උසාවියෙන් කට්ටි පැනීමට ඉහළ අධිකරණවලින් නියෝග රැුගෙන ගිනස් වාර්තාවක් තැබීමේ බලාපොරොත්තුවක් ඇති කෙනෙකු මෙන් එක දිගට අධිකරණ නියෝග ගන්නා ගෝඨාභය රාජපක්ෂ මහතාගේ වාර්තා පොතට තවත් අභියාචනාධිකරණ නියෝගයක් පසුගිය සතියේ එක්වී තිබුණි. ඒ නියෝගය ගෙන තිබුණේ ජන අරගල ව්‍යාපාරයේ ක‍්‍රියාකාරිකයන්ව සිටි (ජන අරගල ව්‍යාපාරය පසුව පෙරටුගාමී සමාජවාදී පක්ෂය විය.* ලලිත් කුමාර් වීරරාජ් හා කූගන් මුරුගානන්දන් අතුරුදන් කිරීමට අදාළ විමර්ශනය සඳහා යාපනය මහේස්ත‍්‍රාත් අධිකරණය ඉදිරියේ පෙනී සිටින ලෙස හිටපු ආරක්ෂක අමාත්‍යාංශ ලේකම්වරයා වන ගෝඨාභය රාජපක්ෂ මහතාට යාපනය අධිකරණය ලබාදී ඇති නියෝගයට එරෙහිවය. ලලිත් හා කූගන් අතුරුදහන් කිරීම සම්බන්ධයෙන් අභියාචනාධිකරණය ඉදිරියේ විභාග වන හේබියස් කෝපුස් නඩුවේ සාක්‍ෂි විභාගය පැවැත්වෙන්නේ යාපනය මහේස්ත‍්‍රාත් අධිකරණයේය.


අභියාචනාධිකරණය ඉදිරියේ පෙත්සමක් ගොනු කරමින් ගෝඨාභය රාජපක්ෂ මහතා කියා තිබුණේ ලලිත් සහ කූගන් දෙදෙනා අතුරුදහන්වීම සම්බන්ධයෙන් යාපනය අධිකරණයේ ගොනු කර ඇති නඩුවට අදාළව සාක්ෂි දීම සඳහා තමාට සැප්තැම්බර් මස 27 වන දින යාපනය මහේස්ත‍්‍රාත් අධිකරණය හමුවේ පෙනී සිටින ලෙස දන්වා සිතාසි නිකුත් කර ඇති බවත්, ආරක්ෂක හේතුන් මත තමාට යාපනයේ අධිකරණය හමුවට ගොස් සාක්ෂි දීමට නොහැකි තත්වයක් උද්ගතව ඇති බවත්ය. පෙත්සමේ සඳහන් වන්නේ උතුරු නැගෙනහිර ප‍්‍රදේශ හැර වෙනත් ප‍්‍රදේශයක ඇති ඕනෑම අධිකරණයක සාක්ෂි දීම සඳහා තමා සූදානම් බවය.


ගෝඨාභය රාජපක්ෂ උතුරු නැගෙනහිර තමන්ට ආරක්ෂාවක් නැතැයි කියා තිබුණේ යුද්ධයට තමාගේ මැදිහත්වීම නිසාය. ඔහුට උතුරු නැගෙනහිර ප‍්‍රදේශ අනාරක්ෂිත බව ඔහු කියා තිබුණි. පසුගිය සතියේ සිංහල පුවත්පත් සමහරක පළකළ ප‍්‍රවෘත්තියකින් කියවුණේ ගෝඨාභය නඩුවේ සාක්‍ෂි දීම සඳහා යාපනයට යෑම ඔහුගේ ආරක්‍ෂාවට තර්ජනයක් බව ‘බුද්ධි අංශ’ පවසන බවයි. මේ ප‍්‍රවෘත්ති අධිකරණයේ තීරණයට බලපෑමක් වන ලෙස ‘අතින් පැළ කළ’ ප‍්‍රවෘත්ති බව කියන්නට අප ඉක්මන් වන්නේ නැත. එහෙත්, ගෝඨාභයගේ මේ ඉල්ලීම සමග කිසියම් සමගාමීත්වයක් ඒ ප‍්‍රවෘත්තිවල තිබෙන බව නම් අපට පෙනේ.


මේ වෙද්දී ලංකාවේ ජනාධිපතිධුරය බලාපොරොත්තු වන අපේක්ෂකයෙකු වන ගෝඨාභය රාජපක්ෂ උතුරට යෑමට නොහැකි බව කීම අප කියවාගත යුත්තේ කෙසේද? ලංකාවේ පළාත් දෙකකට යන්නට බයක් දක්වන පුද්ගලයෙකුට ජනාධිපතිධුරය ලබාදිය හැකිද?


