1896 විලියම් ජේ. මෝගන් මහතා විසින් ඇමෙරිකාවේදී මෙලොවට බිහිකළ වොලිබෝල් ක‍්‍රීඩාව, වසර 20ක ඇවෑමෙන්, කොළඹ තරුණ ක‍්‍රිස්තියානි සංගමයේ ශාරීරික අධ්‍යාපන අධ්‍යක්ෂවරයා ලෙස කටයුතු කළ ඇමෙරිකානු ජාතිකයෙකුම වූ වොල්ටර් ජේ. කැමැක් මහතා විසින් මෙරට රෝපණය කරන ලදි.


එදා 1916 වර්ෂයේ පුංචි පැළයක් ලෙස කොළඹ කොටුවෙන් ආරම්භ වූ වොලිබෝල් ක‍්‍රීඩාව අද ගම් නියම්ගම් පුරා පැතිරුණු දැවැන්ත වෘක්ෂයක් වී ශ‍්‍රී ලංකාවේ ක‍්‍රිඩා ක්ෂේත‍්‍රය පුරා පැතිර සිටියි. එදා මෙදා තුර ශ‍්‍රී ලංකාවේ වොලිබෝල් ක‍්‍රීඩාවේ ප‍්‍රගමනයට උරදුන් ක‍්‍රීඩක ක‍්‍රීඩිකාවන්, නිලධාරීන් මෙන්ම පේ‍්‍රක්ෂකයන්ද ලක්ෂ ගණනකි.


ශ‍්‍රී ලංකාවේ වොලිබෝල් ක‍්‍රීඩා ක්ෂේත‍්‍රයේ නොමැකෙන මතක සටහන් එක් කළ වර්ෂයක් ලෙස 1970 වර්ෂය සඳහන් කළ හැක. ඒ ශ‍්‍රී ලංකාව පමණක් නොව ඉන්දියානු උපමහද්වීපයේද වොලිබෝල් දැවැන්තයන් වූ ඉන්දියානු කාන්තා වොලිබෝල් ක‍්‍රීඩිකාවන් දණගැස්වූ අපේ කෙල්ලන් නිසාය. 1970 මාර්තු මස 05 වන දින සිට 20 දක්වා ඉන්දියාව පුරා පැවැති තරග පහකින් සමන්විත වූ ටෙස්ට් තරගාවලිය 4:1ක් ලෙස විශිෂ්ට ජයග‍්‍රහණයක් ලබාගැනීමට නන්දා ගණේගොඩගේ නායකත්වයෙන් යුත් ශ‍්‍රී ලංකා ජාතික කාන්තා වොලිබෝල් කණ්ඩායම සමත් විය. මෙම කණ්ඩායම එදා මෙදා තුර ශ‍්‍රී ලංකාවේ බිහිවූ දක්ෂතම කාන්තා වොලිබෝල් කණ්ඩායම ලෙස හැඳින්වීම අතිශයෝක්තියක් නොවේ.


ශ‍්‍රී ලංකා ජාතික වොලිබෝල් කණ්ඩායම පාසල් සිසුවියන් 7 දෙනෙකුගෙන් සමන්විත වූ අතර පාසල් වයස පසුකර සිටි ක‍්‍රීඩිකාවන් වූයේ, කොළොන්නාව සෙන්ට‍්‍රල් නියෝජනය කළ නන්දා ගණේගොඩ, විජිතා පෙරේරා, කොළඹ නගර සභාව නියෝජය කළ යසවතී අලහකෝන් සහ කණ්ඩායමේ උපනායක ලෙස කටයුතු කළ ශ‍්‍රී ලංකා පොලිසියේ ලතා ලියනගේය. මෙම කණ්ඩායම පාසල් ක‍්‍රීඩිකාවන්ගෙන් සමන්විත වුවද ජාතික කණ්ඩායමකට සුදුසු සියලූම පරිණතභාවයන්ගෙන් සමන්විත විය. මේ වන විට 1952 වර්ෂයේ කාන්තා ලෝක කුසලාන තරගාවලියේ හත්වන ස්ථානය දිනාසිටි ඉන්දිය කණ්ඩායම දිගින් දිගටම ආසියානු තරගාවලිය නියෝජනය කරමින් ආසියානු කලාපයේ ප‍්‍රබලම කණ්ඩායමක් ලෙස නම් දරා සිටියේය. ශ‍්‍රී ලංකාව හා ඉන්දියාව අතර මෙම ටෙස්ට් තරගාවලිය ආරම්භවීමට ප‍්‍රථම ඉන්දියාවේ හා ශ‍්‍රී ලංකාවේ වොලිබෝල් විචාරකයන්ගේ මතය වී තිබුණේ ඉන්දීය කණ්ඩායම පහසුවෙන් ජයග‍්‍රහණය කරන බවය.


