(දේශපේ‍්‍රමීන්ගේ අවධානය පිණිසයි*

ලංකා ඉතිහාසයේ නොයෙක් වර විදේශ ජාතිකයන් යටතට ලංකාව පත්ව ඇති බව අපි දනිමු. පුරාතන යුගයේ විටින් විට ඉන්දීය ආක‍්‍රමණිකයන් යටතේ ලංකාව පාලනය වී ඇත. නූතන යුගයේදී පෘතුගීසීන් යටතේ රටේ එක් කොටසක් වසර 155 ක් ද, ලන්දේසීන් යටතේ එම ප‍්‍රදේශය තවත් වසර 140 ක් ද, ඉංග‍්‍රීසීන් යටතේ මුළු රටම වසර 133 ක් ද පාලනය වී තිබේ. එහෙත් වසර 2500 කට අධික ලංකා ඉතිහාසය තුළ ඇමරිකානුවෙකු යටතේ කිසි විටෙක ලංකාව පාලනය වී නැත.

ලබන නොවැම්බර් 16 වැනි දා පැවැත්වෙන ජනාධිපතිවරණයෙන් ගෝඨාභය රාජපක්ෂ ජයග‍්‍රහණය කළහොත් ඒ ‘(අප*කීර්තියත්’ ලංකා ඉතිහාසයට එක් වනු ඇත.

මේ රටේ පසුගිය කාලයේ, විශේෂයෙන් තිස් අවුරුදු යුද්ධය සහ ඉන් අනතුරුව ගත වූ කාලය තුළ, සිංහල දේශපේ‍්‍රමය තරම් දෛනික භාවිතයේ යෙදුණු වෙනත් කිසි කාරණයක් දැක ගැනීමට නොවුණි. එය, රටේ සංස්කෘතිය ආක‍්‍රමණය කෙළේය. අපේ දේශපාලනය ආක‍්‍රමණය කෙළේය. අපේ ආගම ආක‍්‍රමණය කෙළේය.

රටේ ආර්ථික සහ දේශපාලනික විපර්යාසයන් තුළත් එකී දේශපේ‍්‍රමය මුල් තැනක් ගත් බව පෙනුණි. එහිදී, දේශපේ‍්‍රමයේ මාරක සතුරා වශයෙන් බොහෝ විට නාමකරණය වුණේ, ඇමරිකාවයි. ලංකාවේ සිදු වන ඕනෑම සංසිද්ධියක් සම්බන්ධයෙන් ගර්හාත්මක අරුතක් ජනනය කැරැුවීම සඳහා කවුරුත් සුපුරුදු පරිදි පාවිච්චියට ගත් ජනප‍්‍රිය සටන් පාඨයක් බවට ඇමරිකානු විරෝධය පත්විය.

අපේ සංවර්ධන අරමුණක් වෙනුවෙන් පසුගිය දා ඇමරිකාවෙන් ලැබීමට නියමිතව තිබූ ‘මිලේනියම් චැලෙන්ජ් කෝපරේෂන්’ හෙවත් එම්. සී. සී. වශයෙන් හැඳින්වෙන ඩොලර් මිලියන 487 ක් තරම් වූ විශාල ප‍්‍රදානයත් භාර ගැනීම වළක්වන ලද්දේ ඇමරිකාව පිළිබඳ පවතින යම් ජන්මාන්තර එදිරිවාදිකමක ප‍්‍රතිවිපාකයක් වශයෙනි.

එහෙව් රටේ, ජනාධිපතිවරණයට දැන් ඉදිරිපත්ව සිටින ගෝඨාභය රාජපක්ෂ තවමත් ඇමරිකානුවෙකු වීම බොහෝ දෙනාට, විශේෂයෙන් ඊනියා දේශපේ‍්‍රමයෙන් තොරව හුස්ම ගැනීමට පවා නොහැකි බවක් පෙන්නුම් කරන ජාතිවාදීන්ට ප‍්‍රශ්නයක් වී ඇති බවක් නොපෙනේ. එම්. සී. සී. ගිවිසුම හරහා ඇමරිකානු ආක‍්‍රමණයට ලක්වෙතැයි කීවේ ලංකාවේ එක් තීරුවක් පමණි. එහෙත් ගෝඨාභය රාජපක්ෂ නමැති ඇමරිකානුවා ලංකාවේ ජනාධිපති තනතුරට පත්වුවහොත් මුළු ලංකාවම ඇමරිකානුවෙකු යටතට පත්වන්නේය.

