තමා 2018 ඔක්තෝබර් මාසයෙන් පසු ආරක්ෂක කවුන්සිල රැුස්වීම්වලට කැඳවා නැති බව පාස්කු ඉරිදා ත‍්‍රස්ත ප‍්‍රහාරය පිළිබඳ පාර්ලිමේන්තු විශේෂ කාරක සභාව ඉදිරියේ ජුනි 06 වැනිදා සාක්ෂි දෙමින් අනිවාර්ය නිවාඩු ලබා සිටින පොලිස්පති පූජිත් ජයසුන්දර පවසා ඇත.

ඔක්තෝබර් 23 වැනිදා තමන්ට මතක ආකාරයට අවසන් වරට ආරක්ෂක කවුන්සිල රැුස්වීමකට සහභාගි වූ නමුත් ඉන්පසුව තමන්ට ආරක්ෂක කවුන්සිල රැුස්වීම්වලට පැමිණෙන ලෙස දැනුම් නොදුන් බව ඔහු කියා ඇත.

එහිදී සාක්ෂි දෙමින් පොලිස්පතිවරයා වැඩිදුරටත් මෙසේ කියා තිබේ. ‘ආරක්ෂක කවුන්සිලයට සහභාගි වෙන්න අවශ්‍ය නැහැ කියන උපදේශය එවකට හිටපු ආරක්ෂක අමාත්‍යාංශ ලේකම් කපිල වෛද්‍යරත්නගෙන් වාචිකව මට ලැබුණා. ආරක්ෂක කවුන්සිලයේ වැඩකටයුතු සාමාන්‍යයෙන් වාචිකව යන්නේ. දැනුම් දෙන්නේත් වාචිකව. සටහන් පිළියෙල කරන සම්ප‍්‍රදායක් නැහැ. මට දැනුම්දීපු දිනය මට මතක නැහැ. ඒත් රැුස්වීමට මට දැනුම් දුන්නේ නැහැ. මම කතාකරලා ඇහුවා සර් අද සිකියුරිටි කවුන්සිල් තියෙනවා නේද කියලා. එතකොට කිව්වා ඔව් කියලා. ඉන්පස්සේ මම ඇහුවා ඒත් මට තවමත් දැනුම්දුන්නේ නැහැ කියලා. ඉන්පස්සේ ඔහු මට කිව්වා සොරි පූජිත්, ඔයාව අපහසුතාවට පත් කරන්න මට  ඕනෑ නැහැ, ජනාධිපතිවරයා ඔයාට එන්න එපා කියලා දැනුම් දුන්නා කියලා. එතකොට මා වෙනුවට වෙනත් කෙනෙක්ව එවන්න අවශ්‍ය නැතිද කියලා මම ඇහුවා. කවුරුත් අවශ්‍ය නැහැ, අවශ්‍ය වුණොත් දැනුම් දෙන්නම් කියලා ආරක්ෂක අමාත්‍යාංශ ලේකම්වරයා කීවා.’

පූජිත් ජයසුන්දරගෙන් සාක්ෂි ලබාගැනීම පුවත්පත මුද්‍රණයට යනවිටත් අවසන් වී නොතිබුණු අතර හිටපු ආරක්ෂක අමාත්‍යාංශ ලේකම් හේමසිරි ප‍්‍රනාන්දුද සාක්ෂි ලබාදීම සඳහා පාර්ලිමේන්තුවට පැමිණ සිටියේය. x

අනුරංග ජයසිංහ