බලපත්‍ර නැති අලි පැටවකු සන්තකයේ තබාගෙන සිටීම සම්බන්ධයෙන් උඩුවේ ධම්මාලෝක හිමියනට එරෙහිව කොළඹ මහාධිකරණය ඉදිරියේ පැවැති නඩුවේ තීන්දුවට විරුද්ධව ඉහළ අධිකරණයට අභියාචනයක් ඉදිරිපත් කිරීමට නීතිපතිවරයා සුදානම් වූ නමුත්, ආණ්ඩුවේ ඉහළින්ම ආ බලපෑම් නිසා අභියාචනා කිරීම අතහැර දමා ඇතැ’යි වාර්තා වෙයි.

මාර්තු 1 වැනිදා, ධම්මාලෝක හිමියන් නිදොස් කර නිදහස් කරමින් මහාධිකරණ විනිසුරු සම්පත් විජේරත්න තීන්දුව දුන් අවස්ථාවේ, දෙපාර්තමේන්තුවේ ඉහළ නිලධාරීන්ගේ උපදෙස් මත එම තීන්දුවට එරෙහිව අභියාචනා කිරීමට බලාපොරොත්තු වන බව නීතිපතිවරයා වෙනුවෙන් රජයේ අධිනීතිඥ ජනක බන්ඩාර අධිකරණයට දැනුම් දුන්නේය.

නීතිපතිවරයා මහාධිකරණ තීන්දුවකට එරෙහිව අභියාචනයක් කරන විට, එය ගොනු කිරීම සඳහා දින 28ක කාලයක් ලැබෙන අතර, එම කාලය ලබන සතිය වන විට අවසාන වීමට නියමිතය. එහෙත්, නීතිපති දෙපාර්තමේන්තුවේ අපේ ආරංචි මාර්ග කියන්නේ, අභියාචනයක් කිරීමට නීතිපතිවරයා කැමැත්තක් නොදක්වන බවයි. ඊට හේතුව ආණ්ඩුවේ ඉහළම තැනකින් ඔහුට  කරන ලද බලපෑම බව ද දැනගන්නට තිබේ.

අලි පැටවාගේ සන්තකය උඩුවේ ධම්මාලෝක හිමියන් වෙතම තිබුණු බවට, සාධාරණ සැකයෙන් තොරව පැමිණිල්ල විසින් ඔප්පු කර නැති බව යන පදනම මත සිට මහාධිකරණ විනිසුරුවරයා තීන්දුව දී තිබුණු අතර, අලි පැටවකුගේ සන්තකය සම්බන්ධයෙන් මත්ද්‍රව්‍ය වැනි නීති විරෝධී, ප්‍රමාණයෙන් කුඩා දෙයක් සන්තකයේ තබාගැනීමට අදාළ අනුමිතීන් භාවිත කිරීම සුදුසු නොවන බව පැමිණිල්ලේ මතය විය.

කෙසේ වෙතත්,  අලි පැටවා වැනි ප්‍රමාණයෙන් විශාල සත්වයකුගේ සන්තකය පිළිබඳව මහාධිකරණ විනිසුරුවරයාගේ තීරණය සම්බන්ධයෙන්, අභියාචනාධිකරණයෙන් පැහැදිලි කිරීමක් ලබාගැනීමට තිබුණු අගනා අවස්ථාවද, නීතිපතිවරයා මෙලෙස අභියාචනා කිරීම අතහැර දැමීම නිසා මගහැරෙයි.

උඩුවේ ධම්මාලෝක හිමියන්ගේ නඩුව සම්බන්ධයෙන් ජනාධිපති මෛත්‍රීපාල සිරිසේන මීට පෙර දිගින් දිගටම පෞද්ගලිකව මැදිහත් වුණු අතර, රිමාන්ඞ් බන්ධනාගාර ගත කළ විට, ඒ හිමියන්ගේ අනුදැනුමකින් තොරව පවා නීතිඥයන් ඉදිරිපත් කර ඇප ලබා ගැනීමට පෞද්ගලිකවම මැදිහත් වුණේද ජනාධිපති සිරිසේන ය. ■

අරුණ ජයවර්ධන