රනිල් වික්‍රමසිංහ පාර්ශ්වය, සජිත් ප්‍රේමදාස පාර්ශ්වය සහ රවී කරුණානායක පාර්ශ්වය අතර එජාපය තුළ ගොඩනැගී තිබෙන සීතල යුද්ධය නිසා එක්සත් ජාතික පක්ෂය ප්‍රමුඛව ඉදිරියේදී ගොඩනගනවා යැයි කියූ පුළුල් දේශපාලන පෙරමුණ ගොඩනොනැගෙන තත්ත්වයක් උදාවී ඇතැයි අනිද්දා වෙත වාර්තා වේ.
සජිත් ප්‍රේමදාස පාර්ශ්වය සහ රවී කරුණානායක පාර්ශ්වය අලියා ලකුණ සහ එක්සත් ජාතික පෙරමුණ යන නාමය වෙනස් වෙනවාට සිය විරෝධය දැක්වා ඇත. එහෙත් රනිල් වික්‍රමසිංහ පාර්ශ්වයේ අදහස වී ඇත්තේ ඉදිරි මැතිවරණ ජයග්‍රහණය කිරීමට නම් මෙම පුළුල් සන්ධානය අවශ්‍ය බවය. මෙහිදී සජිත් ප්‍රේමදාස පාර්ශ්වයේ අදහස වී ඇත්තේ ඡන්ද පදනමක් නොමැති සුළු පක්ෂ සමග සන්ධාන ගතවීමෙන් එජාප පාක්ෂිකයාට අසාධාරණයක් සිදුවන බවය.
මේ අතර ඉදිරි ජනාධිපතිවරණයකදී එක්සත් ජාතික පෙරමුණේ අපේක්ෂකයා කරූ ජයසූරිය විය යුතු බවට එක්සත් ජාතික පක්ෂය තුළ රවී කරුණානායක පාර්ශ්වය මතයක් නිර්මාණය කරමින් සිටින බවද වාර්තා වෙයි. මේ සියලු‍ තත්ත්වයන් සමග එජාපය තුළ බරපතළ තත්ත්වයක් නිර්මාණය වී ඇතැයි දැනගන්නට ලැබේ.■

මංජු කස්තුරිආරච්චි