රජයෙන් නීත්‍යනුකූලව අවසර ලබාදී ඇති මත්පැන් සම්බන්ධයෙන් මිල වැඩි කිරීම හැර වෙනත් තීන්දු තීරණ ගැනීමේදී බොහෝ විට සමාජයෙන් එල්ල වන්නේ බලවත් විරෝධයකි. එය නීත්‍යනුකූල ද්‍රව්‍යයක් හෝ සමහරුන්ට අත්‍යවශ්‍ය ද්‍රව්‍යයක් හෝ යන්න මේ විරෝධතා එල්ල කරන්නෝ අමතක කරති.

මත්පැන් අලෙවි කිරීම සම්බන්ධයෙන් කාන්තාවන්ට ඇති සීමා ඉවත් කිරීමට මීට පෙර යහපාලන ආණ්ඩු සමයේදී දැරූ වෙනස්කොට නොසැලකීමේ උත්සාහයටද බලවත් විරෝධයක් එල්ලවීම හේතුවෙන් එය හකුලා ගන්නට සිදුවිය. අප මීට පෙරද ලියා ඇති පරිදි මත්පැන් යනු රටේ කුටුම්බ ඒකකවල ජීවන මිල ගණනය කිරීමේ කූඩය තුළ ඇති ද්‍රව්‍යයකි. සමහර කුටුම්බයකට මත්පැන් වියදමක් නැතිවා වුවත් කුටුම්බයක් තුළ මාසික වියදමේ මත්පැන්වලට වෙන්වන ගණනක් තිබේ.

මේ කතා නැවත මතක් කරන්නට සිදුවූයේ ලොක් ඩවුන් කාලසීමාවේ ඔන්ලයින් ක්‍රමයට මත්පැන් ලබා ගැනීමට එරෙහිව ආ බලවත් විරෝධය නිසාය.

ලොක්ඩවුන් සමයේ ඔන්ලයින් ක්‍රමයට මත්පැන් බෙදා හැරීම සඳහා සුරාබදු දෙපාර්තමේන්තුවට ලැබුණ ඉල්ලීමක් එම දෙපාර්තමේන්තුවේ නිරීක්ෂණද සමඟ මුදල් අමාත්‍යාංශයට යොමු කරන ලද අතර ඒ සඳහා මුදල් අමාත්‍යාංශයේ අනුමැතිය ලැබුණි. එහෙත් එම අනුමැතිය කොවිඩ් 19 මර්දන කමිටුවට යොමු කිරීමෙන් පසු ඔවුන් එයට අවසර නොදෙන බව එම කමිටුවේ ප්‍රධානි යුද හමුදාපති හා ආරක්ෂක මාණ්ඩලික ප්‍රධානි ජෙනරාල් ශවේන්ද්‍ර සිල්වා නිවේදනය කළේය.

මත්පැන් ඔන්ලයින් ක්‍රමයට ලබාදීමේ සුරාබදු දෙපාර්තමේන්තු හා මුදල් අමාත්‍යාංශ අනුමැතීන් ලැබුණ විට වෛද්‍ය සංගම් මෙන්ම වෙනත් සංගම් හා පුද්ගලයෝද එයට විරෝධය පළකරන්නට වූහ. එම විරෝධය පළකළ පිරිස අතර විශේෂම පිරිස වූයේ බලපත්‍රලාභී මත්පැන් අලෙවි කරන්නන්ගේ සංගමයයි. එම සංගමය මෙම තීරණයට විරෝධය පළකළේ මේ මගින් අවුරුදු 21ට අඩු අයට පවා ඇණවුම්කර මත්පැන් ලබාගත හැකි යන ව්‍යාජ මහා සත් හේතුවක්ද පෙන්වා දෙමිනි. දැනටත් මත්පැන් මිලදී ගැනීමට සහ යම් ස්ථානයකට බීමට ගිය විට වැඩිහිටියන්ට පමණක් අවසර ඇති චිත්‍රපටි බැලීමට යෑමේදී කළ ආකාරයේ තරම්වත් වයස පිළිබඳ පරීක්‍ෂාවක් කිරීමට උත්සාහ ගන්නා අයුරක් දක්නට නොලැබේ.

බලපත්‍රධාරී මත්පැන් අලෙවි කරන්නන්ගේ සංගමයේ මේ විරෝධයේ ඇත්ත වූයේ ඔවුන්ට නොලැබෙන අවස්ථාවක් මත්පැන් ඔන්ලයින් අලෙවියේදී සුපිරි වෙළඳසැල් ජාලයට ලැබීමය. ලොක්ඩවුන් සමයේදී ඔන්ලයින් ලෙස ඇණවුම්කර අනෙක් පාරිභෝගික භාණ්ඩ හා ද්‍රව්‍ය ලබාගත හැකි විය. සුපිරි වෙළඳසැල්වලට තිබෙන එම වාසිය අපට නැති හෙයින් එම පහසුකම නවතන ලෙස සිල්ලර හා අනෙකුත් වෙළඳසැල් උද්ඝෝෂණය කිරීමට හා විරුද්ධ වීමට පටන් ගත්තේ නම් එම පහසුකම සලසා ගතහැකි පාරිභෝගිකයන්ට එය අහිමි වනු ඇත. ඇත්ත වශයෙන්ම බලපත්‍රලාභී මත්පැන් අලෙවිකරුවන්ගේ විරෝධය ආවේ පසුගිය ලොක්ඩවුන් සමයේදී සුපිරි වෙළඳසැල්වලට පමණක් මත්පැන් වෙළඳාමට අවසර දීමේ තීන්දුවටය. අප සලකා බැලිය යුත්තේ පාරිභෝගිකයන්ට යමක් මිලදී ගැනීමට ඇති අවස්ථාව සම්බන්ධයෙන් මිස එය නවතා දමන පැත්තෙන් නොවේ. මත්පැන් සම්බන්ධයෙන් යථාර්ථයද විය යුත්තේ එයය. එම පහසුකම ලබාගත හැකි අයට ලබා ගැනීමට ඉඩදිය යුතුය.

