No menu items!
22.3 C
Sri Lanka
29 March,2024

ඇමති චන්ද්‍රසේනගෙන් වැලි, කළුගල්, බොරලු බලපත්‍ර දෙන්න බලපෑම්

Must read

වනජීවී සංරක්ෂණ දෙපාර්තමේන්තුවේ නිලධාරීන් පිරිසක් මේ වන විට ලැයිස්තු කිහිපයක් සකස් කර ඇත. ඡායාරූපවල ඇත්තේ එම ලැයිස්තුය. එම ලැයිස්තුවල ඇත්තේ 2020 පෙබරවාරි මාසය වන විට පරිසර ඇමති එස්.එම්. චන්ද්‍රසේන වැලි කැණීම, කළුගල් කැණීම හා බොරලු කැණීම සඳහා නිර්දේශ කරමින් බලපෑම් සිදුකළ පුද්ගලයන්ගේ නම් එකතුවකි. මේ වන විට නිර්දේශ කර ඇති බලපත්‍ර අයදුම් කරන පුද්ගලයන් සංඛ්‍යාව 658කි. ඒ අතර කළුගල් කැපීම සඳහා බලපත්‍ර 18ක් සඳහා නිර්දේශ කර ඇත. වැලි සඳහා බලපත්‍ර 457කට නම් නිර්දේශ කර ඇත. බොරලු කැපීම සඳහා නම් 183ක් නිර්දේශ කර ඇත. ඒ පරිසර ආරක්ෂණ බලපත්‍රයක් අවශ්‍ය නොවන නව ක්‍රමය යටතේය. මෙම සම්පූර්ණ ලැයිස්තුව අප සතුව ඇත.

කැණීම් සඳහා බලපත්‍ර නිකුත් කරන්නේ භූ විද්‍යා සමීක්ෂණ හා පතල් කාර්යාංශයය. ඒ සඳහා වනජීවී සංරක්ෂණ දෙපාර්තමේන්තුවේ අනුමැතියද අවශ්‍ය වේ.

ශ්‍රී ලංකාවේ වැලි, කළුගල් හා බොරලු කැපීම සඳහා බලපත්‍ර ලබාදීමේ ක්‍රියාවලිය විශාල දේශපාලන බලපෑමකට වූ එකක් බව ප්‍රසිද්ධ කාරණයකි. ඒ නිසා වත්මන් ඇමතිවරයා නම් නිර්දේශ කිරීම බොහෝ දෙනෙකුට පුදුමයක් නොවනු ඇත. ඒ ගැන සැකයක් ඇති කෙනෙකුට යාන් ඔය ව්‍යාපෘතියේ වැලි කැණීම් බලපත්‍ර ලබාදීම ගැන විගණකාධිපති දෙපාර්තමේන්තුවේ විශේෂ විගණන වාර්තාව කියවා බැලිය හැකිය. එහි ඇමුණුම්වල ඇත්තේ දේශපාලන නායකයන්ගේ බලපෑම් මත වැලි කැණීමේ බලපත්‍ර ලබාදී ඇති ආකාරයය. එම බලපත්‍රවල සීමාව ඉක්මවා වැලි කැණීම් සිදුකර ඇති ආකාරයය. පරිසරය රැකගැනීම පිළිබඳව නොයෙක් සුරංගනා කතා කියූ, හිටපු පරිසර අමාත්‍යවරයාද වූ මෛත්‍රිපාල සිරිසේන හිටපු ජනාධිපතිවරයාගේ සොහොයුරෙකු යාන් ඔයේ බලපත්‍ර ලබාගෙන තිබුණු ආකාරයත් එම වාර්තාවෙන් හෙළි විය.

එම ඉල්ලුම්පත් විවිධ ප්‍රදේශ වල කැණීම් සඳහා කළ ඉල්ලීම්ය. ඒ අතරින් බහුතරය පිරිසකගේ ලිපින ඇත්තේ එස්.එම්. චන්ද්‍රසේන ඇමතිවරයා පදිංචි ප්‍රදේශය වූ අනුරාධපුර දිස්ත්‍රික්කයෙන්ය. අයදුම් කර ඇති අය අතරින් වැඩි පිරිසක් ඒ ඒ ප්‍රදේශවල පදිංචිකරුවන් නොවීම විශේෂයෙන් නිරීක්ෂණය කළ යුතු තත්වයකි. උදාහරණයක් ලෙස මුලතිව් දිස්ත්‍රික්කයේ බොරලු කපන්නට 124 දෙනෙකුගේ නම් ලැයිස්තුවක් දී ඇතත්, එම ලැයිස්තුවේ මුලතිව් පදිංචිකරුවන් නැත.