ශ‍්‍රී ලංකා වොලිබෝල් ඉතිහාසයේ කාන්තා කණ්ඩායමක් සහභාගි වූ ප‍්‍රථම විදේශ සංචාරය ලෙසද සඳහන් කළ හැකි මෙම සංචාරය සඳහා කණ්ඩායමට නන්දා ගණේගොඩ සහ විජිතා පෙරේරා (කොළොන්නාව සෙන්ට‍්‍රල්, යසවතී අලහකෝන් පසුව යසා රාමචන්ද්‍රන් (කොළඹ නගර සභාව, සොපයා ධර්මසේන (මිනුවන්ගොඩ මහා විද්‍යාලය, ඉන්ද්‍රාණි වෙත්තසිංහ සහ චන්ද්‍රා පෙරේරා (මහරගම විද්‍යාකර මහා විද්‍යාලය, චිත‍්‍රානි පෙරේරා (නුගේගොඩ අනුලා විද්‍යාලය, මාලනී පෙරේරා (පොතුපිටිය මහා විද්‍යාලය, ලතා ලියනගේ (ශ‍්‍රී ලංකා පොලිසිය, ඇලෝමා විජේසිංහ සහ ඉන්ද්‍රා ද සිල්වා (කෝට්ටේ ශාන්ත තෝමස් විද්‍යාලය යන ක‍්‍රීඩිකාවෝ ඇතුළත් වූහ. කණ්ඩායමේ නායකත්වය නන්දා ගණේගොඩ ඉසිලූ අතර උපනායිකාව ලෙස කටයුතු කළේ් ශ‍්‍රී ලංකා පොලිසියේ ලතා ලියනගේයි.


ඞී.සී. අලහේන්ද්‍ර මහතා පුහුණුකරු වශයෙන් කටයුතු කළ කන්ඩායම මාස 03කට අධික කාලයක් ක‍්‍රමානුකූලව පුහුණු කරන ලද බවත්, එම ජයග‍්‍රහණයේ පසුපස තිබූ ප‍්‍රධාන සාධකය වූයේ කණ්ඩායම් හැඟීමකින් යුතුව හා විනයගරුක කණ්ඩායමක් ලෙස මෙම ක‍්‍රීඩිකාවන් වෙත ලබාදුන් මනා පුහුණුව බවත් කණ්ඩායමේ විනිසුරු ලෙස මෙම තරගාවලියට සහභාගි වූ දැනට ජීවතුන් අතර සිටින ප‍්‍රවීණතම වොල්බෝල් පරිපාලකයා වන විල්සන් පරණගම මහතා සඳහන් කරයි.


මෙම තරගාවලියේ පළමුවන තරගය සමස්ත ඉන්දීය කණ්ඩායම සමඟ බටහිර බෙංගාල ක‍්‍රීඩාංගණයේදී පවත්වන ලද අතර මෙම තරගයේදී ශ‍්‍රී ලංකා කණ්ඩායම තරග වට 3:2ක් ලෙස විශිෂ්ට ජයග‍්‍රහණයක් ලබාගත් අතර ලකුණු තත්වය 15:13, 15:09, 09:15, 05:15, 15:11ක් විය. දෙවන තරගය ඩල්මියර් නගරයේදී පවත්වන ලද අතර ඉතා දීර්ඝ දුම්රිය ගමනකින් පසු හා අඩු විවේක තත්වයකින් පසු ශ‍්‍රී ලංකා කණ්ඩායම සහභාගිවූ මෙම තරගය තරග වට 3:0ක් ලෙස ඉන්දියානු කාන්තා වොලිබෝල් කණ්ඩායම ජයග‍්‍රහණය කරන ලදි. ලකුණු තත්වය 15:11, 15:02, 15:08 ලෙස විය. තුන්වන තරගය කල්කටා අම්රාහිදී පවත්වන ලද අතර, මෙම තරගයේදී ශ‍්‍රී ලංකා ක‍්‍රීඩිකාවන් විසින් තරග වට 3:0ක් ලෙස විශිෂ්ට ජයක් හිමි කරගන්නා ලදි. ලකුණු තත්වය 15:10, 15:07, 15:04ක් වේ. බිලහි නගරයේ පවත්වන ලද හතරවන තරගය ඉතා උණුසුම් වූ අතර, එය වට 3:2 ක් ලෙස ජයගැනීමට ශ‍්‍රී ලාංකික ක‍්‍රීඩිකාවෝ සමත් වූහ. ලකුණු තත්වය 12:15, 11:15, 15:11, 15:12, 15:09ක් වේ.තරගයේදී පළමු වට දෙකම පරාජය වී තුන්වන වටයේදී 06:02ක් ලෙස ඉදිරියෙන් සිටි ඉන්දීය කණ්ඩායම ලකුණු 15:11ක් ලෙස පරාජය කර ඉතිරි තරග වට දෙකම ජයග‍්‍රහණය කිරීමට ශ‍්‍රී ලංකා කණ්ඩායමට හැකි විය. මෙහිදී කණ්ඩායම් නායිකා නන්දා ගණේගොඩගේ පන්දු ප‍්‍රහාර ක‍්‍රීඩා විචාරකයන්ගේ පැසසුමට ලක්වී ඇත.


