කටාර්හි වෙසෙන ශ‍්‍රී ලාංකිකයන් වෙනුවෙන් 2001 දී කටාර්හි ආරම්භ කළ ජාත්‍යන්තර පාසලක් වෙයි. එය දෝහාහි පිහිටා ඇති ස්ටැෆඞ් ශ‍්‍රී ලංකා ජාත්‍යන්තර පාසල(Stafford Sri Lankan School Doha)යි. කුමුදු ෆොන්සේකා නම් මෙම පාසලේ හිටපු විදුහල්පතිවරයාගේ ප‍්‍රමුඛත්වයෙන් සහ පෞද්ගලික ධන පරිත්‍යාගයෙන්, තවත් කටාර්හි සිටින ශ‍්‍රී ලාංකිකයන්ගේ පෞද්ගලික මූල්‍යමය සහ අනෙකුත් සහයෝගිත්වයෙන් ලාභ නොලබන ආයතනයක් ලෙස ළමුන් 14 දෙනෙකුගෙන් එම පාසල පටන්ගෙන තිබුණි.

පාසල වටා විශාල ලාංකිකයන් පිරිසක් එක්වෙද්දී එය ශ‍්‍රී ලාංකික සිසුන් 1400කට අධික සංඛ්‍යාවක් අධ්‍යාපනය ලබන පාසලක් බවට පත්ව ඇත. දෝහා කටාර්හි වෙසෙන්නන්ගේ දරුවන්ට අධ්‍යාපනය ලබන්නට ඇති ප‍්‍රධාන ආයතනය බව මේ පාසල පත්ව ඇත. පාසැල දියුණු වෙද්දී එය කටාර්හි ශ‍්‍රී ලංකා තානාපති කාර්යාලයට අනුබද්ධ ප‍්‍රජා පාසලක් බවට පත් කර ඇත. එය පාසල වඩා දියුණු කිරීමේ අරමුණෙන් ගෙන තිබුණු තීරණයකි. පාසල තානාපති කාර්යාලයට අනුබද්ධ වුවද පවත්වාගෙන ගොස් ඇත්තේ වැටුපක් හෝ ලාභයන් නොලබන අධ්‍යක්ෂ මණ්ඩලයක පරිපාලන මැදිහත්වීමෙනි.

පාසලට සම්බන්ධ පුද්ගලයන් සහ කටාර්හි වෙසෙන ශ‍්‍රී ලාංකිකයන් පවසන අන්දමට තානාපති කාර්යාලයට අනුබද්ධ වීම නිසා ලාංකික රජයෙන්ද එහි කටාර් නියෝජිතයා වන තානාපති කාර්යාලයෙන්ද පාසලේ සංවර්ධනය වෙනුවෙන් වාසියක් ලැබී නැති තරම්ය. පුරුදු ලෙසම පෞද්ගලික ධන පරිත්‍යාගයෙන් පාසල ඉදිරියට ගොස් ඇත. එසේ වුව පාසලෙහි ගිණුම් පරිපාලනය සියතට ගැනීමට මීට පෙර තානාපතිවරුන් උත්සාහ ගෙන ඇත. එවැනි අවස්ථාවලදී එයට විරුද්ධව කටාර්හි වෙසෙන ශ‍්‍රී ලාංකිකයන් බහුතරය මැදිහත් වී තිබුණි.
පසුගිය වසරේ ජුලි 27 වැනිදා කටාර්හි ශ‍්‍රී ලංකා තානාපති ඒ.එස්.පී. ලියනගේ විසින් පාසලෙහි බැංකු ගිණුම් අත්හිටුවීමට නියෝගයක් නිකුත් කර ඇත. ඔහුගේ තර්කය වී ඇත්තේ පාසලේ මුදල් පරිපාලනය විසින් වංචා කරන බවයි. එසේ වුව පාසලේ නියෝජිතයන් සහ කටාර්හි වෙසෙන ශ‍්‍රී ලාංකිකයන්ගේ සිවිල් සංවිධානවලින් ඉල්ලා ඇත්තේ එලෙස වංචා සිදුවන්නේ නම් ඒවා පිළිබඳව ස්වාධීන පරීක්ෂණයක් සිදුකරන ලෙසයි.