තේ කොළ වර්ග කිහිපයක අසාත්මිකතාවක් තිබෙන කෙනෙකුට තේ රස පරීක්ෂකයෙකු විය නොහැකිය. මිදි වර්ග අසාත්මික නම් වයින් රස පරීක්ෂකයෙකු විය නොහැකිය. එහෙම අසාත්මිකතාවන් තිබේ නම් වෙනත් රැුකියාවක් ගැන කල්පනා කළ යුතුය. රටෙන් පැත්තක් අසාත්මික නම් ජනාධිපතිධුරයක් බලාපොරොත්තු නොවිය යුතුය.


කරුණු කෙසේවෙතත් අභියාචනාධිකරණය සැප්තැම්බර් 24 දින ගෝඨාභය රාජපක්ෂ මහතා බලාපොරොත්තු වූ අතුරු තහනම් නියෝගය නිකුත් කර තිබුණි. රජයේ නීතිඥයාද එම නියෝගයට විරෝධය පළ නොකරන බව කියා තිබුණි. මේ පෙත්සම දෙසැම්බර් 3 වැනිදා යළි කැඳවීමට නියමිතය. නොවැම්බර් 16 වැනිදා ජනාධිපතිවරණය පැවැත්වීමට නියමිතය. නැවත මෙම පෙත්සම කැඳවද්දී ජනාධිපතිවරණය අවසන්ය.


අප විමසිල්ලෙන් බලා සිටිය යුතු එක් කාරණයක් ඇත. ඒ, ගෝඨාභය රාජපක්ෂ මහතා ඉදිරි කාල සීමාව ඇතුළත මැතිවරණ ප‍්‍රචාරණ කටයුතු වෙනුවෙන් උතුරට යනවාද නැද්ද යන කාරණයයි. එසේ නොගියොත් ගෝඨාභය රාජපක්ෂ මහතාගේ මැතිවරණ ව්‍යාපාරයෙහි නිරුවත් ජාතිවාදී ස්වභාවය හෙළිවෙයි. දෙමළ, මුස්ලිම් බහුතරයක් වෙසෙන උතුරු නැගෙනහිර ප‍්‍රදේශවල මැතිවරණ ප‍්‍රචාරණය කරන්නට ඔහුගේ කැමැත්තක් නැති බව එයින් හෙළිවනු ඇත. එපමණක් නොවේ, තමන්ට දෙමළ මිනිසුන් අතරේ ආරක්‍ෂාවක් නැති බව පෙන්වීමෙන් ඔහු සිංහලයන්ගේ ජාතිවාදී මනසට ආමන්ත‍්‍රණය කර ඡුන්ද කඩාගැනීමේ උත්සාහයක යෙදෙන බවද එයින් පැහැදිලිව පෙනේ.


ඔහු උතුරු නැගෙනහිර ප‍්‍රචාරණ කටයුතුවලට සහභාගි වුණොත් හෙළිවෙන්නේ, ගෝඨාභය රාජපක්ෂ මහතා ලලිත්-කූගන් අතුරුදන් කරවීමේ සිදුවීමට අදාළව අධිකරණය මඟහැරීමේ අරමුණෙන් බොරු කියා ඇති බවය. උතුරු නැගෙනහිර තමන්ට ආරක්ෂාවක් නැතැයි ගෝඨාභය රාජපක්ෂ කීවේ බොරුවට බවය.


ගෝඨාභය රාජපක්ෂලා යාපනයේ ත‍්‍රස්තවාදය අවසන් කළ බවත්, දැන් නිදහසේ රටේ ඕනෑ කෙළවරකට යා හැකි බවත් කියන රාජපක්ෂ පිළේ කයිවාරු අපට අසන්නට ලැබෙයි. අභියාචනාධිකරණයට ඔහු ඉදිරිපත් කළ මේ පෙත්සමෙන් කියන්නේ තමන් ත‍්‍රස්තවාදය අවසන් නොකළ බවද? රටේ ඕනෑ කෙළවරකට යන්නට නිදහසක් නැති බවද?


ගෝඨාභය දැන් උතුරු නැගෙනහිරට යන්නට බය බව කීමම එක්තරා විදියකට උත්ප‍්‍රාසජනක කතාවක් ලෙසත් ගත හැකිය. ඔහු ආරක්ෂක අමාත්‍යාංශ ලේකම්වරයාව සිටි කාලයේ උතුරු නැගෙනහිරට ගමන් කිරීම බියජනක අත්දැකීමක් වුණේ වෙනත් පිරිසකටය. ඒ රාජපක්ෂවරුන්ගේ න්‍යාය පත‍්‍රවලට පිටින් දේශපාලනය කළ ක‍්‍රියාකාරිකයන්ටය. ඇත්ත සෙවූ මාධ්‍යවේදීන්ටද උතුරේ යෑම අතුරේ යෑම අනාරක්ෂිත විය. ලලිත් හා කූගන් යන දෙදෙනා ඒ අවදානම නොතකා උතුරේ ක‍්‍රියාකාරී වූ සුළුතරයක් අතර සිටී. ඔවුන්ට අත්වුණු ඉරණම ‘අතුරුදන් වීම’යි.


