අනුරංග ජයසිංහ

සරලවම කීවොත් ආසිරි වනිගරත්න ඉහළ මිලට මනිබඩු විකුණන්නෙකි. ඔහුගේ ව්‍යාපාරය සමාජය ඉදිරියේ විහිළුවක් බවට පත්වීමෙන් පසුව ඔහුට ලංකාවේ ජනප‍්‍රියම රූපවාහිනී නාලිකාවල තමාගේ ව්‍යාපාරය කිරීමට නොහැකි විය. දැන් ඔහු සියත රූපවාහිනියේ ෆෙංෂුයි වැඩසටහන් කරන්නේය.
ආසිිිරි කරන්නේ දේශීය ගණදෙවි සංකල්පය සමඟ බටහිර කතෝලික සංකල්ප හා ෆෙංෂුයි සංකල්ප එකට මුසු කොට කුමක් හෝ අලූ‍ත් අච්චාරුවක් සමාජගත කිරීමයි. ඒ හැම සංකල්පයටම අදාල පොත්පත්, උපකරණ කට්ටල ආදිය ඇත. හැම සංකල්පයක්ම ඉගෙනගන්නට ටිකට්පත් මිලට ගෙන සම්මන්ත‍්‍රණවලට ආ යුතුය. ඔහුගේ සම්මන්ත‍්‍රණවලට අමතරව පිටරටින් කිසිවෙකු හෝ ගෙන්වා සම්මන්ත‍්‍රණ පැවැත්වීම ආසිරි වනිගරත්නගේ ව්‍යාපාරයේ කොටසකි. ඒ එක් එක් සම්මන්ත‍්‍රණවලට එක් එක් වර්ගයේ විශ්වාසයන් ගැන කියාදෙන පුද්ගලයන් වරින් වර පැමිණ ඇත. විශ්ව ශක්තිය ගැන, දේව ආශීර්වාදය ගැන, ගණ දෙවියන් ගැන, භාවනාව ගැන එකිනෙකට පරස්පර දේශන එසේ පැමිණි අය පවත්වන්නේය.
අපි පසුගිය සති දෙකේ පමණක් ආසිරි වනිගරත්න ලංකාවට ගෙන්වූ එවැනි සම්මන්ත‍්‍රණ මාලාවක් ගැන අවධානය යොමු කළෙමු. ඔහු පසුගිය සති දෙකේදී ලංකාවට ගෙන්වුවේ ක‍්‍රිසී ඇස්ටල් නම් යුරෝපීය කාන්තාවකි. යුරෝපය ඉලක්ක කරගනිමින් ඉෂ්ට දේවතාවුන් ගැන දේශනා ඇය පවත්වන්නීය. ලංකාවේ පැවති ඇගේ සම්මන්ත‍්‍රණයක ටිකට්පතක් රුපියල් 980කි. මුලින්ම අපි සම්මන්ත‍්‍රණයට පැමිණි අය සහ එයින් ලැබුණු ආදායම ආසන්න වශයෙන් ගණනය කළෙමු.
