යුද්ධ හමුදාවේ නිලධාරීන් ගම්පහ සහ දිවුලපිටිය ප්‍රදේශයේ පුද්ගලයන් නිරෝධායන මධ්‍යස්ථානවලට රැගෙන යද්දී මහජන සෞඛ්‍ය පරීක්ෂකවරුන්ට නොදන්වා රැගෙන ගොස් ඇති බවත් වෛරසය ආසාදිත පුද්ගලයන් සහ අනෙක් පුද්ගලයන් සමඟ එකම බස්රථයේ රැගෙන යන බවත් මහජන සෞඛ්‍ය පරීක්ෂකවරුන්ගේ සංගමයේ උප සභාපති එච්.ඒ. කුලතිලක අනිද්දාට පැවසීය.

කොවිඞ් 19 ආසාදනය වී ඇතැයි තහවුරු වූ රෝගීන් සොයා මහජන සෞඛ්‍ය පරීක්ෂකවරුන් ඔවුන්ගේ නිවෙස්වලට ගිය අවස්ථාවල ආසාදිත පුද්ගලයන් නිවෙස්වල නොමැති බවත්   දූරකථනයෙන් අමතා ඔවුන් සිටින්නේ කොහේ දැයි විමසන අවස්ථාවලදී යුද්ධ හමුදාව තමන් නිරෝධායන මධ්‍යස්ථානවලට ගෙන යන බවත් පවසන බව  ඒ මහතා පැවසීය.

මෙම ක්‍රියාවලිය නිසා ආසාදිතයන්ගේ ආශ්‍රිතයන් පිළිබඳව තොරතුරු ලබා ගැනීමේ අපහසුතාවක් පවතින බවත් ඔවුන්ගේ අසල්වැසියන්ගෙන් නිවසට ආ ගිය පුද්ගලයන් පිළිබඳව අසා දැනගන්නට සිදු වන බවත් ඒ මහතා පැවසීය.

තවද ඔහු පැවසුවේ මේ ආකාරයෙන් ආසාදිත පුද්ගලයන් සහ නිරෝගී පුද්ගලයන් එකම බස් රථයේ පැය ගණනක් රැගෙන යාම නිසා නිරෝගී පුද්ගලයන්ටද කොවිඞ් 19 වෛරසය ආසාදනය වීමේ ඉඩකඩක් ඇති බවය.■