අයදුම්පත්‍ර අතරින් 356ක් ත්‍රිකුණාමලය දිස්ත්‍රික්කයේ වැලි කැණීම් සඳහාය. වැඩිපුරම ඇත්තේ ත්‍රිකුණාමලය මුතූර් ප්‍රාදේශිය ලේකම් කොට්ඨාශයේ මහවැලි ගංමෝය, කන්තලේ සංකෙන් ලංකා වැලි තොටුපල, සාපිනගර් සහ රාල්කුලි ප්‍රදේශවල ගංමෝය කටවල් වලින් වැලි ලබා ගැනීමට ඉදිරිපත් කර ඇති ඉල්ලුම්පත්ය. 53ක් මඩකලපුව දිස්ත්‍රික්කයේ වැලි කැණීම් සඳහාය.

අමාත්‍ය එස්.එම්. චන්ද්‍රසේනගෙන් මේ පිළිබඳ විමසීම සඳහා දූරකථයෙන් කිහිප වතාවක් උත්සාහ කළද, එම උත්සාහය ව්‍යර්ථ විය. භූ විද්‍යා සමීක්ෂණ හා පතල් කාර්යාංශයේ ඉහළ නිලධාරිනියක තහවුරු කළේ තම ආයතනයට මේ වන විට ඇමතිවරයාගේ නම් ලැයිස්තුවක් ලැබී ඇති බවත්, සුදුසුකම් නොමැති පුද්ගලයන්ටද බලපත්‍ර ලබාදෙන බවට බලපෑම් එල්ලවෙන බවත්ය.

වනජීවී සංරක්ෂණ දෙපාර්තමේන්තුවේ ඉහළ නිලධාරියෙක්ද අනිද්දා සමඟ නිර්නාමිකව අදහස් ප්‍රකාශ කරමින් ඇමතිවරයා බලපත්‍ර සඳහා නම් ඉදිරිපත් කර ඇති බව තහවුරු කළේය. ඇමතිවරයාට එලෙස නම් ලැයිස්තු ලබාදීමට නීතිමය අයිතියක් නැති නමුත්, ඇමතිවරයා එසේ නම් යෝජනා කිරීම නීති විරෝධී දෙයක් නොවන බවද ඔහු කීය. එහෙත් පරිසර ආරක්ෂණ බලපත්‍රයක්ද නොමැතිව, ඇමතිවරයාගේ ලැයිස්තුවක් මත මෙම බලපත්‍ර ලබාදීම නිසා පරිසර හානියක් සිදුවීමේ අවදානමක් ඇති බව ඔහු කීය.

 

ලොකුම ප්‍රශ්නය බලපෑම්

භූවිද්‍යා සමීක්ෂණ හා පතල් කාර්යංශයේ සභාපති
අනුර වල්පොල

එස්.එම්. චන්ද්‍රසේන ඇමතිවරයාගෙන් වැලි, කළුගල් සහ බොරලු කැණිම් බලපත්‍ර සඳහා බලපෑම් ඉල්ලවෙනවා නේද?
අපි සාමාන්‍යයෙන් කාගෙවත් බලපෑම්වලට බලපත්‍ර නිකුත් කරන්නේ නැහැ. මට මේ වෙනකොට තියෙන ලොකුම ප්‍රශ්නය වෙලා තියෙන්නේ මේ බලපෑම්. මොකද මම ඒ වගේ ඉල්ලීම් වලට අවනත වෙන්නේ නැහැ කියලා ලොකු ප්‍රශ්න ඇවිත් තියෙනවා. ඕනෑම අයදුම්කරුවෙක් නිවැරදි සහ නීත්‍යනුකූල ලිපි ලේඛන අපිට ලබා දුන්නොත් අපි ඔවුන්ට බලපත්‍ර ලබා දෙනවා.

ඔබ එවැනි ඉල්ලීම් අනුව බලපත්‍ර නොදුන් නිසා ප්‍රශ්න ඇති වුණාද?
ඔව්, දේශපාලනඥයන් කියන විදියට අපි බලපත්‍ර දෙන්න ගියොත් ලොකු විනාශයක් වෙනවා. ඒක ඇමතිතුමා දන්නවා. ඒ නිසා ඔහුත් කෙළින්ම මගෙන් ඉල්ලීම් කරන්නේ නැහැ.

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි