ඔබේ අමාත්‍යාංශයට පැවරුණ රාජකාරී මොනවාද?

තවම දන්නේ නැහැ. ගැසට් එකක් ඇවිල්ලා නැහැ. ප්‍රාථමික සෞඛ්‍ය දියුණු කරන්න කියලා ජනාධිපතිතුමා පැහැදිලිව කීවා. ග්‍රාමීය සෞඛ්‍ය ගැන සෞභාග්‍යයේ දැක්මේ විශේෂයෙන් තිබුණ බව ඔහු කීවා. ඒ අනුව ඉදිරියේදී මගේ වැඩි අවදානය ඒ පැත්තට යොමු වේවි. කොරෝනා මර්දනයට අදාලව මට පැවරෙන්නේ මොකක්ද කියන එක තවම පැහැදිලි නැහැ. කෙසේවෙතත් සෞඛ්‍ය ඇමතිතුමිය එක්ක කොරෝනා වැඩවලට සම්බන්ධ වෙනවා.

 

ඔබට අමාත්‍යධුරය ලබාදීලා සතියක්. දැනට කරන්නේ අමාත්‍යාංශයේ රැස්වීම්වලට සහභාගී වීමද?

දැනට රැස්වීම්වලට යනවා. ඒ අතර අපි විශේෂ වැඩසටහන් සංවිධානය කරනවා. මම ගම්පහ සමාලෝචන රැස්වීමක් සංවිධානය කළා. ඒ ප්‍රදේශයේ තියෙන ගැටලු සහ ප්‍රගතිය බලන්න තමයි ඒ සාකච්ඡාව කැඳෙව්වේ. මට සෞඛ්‍ය අමාත්‍යාංශය නුහුරු තැනක් නෙවෙයි. මහගෙදර ගියා වගේ. අවුරුදු විස්සකට වඩා වැඩ කළා. ගොඩක් නිලධාරීන් මගේ සමකාලීනයන්. මගේ රාජ්‍ය අමාත්‍යාංශ ලේකම්තුමාත් මගේ සමකාලීනයෙක්. දන්න සාත්තරය තමයි කරන්න තියෙන්නේ. දැනට මට අමාත්‍යාංශයේ කාර්යාලයක් නැහැ. චන්න ජයසුමන රාජ්‍ය ඇමතිතුමා එක්ක කාර්යාලය බෙදාගන්නවා. සති දෙකකින් විතර ඔහු වෙනත් කාර්යාලයකට මාරු වෙන බව කීවා.

 

කොවිඞ්-19 පරිපාලනයේ අඩුපාඩු තියෙන බව සමහර අය චෝදනා කළා. විශේෂයෙන් සුදුස්සන්ගෙන් උපදෙස් නොගන්න බව..

මම දෙසැම්බර් 08 වැනිදා මහාචාර්ය තිස්ස විතාරණ ගෙන්වාගෙන උපදෙස් ගත්තා. හිටපු ප්‍රවීණයන් ගෙන්වලා අදහස් ලබාගන්න මම බලාපොරොත්තු වෙනවා. වසංගත මර්දනයට හැමෝගේම උපදෙස් වැදගත් වෙනවා. නිවැරදි දිශාවට යන්න උදව් වෙනවා.

 

කොවිඞ් පිළිබඳ දැන් තියෙන තත්වය ගැන අදහස මොකක්ද?

කොවිඞ් පාලනය අභියෝගයක්. කොවිඞ්-19 ව්‍යාප්ත වෙන්නේ සමාජයේ තියෙන ජනතාවගේ ක්‍රියාකලාපයන් එක්කනේ. අද සමාජයේ කොවිඞ් ගැන බයක් තියෙනවා. මේක බයක් ඇති විය යුතු දෙයක් නෙවෙයි. මේක වළක්වාගැනීම ඉතා වැදගත් වෙනවා. ඒක තමයි පහසුම. ජනතාව දැනුවත් කිරීම, බය තුරන් කිරීම සහ විද්‍යාත්මකව කරන ක්‍රම නැවත හොයලා බලලා සාර්ථක සහ අසාර්ථක ඒවා ගැන බලමින් විද්‍යාත්මක පසුබිමක් තුළ වැඩ කරන්නයි අපි කටයුතු කරගෙන යන්නේ.

 

මේ වසංගතයේ දැනට පවතින තත්වය ගැන අදහස මොකක්ද?

ධනාත්මකව අපට හිතන්න පුළුවන්. අපි බොහෝදුරට පාලනය කරගෙන යනවා. ඒත් තැනින් තැන පුංචි පොකුරු අපි දකිනවා. කොළඹ නගර සීමාව තුළ ජන ගණත්වය වැඩියි. ඒවායේ යම් පැතිරීමක් අපි දකිනවා. මහල් නිවාසවල දැන් තත්වය අඩු වීගෙන යනවා. මහල් නිවාස විවෘත කරන්නේ කොහොමද කියන එක ගැන කාර්යසාධන බලකායේත් කතා වුණා. වරින් වර පුංචි පොකුරු මතුවෙනවා. හැබැයි බස්නාහිර පළාතේ තිබුණ ආරක්ෂාව ගැන අදහස ලිහිල්වෙන බවකුත් පේනවා. විශේෂයෙන් බස්නාහිර පළාතෙන් ඈතට සමහර අය ගිහින් තියෙනවා. ඒකෙන් පැතිරෙන්න ඉඩ තියෙනවා.

ජනතාවගේ පැත්තෙන් සාධාරණ බයක්. කවුරුහරි පීසීආර් කරලා කොරෝනා පොසිටිව් නම් අපි ඉක්මනට එයා නිරෝධායන මධ්‍යස්ථානයකට දානවා. ඒ කොරෝනාවලින් එයා බේරාගන්න. කලින් ආශ්‍රය කරපු අය අරගෙන ගියා. කොහේද ගෙනියන්නේ කියලා දන්නේත් නෑ. එකපාර යන්න කියනවා. ඔය තත්වය නිසා මිනිස්සු බයක් දැක්වුවා. යම් කළමණාකරණ අඩුපාඩු තිබුණා. ඒත් දැන් අපි ඒ කළමණාකරණ ගැටලු නිරාකරණය කරගනිමින් ඉන්නවා. කොවිඞ්-19 තිබුණොත් විතරයි මධ්‍යස්ථානයකට ගෙනියන්නේ. අනෙක් අය ගෙදර තියනවා. දූරකථනවලින් ක්ෂණිකව ඇමතීමේ ක්‍රම තියෙනවා. ඒ අනුව මම තත්වය දකින්නේ ධනාත්මක විදියට.

 

ඒත් දිනකට හත්සීයක් පමණ රෝගීන් වාර්තා වෙනකොට, නැවත වසංගත මර්දනය දිහාට සමාජය යොමු කිරීමේ විශේෂ වැඩපිළිවෙලක් තියෙනවා…

මාධ්‍ය හරහා ජනතාව දැනුවත් කරයි කියලා අපි බලාපොරොත්තු වෙනවා. විශේෂයෙන් මාධ්‍යවලින් ඉඩ දෙන්න ඕනෑ විශේෂඥ වෛද්‍යවරුන්ගේ, එක් එක් ක්ෂේත්‍රවල විශේෂඥ වෛද්‍යවරුන්ගේ කොලීජි තියෙනවානේ. ඒවාට වැඩි ඉඩක් දෙන්න ඕනෑ. අපිත් වැඩි වැඩියෙන් ඒ විද්වත් සංවිධානවල උපදෙස් ගන්න බලාපොරොත්තු වෙනවා. ඒ විශේෂඥ වෛද්‍යවරුන් එක්ක මාධ්‍යවලින් ජනතාවට පණිවිඩ දෙන්න වැඩපිළිවෙලක් කරන්න බලාපොරොත්තු වෙනවා.

 

ඒ විද්වත් ආයතනවලින් අවශ්‍ය තරමට සහයෝගය නොදෙන, රජයේ වෛද්‍ය නිලධාරීන්ගේ සංගමය කියන වෘත්තිය සමිතියට වැඩිපුර සහයෝගය ගත්ත බවට චෝදනා එල්ල වුණා…

ඔව්, අපි අනිවාර්යයෙන් ඉදිරියේදී ඒ විද්වත් ආයතනවලින් උපදෙස් වැඩිපුර ගන්නවා.