නවදිල්ලියේදි පවත්වන ලද පස්වන අවසන් මහා තරගය තියුණු සටනකින් පසු තරග වට 3:2ක් ලෙස ජය ගැනීමට ශ‍්‍රී ලංකා ක‍්‍රීඩිකාවෝ සමත්වූහ. සමස්ත ලකුණු තත්වය 08:15, 15:07, 06:15, 15:12, 16:14ක් වේ. මෙම තරගයේ අවසාන වටයේදී ඉන්දීය කණ්ඩායම ලකුණු 2ක් ඉදිරියෙන් සිටි අවස්ථාවේ, වෛද්‍ය උපදෙස් මත ක‍්‍රීඩා පිටියෙන් ඉවත්ව සිටි කණ්ඩායමේ දක්ෂතම ප‍්‍රහාරිකාව වූ ඉන්ද්‍රා සිල්වා වෛද්‍ය උපදෙස් නොතකමින් ක‍්‍රීඩා කර ශ‍්‍රී ලංකා කණ්ඩායම 16:14ක් ලෙස ජයග‍්‍රහණය කර කණ්ඩායම මෙහෙයවීම වර්තමාන ක‍්‍රීඩක/ක‍්‍රීඩිකාවන්ටද මහඟු ආදර්ශයක් වනු ඇත.


එදා මෙදා තුර ශ‍්‍රී ලාංකේය වොලිබෝල් ක්ෂේත‍්‍රයේ කාන්තා කණ්ඩායමක් ඉන්දියා කාන්තා කණ්ඩායමක් පරාජය කිරිමට හැකි වූයේ එකම එක අවස්ථාවක පමණි. ඒ 1992 කොළඹ දී පැවැති සාර්ක් තරගාවලියේ අවසන් මහා තරගයෙන් රේණුකා අබේගුණවර්ධන යාපා විසින් මෙහෙයවන ලද කණ්ඩායම ඉන්දියානු කාන්තා වොලිබෝල් කණ්ඩායම තරග වට 3:2 ක් වශයෙන් පරාජය කිරිමෙනි. වර්තමානයේ ශ‍්‍රී ලංකාවේ ජාතික කණ්ඩායම්වල ක‍්‍රීඩක ක‍්‍රීඩිකාවන්ට අවශ්‍ය සියලූ පහසුකම් බොහෝ දුරට සම්මේලන මඟින් සපයනු ලබයි. එහෙත් 1970 ඉන්දියාව පරාජය කළ ශ‍්‍රී ලංකා කාන්තා වොලිබෝල් කණ්ඩායම ඉන්දියාව බලා යාමට ගුවන් ගමන් ප‍්‍රවේශ පත‍්‍ර මිලදී ගැනීමට පවා අපහසු තත්වයක පසුවිය. ඔවුන් ඉන්දියාව බලා ගමන් කළේ කොළඹ සිට තලෙයිමන්නාරමට දුම්රියෙන් ගමන්කොට තලෙයිමන්නාරම සහ රාමේෂ්වරන් තුඩුව අතර පැවැති මගී නෞකා සේවය මඟින් ආදම්ගේ පාලම තරණය කර රාමේෂ්වරන් සිට දීර්ඝ පැය ගණනාවක් දුම්රිය ගමන්වල යෙදෙමින් පන්ජාබය, නාග්පූර්, දිල්ලිය වැනි නගර කරා ගමන් කරමිනි. ඒ එදාය එසේ දුෂ්කරතා මධ්‍යයේ ක‍්‍රියාකළ අපේ කෙල්ලෝ සමස්ත ඉන්දියාවම දණ ගස්වමින් මව්බිමට කීර්තිය ගෙන ආවෝය. එහෙත් වර්තමානයේ අපේ ක‍්‍රීඩිකාවන් එවැනි ජයග‍්‍රහණ ලබා නොගැනීමේ රහස කුමක්දැයි ක‍්‍රීඩා ළැඳි සැමට පැනයකි. x

x ප‍්‍රියන්ත ජයකොඩි