. ජුනි 05 වැනිදා ඉහත තීන්දුව ගෙන තිබුණි. 2014 වසර පුරා පර්පෙචුවෙල් ටේ‍රෂරීස් හා පෑන් ඒෂියා බැංකුව ලාභ ලබා තිබුණි.

 

අපිළිවෙළ

කබ්රාල් පාලන කාලයේත් බැඳුම්කර නිකුත් කිරීම, ප්‍රාථමික ගැනුම්කරුවන් නියාමනය කිරීම ආදි කටයුතු පිළිබඳ මහබැංකුවේ සහ මුදල් මණ්ඩලයේ විධිමත් ක්‍රියාපටිපාටියක් නොතිබුණු බව විස්තර සහිතව වෝහාරික වාර්තාවලින් පෙන්වා තිබේ.

බැඳුම්කර නිකුත් කිරීම මුදල් මණ්ඩලයෙන් අනුමත කළ විධිමත් උපදෙස් මාලාවක් නැති බව මීට පෙර සිටම පැහැදිළිව පෙන්වාදී ඇත. රාජ්‍ය ණය දෙපාර්තමේන්තුවේ මෙහෙයුම් අත්පොතේ පමණක් බැඳුම්කර නිකුත් කිරීම ගැන උපදෙස් තිබී ඇත. එම මෙහෙයුම් අත්පොතට නිසි අනුමැතිය ලැබී නැත. එමෙන්ම එම අත්පොත වාර්ෂිකව සංස්කරණය වී ඇත. එසේ සංස්කරණය වූ පිටපත් මුදල් මණ්ඩලයේ අනුමැතියට ලක් කර නැත. පැහැදිලි වන්නේ බැඳුම්කර නිකුත් කිරීමට අදාලව නිසි ක්‍රමවේදයක්ද නැති බවය.

ඊට අමතරව ඊපීඑෆ් වැනි ආයතන ආයෝනවලින් පාඩු ලබා ඇති ආකාරයත් බැඳුම්කර ගනුදෙනුවලින් මහ බැංකුව පාඩු ලබා ඇති ආකාරයත් බැලූ කළ පෙනෙන්නේ අජිත් නිවාඞ් කබ්රාල් අදක්ෂ පරිපාලකයෙකු බවය.

ඒ අනුව කිව හැක්කේ සෞභාග්‍යයේ දැක්ම ක්‍රියාත්මක කරන කැබිනට් මණ්ඩලයට අජිත් නිවාඞ් කබ්රාල් සුදුස්සෙකු නොවන බවය. විශේෂයෙන් ආයෝජන, මූල්‍ය ආයතන නියාමන ආදි කාරණා පරිපාලනයට කබ්රාල් මීට පෙර පත් වූ අවස්ථාවල දස්කම් පෙන්වා නැත. කෙසේවෙතත් ආණ්ඩුව සෞභාග්‍යයේ දැක්ම යැයි කියන්නේ රටේ සෞභාග්‍යයේ දැක්ම නොවේ නම්, වෙන කාගේ හෝ පෞද්ගලික සෞභාග්‍යයක දැක්ම නම්, ඒ සඳහා අජිත් නිවාඞ් කබ්රාල් පෙර දස්කම් පෙන්වා තිබෙනවා විය හැකිය.■