ඔවුන් 2011 දෙසැම්බර් 9 වැනිදා අතුරුදන් කර තිබුණි. ඒ, අතුරුදන් වූ පුද්ගලයන් සොයාදෙන මෙන් රජයට බල කරමින් මානව හිමිකම් දිනය වෙනුවෙන් මාධ්‍ය හමුවක් සංවිධානය කරමින් සිටි අතරේය. ලලිත් සහ කූගන්ගේ පවුලේ සාමාජිකයන් පැවසුවේ සුදු වෑන් රථයකින් පැමිණි පිරිසක් මොවුන් පැහැරගෙන ගිය බවට තමන්ට දැනගන්නට ලැබුණු බවය. සිද්ධියෙන් පසුව ලලිත් සහ කූගන් දෙදෙනා ගමන් ගත් යතුරු පැදිය කෝපායි පොලීසීයේ තිබී හමුවිය.


ලලිත් කූගන් පැහැරගැනීමෙන් අනතුරුව එකල කැබිනට් මාධ්‍ය ප‍්‍රකාශක කෙහෙළිය රඹුක්වැල්ල මහතා දෙසැම්බර් 15 දින පැවති කැබිනට් තීරණ දැනුම්දීමේ මාධ්‍ය හමුවේදී පවසා තිබුණේ, ලලිත් හා කූගන් අතුරුදන් වී නැති බවයි. ඔවුන් අත්අඩංගුවේ සිටින බව ඔහු කියා තිබුණි. එය එවකට රජයේ නිල ප‍්‍රකාශකයාගේ කතාවකි. අතුරුදන් කිරීම ආණ්ඩුවේ ක‍්‍රියාවක් බව තේරුම් ගන්නට එයම ප‍්‍රමාණවත්ය. ඒ අනුව ආරක්ෂක අංශ මේ දෙදෙනා අතුරුදන් කරවීමට අදාළ ප‍්‍රධාන භූමිකාවක් ඉටුකළ බවට සැක කරන්නට සිදුවෙයි. 2016 මැයි 13 වැනිදා යාපනය මහේස්ත‍්‍රාත් අධිකරණය ඉදිරියේ සාක්ෂි දෙමින් කෙහෙළිය රඹුක්වැල්ල මහතා කියා තිබුණේ ඔහු එවන් ප‍්‍රකාශ කරන්නේ ආරක්ෂක මණ්ඩලයෙන් විමසීමෙන් පසුව වන නිසා, ඔවුන්ගේ උපදෙස් මත නිසා මේ ප‍්‍රකාශයද එවන් ප‍්‍රකාශයක් බවයි.


ලලිත්-කූගන් අතුරුදන් කරවීමට අදාළව සීඅයිඞී පරීක්ෂණ කළේ නැත. නීතිපති දෙපාර්තමේන්තුවෙන් නඩු පැවරුවේ නැත. දැන් යාපනය මහේස්ත‍්‍රාත් අධිකරණයේ ක‍්‍රියාත්මක වන නඩුව පෙරටුගාමී සමාජවාදී පක්ෂය අභියාචනාධිකරණයට හේබියස් කෝපුස් පෙත්සමක් ඉදිරිපත් කරමින් ආරම්භ කළ නඩුවකි. හේබියස් කෝපුස් පෙත්සමට අදාළව අභියාචනාධිකරණය යාපනය මහේස්ත‍්‍රාත් උසාවියට නියෝග කර ඇත්තේ රජය ලලිත් හා කූගන් රඳවාගෙන සිටිනවාදැයි සොයා බැලීමට මහේස්ත‍්‍රාත් විමර්ශනයක් කරන ලෙසයි. වසර ගණනක් පුරා මේ ඇදී ආවේ ඒ නඩු විභාගයයි.


ලලිත්-කූගන් අත්අඩංගුවේ සිටින බව කියා තිබුණු ආරක්ෂක මණ්ඩලයේ ප‍්‍රධානීන්ගෙන් ප‍්‍රශ්න කිරීම මෙම නඩුව ඉදිරියට ගෙනයෑමට නම් අනිවාර්යයෙන්ම කළ යුතුය. ගෝඨාභය රාජපක්ෂ යනු එකල ආරක්ෂක මණ්ඩලය සම්පූර්ණයෙන්ම පාහේ මෙහෙයවූ පුද්ගලයා බව නොරහසකි. ඉතින්, ඔහුගෙන් කරුණු විමසීම අත්‍යවශ්‍ය කටයුත්තකි. එහෙත් අධිකරණයකට ගොස් තමන්ගේ නිර්දෝෂීභාවය ඔප්පු කිරීමේ හැකියාවක් නැති ගෝඨාභය රාජපක්ෂ මහතා, තමන්ගෙන් පළිගන්නවායැයි කියමින් මේ නඩුවද මඟහැරීමට පියවර ගනිමින් සිටියි.