 

කොවිඞ්-19 එන්නත ලබාදෙන ආකාරය ගැන සැලසුමක් අමාත්‍යාංශයට තියෙනවාද?

දැනට වැඩපිළිවෙලක් සකස් කරගෙන යනවා. වයස අවුරුදු හැටට වැඩි, වෙනත් සංකූලතා තියෙන අයට දෙනවා. ඉදිරියේදී සෞඛ්‍ය, පොලීසි, හමුදාව වගේ ඉදිරිපෙළ වැඩකරන අයටත් ප්‍රමුඛතාව දෙනවා.

 

ලංකාවට එන්නත ලැබෙන්නේ කවදාද?

ලබන අවුරුද්දේ පෙබරවාරි හෝ මාර්තු විතර වේවි කියලා අපි හිතනවා. අපි මේ වෙනකොට ඉල්ලුම් කරලා, අවශ්‍ය සාකච්ඡා කටයුතු කරමින් ඉන්නවා. එන්නත එන බව කීවාම මිනිස්සු තමන්ගේ පෙර සූදානම ලිහිල් කරනවා. එන්නත ගැන හිතමින් ආරක්ෂාව අමතක කරනවා. ඒත් එන්නත තවම අලුත්. ඒකේ අතුරු ආබාධ ගැන වුණත් බයක් තියෙන්න පුළුවන්. අපි කොහොමත් ආරක්ෂා වෙන එක හොඳයි.

 

ලංකාවේ ඖෂධයක් හොයාගත් බව කියනවානේ. එහෙමනම් එන්නත ඕනෑ නැහැ නේද?

නෑ. කොරෝනා වෛරසයට තවම ඖෂධයක් හොයාගෙන නෑ. එන්නත් තමයි තියෙන්නේ. පෝලියෝ වගේ වෛරස්වලට මීට කලින් ප්‍රතිකර්මය වුණේ එන්නත්. දැන් ඖෂධයක් නම් හරියට පර්යේෂණ කරලයි හොයාගන්න ඕනෑ.

මුලින්ම විද්‍යාගාර පර්යේෂණ කරන්න ඕනෑ. ඊට පස්සේ සත්තුන්ට දෙනවා. ඊට පස්සේ කොපමණ ප්‍රමාණයක් ලබාදිය යුතුද වගේ කරුණු ගැන තීන්දු ගන්නවා. වාර ගණන මොකක්ද වගේ දේවල් බලනවා. මිනිසුන්ටත් පරීක්ෂණ කරන්නේ අදියර තුනකින්. ඒ අය තෝරාගෙන, සුදුසු කාටද කියලා හොයාගන්න ඕනෑ. ඒ විද්‍යාත්මක ප්‍රතිඵල ආවාට පස්සේ තමයි හොඳ, නරක කියන්න ඕනෑ. විද්‍යාත්මක පදනමක් නැතුව ජනතාව තුළ බේතක් ගැන විශ්වාසයක් හදන්න හොඳ නෑ. මේ බේත හොඳයි කියන්න බෑ.

 

මාධ්‍යවලත්, ආණ්ඩුවේ ඉන්න අයත් මේක ප්‍රවර්ධනය කළොත්…

අනිවාර්යයෙන් එහෙම වුණොත් මිනිස්සු වැළැක්වීමේ පියවර නොගෙන ඒවා බිබී ඉඳියි. නිසි ආරක්ෂාවක් නැතිව ඔය බෙහෙත් ගන්න පොරකාලා, මිනිස්සු මැරෙනකල් හොයන්න බැරිවේවි. කැමති අය මේක පාවිච්චි කළාට කමක් නෑ. ඒක කැමැත්ත. ඒත් අනිවාර්යයෙන් මුඛ ආවරණයක් පළඳින්න, අත හෝදන්න, මීටරයේ දුර තියාගන්න.

 

සීයට සීයක් සාර්ථක බවට වචනය කීවාම බයක් නැති වෙනවා…

දැන් කියනවානේ බිව්වොත් ජීවිත කාලෙටම හැදෙන්නේ නෑ කියලා. දැන් මේ එන්නත ගෙනාවත් අවුරුද්දකට විතරයි ආරක්ෂාව ලැබෙන්නේ.■