ඒ.එස්.පී. ලියනගේ මහතා ලංකාවේදී කළ කී දෑ ගැන අපේ පුරවැසියන්ට තක්සේරුවක් ඇත. රාජපක්ෂ සමයේදී රාජපක්ෂලාට සමීපව සිටි ඔහු විදෙස් රටවල් කිහිපයකම තානාපතිවරයා ලෙස කටයුතු කළේය. පසුව ඒ.එස්.පී. ලියනගේ ජනාධිපති මෛත‍්‍රීපාල සිරිසේනට සමීප විය. ඒ හිතවත්කම් මත තමන්ට තානාපති තනතුරක් හෝ ආණ්ඩුකාර තනතුරක් ලබාදෙන ලෙස ඔහු ප‍්‍රසිද්ධියේම ඉල්ලා තිබුණි. රාජපක්ෂලාගේ විදේශ කටයුතු ප‍්‍රතිපත්තියම අනුව යමින්, තානාපති තනතුරකට කිසිදු සුදුසුකමක් පෙන්වා නැති ඒ.එස්.පී. ලියන්ගේ කටාර් තානාපති ලෙස පත්කර යවා තිබුණේ සිරිසේන ජනාධිපතිවරයාගේ මැදිහත්වීමෙනි. ඒ බව ඒ.එස්.පී.ම කියා තිබුණි.

වාර්ෂිකව මෙම පාසලේ ගිණුම් විගණනය වී ඇත. කටාර්හි විගණන ආයතනයක් ලවා කර ඇති එම විගණනයන්හි වාර්තා පාසල විසින් තානාපති කාර්යාලයටද වාර්ෂිකව ලබා දී ඇත. එම විගණන වාර්තාවල මුදල් වංචා පිළිබඳව වාර්තා වී නැත. එවැනි පසුබිමක ඒ.එස්.පී. ලියනගේ මහතා වංචා චෝදනා එල්ලකර ඇත. අවසානයේදී මේ ප‍්‍රශ්නය සම්බන්ධයෙන් ඇතිවූ බලපෑම නිසා විදේශ කටයුතු අමාත්‍යාංශය මඟින් නැවත පාසලේ පරිපාලනයට ගිණුම් සම්බන්ධ කටයුතු කිරීමේ අයිතිය ලබාදෙන ලෙස උපදෙස් ලබා දී තිබුණි. එතැන් පටන් මේ වසරේ ජූලි මාසය තෙක් පාසලේ පරිපාලනය සාමාන්‍ය ලෙස සිදුකර ඇත.

ජූලි මාසය පාසලේ මෙන්ම කටාර්හිද නිවාඩු සමයයි. බොහෝ දරුවන් සහ මාපියන් ලංකාවට පැමිණෙන්නේ ඒ කාලයේදීය. බොහෝවිට පාසලෙහි දුෂණ වංචා ගැන තානාපතිවරුන්ගේ කැක්කුම හටගන්නේද කටාර් ශ‍්‍රී ලාංකිකයන්ගේ ක‍්‍රියාකාරීත්වය අඩු කාලයේදීය.
පසුගිය ජූලි 05 වැනිදා කටාර් තානාපති ඒ.එස්.පී. ලියනගේ විසින් පාසලට නව සභාපතිවරයකු පත් කර ඇත. පාසලේ යතුරු නව සභාපතිවරයාට ලබා දෙන ලෙස පාසලේ සිටි සභාපති කුමුදු ෆොන්සේකාට උපදෙස් දී ඇත. මෙවරද තර්කය වී ඇත්තේ පාසලට ලැබී ඇති මූල්‍යාධාර වංචා කර ඇති බවයි. එහෙත් ඒ පිළිබඳව සිදුකළ ස්වාධීන පරීක්ෂණයක වාර්තා ඉදිරිපත් කර නැත.

පාසල් අරමුදලේ මේ වෙද්දී රියාල් මිලියන නවයක පමණ මුදලක් ඇතැයි දැනගන්නට තිබෙයි. එය රුපියල්වලින් මිලියන 390ක් පමණ වෙයි. සිසුන් 14 දෙනෙකුගෙන් පටන්ගත් පාසලක් මෙතරම් දියුණු තත්වයකට පත් කළේ වත්මන් පරිපාලනය විසින් බවත්, මුදල් වංචා කරමින් සිටියා නම් මේ තරම් පාසල දියුණු වෙන්නේ නැති බවත් පාසලේ ආරම්භක පරිපාලනය විසින් කියයි.

කටාර්හි ඇති මේ ආයතනයේ වංචා වෙන බව තානාපතිවරුන්ගේ තර්කයයි. තවම ලිඛිත සාක්ෂි නැතත් එලෙස තර්ක කිරීමට තානාපතිවරුන්ට අයිතියක් ඇත. එහෙත් එවැනි තර්කයක් මත පරිපාලනයට අත දැමීමට ඔවුන්ට හැකියාවක් නැත.

එවැනි චෝදනාවක් තිබේ නම් විධිමත් පරීක්ෂණයක් හරහා එය ඔප්පු කරන්නට හැකියාව ඔවුන්ට තිබිය යුතුය. එසේ නොකර පරිපාලනය එක්වර සියතට ගැනීමෙන් පෙනෙන්නේ පාසලේ පරිපාලනය කෙසේ හෝ සියතට ගැනීමේ වුවමනාව තානාපති ඒ.එස්.පී. ලියනගේට ඇති බවයි.