නුවර තිබුණු සමුළුවට ආසන්න වශයෙන් 350ක පමණ පිරිසක් පැමිණ සිටි බව ගණනය කළෙමු. ඒ අනුව නුවර ටිකට්පත් අලෙවියෙන් පමණක් ලද ආදායම රුපියල් 343000 කි. ගාල්ලට 380ක් පමණ පැමිණියේය. ගාල්ලෙන් ආසන්න ටිකට්පත් ආදායම රුපියල් 372400කි. කුරුණෑගල, මහරගම, ගම්පහ, රත්නපුර ප‍්‍රදේශ හතරේ තවත් වැඩමුළු‍ හතරක් පවත්වනු ලැබීය. ඒ හැම වැඩමුළුවකටම 350කට ආසන්න පිරිසක් පැමිණ ඇත. එහෙත් අප එක් වැඩමුළුවකට සාධාරණ අඩුම සංඛ්‍යාවක් අනුමාන කරමින් 300 බැගින් පැමිණි ලෙස සලකා ගණනය කළෙමු. ඒ අනුව ආසන්න ආදායම 1176000 කි. ඔවුන් ලද සමස්ත ආදායම 1891400කි. ආසන්න රවුම් අගයට වැටයුවොත් ලක්ෂ දහනවයකි. මේ ආදායම සති දෙකකට පමණි. ක‍්‍රිසී ඇස්ටල් මේ සතියේ සිට යුරෝපයේ නැවත සංචාරයක් අරඹා ඇත. යුරෝපයේදී ඇගේ ටිකට්පතක මිල මීටත් වඩා වැඩිය. ආසිරි වනිගරත්නත් ජුනි 09 වැනිදා සිට තවත් සම්මන්ත‍්‍රණ මාලාවක් අරඹා ඇත්තේ පිටසක්වලින් පැමිණි මොකක්දෝ බලයක් ගැන කතාකරන්නටය.
ක‍්‍රිසී ඇස්ටල් ලංකාවට පැමිණ කළේ මොනවාද. ආසිරි වනිගරත්න විසින් දිවයිනේ ප‍්‍රධාන පුවත්පත් කිහිපයකම නැකැත් අතිරේකවල දැන්වීම් පළ කර තිබුණි. ඒ අනුව ලෝකයේ සිටින හැම පුද්ගලයාටම එක් ඉෂ්ට දෙවියා බැගින් ඇත. ඒ ඉෂ්ට දෙවියාව මිත‍්‍ර කරගැනීමෙන් අපට සාර්ථකත්වය ළඟා කරගත හැක. මේ සම්මන්ත‍්‍රණවලදී තමාගේ ඉෂ්ට දෙවියන් සමඟ කතාබහ කරන්නට අවස්ථාවක් ලබාදෙන බව කියා තිබුණි. එක්කෙනාට එක ඉෂ්ට දෙවියා බැගින් ඉන්නවා නම් ආසිරි වනිගරත්න ගණ දෙවියන් මිත‍්‍ර කරගන්නැයි අපට කියන්නේ කුමකටදැයි අප දන්නේ නැත. එහෙත් සම්මන්ත‍්‍රණයට පැමිණි කිසිවෙකුට ඉෂ්ඨ දෙවියෙකු කතාකර තිබුණේ නැත. ඒ වෙනුවට ක‍්‍රිසී ඇස්ටල් ඔවුන් වේදිකාවට ගෙන්වා මාලයක් හොලවන අන්දම කියා දී තිබුණි.
සම්මන්ත‍්‍රණවලට ගිය අයට පොරොන්දු වූ කිසිවක් නොලැබුණත් ක‍්‍රිසී ඇස්ටල්ගේ පෞද්ගලික ෆෙස්බුක් පිටුව වන ක‍්‍රිසී බෙනට් නම් ෆෙස්බුක් පිටුව බැලූ කල ඇය නම් ලංකාගමනයෙන් හොඳ විනෝදයක් ලබා ඇති බව පැහැදිලිය. ක‍්‍රිසී ඇස්ටල් නම් නිල ෆෙස්බුක් පිටුවෙහි ඇය පන්සල්, පල්ලි, කෝවිල්වලට සිටින ඡුායාරූප පළ කර ඇතත් පෞද්ගලික ෆෙස්බුක් පිටුවේ ඇත්තේ ඇය ලංකාවේ හොඳම හෝටල්වල, වන උද්‍යානවල විනෝද වූ ආකාරයයි. ලංකාවට පැමිණ දේශන කිහිපයකින් ලක්ෂ ගණනක් උපයාගෙන විනෝද සංචාරයක්ද නිම කොට සියරටට යෑමට ඇයට හැකිවිය. ඒ මොන විවේචන ආවත් ආසිරි වැනි ව්‍යාපාරිකයන්ට හසු වෙන පුද්ගලයන් ලංකාවේ සිටින නිසාය.x