මීට කලකට ඉහතදී ගෝඨාභය රාජපක්ෂ සිය බිරිඳ සමග ඇමරිකාවේ වාසයට යාම සඳහා යුද්ධයෙන් ඉල්ලා අස්වීම මොවුන්ට ප‍්‍රශ්නයක් නොවේ. ගෝඨාභය රාජපක්ෂ එසේ ඇමරිකාවට ගොස් ලංකාවේ පුරවැසිභාවය අතහැර අවුරුදු 12 ක් තිස්සේ පූර්ණ ඇමරිකානුවෙකු වශයෙන් ජීවත් වීම මොවුන්ට ප‍්‍රශ්නයක් නොවේ. 2005 දී අයියා ලංකාවේ රජවීම නිසා පමණක්ම ලංකාවේ ද්විත්ව පුරවැසි භාවය ලබා ගැනීම මොවුන්ට ප‍්‍රශ්නයක් නොවේ. ද්විත්ව පුරවැසිභාවය යනු පළමු පුරවැසිභාවයක් ද ඇති බවයි. ද්විත්ව වන්නේ ලංකාවෙන් ලබාගන්නා පුරවැසිභාවයයි. ප‍්‍රධාන වන්නේ ඇමරිකානු පුරවැසිභාවයයි. එයද, මොවුන්ට ප‍්‍රශ්නයක් නොවේ. ඊළඟට, ඒ ඇමරිකානු පුරවැසි භාවය අතහැර මුළුමණින් ශ‍්‍රී ලාංකිකයෙකු වීමට ගෝඨාභය රාජපක්ෂ තීරණය කරන්නේ මේ වසරේදී ය. එනම්, අවුරුදු 26 ක් තිස්සේ (1993-2019* තමන්ගේ ඇමරිකානු භාවය අතහැරීමට මේ ගෝඨාභය රාජපක්ෂ තූළ කැමැත්තක් නොවීම මොවුන්ට ප‍්‍රශ්නයක් නොවේ. අවසානයේදී, පසුගිය අපේ‍්‍රල් මාසයේ ඒ ඇමරිකානු පුරවැසි භාවය අතහැරීමේ සිතැඟියාව අනුව ඔහු ලංකාවේ ඇමරිකානු තානාපති කාර්යාලයට ඉල්ලූම් පත් භාර දෙමින් මුල් පියවර ගන්නේ, ඊළඟ ජනාධිපතිවරණයට ඉදිරිපත්වීම සඳහා පමණක්ම වීම මොවුන්ට ප‍්‍රශ්නයක් නොවේ.

මේ දක්වා ඒ සම්බන්ධයෙන් ඔහු ඉදිරිපත් කොට ඇති ලියවිලිවල සත්‍යතාව ඔප්පු කොට පෙන්වීමට ඔහු අසමත්ව තිබේ. ඔහුගේ නීතිඥවරුන් විසින් ඇතැම් මාධ්‍ය සාකච්ඡුා තුළ පෙන්වන ලියවිලි ව්‍යාජ ඒවා බව ඕනෑම කෙනෙකුට පෙනෙන්ට තිබෙන දෙයකි. උදාහරණයක් වශයෙන්, එක් ඇමරිකානු ලියවිල්ලක දාතම යොදා ඇත්තේ ඇමරිකානු ක‍්‍රමයට නොව, ලංකාවේ ක‍්‍රමයට ය. තවත් ලියවිල්ලක් තුළ ‘අවලංගු කරන ලදි’ යන්න ඉංග‍්‍රීසියෙන් සඳහන් වන්නේ, ‘අවලංගු කරනවා’ යනුවෙනි. ඇමරිකානුවන්ටත් ඉංගී‍්‍රසි වරදින බවද එයින් කියැවෙන්නේ?

යම් හෙයකින් මේ ජනාධිපතිවරණයෙන් ඔහු ජයගත්තොත්, නොවැරදීම ඔහුගේ මේ පුරවැසිභාවය පිළිබඳ ප‍්‍රශ්නය ඡුන්ද පෙත්සමක් වශයෙන් ඉදිරියට එනු ඇත. මීට පෙර ගීතා කුමාරසිංහ සම්බන්ධයෙන් එවැනි ගැටලූවක් මතු වූ අවස්ථාවේ එය විසඳුණේ ඇගේ මන්ත‍්‍රී ධුරය අධිකරණය මගින් ඇයට අහිමි කිරීමෙනි. මන්ත‍්‍රීධුරයට තේරී පත්වන විට ස්විට්සර්ලන්තයේ හා ලංකාවේ යන දෙරටේම පුරවැසිභාවය දරමින් සිටීම ඇයට මන්ත‍්‍රීධුරය අහිමි වීමට හේතු විය.

මේ නිසා, මෙවර මෙරටේ ඡුන්දදායකයා ඉදිරියේ ඇත්තේ, ප‍්‍රජාතන්ත‍්‍රවාදියෙකු සහ ෆැසිස්ට්වාදියෙකු අතර තේරීමක් කිරීම පමණක් නොව, ඇමරිකානුවෙකු සහ ශ‍්‍රී ලාංකිකයෙකු අතරේද තේරීමක් කිරීම ද වන්නේය. සැබෑ දේශප්‍රේමීන් නම්, සැබවින්ම මේ අවස්ථාවේ කළ යුත්තේ, මෙකී ඇමරිකානු ආක‍්‍රමණය පරාජය කිරීමයි.