මෙහි  පසෙක පළවන්නේ පාර්ලිමේන්තු මහ මැතිවරණය දා (අගෝස්තු 5දා) ‘මව්බිම‘ පුවත්පතේ මුල් පිටුවයි. එක පැත්තකින් ‘මහ ඡන්දය අදයි‘ කියන අතරේ එහි ප්‍රධාන සිරස්තලය, ජනාධිපති ගෝඨාභය රාජපක්‍ෂගේ ප්‍රකාශයක් පදනම් කර ගත්තකි.

‘උදෙන්ම ඡන්ද පොළට ගිහින් ඔබේ යුතුකම ඉටුකරන්න. මගේ යුතුකම මම ඉටුකරන්නම්. මෙතෙක් තිබෙන ප්‍රශ්න යළිත් අහන්න නොතබන රටක් මම ගොඩනගනවා.’ යනුවෙන් එම ප්‍රධාන සිරස්තලයේ අඩංගුය.

බැලූ බැල්මටම මේ ප්‍රකාශය ඡන්දය දා උදේ ජනාධිපති කියූවකි. එහෙත් කොහේදීද?එය කොතැනකදී ජනාධිපතිවරයා විසින්  කියන ලද්දක්දැයි සොයනු පිණිස දෙවැනි පිටුවට ගියද, එහි කිසි තැනක ජනාධිපතිවරයා, ඡන්දය දා එනම් අගෝස්තු 5වැනිදා, කොතැනකදී කියූවක්දැයි සඳහනක් නැත. එහෙත්, ජනාධිපතිවරයා කියූ දේයැයි සඳහන් දීර්ඝ විස්තරයක් එහි පළවෙයි. අනෙක් අතට, අගෝස්තු 5 වැනිදා, ජනාධිපති කියූ දෙයක් නම්, එදිනම පුවත්පතේ පළවන්නටද ඉඩක් නැත.

පුවත තවදුරටත් කියවන කෙනකුට හමුවන්නේ, ‘මේ අතර දළදා පෙරහැර අවසානයේ පැවැති එහි සමාප්ති උළෙලේදී ජනාධිපතිවරයා ඊයේ මෙසේද ප්‍රකාශ කෙළේය’ කියන වෙනත් විස්තරයකි. එය ‘ඊයේ’ කතාවකි. මෙය ‘අද’ කතාවකි.

මෙවැනි අවලස්සන පුවතක් ගැන මෙපමණ විස්තර කළේ පිරියකින් නොවේ. අපේ ‘ජාතික’ ජනමාධ්‍ය වැටී ඇති ජරාජීරණ තත්වය නැවතත් පෙන්වා දෙන්නටය. එය හුදෙක් ආචාධාර්මික වරදක් පමණක් නොවේ. මහ මැතිවරණයක් පැවැත්වෙන අවස්ථාවක මාධ්‍ය විසින් පිළිපැදිය යුතු යැයි මැතිවරණ කොමිෂන් සභාව නියම කර ඇති උපමාන අමුඅමුවේ බිඳ දැමීමකි.

එම උපමාන අනුව, අගෝස්තු 3 වැනි ඉරිදා රාත්‍රි 12න් පසු මහමැතිවරණය වෙනුවෙන් වූ කිසිම ප්‍රචාරක කටයුත්තක් කළ නොහැකිය. රටේ හැම පුවත්පතක්ම පාහේ ඒ නියමයට යටත් වී සිටියේ හුදෙක් නියම පිළිපැදීමටත් වඩා තමන්ගේ ආචාරධාර්මික ළැදියාව පෙන්වමිනි.

එහෙත්, මව්බිම ලජ්ජා නැතිව, ජනාධිපතිවරයාගේ ප්‍රකාශයක් කිසිම මූලාශ්‍රයක් නැතිව, මුල් පුවත සේ පළකර තමන් කුමන ආචාරධර්මයකින්වත්, උපමානයකින්වත් බැඳ තැබිය නොහැකි පිරිසකගේ නිර්මාණයක්  බව ප්‍රදර්ශනය කෙළේය.

මෙය ජනාධිපතිගේ ප්‍රකාශයක් නිසා උපමාන ඊට අදාළ නොවන බව කිසිවකු කිවහොත්, ඔවුන්ට මැතිවරණ කොමිසමේ උපමාන නැවතත් කියවන්නට උපදෙස් දිය යුතුය. ජනාධිපතිවරයා, අගමැතිවරයා යම් පක්‍ෂයක නියෝජිතයකු වන විට, ඔවුන් කරන කියන දේ  අයත් වන්නේ එම පක්‍ෂයේ ක්‍රියාකාරකම්වලටම බව එම උපමාන කියයි. ඒ හැරත්, ජනාධිපතිවරයා එක් පක්‍ෂයක නායකයෙකි. ඔහුගේ පක්‍ෂය මේ මැතිවරණයේදී තරග වැදුණේය. ඒ පක්‍ෂයේ මැතිවරණ  රැස්වීම්වලට ජනාධිපතිවරයා පෞද්ගලිකවම සහභාගි වුණේය. ඒ සෑම අවස්ථාවකදීම ඔහු පක්‍ෂයක කොටසක් නම්, මෙතැනදී පක්‍ෂයකට අයත් නොවන්නේ කෙසේද?

එසේ නම් සිදුවී ඇත්තේ කුමක්ද? පොහොට්ටුවේ ජාතික ලැයිස්තු මන්ත්‍රීධුර අපේක්‍ෂකයකු වන සිය ස්වාමියා වෙනුවෙන් යුතුකම් ඉටුකිරීමට. මව්බිම පුවත්පතේ (පත්තර)කාරයන් පිරිස මහ මැතිවරණය දා අමු අමුවේ මාධ්‍ය සදාචාරය පමණක් නොව, මැතිවරණ කොමිසමේ මාධ්‍ය උපමානද උල්ලංඝනය කිරීමය.

අප මේ කාලයේ මුහුණ දෙන ඛේදවාචකය වන්නේ අශික්‍ෂිත දේශපාලකයන්ගෙන් පාලනය වන්නට සිදුවීම පමණක් නොවේ. තමන්ගේ වෘත්තියේ අවම ආචාරධාර්මික තත්වයවත් නොසලකන, මාධ්‍ය‘කාරයන්ගේ’ මාධ්‍ය කියවන්නට, අසන්නට, දකින්නට ලැබීමත්ය.

මව්බිම මේ මුල් පුවත වනාහි ජනාධිපතිවරයාගේ ප්‍රකාශයකට ඉඩ දීමක් නොවේ. පොහොට්ටු ප්‍රචාරක දැන්වීමක් මුල් පිටුවේ පළකර මාධ්‍ය උපමාන සීසීකඩ විසුරුවා දැමීමකි.■

■ අරුණ ජයවර්ධන