මුලින් සඳහන් කළ ආකාරයටම මත්පැන් නිවසක මාසික පරිභෝජන ලැයිස්තුවේ තිබේ නම් වෙනත් ද්‍රව්‍ය ඔන්ලයින් ගෙන්වා ගැනීමට තිබියදී මත්පැන්වලට පමණක් තහනමක් ඇයිද යන්න ප්‍රශ්නයකි.

රටම ලොක් ඩවුන් සමයේදී නීත්‍යනුකූල මත්පැන් තහනමක් තිබියදී යළි හිස එසවූයේ නීති විරෝධී මත්පැන්ය. එක් අතකින් ප්‍රමිතියෙන් බාල එය නීත්‍යනුකූල මත්පැන්වලටත් වඩා ශරීර සෞඛ්‍යට අහිතකරය. අනෙක් අතට ඒ මගින් රජයට බදු ආදායමක්ද ලැබෙන්නේ නැත. එහෙත් තරු පන්තියේ හෝටල්වලට යා හැකි අයට නම් විදේශීය සංචාරකයන්ට ලබාදීමට අවසර ඇති ලේබලය යටතේ එම කාලයේ මත්පැන් ලබා ගැනීමේ හැකියාව තිබුණි. සංචාරක මණ්ඩලයේ 1 මට්ටමේ අනුමැතිය ලත් තරු නොවන මට්ටමේ ගෙස්ට් හවුස් වැනි ස්ථානවලටද එම ලේබලය යටතේ මත්පැන් ලබාදීමට අවසර තිබුණි.

එපමණක් නොව මත්පැන් ඔන්ලයින් ක්‍රමයේ මහා පාප කර්මයට අවසර ලබාදීමට නොහැකි යැයි කී ශවේන්ද්‍ර සිල්වා නායකත්වය දෙන යුද හමුදාව තුළ මෙන්ම අනෙකුත් හමුදා හා පොලීසිය තුළද මත්පැන් තහනම් නැත. මත්පැන් විකිණීමට සුරාබදු දෙපාර්තමේන්තුවෙන් අවසර ලබාගත යුතුද නැත. එය සුරාබදු ආඥා පනතේ දැක්වෙන්නේ මේ ආකාරයටය.‘යුද හමුදා හෝ නාවික නියෝග යටතේ විවෘත කොට පවත්වාගෙන යනු ලබන එමෙන්ම හමුදා හෝ නාවික නිලධාරීන්ගේ අධීක්ෂණය යටතේ පවත්වාගෙන යනු ලබන ආපන ශාලා, වෙළඳහල් හෝ තැබෑරුම් උදෙසා මේ ආඥා පනතේ කිසිදු විධිවිධානයක් අදාළ නොවන්නේය’. ත්‍රිවිධ හමුදාවට හා පොලීසියට ඕනෑම මත්පැන් නිෂ්පාදකයකුගෙන්, තොග අලෙවිකරුවකුගෙන්, බෙදාහරින්නකුගෙන් හෝ සිල්ලර අලෙවිකරුවකුගෙන් බලපත්‍රයක් නොමැතිව ඔවුන්ට අවශ්‍ය ප්‍රමාණයට මත්පැන් ලබා ගැනීමේ අවසරය තිබේ.
මීටත් අමතරව මේ හමුදා කඳවුරු තුළ පවත්වාගෙන යන ආපන ශාලා හෝ තැබෑරුම් සඳහා අවශ්‍ය මත්පැන් ප්‍රවාහනය සඳහා වූ බලපත්‍ර කොන්දේසියෙන්ද ඔවුන්ව මුදා හැරීම සුරාබදු දෙපාර්තමේන්තුව පසුගිය කාලයේ කළේය.

සුරාබදු දෙපාර්තමේන්තුවේ මාධ්‍ය ප්‍රකාශක සුරාබදු කොමසාරිස් කපිල කුමාරසිංහගෙන් මෙම කරුණු ගැන වැඩිදුරටත් කළ විමසීමේදී ඔහු කීවේ සුරාබදු පනත තුළ ගුවන් හමුදාව හා පොලීසිය සම්බන්ධයෙන් සඳහනක් නැතත් එම ස්ථාන සම්බන්ධයෙන්ද බලපාන්නේ යුද හා නාවික හමුදාවන්ට අදාළ තත්වයන් බවය.

ඒ අනුව ලොක් ඩවුන් සමයේ පවා මත්පැන් සම්බන්ධයෙන් එක රටේ නීති දෙකක් පවතින බව පෙනේ. එම නීති දෙකෙන් එකක වරප්‍රසාද ලබන යුද හමුදාපති ශවේන්ද්‍ර සිල්වා, වරප්‍රසාද අහිමි කොටසට එම වරප්‍රසාදය ලබාදීමට යන විට විරුද්ධ වී එම වරප්‍රසාදය භුක්ති විඳීම සදාචාරද යන ප්‍රශ්නය පැන නඟී. එය තවදුරටත් අපට ඔප්පු කළේ ලොක්ඩවුන් සමයේ අනුරාධපුර සතොස මත්පැන් හල විවෘත කරගෙන හමුදාව ඔවුන්ගේ පරිභෝජනය සඳහා මත්පැන් රැගෙන යෑමය.■